Read Northwest Gbaya EZEKIƐL 44 Bible Online

EZEKIƐL 44 - Northwest Gbaya bible

EZEKIƐL 44

¹Ɓɛɛ nɛ mɔ'ɔ nɛ wi’ɛi mgbɔa'm gbonɛ si nu garo mɛ zan nɛ duk si war daŋa-wese; nu garo'i duka ɓɔn nɛ kpea-a.

²Ɓɛɛ GASA WAN tɔ̧ ha̧‘m: «Ɛ̧ɛ̧ nu tua’ɛ tɛ duk kɔ‘i ɓɔn nɛ kpea-a hegɔ. Wi beka hú̧í̧ fara'i na; ŋma bíí beka ɓir nɛ fara'i yak na mbɛt, wen nɛ́ mi GASA WAN Sɔ̧ ko Israɛl a̧ yee mɔ nɛ fara'i. Nu garo'i tɛ duk ɓɔn nɛ kpea-a kpoo nɛ kpoo.

³Nɛ́ be-wan ɛ̀nɛ̀-wí ɓɛɛ a̧ tɛ ye mɔ nɛ nu garo'i si kɔ̧ a̧ mɛ nyɔŋ mɔ ti GASA WAN wen nɛ a̧ a̧ ɔ wan zu o bíí. A̧ tɛ ye nɛ nu zala tua'i, ɓɛɛ a̧ gboo nɛ kale fara'i mbɛt.»

⁴Ɓɛɛ a̧ mgbɔ‘m ye nɛ nu garo mɛ ká̧-zan-mɛ́-ŋgɔn pii ti Tua ko Sɔ̧. Kà‘m ba yí‘m nɛ ŋgɔn wó, ɓɛɛ Tua ko Sɔ̧ duna nɛ gasamɔ ko GASA WAN. Nɛ mɔ'ɔ n'am guu nu ba sɔnti'm hikiɗi nu.

⁵Ɓɛɛ GASA WAN tɔ̧ ha̧‘m: «Mɛ́ bíí, mɛ̀ gá̧ tɛ-mɛ, mɛ̀ zɔ́k mɔ n'am tɛ usi ha̧ mɛ‘i sa̧ yí-mɛ, mɛ̀ zíí mɔ n'am tɛ tɔ̧ ha̧ mɛ sa̧ zer-mɛ mbɛt. Mɔ n'am tɛ tɔ̧ ha̧ mɛ‘i nɛ yuwar ɗafa mɔ in o heembea kɔ̧ Tua ko GASA WAN. Sɛn tɛ mɔ‘i, mɛ̀ zɔ́k mɔ nɛ de-a tɛ mɔ ko yee Tua'i in gboa-a mbɛt.

⁶«Ɓɛɛ mɛ̀ tɔ̧́ mbɔrɔ ha̧ o wi-ŋgazu nɛ ya nutua ko Israɛl‘e nde: Wen nɛ GASA WAN tɔ̧ nɛ mɔ'ɔ:

⁷Ɛnɛ fɛŋa Tua kɔ‘m tɛ ea-a ha̧ o gɔni-duk, o wi-mbii nɛ mbo zu ha̧‘m na, mɛ ye kɔ̧ Tua kɔ‘m ŋgimbi n’ɛnɛ ɗafi nɛ sɔ̧, ha̧ nɛ nɔ̧́-saɗi in tɔk-aa ha̧‘m, ɓɛɛ o bíí kɔ‘m ɗaŋa yuwar nɔɔ-tɔk k’ɛɛ in wa tɛ yuwar ɗaŋ deemɔ kɔ-wa.

⁸Ɛnɛ ee dee tom kɔ̧ sa̧a̧ Tua kɔ‘m duk, ɓɛɛ ɛnɛ e tom'i er o be gɔni-duk.

⁹«Ɓɛɛ wen kɔ‘m GASA WAN Sɔ̧ zu mɔ‘i h’ɛ́nɛ́ nɛ mɔ'ɔ: K’ɛ́nɛ́ e ha̧ ŋma wi-mbii nɛ̀ mbo zu ha̧‘m na mɛ ye kɔ̧ Tua kɔ‘m na, kóó nɛ ŋma be gɔni-duk nɛ a̧a̧ mgbara dukbíí kɔ‘m Israɛl na mbɛt.»

¹⁰«Nɛ̀ war ko o be nutua ko Levii nɛ nɛ̀ɛ́ ɗoŋ o be Israɛl nɛ ea'm duk wen ɗafa o géé-sɔ̧ kɔ-wa'i, ɗaŋmɔ kɔ-wa tɛ si ɗoŋ zu wa.

¹¹Nɛ́ wa'i a̧ tɛ de tom kɔ Tua kɔ‘m, pɛm nɛ nu Tua kɔ‘m. Nɛ́ wa'i a̧ tɛ gbɛ o saɗi-ɗɔɔ zu fara-ɗafi-sɔ̧ nɛ dukbíí tɛ kai tɛnɛ in wan mɛ ɗafi sɔ̧ mbɛt, ɓɛɛ wa tɛ duk ti dukbíí mɛ de tom ha̧ wa.

¹²Wen hee mɔ'ɔ nɛ wa duka so ti tɛ ɗafa o géé-sɔ̧, de nɛnɛ ha̧ o be nutua ko Israɛl mɛ tik tɛ ɗaŋmɔ ga, mi kana mɔ, mi tɛ de ŋmaa in wa. Mi GASA WAN Sɔ̧ tɔ̧ɔ̧ hegɔ; ɗaŋmɔ kɔ-wa tɛ si ɗoŋ zu wa.

¹³Wa beka hɛɗi katɛ‘m wen ɗafa sɔ̧ ti'm, kà bó nɛ̀ foo o sa̧a̧ nyɛk kɔ‘m nɛ er-wa na, kóó yea-a kɔ̧ sa̧a̧-fara kɔ‘m na mbɛt. Ziimɔ tɛ ba wa zu ɗaŋ deemɔ nɛ wa dea so.

¹⁴Ɓɛɛ zu deemɔ kɔ-wa hegɔ‘i, mi tɛ e wa zu o ŋma be tom mɛ kɔ̧ Tua kɔ‘m.»

¹⁵«Ɓɛɛ nɛ̀ war ko duk ko Levii, o wi-ɗafi-sɔ̧, o bezaŋ Sadɔk, ŋgimbi nɛ o bezaŋ Israɛl ee nɛ‘m duk, nɛ́ wa'i a̧ kasa so o yuwar deemɔ kɔ̧ Tua kɔ‘m nɛ de-a; ɓɛɛ nɛ́ wa a̧ tɛ duk ti'm de nɛ tom ha̧‘m. Nɛ́ wa'i a̧ tɛ dɔ gba de zɔr-zɔr kpoo, misi̧ nɛ tɔk-aa zu fara-ɗafi-sɔ̧. Mi GASA WAN Sɔ̧ tɔ̧ɔ̧ hegɔ.

¹⁶Nɛ́ wa'i a̧ tɛ ye kɔ̧ Tua kɔ‘m, mɛ de tom ha̧‘m zu taŋge kɔ‘m, wen nɛ́ wa a̧ mboo so zu tɛ o geŋa kɔ‘m.

¹⁷Ŋgimbi nɛ wa be tɛ̀ɛ́ ye mɔ si kɔ̧ bee-gara Tua ko Sɔ̧ mɛ kɔ̧ a̧, ɓɛɛ wa a̧ pi̧ nɛ o gba de yɛm-yɛm laa. Wa nɛ́ tɛ̀ɛ́ de tom sɛn bee-gara mɛ kɔ̧ a̧‘i, kóó kɔ̧ Tua ko Sɔ̧, ká wa pi̧ ndota laa-ulu tɛ-wa na.

¹⁸Wa a̧ hɛr nɛ́ mɛtɛwol yɛm-yɛm laa zu wa, in wa a̧ pi̧ nɛ be yɛm-yɛm sir-laa ndaa-wa; ká wa hɛr zaŋ-wa na, wen ká sɔbɛɛ tɛɛ hɔ tɛ-wa.

¹⁹Ŋgimbi nɛ wa tɛ gbo si mgbara dukbíí bee-gara mɛ zan mɛ, ɓɛɛ wa a̧ kpɔ̧i̧ o laa nɛ wa dee so nɛ tom tɛ-wa yinɛ, e ɓɔn kɔ̧ o bɛr-tua mɛ kɔ̧ Tua ko Sɔ̧, ɓɛɛ wa a̧ pi̧ o ŋma laa nɛtɛ, wen ká wa tɛɛ gbo mgbara o bíí nɛ sa̧a̧ laa kɔ-wa'i.

²⁰«Ká o wi-ɗafi-sɔ̧ kpui zu na, ká wa e ha̧ mui̧-zu-wa mɛ da̧ na mbɛt, ɓɛɛ wa a̧ gɔn mui̧-zu-wa nɛ dɔ̧-a̧ yiɗiɗi.

²¹Ká wi-ɗafi-sɔ̧ nɔ dɔ̧ɔ̧ nɛti mɛ ye mɔ si kɔ̧ bee-gara mɛ kɔ̧ a̧ na.

²²Ká wa ba kóò nɛ gbii wíì, kóó ko-gera nɛ kóò na, ɓɛɛ wa a̧ ba nɛ be-zɔŋa Israɛl ɛ̧; kà wa nɛ́ kɔ̧a̧, ɓɛɛ wa a̧ ba nɛ ko-gera oi ŋma wi-ɗafi-sɔ̧.

²³«Wa tɛ usi kɛ̧ɛ̧ mgbara war mɔ nɛ duk nɛ sa̧a̧-a̧ in mɔɔ-zim, mɔɔ war-tɛ-wi nɛ duk nɛ yuwar-a in wan nɛ sa̧ na.

²⁴Kà ŋma wen a̧ kura mgbara'nɛ́, ɓɛɛ o wi-ɗafi-sɔ̧ tɛ gɔn kita zu'nɛ́ nyɛm nɛ ɗoŋ heembea kɔ‘m. Wa tɛ de o gbaŋa nyɛm nɛ ɗoŋ yuwar o heembea kɔ‘m, ɓɛɛ wa a̧ zɔk o wese-ɔm-tɛ kɔ‘m nɛ de-a.

²⁵«O wi-ɗafi-sɔ̧ beka hɔ ká̧ wɔr bíí na, wen ká simbo tɛɛ ba wa. Mɔ kpɔk, bíí n'aa nyɛma mɛ hɔ ká̧ wɔr-aa nɛ dáà, nàà in o bem kɔ̧-a̧, ká bá nɛ̀ o nya-a̧, in o boko-nya-a̧ mɛ wan nɛ tɛ ba wíì hɔ̧ɔ̧ na.

²⁶Ɗoŋ n'aa ɗafa war-tɛ-a sa̧ woyo kaɗi, a̧ tɛ duk tɛ ɔɔ-zɛ mɔɔrɔ-ɗoŋ-yiitoo,

²⁷sɛka a̧ yee si bee-gara Tua ko Sɔ̧ mɛ kɔ̧ a̧, mɛ ɗafi sɔ̧ wen bura war-tɛ-a; ɓɛɛ ɗoŋ mɔ‘i a̧ nyɛma dee tom kɔ̧-a̧ kɔ̧ Tua ko Sɔ̧ siti woyo. Mɛ nɛ wen kɔ‘m, mi GASA WAN Sɔ̧.

²⁸«O wi-ɗafi-sɔ̧ beka kpa ŋma mɔɔ-oi yak zu'm na. Mi nɛ mɔɔ-oi kɔ-wa. K’ɛ́nɛ́ kɛ̧ ŋma nu Israɛl mɛ duk nɛ mɔɔ-oi kɔ-wa na; mi nɛ nù kɔ-wa.

²⁹O ha̧a̧mɔ-zu-nyɔnɔ, o ha̧a̧mɔ-ɗafi-sɔ̧ wen ɗaŋmɔ in o mɔɔ-ɗafi-sɔ̧ wen ɗafa mgbara ŋmaa ká bá nɛ̀ o mɔ lɛŋ nɛ o be Israɛl tɛ ba tɛnɛ ha̧‘m tɛ duk nɛ nyɔŋmɔ ko o wi-ɗafi-sɔ̧.

³⁰O zu-nyɔnɔ k’ɛ́nɛ́ gu nɛ o mɔ nɛtɛ nɛtɛ n’ɛnɛ a̧a̧ nɛnɛ mɛ ha̧ ha̧‘m, ɛ̀nɛ̀ há̧ o mɔɔ nɔ‘i ha̧ o wi-ɗafi-sɔ̧. Gba de fuu k’ɛ́nɛ́, ɛ̀nɛ̀ há̧ zu-a ha̧ o wi-ɗafi-sɔ̧, wen ha̧ de yoŋgo mɛ duk zu tua k’ɛ́nɛ́.

³¹Ká o wi-ɗafi-sɔ̧ nyɔŋ wɔr nɔ̧́í̧, kóó wɔr saɗi na, kóó nɛ́ wan nɛ̀ saɗi baa gbɛ na mbɛt.»