Read Northwest Gbaya EZEKIƐL 42 Bible Online

EZEKIƐL 42 - Northwest Gbaya bible

EZEKIƐL 42

¹Wi’ɛi mgbɔa'm gbonɛ si bee-gara mɛ wan mɛ ká̧-zan-mɛ́-ŋgɔn, nɛ́ɛ̀ ye kɔ̧ ŋma tua nɛ zɔka ŋmaa in fara-yar-sɛnɛ, nɛ duk tan nɛ tua nɛ duk ɗoŋ Tua ko Sɔ̧.

²Zi̧a̧ tua'i duka nɛ mɛtrɛ ɓu-mɔɔrɔ in pɛsa-a, mɛtrɛ ɓu-yiitoo-zua-mɔɔrɔ.

³Nu tua'i zɔka mɔ si fara-yar-sɛnɛ ká̧ Tua ko Sɔ̧, pɛsa fara'i duka nɛ mɛtrɛ ɓu, ɗoŋ tua'i duka zɔk mɔ si bee-gara mɛ zan nɛ wa yɔka so nɛ ta; wa dee so o gɔna-bɛr-tua zu ŋmaa taar.

⁴Pɛsa war tɛ mɛtrɛ mɔɔrɔ in zi̧a̧-a̧ ɓu-mɔɔrɔ ɓira nɛ ti tua'i nɛ war bee-gara mɛ kɔ̧ a̧. Nu tua fara'i zɔka mɔ si war ká̧-zan-mɛ́-ŋgɔn.

⁵O gɔna bɛr tua mɛ ɗɔɔ duka so nɛ pɛsa-a gan o wan mɛ see-a, ɓɛɛ o wan mɛ zu-a duka nɛ mɔi̧a-a gan,

⁶wen o bɛr-tua yaa so zu ŋmaa taar nɛ bo nɛ o mbiŋ-tua a̧ tɔn wa hee o ŋma bɛr-tua mɛ ká̧ bee-gara'i ga na. Mɛ nɛ mɔ‘i a̧ dee ha̧ o bɛr-tua nɔ‘i mɛ mɔi̧ gan o wan mɛ see-a in mɛ ɗɔɔ.

⁷Nɛ̀ war ɗoŋ tua si bee-gara mɛ zan, ŋgeŋ kɛ̧ɛ̧ tɛ fara yiitoo; nu ŋgeŋ mɛ ɛ̧ɛ̧ duka nɛ gee ŋgeŋ tɛ mɛtrɛ ɓu-yiitoo-zua-mɔɔrɔ, ɓɛɛ ɓii-aa a̧a̧ so nɛ bɛr-tua tɛ mɛtrɛ ɓu-yiitoo-zua-mɔɔrɔ. Ɓɛɛ ŋgeŋ mɛ ti tua nɛ zɔk mɔ sitɛ Tua ko Sɔ̧, bɛr-tua duka so sɛnɛ mɛtrɛ ɓu-mɔɔrɔ nɛ oi-aa.

⁹Ɓɛɛ sɛn ɗɔɔ bɛr-tua nɔ‘i, ŋma nu tua duka so zɔk mɔ si war daŋa-wese nɛ ɓira si kɔ̧ bee-gara mɛ zan. Nɛ̀ war ká̧-zan-mɛ́-ɗɔɔ,[28] ŋma kale tua hegɔ a̧a̧ so sɛnɛ nɛ zɔka ŋmaa in fara-yar-sɛnɛ, nɛ nyɛi̧ nɛ tua mɛ ɗoŋ Tua ko Sɔ̧ na mbɛt.

¹¹Ŋma yuwar duka ɓir yak nɛ fara'i hee ko tua mɛ si ká̧-zan-mɛ́-ŋgɔn ga. O bɛr-tua tɛ tua'i, yuwar dea-a hɔ nɛnɛ tɛ ɗafa o nú-a lɛŋ nyɛma ŋmaa in kuti tua.

¹²Duka so nɛ kalemɔ in nu tua-ye-mɔ si kɔ̧ tua'i mbɛt. Ŋma yuwar ɓira yak ká̧ tua'i, ɓɛɛ ŋma fara-ye-mɔ a̧a̧ so sɛnɛ nu yuwar'i nɛ zɔk ŋmaa in garo nɛ kpee ɗoŋ Tua ko Sɔ̧. Wi ye si fara'i nɛ war daŋa-wese.

¹³Ɓɛɛ wi’ɛi tɔ̧ ha̧‘m: «O tua mɛ ká̧-zan-mɛ́-ŋgɔn nɔ'ɔ in wan mɛ ká̧-zan-mɛ́-ɗɔɔ nɛ zɔk mɔ si bee-gara mɛ kɔ̧ a̧‘i nɛ sa̧a̧ sa̧a̧-fara. Fara'i nɛ fara-nyɔŋ-mɔ ko o wi-ɗafi-sɔ̧ nɛ̀ nɛ́ mɛ ɗafi sɔ̧ ti GASA WAN. Hee mɔ'ɔ nɛ fara'i nɛ sa̧a̧ fara ga, o bíí tɛ a mɔɔ-ɗafi-sɔ̧ nɛ nyɛma yi Sɔ̧ fara'i, o ha̧a̧mɔ ha̧ Sɔ̧ in o mɔɔ-ɗafi-sɔ̧ zu ea-ɗaŋmɔ in wan mɛ ɗafi mgbara tɛ-wi in Sɔ̧.

¹⁴Ŋgimbi nɛ o wi-ɗafi-sɔ̧ be tɛ̀ɛ́ ye hi̧i̧, wa beka gbo nɛ sa̧a̧ fara'i si bee-gara mɛ zan na; wa tɛ kpɔ̧i̧ o laa-ɗafi-sɔ̧ e ɓɔn fara'i sɛka wa gboa, wen o laa nɔ‘i nɛ sa̧a̧ laa. Wa tɛ pi̧ ŋma laa nɛtɛ kaɗi sɛka wa gboo nɛ yuwar gboa-a sitɛ o bíí.»

¹⁵Ɗoŋ nɛ wi’ɛi kaɗa wee o mɔ mɛ kɔ̧ Tua ko Sɔ̧ kaɗi, ɓɛɛ a̧ mgbɔ‘m gbonɛ si zan nɛ war nu garo mɛ daŋa-wese, ɓɛɛ a̧ we fara mɛ ɗoŋ-aa nɛ zan mbɛt.

¹⁶A̧ wee ká̧ garo mɛ si daŋa-wese nɛ mɔɔ-we-mɔ, mɛtrɛ gɔmŋmaa-yiitoo-nɛ-ɓu-mɔɔrɔ.

¹⁷Ɓɛɛ mɛ ɗoŋ, a̧ wee fara si ká̧-zan-mɛ́-ŋgɔn, mɛtrɛ gɔmŋmaa-yiitoo-nɛ-ɓu-mɔɔrɔ.

¹⁸A̧ wee mɔ nɛ war ká̧-zan-mɛ́-ɗɔɔ, mɛtrɛ gɔmŋmaa-yiitoo-nɛ-ɓu-mɔɔrɔ.

¹⁹Ɓɛɛ mɛ mɔ'ɔ n'aa zika tɛ, we mɔ nɛ war yee-wese mɛtrɛ gɔmŋmaa-yiitoo-nɛ-ɓu-mɔɔrɔ.

²⁰A̧ wee o garo nɛ zika Tua ko Sɔ̧ kpa nu ŋmaa, zi̧a̧-a̧ gɔmŋmaa-yiitoo-nɛ-ɓu-mɔɔrɔ in pɛsa-a mɛtrɛ gɔmŋmaa-yiitoo-nɛ-ɓu-mɔɔrɔ mbɛt, wen kɛ̧ɛ̧ mgbara sa̧a̧-fara in oi o gee fara.