Read Northwest Gbaya EZEKIƐL 32 Bible Online

EZEKIƐL 32 - Northwest Gbaya bible

EZEKIƐL 32

¹Tɛ kuti wese tɛ ɓu-zua-yiitoo fio-zɛ, tɛ ɓu-zua-yiitoo pɛ-wan ko wannu Jɔakim ɗoŋ kaia bíí nɛ bara-biro yaknɛ, GASA WAN tɔ̧ɔ̧ ha̧‘m'e:

²«Mɛ́ bíí, mɛ̀ bíí gima-fio’ɛ zu wannu Egiptɛ; mɛ̀ tɔ̧́ ha̧ a̧‘e nde: ‹A̧ duk mgbara o tugun bíí hee be dila ga. A̧ duk hee ndiɓa ɗɔɔ gba-tɔp ga, nɛ duk ɔm nɛnɛ nɛ kɔ̧ zɔ̧ɔ̧, ŋmai̧ nɛ̀ yì, ɓuti nɛ̀ yì nɛ̀ naŋ'ɛ ga.

³Mɛ nɛ wen hegɔ sa mi GASA WAN Sɔ̧ tɔ̧‘e nde, ŋgimbi nɛ o gii dukbíí be tɛ̀ɛ́ mɔi̧ nɛ dɔka-a, mi tɛ pi̧ yɔk kɔ‘m zu mɛ, ɓɛɛ wa tɛ dak mɛ pi̧ zan.

⁴Mi tɛ e mɛ ɓɔn mbɔɗɔnu, mi tɛ pi̧ mɛ taŋ zaŋbɛɛ, wen ha̧ o nɔ̧́í̧ mɛ gu zu mɛ, in ha̧ o saɗi-zaŋbɛɛ mɛ nyɔŋ mɛ zakati nɛ nu.

⁵Mi tɛ e wɔr-mɛ zu kaya, ɓɛɛ mi tɛ dun o gboŋgo nɛ mbɔra mɛ.

⁶Mi tɛ de ha̧ tɔk tɛ-mɛ mɛ fok nɛ zu o kaya nɛnɛ, ɓɛɛ o gboŋgo tɛ dun nɛ tɔk tɛ-mɛ‘i.

⁷Ŋgimbi nɛ mɛ be tɛ̀ɛ́ fe, mi tɛ kpe yí-zan, mi tɛ de ha̧ tum mɛ kpe yi o sɔra, mi tɛ kpe yi wese nɛ tu̧-zan, ɓɛɛ nyaŋa-zɛ beka tok ɓɔna.

⁸Mi tɛ ba sa̧a̧mɔ mɛ ŋgɔn yinɛ wen zu mɛ, ɓɛɛ tum tɛ kpe zu nu kɔ-mɛ. GASA WAN Sɔ̧ tɔ̧ɔ̧ hegɔ.

⁹« ‹Gba gii dukbíí tɛ kpa dita-see ŋgimbi nɛ nyɛrɛ mɔ nɛ tika zu mɛ be tɛ̀ɛ́ pɛsi dam mgbara o tugun bíí nɛ ya tɛ gɔni nu nɛ mɛ iŋ na.

¹⁰Mɔ n'am tɛ de in mɛɛ tɛ gɔn ɗɛɗɛ gba dɔka dukbíí; ŋgimbi n'am be tɛɛ dak gba-paa kɔ‘m mɛ nak ɗɔɔ yi o wannu kɔ-wa, bele tɛ zar wa a nu, ɓɛɛ wa tɛ ya nak nɛnɛ wese tika-a kɔ-mɛ‘i.

¹¹« ‹Wen mɔ nɛ GASA WAN Sɔ̧ tɔ̧a̧, a̧‘i: Gba-paa ko wannu Babilɔŋ tɛ nasi mɛ.

¹²Mi tɛ de ha̧ o wi-biro mɛ kum o gba dukbíí kɔ-mɛ nɛ gba-paa; o wi-biro nɔ‘i nɛ o gba ŋga ɗaŋ wi-de-saka-yí mgbara o tugun bíí. Nɛ wa'i a̧ tɛ de ha̧ gasa zu ko Egiptɛ mɛ hɔ nduti; wa tɛ kum o gba dukbíí nɔ‘i lɛŋ.

¹³Mi tɛ kum o mɔ-dai nu Egiptɛ ká̧ zaŋ nana-yì mɛ lɛŋ, ɓɛɛ naŋ bíí beka ɓuti yi kɔ-wa kà bó nɛ̀ naŋ saɗi ɓɔna mbɛt.

¹⁴Mi tɛ de ha̧ o yi Egiptɛ mɛ ɔ̧sa̧, ɓɛɛ nana-yì kɔ-wa tɛ fok hee nɔ̧́ ga; kin-yì beka bo na; GASA WAN Sɔ̧ tɔ̧ɔ̧ hegɔ.

¹⁵Ŋgimbi n'am be tɛ̀ɛ́ de ha̧ Egiptɛ mɛ kifi nɛ gee ŋga-gbárà kotoro, nɛ wa tɛ ɓar mɔ tɛ nu'i lɛŋ, kai yaknɛ, ŋgimbi n'am be tɛ̀ɛ́ kum o bíí nu'i gbuɗuk, ɓɛɛ wa tɛ iŋ‘e, mi nɛ GASA WAN.›

¹⁶«Nɛ́ gima-fio’ɛ a̧ o boko-bem ko o tugun bíí tɛ bìì; wa tɛ bìì gima-fio'i hi̧i̧ nɛ Egiptɛ in gba dukbíí kɔ‘i; mɛ nɛ GASA WAN Sɔ̧ a̧ tɔ̧ wen’ɛ.»

¹⁷Pɛ-wan ko wannu Jɔakim dee ɓu-zua-yiitoo, ɓɛɛ tɛ ɔɔ-zɛ ɓu-zua-mɔɔrɔ tɛ sɔŋkur fio-zɛ ɗoŋ kaia bíí yaknɛ nɛ bara-biro, GASA WAN tɔ̧ɔ̧ wen ha̧‘m'e:

¹⁸«Mɛ́ bíí, mɛ̀ hí̧í̧ gba duk gii bíí Egiptɛ; mɛ ir wa in o boko-bem ko o tugun bíí si kɔ̧ ɗuka fara mɛ. Wa a̧ ai nɛ oi déè kɔ-wa si ɗɔɔ nu mɛ ha̧ wa mɛ ya in o bíí fara'i.

¹⁹Mɛ tɔ̧ ha̧ wa'e: ‹Ɛ́nɛ́ ta k’ɛ́nɛ́‘e bíí tɛ de ŋma ko h’ɛ́nɛ́ nde? Ɛ́nɛ́ mbɛt, ɛ̀nɛ̀ zír si ɗɔɔ nu mgbara o wi-mbii mɛ.›

²⁰«O bíí Egiptɛ tɛ tik nɛ ɗaŋa yi biro; gba-paa bɛŋa kaɗi! A̧ a̧ ndur Egiptɛ nɛ oi gba dukbíí kɔ‘i si kɔ̧ fio mɛ.

²¹O gbin-biro in o ŋgaŋa-wi tɛ tɔ̧ wen ha̧ wa nɛ fara ko o fio mɛ tɛnɛ‘e: ‹O wi-mbii nɛ fee so nu gba-paa a̧a̧ mgbara yɛ fara ko o fio’ɛ mbɛt.›

²²«Wannu Asirii in o wi-biro kɔ‘i ya fara'i, ɓɛɛ pɛsi-fio kɔ-wa kɛr wa e see-a. Wa kuma so lɛŋ nu gba-paa.

²³Wa ee pɛ̀sì ko wannu Asirii sɛn mgbák ndaa fara ko o fio mɛ, ɓɛɛ wa nɛk o wi-biro kɔ̧-a̧ lɛŋ ɗoŋ ŋmaa nɛ yuwar-a zik pɛ̀sì kɔ̧-a̧ kpa nu ŋmaa; o wi nɔ‘i yaa so nɛ o bíí nɛ duka so mɛ pi̧ kíì tɛ o bíí, ɓɛɛ nɛ mɔ'ɔ nɛ wa kuma lɛŋ nu gba-paa.

²⁴«Pɛ̀sí-fio ko wannu Elam duka so fara'i mbɛt, ɓɛɛ pɛsi-fio ko gba duk wi-biro kɔ̧-a̧ zik pɛ̀sì kɔ̧-a̧ e see-a; o wi nɔ‘i nɛ o wi nɛ fee so nu gba-paa, wa nɛ o wi-mbii nɛ zira si ɗɔɔ nu mɛ. O wi nɔ‘i yaa so nɛ o bíí nɛ duka so mɛ pi̧ kíì tɛ o bíí, ɓɛɛ wa lɛŋ fee nɛ fio-foe hee o ŋma bíí nɛ zira si ɗɔɔ nu mɛ ga.

²⁵Wa ɗafa so fara ha̧ wannu Elam in o gba gii wi-biro kɔ‘i mgbara o bíí nɛ fee so nu gba-paa. O pɛ̀sì ko o wi-biro kɔ̧-a̧ zika pɛ̀sì kɔ̧-a̧ kpa nu ŋmaa. O wi-mbii nɔ‘i lɛŋ kuma nu gba-paa. Nɛti wa yaa so nɛ o bíí nɛ duka so mɛ pi̧ kíì tɛ o bíí, ɓɛɛ nɛ mɔ'ɔ nɛ wa fee nɛ fio-foe hee o ŋma bíí nɛ zira si ɗɔɔ nu mgbara o fio mɛ ga.

²⁶«Pɛ̀sì ko Mɛsɛk in Tubal a̧a̧ so hi̧i̧ mbɛt in o gba gii wi-biro kɔ-wa. O pɛ̀sì ko o wi-biro nɔ‘i zika pɛ̀sì ko o wannu kɔ-wa kpa nu ŋmaa. Wa lɛŋ nɛ o wi-mbii nɛ kuma nu gba-paa wen wa duka so mɛ pi̧ kíì tɛ o bíí.

²⁷Wa gun o wi nɔ‘i nɛ tu̧u̧-tɛ-mɔ hee o kuti o yaa-ŋgo-biro mɛ ti ga na. Wa nɛ o wi-mbii nɛ zira si kɔ̧ fio nɛ oi o mɔɔ-biro kɔ-wa. Wa kaia o gba-paa kɔ-wa a ɗɔɔ zu-wa, ɓɛɛ wa kai o ŋgee kɔ-wa gu zu gba̧a̧-wa, wen wa yaa so nɛ o bíí nɛ duka so mɛ pi̧ kíì tɛ o bíí, hee mɔ'ɔ nɛ o yaa-ŋgo-biro de so ga.

²⁸«Ɓɛɛ mɛ mbɛt, mɛ tɛ fe in o wi-mbii kpɔk, ɓɛɛ wa tɛ gun mɛ mgbara o bíí nɛ kuma nu gba-paa.

²⁹«O be Edɔm in o wannu ká bá nɛ̀ o be-wan kɔ‘i a̧a̧ mgbara o bíí nɛ kuma nu gba-paa mbɛt; kóó nɛ oi o ŋgaŋamɔ nɛ wa dee so, wa ɔ kpɔk fara in o wi-mbii ká bá nɛ̀ o bíí nɛ zira si ɗɔɔ nu fara ko o fio mɛ.

³⁰«O be-wan mɛ ká̧-zan-mɛ́-ŋgɔn in o be Sidɔŋ lɛŋ nɛ zira si ɗɔɔ nu in o bíí nɛ fea so a̧a̧ hi̧i̧ mbɛt. Wa nɛ o wi-mbii, ɓɛɛ kóó nɛ oi kíì nɛ wa duka so mɛ pi̧ tɛ o bíí‘i, ziimɔ baa wa zu o ŋgaŋamɔ nɛ wa dee so, ɓɛɛ wa ɔ nu mgbara o bíí nɛ kuma nu gba-paa. Wa fee nɛ fio-foe hee o ŋma bíí nɛ zira si ɗɔɔ nu mɛ ga.

³¹«Wannu Egiptɛ be tɛ̀ɛ́ zɔk mɔ‘i, ɓɛɛ see-aa tɛ ga̧ zu gba duk gii wi-biro kɔ̧-a̧, wen a̧ nɛ tɛ-a gu nɛ o wi-biro kɔ̧-a̧ lɛŋ tɛ fe nɛ fio gba-paa mbɛt. GASA WAN Sɔ̧ tɔ̧ɔ̧ hegɔ.

³²«Mi ee so ha̧ wannu Egiptɛ mɛ pi̧ bele tɛ o bíí, ɓɛɛ kinii a̧ in gba o gii wi-mbii kɔ̧-a̧ tɛ ɔ nu mgbara o wi-biro in o wi nɛ kuma nu gba-paa. GASA WAN Sɔ̧ tɔ̧ɔ̧ hegɔ.»