Read Northwest Gbaya EZEKIƐL 43 Bible Online

EZEKIƐL 43 - Northwest Gbaya bible

EZEKIƐL 43

¹Wi’ɛi mgbɔa'm si nu garo mɛ war daŋa-wese,

²ɓɛɛ mi zɔk gasamɔ ko Sɔ̧ ko Israɛl fara tɛa-a nɛ war daŋa-wese mɛ. Gitimɔ nɛ mgbimgbi tɛnɛ‘i hɔɔ ŋmaa in giti zɔm som-yì, ɓɛɛ fara'i sa̧, nù duk tok nɛnɛ lak-lak nɛ gasamɔ ko Sɔ̧.

³Mɔ‘i duka so hee ŋma hɔɔ-zu ga, ɓɛɛ hɔɔ-zu'i dee ha̧ tɛ‘m mɛ mbaŋ ɗoŋ mɔ n'am zɔka so ŋgimbi nɛ Sɔ̧ nɛ̀ɛ́ so nɛnɛ mɛ ɗaŋ nɛ gasa ye Jerusalɛm, in mɔ n'am zɔka so ká̧ zaŋ Kebar mɛ. Ɓɛɛ mi gu nu, hikiɗi yí‘m nu.

⁴Gasamɔ ko Sɔ̧ yee tua nɛ nu garo wan mɛ daŋa-wese.

⁵Ɓɛɛ ɔmi ko Sɔ̧ ba'm nɛ́ɛ̀ e nyaŋan kɔ̧ bee-gara mɛ kɔ̧ a̧ mɛ; nɛ fara'i a̧‘m zɔka nɛ gasamɔ ko GASA WAN duna kɔ̧ Tua kɔ̧-a̧.

⁶Wi’ɛi tɛ̀ɛ̀ dúk katɛ‘m, ɓɛɛ mi zii ŋma tiger bíí nɛ tɔ̧ wen ha̧‘m tɛnɛ nɛ kɔ̧ Tua mɛ‘e:

⁷«Mɛ́ bíí, damti kɔ‘m nɛ mɔ'ɔ, fara-a-naŋ-am a̧a̧; mi tɛ duk ɓɔn mgbara o be Israɛl kpoo nɛ kpoo. O be nutua ko Israɛl in o be-wan kɔ‘i beka de mɔɔ-búù fɛŋ nɛ sa̧a̧ nin-am tɛ ɗafa o géé-sɔ̧ kɔ-wa ɓɔna; wa beka gun o wan kɔ-wa nɛ ká̧ ɓaa Tua kɔ‘m ɓɔna mbɛt.

⁸O wan kɔ-wa ee tua kɔ‘i ká̧ nu Tua kɔ‘m, ɓɛɛ wa e nu tua kɔ-wa mgbák nu Tua kɔ‘m; nɛ mɔ'ɔ nɛ wa gɔna mgbara'm in wa nɛ be ŋgeŋ ɓɛɛ. Wa fɛŋa sa̧a̧ nin-am tɛ ndiŋ yuwar deemɔ kɔ-wa; nɛ mɔ‘i a̧ dee ha̧ ŋga nyimsea kɔ‘m mɛ kum wa.

⁹Kinii, wa beka duk tɛ gasa o géé-sɔ̧ kɔ-wa siti ɓɔna; wa tɛ kai wɔr o wannu kɔ-wa yinɛ ká̧ ɓaa Tua kɔ‘m mbɛt, ɓɛɛ mi tɛ duk mgbara wa kpoo nɛ kpoo.

¹⁰«Nɛ kɔ-mɛ, bíí, mɛ̀ wé ɗoŋ mɔɔ-tɛ Tua ko Sɔ̧‘i ha̧ o be nutua ko Israɛl, ɓɛɛ mɛ̀ dé ha̧ wa mɛ iŋ yuwar-a mbɛt, wen ha̧ foe mɛ ba wa zu o yɔɔ-kaya kɔ-wa.

¹¹Kà foe nɛ baa wa zu ɗaŋ deemɔ kɔ-wa'i, ɓɛɛ mɛ̀ wé ɗoŋ yuwar dee Tua ko Sɔ̧ nɛ‘i dea'i ha̧ wa: o bɛr-tua nɛtɛ nɛtɛ, o fara-yea-a in gboa-a, ká bá nɛ̀ o heembea Tua'i, o yuwar tom-aa, in yuwar gasa Sɔ̧ kɔ̧ Tua'i mbɛt. Mɛ̀ yɔ́r o mɔɔ nɔ‘i ɓɔn yí-wa, wen ha̧ wa mɛ de mɔɔ-tɛ Tua'i lɛŋ nɛ yuwar-a.

¹²Ɓɛɛ gasa heembea nɛ duk zu Tua'i nɛ mɔ'ɔ: zu kaya nɛ Tua'i yor sɛnɛ‘i, nɛ war mɛ kɔ̧ a̧ in nɛ war mɛ ɗoŋ-aa hɔ nɛnɛ zan lɛŋ nɛ sa̧a̧-fara nyɛmna.»

¹³Wa wee fara-ɗafi-sɔ̧ nɛ zi̧a̧ mɔɔ-we-mɔ, ɓɛɛ de reeta mɛtrɛ, ɓɛɛ gasa mɔ‘i nɛ mɔ'ɔ: ɗuka kɔ̧ mɛ naŋ-a zik kpa ŋmaa nɛ reeta mɛtrɛ, pɛsa-a nɛ reeta mɛtrɛ, ɓɛɛ kusa ká̧ nu kɔ̧‘i nɛ hee ŋgɛɗɛ er-wi ga. Kusa fara-ɗafi-sɔ̧

¹⁴nɛ gun-aa zu nu mɛ hɔ tɛ gɔna-keɗe-a, nɛ kusa mɛtrɛ kpɔk, ɓɛɛ fara'i tɛ́ɛ̀ nyɛkɛ̧ɗi si kɔ̧ a̧, reeta mɛtrɛ; báá fara'i daŋnɛ hɔ nɛnɛ tɛ yiitoo gɔna-keɗe-a dee nɛ mɛtrɛ yiitoo, ɓɛɛ fara'i tɛ́ɛ̀ nyɛ̧kɛ̧ɗi woyo tɛ reeta mɛtrɛ.

¹⁵Báá-a nɛ fara'i daŋnɛ hɔ nɛnɛ mgbák zu fara-ɗafi-sɔ̧ mɛ, nɛ mɛtrɛ yiitoo, ɓɛɛ tɛ gbɛɛ nú-a, mgbii-aa tɛ kusi gan o oi fara lɛŋ.

¹⁶Zu fara-ɗafi-sɔ̧ duka nɛ mɛtrɛ mɔɔrɔ-ɗoŋ-kpɔk, pɛsa-a in zi̧a̧-a̧ hee ŋmaa ga.

¹⁷Nyɛkɛ̧ɗa mɔ, wan mɛ ŋgɔn dee nɛ mɛtrɛ mɔɔrɔ-ɗoŋ-yiitoo, pɛsa-a in zi̧a̧-a̧ hee ŋmaa ga zik kpa nu ŋmaa. Kusa ká̧ nú mboo-mɔ nɛ zika ɗoŋ-aa kpa nu ŋmaa'i duka hee ŋgɛɗɛ-er-wi ga, pɛsa kɔ̧ nɛ zika gun-aa kpa nu ŋmaa nɛ reeta mɛtrɛ, ɓɛɛ fara-daŋa-a si zu a̧ zɔka mɔ si war daŋa-wese.

¹⁸Nɛ mɔ'ɔ nɛ wi’ɛi tɔ̧ɔ̧ ha̧‘m: «Mɛ́ bíí, wen nɛ GASA WAN Sɔ̧ tɔ̧ nɛ mɔ'ɔ: Ŋgimbi nɛ fara-ɗafi-sɔ̧ be tɛ̀ɛ́ kaɗi, ha'i mɛ dɔ kpoo-sɔ̧, misi̧ nɛ̀ tɔk-aa zu-a, mɔ nɛ‘i tɛ de nɛ mɔ'ɔ.

¹⁹O bíí nɛ tɛ hɔ ti'm mɛ ɗaf'am nɛ o be nú-gara ko Levii, o bezaŋ Sadɔk. Nɛ GASA WAN Sɔ̧ a̧ tɔ̧ wen’ɛ. Mɛ tɛ ha̧ be wiwii ndai ha̧ wa mɛ ɗafi nɛ sɔ̧ wen ea ɗaŋmɔ.

²⁰Mɛ tɛ duɓi tɔk-aa a zu zak naar nɛ duk mgbii fara-ɗafi-sɔ̧ in zu o mgbii-aa naar mɛ see-aa, ká bá nɛ̀ o ká̧ nú-a nɛ zika gun-aa kpa nu ŋmaa. Mɛ nɛ yuwar'i a̧ mɛ tɛ ɗafi nɛ war fara-ɗafi-sɔ̧ wen ha̧ fara'i mɛ duk nɛ ko Sɔ̧.

²¹Ɓɛɛ mɛ tɛ ba wiwii ndai-ɗafi-sɔ̧ wen ɗaŋmɔ‘i nɛ́ɛ̀ dɔ sɛn fara nɛ‘i ɗafa ɗoŋ Tua ko Sɔ̧ nɛ zan mɛ.

²²Kà mɔ nɛ sa̧a̧, ɓɛɛ mɛ̀ bá vala gbadua nɛ war-tɛ-a duk nɛ sa̧a̧-a̧, mɛ̀ gbɛ́ ɗafi nɛ Sɔ̧ wen ɗaŋmɔ. Mɛ̀ bá tɔk-aa ɗafi nɛ war-tɛ fara-ɗafi-sɔ̧ nyɛm nɛ ɗoŋ yuwar-mɔ nɛ mɛ dee nɛ wiwii ndai.

²³«Kà mɛ nɛ dee mɔ‘i kaɗi, ɓɛɛ mɛ̀ bá be wiwii ndai in be daŋa vala sami nɛ war-tɛ-wa duk nɛ sa̧a̧-a̧ yiitoo mbɛt.

²⁴Mɛ̀ káí wa tɛnɛ pii ti'm, mi GASA WAN, ɓɛɛ o wi-ɗafi-sɔ̧ tɛ sɔ̧ tɔŋ tɛ-wa, ɓɛɛ wa dɔɔ wa nɛ kpoo-sɔ̧ ha̧‘m, mi GASA WAN.

²⁵«Mɛ tɛ gbɛ vala gbadua, wiwii ndai in be daŋa vala sami nɛ war-tɛ-wa duk nɛ sa̧a̧-a̧ ha̧‘m wen zu ɗaŋmɔ. Mɛ tɛ de hegɔ wese kpɔk kpɔk tɛ ɔɔ-zɛ mɔɔrɔ-ɗoŋ-yiitoo.

²⁶Wa tɛ ɗafi sɔ̧ wen fara'i tɛ ɔɔ-zɛ mɔɔrɔ-ɗoŋ-yiitoo wen ha̧ fara'i mɛ sa̧, ɓɛɛ sɛka wa ee fara'i nɛ mɔ kɔ Sɔ̧.

²⁷Kà o zɛ mɔɔrɔ-ɗoŋ-yiitoo nɔ‘i be tɛ̀ɛ́ kaɗi, ɓɛɛ tɛ mɔɔrɔ-ɗoŋ-taar ɔɔ-zɛ hegɔɔ yak nɛnɛ, o wi-ɗafi-sɔ̧ tɛ ku̧ naŋ ɗafa sɔ̧ zu fara-ɗafi-sɔ̧, dɔ nɛ kpoo-sɔ̧, ɗafi nɛ sɔ̧-gaŋmɔ mbɛt. Ɓɛɛ hegɔ, deemɔ k’ɛ́nɛ́ tɛ nyɛm yí‘m. Mɛ nɛ mi GASA WAN Sɔ̧ a̧ tɔ̧ wen’ɛ.»