Read Northwest Gbaya EZEKIƐL 38 Bible Online

EZEKIƐL 38 - Northwest Gbaya bible

EZEKIƐL 38

¹GASA WAN tɔ̧ɔ̧ ha̧‘m:

²«Mɛ̀ bíí, mɛ̀ zík tɛ-mɛ sitɛ Gɔg, gasa wannu ko o be Mɛsɛk in Tubal nu Magɔg. Mɛ̀ tɔ̧́ ŋga wen zu a̧.

³Mɛ̀ tɔ̧́ ha̧ a̧‘e, GASA WAN Sɔ̧ tɔ̧ɔ̧ hee nde, mi GASA WAN, mi tɛ ba zu'm duk nɛ mɛ Gɔg gasa wannu wan ko Mɛsɛk in Tubal.

⁴Mi tɛ kɔti mɛ yinɛ sɛn fara kɔ-mɛ, mi tɛ pi̧ káná nu mɛ ba yaŋgo-mɛ ŋgai keŋ, ɓɛɛ mi gbura mɛ yaknɛ nɛ oi gba mɔɔ-biro kɔ-mɛ, gu nɛ o nyaŋa nɛ oi o wi-daŋ-aa nɛ laa-biro tɛ-wa, ká bá nɛ̀ o wi-biro kɔ-mɛ nɛ oi o ŋgee in o gba-paa mbɛt.

⁵O wi-biro Pɛrsɛ, Etiopii ká bá nɛ̀ o bíí nu Libii tɛ mɔi̧ a zu'nɛ́, nɛ oi o ŋgee in o laasɔ̧i̧ kpáná-boi.

⁶Gɔmɛr in gba gii wi-biro kɔ‘i, Bɛt-Togarma nɛ war ká̧-zan-mɛ́-ŋgɔn mɛ nɛ oi o wi-biro kɔ‘i ká bá nɛ̀ o bíí ko o ŋma dukbíí nɛ ya zik'nɛ́ mbɛt tɛ to a zu'nɛ́.

⁷Mɛ̀ ɗáfí mɔ, mɛ in gba giiwi nɛ̀ mɛ́ mɔi̧a zik mɛ́ nɛ̀ duk ɗɔɔ ŋgai kɔ-mɛ‘i.

⁸Ɗoŋ zɛ gee nde, mɛ tɛ zii heembea kɔ‘m, wen o ŋma bíí a̧a̧ sɛnɛ nɛ kpasa so nu gba-paa. Wa mɔi̧a ŋmaa nɛ mgbara o dukbíí mɛ́ pii ɗoŋ tɛ́ɛ̀ de ye tɛ gee bɛɛ-oi, mgbara o kaya Israɛl, ɓɛɛ wa ya mɔ kɔ-wa hi̧i̧ nɛ fee-see. Nɛ́ fara'i a̧ mɛ tɛ kur mɛ nɛ si sɛnɛ tɛ sɔŋkur ŋgimbi.

⁹Mɛ in o wi-biro kɔ-mɛ, ká bá nɛ̀ gba zɔm dukbíí nɛ mɔi̧a a zu'nɛ́ tɛ daŋ tɛnɛ mɛ nɛ̀ɛ́ bi wa hee ŋga búk kórò ga, ɓɛɛ ɛ́nɛ́ tɛ kpe zu nu kɔ-wa hee gba kutu ga.

¹⁰«Mɔ nɛ GASA WAN Sɔ̧ tɔ̧ɔ̧ ha̧‘m mɛ tɔ̧ ha̧ Gɔg nɛ mɔ'ɔ: Wese'i be tɛ̀ɛ́ hɔ, ɓɛɛ o taamɔ tɛ hɔ tɛ-mɛ nɛtɛ nɛtɛ nɛ tɛ de ha̧ mɛ mɛ ba ɗaŋ keta.

¹¹Mɛ tɛ kur mɛ nɛ̀ɛ́ bi ŋma nu nɛ o bíí ya sɛnɛ nɛ fee-see, o wi nɛ kɔ̧ kɔ‘i biro na, nɛ mbo garo zik nɛ ye kɔ-wa na, in nɛ bó nɛ̀ mɔɔ-man-nu tua na mbɛt.

¹²Mɛ tɛ nɛ̀ɛ́ ɓar o mɔɔ-nù kɔ-wa lɛŋ kai yaknɛ pii tɛ kɔ-mɛ. Mɛ tɛ ɗaŋ ye kɔ-wa nɛ wa ɗafa kifi mbe-a'i, wen wa mɔi̧a ŋmaa pii ɗoŋ nɛ mgbara o tugun bíí nɛ wa pɛsa so si sɛnɛ; nɛ mɔ'ɔ nɛ wa dɛm nɛ o mɔ-dai in o nyɔnɔ nɛ tɛ mɔ nɛnɛ, ɓɛɛ fara-duk kɔ-wa nɛ mgbák bin-see-nù.[27]

¹³O bíí Seba, Dedaŋ in o wi-ɗɔr-mɔ nu Tarsis ká bá nɛ̀ o be ye mɛ katɛ wa tɛ ak mɛ‘e nde: ‹Gba o wi-biro nɔ'ɔ nɛ mɛ mɔi̧a’ɛ, mɛ̀ nɛ́ wen tika o wi nɔ'ɔ mɛ ɓar mɔ kɔ-wa kai yaknɛ nde? Mɛ̀ nɛ́ wen kaia o lɔr, bu-mbɔi in o mɔ-dai ká bá nɛ̀ o mbɔi kɔ-wa wen ha̧ o mɔɔ nɔ‘i mɛ duk nɛ mɔɔ-oi kɔ-mɛ nde?›

¹⁴«Hegɔ mɛ́ bíí, mɛ̀ tɔ̧́ ha̧ Gɔg'e, nɛ mi GASA WAN Sɔ̧ a̧ tɔ̧ wen’ɛ: Ŋgimbi nɛ dukbíí kɔ‘m Israɛl be tɛ̀ɛ́ duk zaŋnu kɔ‘i nɛ fee-see, a̧ mɛ tɛ kur nɛnɛ mɛ bi wa.

¹⁵Mɛ tɛ kur nɛ ká̧-zan-mɛ́-ŋgɔn mɛ tɛnɛ, mɛ in o gba wi-biro ko o dukbíí, nɛ oi o nyaŋa in o wi-daŋa-a mbɛt.

¹⁶Mɛ tɛ bi dukbíí kɔ‘m, Israɛl, ɓɛɛ mɛ tɛ kpe zu nu kɔ̧-a̧ hee gba kutu ga. Mɔ‘i tɛ de tɛ sɔŋkur ŋgimbi. Mi tɛ tom mɛ, mɛ nɛ̀ɛ́ bi nu kɔ‘m, ɓɛɛ mɔ n'am tɛ de in mɛɛ Gɔg'i tɛ de ha̧ o tugun bíí mɛ iŋ‘e mi ɔ sa̧a̧; ɓɛɛ nɛ́ tɛ mɔ‘i a̧ wa tɛ iŋ nɛ‘m.

¹⁷«Mɛ nɛ wen zu mɛ Gɔg a̧‘m tɔ̧ɔ̧ nɛti ɓeemɛ‘i nɛ nú o wi-de-tom kɔ‘m, o wi-tɔ̧-wen oi nú‘m mɛ nu Israɛl. Mi tɔ̧ɔ̧ so'e, ŋma ŋgimbi tɛ hɔ, ɓɛɛ mi tɛ tom ŋma bíí mɛ nɛ̀ɛ́ bi Israɛl. Mɔ n'am tɔ̧ɔ̧ so a̧‘i.

¹⁸«Wese nɛ mɛ Gɔg be tɛ̀ɛ́ bi Israɛl, GASA WAN Sɔ̧ tɔ̧a̧, mɛ tɛ aŋ ŋga nyimsea kɔ‘m a ŋgɔn.

¹⁹Mi kana mɔ tɛ ŋga nyimsea kɔ‘m, wese'i, nù tɛ nak nɛ ŋgaya-a sɛn Israɛl ɗaŋ de na,

²⁰ɓɛɛ o zoro in o nɔ̧́í̧, o saɗi, in o saɗi-gbur-zaŋ nɛ nu, ká bá nɛ̀ o bíí lɛŋ tɛ nak nɛ kíì, ɓɛɛ o kaya tɛ mbaŋ gbin a nu gu nɛ o kam-ta in o garo mbɛt.

²¹Mi tɛ pi̧ ŋga mɔɔ-kíì zu mɛ Gɔg, GASA WAN Sɔ̧ tɔ̧ɔ̧ hegɔ. O bíí kɔ-mɛ tɛ a gba-paa zu ŋmaa in o ŋmaa kum nɛ ŋmaa a nu.

²²Mi tɛ pi̧ gba-paa in zɛɛ-geŋa zu mɛ Gɔg in o bíí kɔ-mɛ mɛ kum'nɛ́. Mi tɛ dak zɔm gba ndiɓa kórò in ɓɔrɔ, ká bá nɛ̀ wee in baraadu pi̧ zu o wi-biro in o gba dukbíí nɛ mgbɔ mɛ nɛ nɛnɛ‘i.

²³Mi tɛ de mɔ‘i wen usa-a ha̧ o tugun bíí lɛŋ‘e nde, mi ɔ gasa in mi ɔ sa̧a̧. Nɛ́ tɛ mɔ‘i a̧ wa tɛ iŋ nɛnɛ‘e, mi nɛ GASA WAN.»