Read Northwest Gbaya EZEKIƐL 36 Bible Online

EZEKIƐL 36 - Northwest Gbaya bible

EZEKIƐL 36

¹«Mɛ́ bíí, mɛ̀ tɔ̧́ wen ha̧ o kaya Israɛl; mɛ̀ tɔ̧́ ha̧ wa'e nde, wa a̧ yeŋ zer tɛ wen n'am tɛ tɔ̧ ha̧ wa'i. Mɛ̀ tɔ̧́ ha̧ wa'e: O kaya nu Israɛl, ɛ̀nɛ̀ zíí wen nɛ GASA WAN tɔ̧'ɛ;

²GASA WAN Sɔ̧‘e nde, o wisɛn mama ɛnɛ tɔ̧ nɛnɛ‘e: ‹O gba̧‘a̧ kaya nɔ'ɔ kifa nɛ k’ɛɛ.›

³«Mɛ̀ tɔ̧́ ha̧ wa'e, wen nɛ GASA WAN Sɔ̧ tɔ̧ nɛ mɔ'ɔ: O tugun bíí nɛ ya zik'nɛ́ nukura'nɛ́, ɗaŋ‘nɛ́, ba'nɛ́ nɛ kɔ‘i, ɓɛɛ wa fɛŋ‘nɛ́ ɗaŋ nɛ nin'nɛ́ ti o tugun bíí.

⁴Hegɔ o kaya Israɛl, ɛ̀nɛ̀ zíí wen nɛ GASA WAN Sɔ̧ tɔ̧ ha̧ o kaya, o zu-tɔ̧́, o gboŋgo, o ɗɔŋgɔ ká bá nɛ̀ o bɛɛ-oi, in o gasa ye nɛ ɗaŋa so kifi nɛ gee bubu nɛ duk nɛ mɔɔ-zɛkɛɗi in fara-ɓar-mɔ ko o tugun bíí yaknɛ.

⁵«Nɛ mɔ'ɔ nɛ GASA WAN Sɔ̧ tɔ̧a̧: Mi kana mɔ, mi tɔ̧ɔ̧ wen’ɛ tɛ nyima see in ŋga nyimsea zu o tugun bíí, ɓɛɛ gan, nɛ zu Edɔm nɛ oi gun, yaa-saka-yí‘i nɛ duk nɛ desee wen nɛ‘i baa nu kɔ‘m e nɛ mɔɔ-oi kɔ‘i wo'i.

⁶«Mi tɔ̧ wen’ɛ ha̧ nu Israɛl. Mɛ tɔ̧ ha̧ o kaya, o zu-tɔ̧́, o gboŋgo in o ɗɔŋgɔ‘e nde, mi tɔ̧ wen nɛ ɗaŋsee in ŋga nyimsea zu o tugun bíí wen dara nɛ wa da̧a̧ nɛ ɛnɛ.

⁷Ɓɛɛ GASA WAN tɔ̧: Mi baa er-am nɛ ŋgɔn kan nɛ mɔ ti'nɛ́‘e, dara ko o tugun bíí nɔ'ɔ nɛ ya zik'nɛ́'ɛ tɛ si ɗoŋ zu wa.

⁸Ɓɛɛ k’ɛ́nɛ́, o kaya Israɛl, o te k’ɛ́nɛ́ tɛ ɓɔ woyo mɛ gasi kusi nɛ de-a, ɓɛɛ wa tɛ wai, h’ɛ́nɛ́ dukbíí kɔ‘m Israɛl mɛ kpa nyɔŋmɔ. Ɛnɛ hɛɗa sii ɗoŋ oi fara-duk k’ɛ́nɛ́ kaɗi.

⁹Mi si ɗoŋ tɛ‘nɛ́ mɛ ye ɗoŋ‘nɛ́, mi tɛ de ha̧ nu k’ɛ́nɛ́ mɛ mɔk woyo wen h’ɛ́nɛ́ mɛ gun nyɔnɔ sɛnɛ.

¹⁰Mi tɛ de ha̧ o bíí nutua ko Israɛl mɛ dɔk dam fara lɛŋ; ɛ́nɛ́ tɛ mbo o bɛɛ-oi ye k’ɛ́nɛ́ nɛ gbina so nɛ mbe-a, ɓɛɛ ɛ́nɛ́ tɛ duk tɛ o gasa ye k’ɛ́nɛ́ woyo.

¹¹Mi tɛ de ha̧ o bíí in o mɔ-dai k’ɛ́nɛ́ mɛ dɔk siti, ɓɛɛ wa tɛ dɛm gan kuti-a. Mi tɛ de h’ɛ́nɛ́ mɛ ya nɛ de-a gan kuti-a, ɓɛɛ ɛ́nɛ́ tɛ iŋ‘e, mi nɛ GASA WAN.

¹²Mi tɛ kai dukbíí kɔ‘m Israɛl pii ɗoŋ mɛ i̧si̧ zu'nɛ́ yar nɛnɛ. Mɛ tɛ duk nɛ mɔɔ-oi kɔ-wa, mɛ beka ba o bem kɔ-wa yinɛ er-wa ɓɔna.

¹³«GASA WAN Sɔ̧ tɔ̧a̧: O ŋma bíí tɔ̧‘e, nu’ɛ nɛ nu-nyɔŋ o bíí, nɛ nyɔŋ nɛ o bem kɔ‘i.

¹⁴Ɓɛɛ ku̧u̧naŋ-a kinii hegɔɔ yak nɛnɛ siti, nu’ɛ beka nyɔŋ bíí sɛka bó nɛ̀ kuma o bem ɓɔna. GASA WAN Sɔ̧ tɔ̧ɔ̧ hegɔ.

¹⁵Nu’ɛ beka zii dara ko o tugun bíí ɓɔna, ziimɔ beka ba nu’ɛ ti o dukbíí ɓɔna, in nu’ɛ beka kum o bem kɔ‘i ɓɔna mbɛt. GASA WAN Sɔ̧ tɔ̧ɔ̧ hegɔ.»

¹⁶Nɛ mɔ'ɔ nɛ GASA WAN tɔ̧ɔ̧ ha̧‘m:

¹⁷«Mɛ́ bíí, mɛ̀ zíí, o be Israɛl duka so ɔ nu kɔ-wa, ɓɛɛ wa ɗaŋ nu'i tɛ yuwar duka-a in deemɔ kɔ-wa, ɓɛɛ deemɔ kɔ-wa duk yí‘m hee ŋma okoo-zɔk-zɛ ga.

¹⁸Mi pi̧i̧ ŋga nyimsea kɔ‘m zu wa tɛ gbɛɛ o bíí nɛ wa gbɛɛ tɛ nu'i, in wen ɗafa o géé-sɔ̧ nɛ ɗaŋa nu kɔ-wa.

¹⁹Ɓɛɛ mi de bɔnɛ in wa nyɛm nɛ ɗoŋ deemɔ kɔ-wa. Tɛ mɔ‘i, mi pɛsa wa dam mgbara o tugun bíí hɔ nɛnɛ gɔni nu mɛ mbɛt.

²⁰Dukbíí fɛŋa nin-am mgbara o tugun bíí nɛ wa ya mgbara wa, ɓɛɛ mɔ‘i de ha̧ dukbíí nu'i mɛ tɔ̧‘e: ‹O wi nɔ'ɔ nɛ dukbíí ko GASA WAN nɛ gboo e nù kɔ-wa duk yɛ́ɛ́ ɓɛɛ gɔ!›

²¹Ɓɛɛ nɛ mɔ'ɔ n'am yora ɗoŋ nin-am nɛ o be nutua ko Israɛl fɛŋa mgbara o tugun bíí nɛ wa pɛsa so si sɛnɛ‘i.

²²«Wen hegɔ, mɛ̀ tɔ̧́ wen n'am tɛ tɔ̧ ha̧ mɛ'ɛ ha̧ o be nutua ko Israɛl, mɛ̀ tɔ̧́ ha̧ wa'e nde, nɛ́ mi GASA WAN Sɔ̧ a̧ tɔ̧ wen’ɛ: Bo nɛ wen zu'nɛ́ o be Israɛl, a̧‘m de nɛ mɔ n'am tɛ de'i na, ɓɛɛ mɛ nɛ wen sa̧a̧ nin-am n’ɛnɛ fɛŋa so mgbara o tugun bíí mɛ‘i’ɛ.

²³Mi tɛ de ha̧ nin-am n’ɛnɛ fɛŋa so mgbara wa'i mɛ hu̧r. Mi tɛ de mɔ‘i mgbara'nɛ́ ha̧ wa mɛ zɔk'e mi ɔ sa̧a̧, ɓɛɛ wa tɛ iŋ‘e, mi nɛ GASA WAN. Nɛ mi GASA WAN Sɔ̧ a̧ tɔ̧ wen’ɛ.

²⁴«Mi tɛ mɔi̧‘nɛ́ nɛ̀ mgbara o tugun bíí nɛ gɔni nu mɛ pii ɗoŋ nu k’ɛ́nɛ́.

²⁵Mi tɛ misi̧ de sa̧a̧ yi a tɛ‘nɛ́, ɓɛɛ war-tɛ‘nɛ́ tɛ sa̧ zu ɗafa o géé-sɔ̧ in o mɔ lɛŋ n’ɛnɛ dee so.

²⁶Mi tɛ ha̧ mbe see h’ɛ́nɛ́, ɓɛɛ mi tɛ e mbe taamɔ tɛ‘nɛ́. Mi tɛ ba ŋga-see tɛ‘nɛ́ yinɛ, ɓɛɛ mi tɛ ha̧ mbe mɔka-see h’ɛ́nɛ́.

²⁷Mi tɛ e taamɔ kɔ‘m tɛ‘nɛ́ h’ɛ́nɛ́ mɛ nɛ nɔ nyɛm nɛ ɗoŋ heembea kɔ‘m in h’ɛ́nɛ́ mɛ kasi yuwar deemɔ kɔ‘m mbɛt,

²⁸ɓɛɛ ɛnɛ tɛ duk ɓɔn zaŋnu n'am ha̧a̧ so ha̧ o zɔmdáa k’ɛ́nɛ́‘i. Ɛnɛ tɛ duk nɛ dukbíí kɔ‘m, ɓɛɛ mi tɛ duk nɛ Sɔ̧ k’ɛ́nɛ́.

²⁹Mi tɛ gbo'nɛ́ tɛ o ndiŋmɔ yinɛ lɛŋ. Mi tɛ de ha̧ alkamaari mɛ dɛm h’ɛ́nɛ́ nɛ dɔka-a; hegɔ kaɓa beka ba'nɛ́ ɓɔna.

³⁰Mi tɛ de ha̧ o te k’ɛ́nɛ́ mɛ wai nɛ dɔka-a gu nɛ o mɔ mɛ kpɛɛfɔ lɛŋ, ɓɛɛ kaɓa beka ba'nɛ́ ha̧ ziimɔ mɛ ba'nɛ́ mgbara o tugun bíí ɓɔna.

³¹Tɛ‘nɛ́ be tɛ̀ɛ́ mbaŋ ɗoŋ ɗaŋ duka-a in deemɔ k’ɛ́nɛ́ nɛ de na, ɓɛɛ gɛ̧ɛ̧mɔ tɛ ba'nɛ́ zu o ɗaŋmɔ in ndiŋmɔ n’ɛnɛ duka so de'i.

³²GASA WAN Sɔ̧ tɔ̧a̧, ɛnɛ o be nutua ko Israɛl, mi kɔ̧ɔ̧ ɛ̀nɛ̀ íŋ nɛ de-a'e, o mɔɔ nɔ'ɔ n'am tɛ de’ɛ bo nɛ wen zu'nɛ́ na. Kà bó nɛ́ kɔ‘m, ɓɛɛ foe a̧ ba'nɛ́ in gɛ̧ɛ̧mɔ a̧ de'nɛ́ zu ɗaŋ deemɔ k’ɛ́nɛ́‘i ɛ̧.

³³«Ɓɛɛ GASA WAN Sɔ̧ tɔ̧ woyo'e: Wese n'am be tɛ̀ɛ́ zui'nɛ́ ha̧ war-tɛ‘nɛ́ mɛ sa̧ tɛ o yɔɔ-kaya k’ɛ́nɛ́ lɛŋ, mi tɛ de h’ɛ́nɛ́ mɛ duk tɛ o gasa ye k’ɛ́nɛ́, ɓɛɛ ɛ́nɛ́ tɛ kai o gbina-ŋgeŋ-tua bɛɛ-oi a ŋgɔn woyo.

³⁴Ɓɛɛ kóó o nde nɛ be tɛ̀ɛ́ ɓir nɛ ká̧ fara k’ɛ́nɛ́ yak tɛ zɔk'e ɛnɛ dee nyɔnɔ tɛ ŋga-gbárà nɛ duka so nɛ gee kpɛ̧ɛ̧-nu kotoro.

³⁵Ɓɛɛ wa tɛ tɔ̧ nyɛrɛ-a yaknɛ‘e, fara’ɛ nɛ ɗaŋa so kifi nɛ gee ŋga-gbárà kotoro, nɛ mɔ'ɔ n’ɛnɛ ɗafa kifi duk nɛ gba de fɔ Edɛn, in o gasa ye nɛ ɗaŋa so gbin a nu lɔkɔti-lɔkɔti’ɛ, nɛ mɔ'ɔ n’ɛnɛ ɗafa kifi nɛ o mbe ye-ŋgárá nɛ o bíí ya sɛnɛ mbɛt’ɛ.

³⁶Ɓɛɛ o tugun bíí nɛ biti yáà nɛ yi zik'nɛ́ tɛ iŋ‘e, nɛ mi GASA WAN a̧ baa o gasa ye nɛ ɗaŋa so lɔkɔti-lɔkɔti'i e ŋgɔn, gun nɛ o mɔ nɛ ɗaŋa so woyo mbɛt. Wen mɔ n'am tɔ̧ɔ̧ so'i nɛ mɔ‘i a̧‘m dea'i.

³⁷«Nɛ mɔ'ɔ nɛ GASA WAN Sɔ̧ tɔ̧ɔ̧ woyo'e, mi tɛ de mbe mɔ gan ɛ̧ɛ̧ hɛ̧ɛ̧; mi tɛ e ha̧ nutua ko Israɛl mɛ sa mɔ pii tɛ‘m. Kà wa nɛ kɔfa'm, ɓɛɛ mi tɛ de ha̧ duk-wa mɛ dɔk hee duk-sami ga.

³⁸Ɓɛɛ o zɔm ye nɔ'ɔ nɛ ya nɛ bɛɛ-oi kinii’ɛ tɛ dun nɛ o bíí hee mɔ'ɔ nɛ Jerusalɛm duka so mɛ dun nɛ gba duk-sami nɛ o bíí kai so tɛnɛ wen ɗafa sɔ̧ tɛ ŋgimbi gbaŋa’ɛ ga. Nɛ tɛ mɔ‘i a̧ o bíí lɛŋ tɛ iŋ‘e, mi nɛ GASA WAN.»