Read Northwest Gbaya EZEKIƐL 39 Bible Online

EZEKIƐL 39 - Northwest Gbaya bible

EZEKIƐL 39

¹Nɛ mɔ'ɔ nɛ GASA WAN tɔ̧ɔ̧ ha̧‘m: «Ɓɛɛ kɔ-mɛ, mɛ́ bíí, mɛ̀ tɔ̧́ wen a zu Gɔg. Mɛ̀ tɔ̧́‘e nde, mi tɛ ba zu'm duk nɛ mɛ Gɔg wan ko o be Mɛsɛk in Tubal.

²Mi tɛ kɔti mɛ yinɛ sɛn fara kɔ-mɛ, ɓɛɛ mi tɛ mgbɔ mɛ nɛ ká̧-zan-mɛ́-ŋgɔn mɛ tɛnɛ, wen ha̧ mɛ mɛ bi o kaya Israɛl.

³Mi tɛ gusi kusaa-góò kɔ̧ er-mɛ mɛ gale pi̧ nu, ɓɛɛ o góò mɛ er-mɛ mɛ wiiko tɛ pɛsi a nu pamyala.

⁴Mɛ in o wi-biro kɔ-mɛ lɛŋ tɛ kum zu kaya Israɛl, ká bá nɛ̀ o gba dɔka bíí nɛ gbina ye ɗoŋ mɛ‘i. Mi tɛ de ha̧ o tama in o saɗi-zaŋbɛɛ mɛ nyɔŋ wɔr'nɛ́ zakati nɛ nu.

⁵Mɛ tɛ fe zaŋbɛɛ nyɛm nɛ ɗoŋ wen kɔ‘m. Mi GASA WAN Sɔ̧ tɔ̧ɔ̧ hegɔ.

⁶Mi tɛ pi̧ wee zu ye ko Magɔg in o wi nɛ ɔ ye see-kisi nɛ fee-see mɛ‘i, ɓɛɛ wa tɛ iŋ‘e nde, mi nɛ GASA WAN.

⁷Mi tɛ de ha̧ nin-am mɛ hu̧r mgbara dukbíí kɔ‘m Israɛl; mi beka e ha̧ o bíí mɛ fɛŋ sa̧a̧ nin-am ɓɔna, ɓɛɛ o tugun bíí tɛ iŋ‘e, mi nɛ GASA WAN, sa̧a̧-wi sɛn Israɛl.

⁸«Zɔk, wese n'am tɔ̧ɔ̧ nɛnɛ‘i a̧ tɛ‘i; mɔ tɛ de kana nyɛm oi nú‘m. Nɛ mi GASA WAN Sɔ̧ a̧ tɔ̧a̧.

⁹Ɓɛɛ o wi nɛ ɔ tɛ o gasa ye Israɛl tɛ nɛ̀ɛ́ kai o mɔɔ-biro kɔ-mɛ dɔ gbuɗuk a nu; o ŋgee, o kusa-a in o gba̧a̧-góò, o ɓira-te in o sɛɛ, wa tɛ ye wee nɛ o mɔɔ nɔ‘i tɛ pɛ mɔɔrɔ-ɗoŋ-yiitoo.

¹⁰Wi beka nɛ́ɛ̀ kii gua zaŋbɛɛ ɓɔna, wi beka nɛ́ɛ̀ gɔm gua kɔ̧ kombo mɛ ɓɔna mbɛt, wen wi tɛ ye wee nɛ o boi-biro. Wa tɛ nɛ̀ɛ́ ɓar mɔ ko o wi nɛ ɓara so o mɔ kɔ-wa yaknɛ; wa tɛ kai o mɔ ko o wi nɛ kaia so o mɔ kɔ-wa nɛ mɔɔ-oi-biro. GASA WAN Sɔ̧ tɔ̧ɔ̧ hegɔ.»

¹¹«Ŋgimbi nɛ o mɔɔ nɔ'ɔ be tɛ̀ɛ́ de, mi tɛ ha̧ fara-gun Gɔg sɛn tɛ gba de kɔ̧ ɗɔŋgɔ ko o wi-ɓir-war nu Israɛl, nɛ duk ká̧ gba-tɔp nɛ war daŋa-wese, nɛ ɓira zu war ko o wi-ɓir-war. Mɛ nɛ fara'i a̧ wa tɛ gun Gɔg in o gba gii wi-biro kɔ‘i sɛnɛ, ɓɛɛ wa tɛ sa nin fara'i nɛ kɔ̧ ɗɔŋgɔ gun gba giiwi ko Gɔg.

¹²O bíí Israɛl tɛ gun o wɔr bíí tɛ fio-zɛ mɔɔrɔ-ɗoŋ-yiitoo, sɛka war nu kɔ-wa sa̧a̧.

¹³O bíí tɛ nu'i lɛŋ tɛ ye tɛ guna o wɔr bíí, ɓɛɛ wi nɔ‘i tɛ ya nɛ tortɛ wese n'am be tɛ̀ɛ́ usi gasamɔ kɔ‘m nyɛm nɛ ɗoŋ mɔ n'am tɔ̧a̧. Nɛ mi GASA WAN Sɔ̧ a̧ tɔ̧a̧.

¹⁴Wa tɛ hok o ŋma bíí nɛ tɛ duk yar nɛnɛ tɛ nu'i, wen guna o wɔr bíí nɛ ɓɔna zan. Nɛ́ ɗoŋ fio-zɛ mɔɔrɔ-ɗoŋ-yiitoo a̧ o wi nɔ‘i tɛ ku̧ nɛ naŋ tom kɔ‘i.

¹⁵Tɛ yara-a ko o wi nɔ‘i, nɛ̀ wa á̧ kpaa ŋma gba̧a̧ bíí sɛn ŋma fara, ɓɛɛ wa dee be duk-ta e katɛ gba̧a̧ wi’ɛi, kà o wi-gun-fio a̧ hɔɔ fara'i, ɓɛɛ wa baa a̧ nɛ́ɛ̀ gun kɔ̧ ɗɔŋgɔ gun gba gii wi-biro ko Gɔg.

¹⁶Ɓɛɛ wi tɛ sa nin ŋma ye nɛ Hamɔna, mɛ nɛ wen nɛ tɔ̧‘e ‹Giiwi›, ɓɛɛ war nu'i tɛ sa̧ woyo.»

¹⁷Nɛ mɔ'ɔ nɛ GASA WAN tɔ̧a̧: «Mɛ́ bíí, mɛ̀ sá o nɔ̧́í̧ in o saɗi-zaŋbɛɛ tɛnɛ mɛ nyɔŋ gba kpoo-sɔ̧ n'am ɗafa e ha̧ wa’ɛ. Mɛ̀ tɔ̧́ ha̧ wa'e: mɛ nɛ zɔm gbaŋa a'i tɛ de zu kaya ko Israɛl; fara'i ɛ̀nɛ̀ tɛ nyɔŋ nɛ kpoo in nɔɔ tɔk.

¹⁸Ɛnɛ tɛ nyɔŋ mur-tɛ o wi-de-ŋgaŋamɔ, ɛnɛ tɛ nɔ tɔk-tɛ o be-wan zu nu’ɛ mbɛt. Wa duk hee o vala sami, o be-sami, o vala gbadua in o gba de ŋmaŋa ndai mɛ Basaŋ mɛ ga.

¹⁹Ɛnɛ tɛ nyɔŋ kpoo-sɔ̧ zaŋ‘nɛ́ sur, ɓɛɛ ɛnɛ tɛ nɔ tɔk-aa gan ŋgai k’ɛ́nɛ́ tɛ zɔm gbaŋa n'am dee h’ɛ́nɛ́‘i.

²⁰Ɛnɛ tɛ nyɔŋ mɔ zu fara-nyɔŋ-mɔ kɔ‘m zaŋ‘nɛ́ sur. Ɛnɛ tɛ nyɔŋ o nyaŋa gu nɛ o wi-daŋa-a, o ŋga-wi in o wi-de-ŋgaŋamɔ. Nɛ mi GASA WAN Sɔ̧ a̧ tɔ̧.

²¹«O tugun bíí tɛ zɔk gasamɔ kɔ‘m, ŋgimbi n'am be tɛ̀ɛ́ de ŋmaa in wa, tɛ gɔna-kita kɔ‘m zu wa.

²²Ɓɛɛ o be nutua ko Israɛl tɛ iŋ‘e, mi nɛ GASA WAN Sɔ̧ kɔ-wa, ku̧u̧naŋ-a wese'i hegɔɔ kpoo nɛ kpoo.»

²³«O tugun bíí tɛ iŋ‘e, mɛ nɛ wen zu ɗaŋmɔ in ŋgazu ko o be nutua ko Israɛl a̧ dee ha̧ wa mɛ yambali kifi bara-biro dam tɛ mɔ lɛŋ. Mi zika ɗoŋ-am ha̧ wa, ɓɛɛ mi e ha̧ o wisɛn kɔ-wa mɛ tɛ̀ɛ́ kai wa yaknɛ, kum nɛ wa a nu nɛ gba-paa.

²⁴Mi dee mɔ in wa nyɛm nɛ ɗoŋ dee ndiŋmɔ in ŋgazu kɔ-wa nɛ wa dea, ɓɛɛ mi zik ɗoŋ-am e ha̧ wa.»

²⁵Nɛ mɔ'ɔ nɛ GASA WAN Sɔ̧ tɔ̧a̧‘e: «Kinii, mi tɛ de ko ha̧ o bezaŋ Jakob, mi tɛ de ha̧ yuwar mɔ ko o bíí nutua ko Israɛl mɛ kpai; mi tɛ de da̧ zu sa̧a̧ nin-am ká tɛɛ fɛŋ.

²⁶Tɛ-wa tɛ bi ɗoŋ mɔɔ-foe in ŋgazu nɛ wa duka so de in am, ŋgimbi nɛ wa yaa so nɛnɛ nu kɔ-wa tɛ ga̧a̧mɔ, ŋma wi-nukuri-wa bo na'i.

²⁷Ŋgimbi n'am be tɛ̀ɛ́ mɔi̧ wa pii ɗoŋ nɛ tɛ nu nɛ o wisɛn kɔ-wa kaia so wa pɛsi si sɛnɛ‘i, mi tɛ de mɔ mgbara wa mɛ usi ha̧ o tugun bíí‘e, mi ɔ sa̧a̧.

²⁸Ŋgimbi n'am be tɛ̀ɛ́ kai wa nɛ oi gun nɛ fara bara, nu ko o tugun bíí wen ha̧ wa mɛ si ɗoŋ nu kɔ-wa, wa tɛ iŋ‘e, mi nɛ GASA WAN Sɔ̧ kɔ-wa.

²⁹Mi tɛ ha̧ ŋgai kɔ‘m ha̧ o bíí nutua ko Israɛl, mi beka zik ɗoŋ-am e ha̧ wa ɓɔna. Nɛ mi GASA WAN Sɔ̧ a̧ tɔ̧ wen’ɛ.»