Read Northwest Gbaya EZEKIƐL 40 Bible Online

EZEKIƐL 40 - Northwest Gbaya bible

EZEKIƐL 40

¹Pɛ yaka ɓu-yiitoo-zua-mɔɔrɔ, ɓɛɛ k’ɛɛ a̧a̧ tɛ bara. Ɔɔ-zɛ ɓu tɛ kuti mbe zɛ‘i, ɓɛɛ ká pɛ ɗaŋa-a ko Jerusalɛm dee ɓu-zua-naar kaɗi. Nɛ kale wese'i a̧ ŋgai ko GASA WAN yee nɛnɛ tɛ‘m.

²Nɛ mɔ'ɔ n'aa hɔɔ zu ha̧‘m, fara n'aa ba'm nɛnɛ si nu Israɛl mɛ, ɓɛɛ e'm zu gba kusa kaya. Kà‘m tɛ zɔk mɔ wó, ɓɛɛ ŋma mɔ nɛ hɔɔ ŋmaa in zɔm ye nɛ mɔ'ɔ nɛ duk nɛ war ká̧-zan-mɛ́-ɗɔɔ'ɛ.

³A̧ mgbɔa'm nɛnɛ siti, kà‘m tɛ zɔk mɔ, ɓɛɛ ŋma bíí nɛ sɔnti-a tok hee ndɛrɛ ga nɛ mɔ'ɔ nɛ duk’ɛ; a̧ kasi nɛ nyak-we-mɔ in be te er-a, ɓɛɛ a̧ yor nu tua.

⁴Nɛ mɔ'ɔ nɛ wi’ɛi tɔ̧ɔ̧ ha̧‘m: «Mɛ́ bíí, mɛ̀ yéŋ zer-mɛ nɛ de-a tɛ mɔ n'am tɛ tɔ̧ ha̧ mɛ'ɛ in mɛ̀ zɔ́k o mɔɔ nɔ'ɔ nɛ mɛ tɛ zɔk’ɛ lɛŋ nɛ de-a in nɛ sa̧a̧-a̧; nɛ mɔ‘i a'i baa mɛ tɛnɛ hɛ̧ɛ̧ wen-aa. Mɛ̀ wé ɗoŋ mɔ nɛ mɛ zɔka’ɛ lɛŋ ha̧ o be nutua ko Israɛl.»

⁵Mi zɔka Tua ko Sɔ̧ nɛ wa mboo garo zik. Wi’ɛi duka nɛ̀ kan-we-mɔ er, zi̧a̧-a̧ duka nɛ mɛtrɛ taar. A̧ wee ndota garo, ɓɛɛ a̧ kpa mɛtrɛ taar, in kusa-a dee nɛ mɛtrɛ taar mbɛt.

⁶A̧ tɛɛ pii nu garo nɛ zɔk mɔ si war daŋa-wese, ɓɛɛ a̧ daŋ si ŋgɔn nɛ gɔna-keɗe-mɔɔ-daŋ-mɔ si kɔ̧ tua, ɓɛɛ a̧ we yuwar-yea-a, zi̧a̧-a̧ nɛ mɛtrɛ taar.

⁷Zu-a'i, o be gɔna bɛr-tua-pɛm-mɔ a̧a̧ so sɛnɛ taar nɛ war mgbɔɔr in taar nɛ war mgbɔɔr mbɛt; zi̧a̧-a̧ duka nɛ mɛtrɛ taar in pɛsa-a mɛtrɛ taar mbɛt. Ɓɛɛ ndota ŋgeŋ nɛ gɔna mgbara wa duka nɛ mɛtrɛ yiitoo nɛ reeta.

⁸Yuwar yea-a si kɔ̧ bɛr-tua nɛ nú-a zɔka ŋmaa in Tua ko Sɔ̧ nɛ mɛtrɛ taar.

⁹Wi’ɛi wee nu zala ye si dadaa-nu tua mɛtrɛ naar, ndota ŋgeŋ mɛ zan nɛ mɛtrɛ kpɔk. Gɔna bɛr-tua'i nɛ war kɔ̧ a̧ nyɛi̧ nɛ Tua ko Sɔ̧ na.

¹⁰O gɔna bɛr-tua-pɛm-mɔ mɛ war daŋa-wese duka nɛ taar nɛ war mgbɔɔr in taar nɛ war mgbɔɔr mbɛt; wa lɛŋ duka hee ŋmaa ga. Ndota o ŋgeŋ nɛ gɔna mgbara wa duka nɛ kale kpɔk mɔ mbɛt lɛŋ.

¹¹A̧ wee pɛsa dadaa-nu tua ye si kɔ̧ tua, mɛtrɛ mɔɔrɔ, ɓɛɛ pɛsa-a nɛ oi-aa lɛŋ nɛ mɛtrɛ mɔɔrɔ-ɗoŋ-kpɔk nɛ reeta.

¹²Nɛ ti ha̧ o gɔna bɛr-tua-pɛm-mɔ, be ŋgeŋ a̧a̧ sɛnɛ, kusa-a duka nɛ reeta mɛtrɛ in ndota-a duka nɛ reeta mɛtrɛ mbɛt. O gɔna bɛr-tua-pɛm-mɔ nɔ‘i duka nɛ mɛtrɛ taar taar.

¹³A̧ wee nu tua yea-a hɔ ndaa ɓii gɔna bɛr-tua-pɛm-mɔ, pɛsa-a duka nɛ mɛtrɛ ɓu-zua-yiitoo nɛ reeta mgbara o ŋgeŋ nɛ zɔk ŋmaa.

¹⁴A̧ wee nú-zala nɛ gbo si bee-gara mɛ kɔ̧ a̧, mɛtrɛ ɓu; bee-gara mɛ kɔ̧ a̧‘i zika zala'i e see-a.

¹⁵A̧ wee zi̧a̧ mgbara nú-zala mɛ zan in nú-zala mɛ kɔ̧ a̧, mɛtrɛ ɓu-yiitoo-zua-mɔɔrɔ.

¹⁶O woi-tua nɛ wa aa o fana-boi sɛnɛ duka zaŋ ŋgeŋ mɛ zan hɔ nɛnɛ tɛ o ŋgeŋ mɛ kɔ̧ a̧. Pɛsa o woi-tua nɔ‘i duka pii kɔ̧ a̧, ɓɛɛ wa zik nu tua kpa ŋmaa. Wa gɔna so dap wa̧a̧ ndɛŋgɛ zaŋ ŋgeŋ mɛ kɔ̧ a̧.

¹⁷Wi’ɛi mgbɔa'm si bee-gara mɛ zan nɛ wa yɔka nɛ ta nɛ de-a. O be gɔna-bɛr-tua a̧a̧ hi̧i̧ ɓu-taar nɛ wa dea zaŋ ŋgeŋ.

¹⁸Wa yɔka so bee-gara'i nɛ ta nɛ ká̧ o nu tua lɛŋ hɔ nduti-a mɛ; bee-gara mɛ zan'i hira benaŋ si ɗɔɔ e wan mɛ kɔ̧ a̧ nɛ be kusa-a tikiɗi.

¹⁹Wi’ɛi wee mgbara nu garo mɛ zan in wan mɛ ye si kɔ̧ bee-gara mɛ kɔ̧ a̧, ɓɛɛ a̧ kpa nɛ́ mɛtrɛ ɓu-mɔɔrɔ. A̧ wee pɛsa wan mɛ si daŋa-wese in wan mɛ ká̧-zan-mɛ́-ŋgɔn mbɛt.

²⁰Nɛ mɔ'ɔ n'aa wee pɛsa nu garo bee-gara mɛ zan, in zi̧a̧-a̧ nɛ war ká̧-zan-mɛ́-ŋgɔn.

²¹O be gɔna bɛr-tua-pɛm-mɔ a̧a̧ so zaŋ ŋgeŋ, taar nɛ war mgbɔɔr, in taar nɛ war mgbɔɔr mbɛt. Ndota o mbiŋ in gasa o tua-pɛm-mɔ nyɛma ŋmaa in o wan mɛ kuti nu garo. Zi̧a̧-a̧ nɛ mɛtrɛ ɓu-yiitoo-zua-mɔɔrɔ, in pɛsa-a nɛ mɛtrɛ ɓu-zua-yiitoo nɛ reeta.

²²Pɛsa bɛr-tua, o woi-tua in gɔna dap wa̧a̧ ndɛŋgɛ nyɛma ŋmaa in wan mɛ nu garo mɛ si daŋa-wese. Wi daŋ si nu garo'i nɛ gɔna-keɗe-mɔɔ-daŋ-mɔ mɔɔrɔ-ɗoŋ-yiitoo.

²³Ŋma nu garo a̧a̧ sɛnɛ nɛ ye si kɔ̧ bee-gara mɛ kɔ̧ a̧ nɛ duk tan nɛ nu garo mɛ zan nɛ war ká̧-zan-mɛ́-ŋgɔn, ɓɛɛ nɛ duk nɛ kale kpɔk mɔ in wan mɛ daŋa-wese. Wi’ɛi wee mgbara o nu garo nɔ‘i, ɓɛɛ a̧ kpa nɛ́ mɛtrɛ ɓu-mɔɔrɔ.

²⁴Wi’ɛi mgbɔa'm nɛnɛ nɛ́ɛ̀ e nu garo mɛ wan mɛ ká̧-zan-mɛ́-ɗɔɔ. A̧ wee o be gɔna-bɛr-tua-pɛm-mɔ, o ŋgeŋ, in bɛr-tua; wa lɛŋ nyɛma ŋmaa in o wan mɛ kuti nu garo mɛ ti.

²⁵O woi-ŋgeŋ duka so zaŋ ŋgeŋ bɛr-tua'i in fara-yea-a zik kpa nu ŋmaa, hee o wan mɛ kuti nu garo ga. Zi̧a̧ fara'i nɛ́ mɛtrɛ ɓu-yiitoo-zua-mɔɔrɔ, ɓɛɛ pɛsa-a nɛ ɓu-zua-yiitoo nɛ reeta.

²⁶Gɔna kiɗi-mɔɔ-daŋ-mɔ si fara'i duka nɛ mɔɔrɔ-ɗoŋ-yiitoo, nu zala duka nɛ war bee-gara si war kɔ̧ a̧, ɓɛɛ wa gɔna dap wa̧a̧ ndɛŋgɛ tɛ o ŋgeŋ nɛ kɔ̧ a̧ nɛ war mgbɔɔr in nɛ war mgbɔɔr mbɛt.

²⁷Nu garo ye si kɔ̧ bee-gara mɛ kɔ̧ a̧ duka nɛ war hi̧i̧ mbɛt; ɓɛɛ nɛ mɔ'ɔ n'aa wee pɛsa mgbara nu garo mɛ kɔ̧ a̧‘i in wan mɛ zan nɛ́ mɛtrɛ ɓu-mɔɔrɔ.

²⁸Wi’ɛi mgbɔa'm ye nɛ nu garo mɛ ká̧-zan-mɛ́-ɗɔɔ si kɔ̧ bee-gara mɛ kɔ̧ a̧; a̧ wee pɛsa nu garo'i, ɓɛɛ pɛsa-a duka nɛ kalemɔ in o wan mɛ zan.

²⁹O be gɔna bɛr-tua-pɛm-mɔ, o ŋgeŋ nɛ gɔna mgbara wa, in bɛr-tua'i lɛŋ nyɛma ŋmaa in o wan mɛ nu garo mɛ zan. O woi-tua yaa tɛ bɛr-tua'i zik kpa nu ŋmaa. Zi̧a̧ fara'i nɛ mɛtrɛ ɓu-yiitoo-zua-mɔɔrɔ, pɛsa-a nɛ mɛtrɛ ɓu-zua-yiitoo nɛ reeta.

³⁰O bɛr-tua zika so ɗoŋ fara'i kpa nu ŋmaa, zi̧a̧-a̧ duka nɛ mɛtrɛ ɓu-zua-yiitoo nɛ reeta, pɛsa-a mɛtrɛ yiitoo nɛ reeta.

³¹Nu bɛr-tua fara'i zɔka mɔ si kɔ̧ bee-gara mɛ zan. Wa gɔna so dap wa̧a̧ ndɛŋgɛ tɛ o ŋgeŋ mɛ kɔ̧ a̧, ɓɛɛ gɔna-kiɗi-mɔɔ-daŋ-mɔ si fara'i duka zu ŋmaa mɔɔrɔ-ɗoŋ-taar.

³²Wi’ɛi mgbɔa'm nɛ nu garo si war daŋa-wese si kɔ̧ bee-gara mɛ kɔ̧ a̧. A̧ wee pɛsa nu garo'i, ɓɛɛ pɛsa-a nyɛma ŋmaa in o wan mɛ kuti-a.

³³O be gɔna bɛr-tua-pɛm-mɔ, o ŋgeŋ nɛ gɔna mgbara wa, in ɓɛr-tua'i nyɛma ŋmaa in o wan mɛ kuti-a. O woi-tua zika bɛr-tua'i in fara yea-a zik kpa nu ŋmaa. Zi̧a̧ fara'i duka nɛ mɛtrɛ ɓu-yiitoo-zua-mɔɔrɔ, pɛsa-a mɛtrɛ ɓu-zua-yiitoo nɛ reeta.

³⁴Nu bɛr tua fara'i zɔka mɔ si kɔ̧ bee-gara mɛ zan. Wa gɔna dap wa̧a̧ ndɛŋgɛ tɛ o ŋgeŋ mɛ kɔ̧ a̧ nɛ war mgbɔɔr in nɛ war mgbɔɔr mbɛt, ɓɛɛ gɔna-keɗe-mɔɔ-daŋ-mɔ si fara'i duka zu ŋmaa mɔɔrɔ-ɗoŋ-taar.

³⁵Wi’ɛi mgbɔa'm nɛ war nu garo mɛ ká̧-zan-mɛ́-ŋgɔn. A̧ wee mɔ, ɓɛɛ fara'i duk nɛ kale kpɔk mɔ hee o dɔka-a ga.

³⁶O be gɔna bɛr-tua-pɛm-mɔ a̧a̧ so sɛnɛ in o ŋgeŋ nɛ gɔna mgbara wa, ká bá nɛ̀ bɛr-tua, ɓɛɛ o woi-tua zika fara'i kpa nu ŋmaa. Zi̧a̧ fara'i duka nɛ mɛtrɛ ɓu-yiitoo-zua-mɔɔrɔ, pɛsa-a nɛ mɛtrɛ ɓu-zua-yiitoo nɛ reeta.

³⁷Nu bɛr-tua fara'i zɔk mɔ si kɔ̧ bee-gara mɛ zan. Wa gɔna dap wa̧a̧ ndɛŋgɛ tɛ o ŋgeŋ nɛ kɔ̧ a̧ nɛ war mgbɔɔr in war mgbɔɔr mbɛt, ɓɛɛ gɔna-kiɗi-mɔɔ-daŋ-mɔ si fara'i duka zu ŋmaa mɔɔrɔ-ɗoŋ-taar.

³⁸Ŋma nu bɛr-tua duka nu garo mɛ kɔ̧ a̧ nɛ zɔka mɔ si nu garo mɛ si ká̧-zan-mɛ́-ŋgɔn; nɛ fara'i a̧ wa fɔr o kpoo-sɔ̧ sɛnɛ.

³⁹O taŋge naar yaa so kɔ̧ bɛr-tua'i, yiitoo nɛ nú-a si mɛ‘i, in yiitoo nɛ nú-a pii hɛ̧ɛ̧; nɛ́ zu o taŋge nɔ‘i a̧ wa gɔn so o saɗi-ɗafi-sɔ̧ sɛnɛ, o wan mɛ dɔa-a in o wan mɛ ɗafi sɔ̧ ha̧ Sɔ̧ mɛ e ɗaŋmɔ ha'i.

⁴⁰O taŋge naar yaa so ɗɔɔ wɛɛ-tua nɛ war zan, nɛ war nu garo mɛ ká̧-zan-mɛ́-ŋgɔn, yiitoo nɛ mgbɔɔr, in yiitoo nɛ mgbɔɔr mbɛt.

⁴¹O taŋge naar yaa nɛ kɔ̧ a̧, ɓɛɛ o ŋma naar woyo ya kɔ‘i nɛ zan; wa lɛŋ dee nɛ mɔɔrɔ-ɗoŋ-taar nɛ wa gɔn so o saɗi-ɗafi-sɔ̧ zu-a.

⁴²O taŋge naar nɛ wa dee so mɛ a o kpoo-sɔ̧ zu a'i, wa sɛka so nɛ ta de nɛnɛ, kusa-a duka nɛ reeta mɛtrɛ, ɓɛɛ zi̧a̧-a̧ in pɛsa-a gana zu i̧i̧ tikiɗi. Nɛ fara'i a̧ wa a so o boi-gbɛ o saɗi-ɗafi-sɔ̧ sɛnɛ.

⁴³Wa dee mɔɔ-kpe-ka̧-nú o taŋge nɔ‘i zik kpa nu ŋmaa, pɛsa-a hee pɛsa kɔ̧ er-wi ga. Nɛ́ o taŋge nɔ‘i a̧ wa a so o kpoo-ɗafi-sɔ̧ zu-a.

⁴⁴Wi’ɛi mgbɔa'm si kɔ̧ bee-gara mɛ kɔ̧ a̧. Bɛr-tua yaa so hi̧i̧ yiitoo: Kpɔk duka ndaɗi ɗoŋ nu garo ye si bee-gara mɛ kɔ̧ a̧ nɛ war ká̧-zan-mɛ́-ŋgɔn, ɓɛɛ nú-a zɔk mɔ si war ká̧-zan-mɛ́-ɗɔɔ; ɓira-a duka ndaɗi ɗoŋ nu garo mɛ ká̧-zan-mɛ́-ɗɔɔ, ɓɛɛ nú-a zɔk mɔ si war ká̧-zan-mɛ́-ŋgɔn.

⁴⁵Ɓɛɛ a̧ tɔ̧ ha̧‘m: «Gɔna-bɛr-tua nɛ zɔk mɔ si war ká̧-zan-mɛ́-ɗɔɔ'ɛ nɛ bɛr-tua ko o wi-ɗafi-sɔ̧ mɛ wan nɛ de tom kɔ̧ Tua ko Sɔ̧.

⁴⁶Ɓɛɛ nɛ̀ bɛr-tua mɛ́ wan nɛ̀ nú-a zɔk mɔ si war ká̧-zan-mɛ́-ŋgɔn’ɛ nɛ́ bɛr-tua ko o wi-ɗafi-sɔ̧ nɛ de tom fara-ɗafi-sɔ̧. O wi-ɗafi-sɔ̧ nɔ‘i nɛ o be nutua ko Levii, o bezaŋ Sadɔk. Kana nɛ wa'i ɓɛɛ a̧ nyɛma yee ti GASA WAN mɛ ɗaf'aa.»

⁴⁷Wi’ɛi wee bee-gara mɛ kɔ̧ a̧, zi̧a̧-a̧ duka nɛ mɛtrɛ ɓu-mɔɔrɔ, pɛsa-a mɛtrɛ ɓu-mɔɔrɔ mbɛt; fara-ɗafi-sɔ̧ duka tan nɛ nu Tua ko Sɔ̧.

⁴⁸A̧ mgbɔa'm si fara yea-a si kɔ̧ Tua ko Sɔ̧; a̧ wee ndota o mbiŋ tua fara'i mɛtrɛ yiitoo nɛ reeta, pɛsa fara-ye-mɔ‘i nɛ mɛtrɛ mɔɔrɔ-ɗoŋ-yiitoo, ɓɛɛ ndota o ŋgeŋ fara'i nɛ mɛtrɛ kpɔk nɛ reeta.

⁴⁹Zi̧a̧ fara-ye-mɔ duka nɛ mɛtrɛ ɓu in pɛsa-a nɛ mɛtrɛ mɔɔrɔ-ɗoŋ-kpɔk. Gɔna-keɗe-mɔɔ-daŋ-mɔ si kɔ̧ fara'i a̧a̧ sɛnɛ zu ŋmaa ɓu, ɓɛɛ o ŋma mbiŋ a̧a̧ ká̧ nu fara'i mbɛt, kpɔk nɛ ká̧-a̧ mɛ mgbɔɔr, in kpɔk nɛ ká̧-a̧ mɛ mgbɔɔr mbɛt.