Read Northwest Gbaya EZEKIƐL 31 Bible Online

EZEKIƐL 31 - Northwest Gbaya bible

EZEKIƐL 31

¹Kuti wese tɛ taar fio-zɛ tɛ pɛ ɓu-zua-kpɔk ɗoŋ kaia bíí yaknɛ nɛ bara-biro, GASA WAN tɔ̧ɔ̧ ha̧‘m:

²«Mɛ́ bíí, mɛ̀ tɔ̧́ ha̧ wannu Egiptɛ in gba dukbíí kɔ̧-a̧‘e nde: Wi tɛ we mɛ nɛ oi gasamɔ kɔ-mɛ nɛ ge mɔ ge?

³Mɛ hɔɔ ŋmaa in gbatui[22] Libaŋ nɛ gbaa-er-a ɔ dee, nɛ wa̧a̧-a̧ kpee zu a̧, nɛ duk nɛ kusa-a nyɛmna, nɛ ndɔŋ nu zɔ̧ɔ̧-a̧a̧ kusa hɔ ti tu̧-zan mɛ.

⁴O yi dee ha̧ a̧ mɛ gasi, ɓɛɛ nɛ yì-mɛ-ɗɔɔ-nu a̧ dee ha̧ a̧ mɛ kusi mbɛt, ɓɛɛ de ha̧ yi'i mɛ fok a gun-aa, gba nɛnɛ fok dam gun o te kpɛɛfɔ lɛŋ.

⁵Mɛ nɛ mɔ‘i a̧ dee ha̧ te'i mɛ kusi gan o dɔka te lɛŋ sɛn kpɛɛfɔ‘i; o gbaa-er-a gbaa dɔk kpa nɛ̀ tɛ́ mɔ nɛnɛ.

⁶O nɔ̧́í̧ mɛ yiwese tɛɛ ɔ ɗɔɔ gbaa-er-a, ɓɛɛ o saɗi-zaŋbɛɛ tɛɛ ko kɔ‘i bem ti ɗɔɔ-aa, ɓɛɛ o gba gii dukbíí zaŋnu lɛŋ tɛ́ɛ̀ ya ti gi̧ɔ̧-a̧.

⁷Te'i gasa, ɓɛɛ duk yí-wí nɛ de-a nyɛmna, hɔ nɛnɛ tɛ gbaa-er-a mɛ mbɛt. Ku̧nin-a nɛ̀ɛ́ hegɔɔ a ɗɔɔ yi mɛ.

⁸O gbatui kpɛɛfɔ Edɛn de nyɛm ŋmaa in te'i na; o zawaya[23] nɛ oi da̧a̧ wa̧a̧-a̧, da̧ nyɛm ŋmaa in gbaa-er te'i na. O gasa te kɔ̧ zer nɛ‘i sa nin wa'e platan hɛɗi gee hɛɗa-a in te'i na. Ŋma te kpɛɛfɔ Edɛn nɛ baa yí-wi hee te'i ga, bo na mbɛt.

⁹Mi ɗafa so o gbaa-er te'i nɛ de-a, ɓɛɛ o te kpɛɛfɔ Edɛn ko Sɔ̧ a see mɔ in a̧.»

¹⁰«Mɛ nɛ hegɔ ɓɛɛ sa GASA WAN Sɔ̧ tɔ̧‘e, hee mɔ'ɔ n'aa duk ŋmaŋ nɛ tɛ zu kusa-a kɔ̧-a̧, wen nɛ̀ ndɔŋ nu zɔ̧ɔ̧-a̧a̧ kusa hɔ ti tu̧-zan mɛ ga,

¹¹mi ee a̧ er gasa wan ko o tugun bíí, wen ha̧ wa mɛ de bɔnɛ in a̧ nyɛm nɛ ɗoŋ ɗaŋ kɔ̧-a̧; mi ɗaŋa a̧ yinɛ.

¹²O gɔni-duk, o gba ŋga ɗaŋ wi-de-saka-yí mgbara o tugun bíí gɔma a̧ pi̧ nu, ɓɛɛ e a̧ duk; o gbaa-er-a gbin dam nɛ zu o kaya nɛnɛ hɔ kɔ̧ ɗɔŋgɔ mɛ. O gbaa-er-a gbina dam kɔ̧ gboŋgo zaŋnu'i, ɓɛɛ o bíí zaŋnu lɛŋ yu duka-a ɗɔɔ gi̧ɔ̧-a̧; wa pɛsa e a̧ duk.

¹³O nɔ̧́í̧ mɛ yiwese nɛ̀ɛ́ gu zu ŋginda-a, ɓɛɛ o saɗi-zaŋbɛɛ nɛ́ɛ̀ ɔ mgbara o gbina gbaa-er-a.

¹⁴Mɔ‘i dee hegɔ wen ká o gasa te nɛ‘i aa yi gun-aa nɛ dɔka-a, ɓɛɛ ká kusi ndɔŋ nú-zɔ̧ɔ̧-a̧a̧ ndɔ bu-zan tɛ́ɛ̀ ŋmaŋ tɛ zu kùsí kɔ‘i na, wen wa lɛŋ a̧a̧ kɔ̧ nu fio, wa lɛŋ tɛ fe mɛ nɛ si ɗɔɔ nu, si mgbara o bíí nɛ fea, mɛ ya in o wi nɔ‘i.»

¹⁵Ɓɛɛ nɛ mɔ'ɔ nɛ GASA WAN tɔ̧a̧‘e: «Wese n'aa zira nɛnɛ si ye ko o fio'i, mi dee ha̧ ɗuka fara mɛ zim fio; mi kpee zu a̧, ɓɛɛ mi de ha̧ o foka-yì mɛ gɔn, in ha̧ o nana-yì mɛ ɔ̧sa̧ ndaɗi ta̧i̧-ta̧i̧. Mi dee ha̧ Libaŋ mɛ zim fio wen zu a̧, in ha̧ o te kpɛɛfɔ mɛ kor lɛŋ ŋgokoko.

¹⁶Mi pi̧i̧ kíì tɛ o tugun bíí ŋgimbi nɛ wa zia nɛ giti tika-a kɔ̧-a̧, ɓɛɛ tɛ-wa nak nɛ kíì hɛrr, ŋgimbi n'am ira nɛ a̧ si ye ko o fio ɗɔɔ nu mɛ mgbara o bíí nɛ fea. Ɓɛɛ nɛ̀ mɔ‘i a̧ dea ha̧ see o te mɛ kpɛɛfɔ Edɛn, ká bá nɛ̀ o gba de te Libaŋ nɛ yi fok a gun-wa mɛ ga̧ ɗɔɔ nu mɛ;

¹⁷wen o wi nɔ‘i nɛ yaa so nɛ o be-er-wa, nɛ yaa so ɗɔɔ gi̧ɔ̧ tɛ-wa sɛn mgbara o tugun bíí, zira in wa si ɗɔɔ nu mɛ, ha̧ wa mɛ duk kpɔk in o wi nɛ fea so nu gba-paa.

¹⁸«Gasamɔ kɔ-mɛ hɔɔ ŋmaa in ge te ge mgbara o te mɛ kpɛɛfɔ Edɛn ge? Mi tɛ ir mɛ in o te mɛ kpɛɛfɔ Edɛn lɛŋ a nu si ɗɔɔ nu mɛ, ɓɛɛ mɛ tɛ duk kpɔk in o wi-mbii, ká bá nɛ̀ o wi nɛ fee so nu gba-paa. Mɔ nɛ tɛ kpa wannu Egiptɛ in o gba dukbíí kɔ‘i nɛ mɔ‘i. Nɛ GASA WAN Sɔ̧ a̧ tɔ̧a̧.»