Read Northwest Gbaya EZEKIƐL 46 Bible Online

EZEKIƐL 46 - Northwest Gbaya bible

EZEKIƐL 46

¹GASA WAN Sɔ̧ tɔ̧a̧: «Nú-garo-ye-mɔ si bee-gara mɛ kɔ̧ a̧, nɛ zɔk mɔ tan daŋa-wese tɛ duk nɛ kpea-a, tɛ wese-tom tɛ ɔɔ-zɛ mɔɔrɔ-ɗoŋ-kpɔk, ɓɛɛ wa ee ha̧ a̧ duk nɛ hu̧i̧a̧-a̧ wese-ɔm-tɛ in wese mbe-yi-zɛ mbɛt.

²Be-wan tɛ ye mɔ nɛ nú-zala nu garo mɛ zan, ɓɛɛ a̧ nɛ̀ɛ́ yor ɛk tɛ nɛ ká̧ nu tua, ɓɛɛ o wi-ɗafi-sɔ̧ tɛ dɔ kpoo-sɔ̧ kɔ̧-a̧ in o mɔɔ-ɗafi-sɔ̧-gaŋmɔ mbɛt. Be-wan tɛ gu nu dadaa nu garo'i, ɓɛɛ a̧ kura gbo kɔ̧-a̧ yak, ɓɛɛ wi beka kpe nu garo'i wese'i na hɔ nɛnɛ mɛ ga̧a̧mɔ.

³Wese-ɔm-tɛ in wese mbe-yi-zɛ lɛŋ, o gee bíí lɛŋ tɛ mɔi̧ nɛ́ɛ̀ gu nu nu garo'i wen gasa GASA WAN.

⁴«Be-wan tɛ kai o be-sami mɔɔrɔ-ɗoŋ-kpɔk in vala sami kpɔk nɛ war-tɛ-wa ɔ sa̧a̧ tɛnɛ, mɛ dɔ nɛ oi kìì ha̧ GASA WAN wese-ɔm-tɛ.

⁵Ɓɛɛ a̧ tɛ ha̧ kilo fuu alkamaari ɓu-taar, wen vala sami kpɔk kpɔk dam; ɓɛɛ nɛ war ko o be-sami, a̧ tɛ ha̧ fuu nyɛm nɛ mɔ n'aa taa. A̧ tɛ ha̧ litrɛ nɔ̧́ mɔɔrɔ-ɗoŋ-kpɔk wen kilo fuu alkamaari ɓu-taar.

⁶Tɛ wese mbe-yi-zɛ, a̧ tɛ ha̧ wiwii ndai kpɔk in o be-sami mɔɔrɔ-ɗoŋ-kpɔk, ká bá nɛ̀ vala sami kpɔk nɛ war-tɛ-wa ɔ sa̧a̧.

⁷A̧ tɛ ha̧ kilo fuu alkamaari ɓu-taar wen wiwii ndai in wen vala sami, in fuu nyɛm nɛ mɔ n'aa taa wen o be-sami; a̧ tɛ ha̧ litrɛ nɔ̧́ mɔɔrɔ-ɗoŋ-kpɔk wen kilo fuu alkamaari ɓu-taar.

⁸Ŋgimbi nɛ be-wan tɛ ye mɔ, a̧ a̧ ye mɔ nɛ nú-zala, ɓɛɛ a̧ gboo si zan nɛ kale kpɔk yuwar'i.

⁹«Ŋgimbi nɛ o gee bíí tɛ nɛ mɛ gasi GASA WAN wese gbaŋa, ká'í gbo nɛ kale nu garo nɛ‘i yee nɛnɛ na; kóó o nde a̧ zɔk mɔ tan sɔnti-wi gbo nɛnɛ. O wan nɛ yee mɔ nɛ nu garo mɛ ká̧-zan-mɛ́-ŋgɔn a̧ gbo nɛ nu garo mɛ ká̧-zan-mɛ́-ɗɔɔ, ɓɛɛ o wi nɛ yee mɔ nɛ nu garo mɛ ká̧-zan-mɛ́-ɗɔɔ, a̧ gbo nɛ nu garo mɛ ká̧-zan-mɛ́-ŋgɔn.

¹⁰Be-wan tɛ ye mɔ tɛ kale kpɔk ŋgimbi in o dɔka bíí, ɓɛɛ a̧ tɛ gbo zan tɛ kale kpɔk ŋgimbi in wa mbɛt.

¹¹«Mɔɔ-ɗafi-sɔ̧ tɛ o wese yɔyɛ-gasi-sɔ̧ in oi o gbaŋa tɛ duk nɛ kilo fuu alkamaari ɓu-taar wen wiwii ndai kpɔk kpɔk dam, in wen o vala sami nɛ wa ha̧a̧ kpɔk kpɔk mbɛt. Ɓɛɛ nɛ war ko o be-sami, kóó o nde tɛ ha̧ mɔ nyɛm nɛ ɗoŋ taamɔ kɔ‘i; wa tɛ ha̧ litrɛ nɔ̧́ mɔɔrɔ-ɗoŋ-kpɔk wen kilo fuu alkamaari ɓu-taar mbɛt.

¹²«Ŋgimbi nɛ be-wan kɔ̧ɔ̧ mɛ dɔ kpoo-sɔ̧ nɛ ta-tɛ-wi, kóó nɛ́ ɗafa-sɔ̧-gaŋmɔ, wa a̧ hú̧í̧ nu garo nɛ zɔk mɔ si daŋa-wese ha̧ a̧, ɓɛɛ a̧ a̧ dɔ kpoo-sɔ̧ in ɗafa-sɔ̧-gaŋmɔ hee mɔ'ɔ n'aa ɗafi nɛ sɔ̧ wese-ɔm-tɛ'ɛ ga. Ɓɛɛ gboa-a kɔ̧-a̧ hegɔ, wa a̧ kpe nu garo ɓɔn ɗoŋ-aa.»

¹³«Mɛ tutuyɛ dam ɗoŋ wese lɛŋ, a'i ba be-sami nɛ a̧a̧ nɛ pɛ kpɔk, wan nɛ war-tɛ-a ɔ sa̧a̧, dɔ nɛ oi kìì ha̧‘m.

¹⁴A'i ha̧ litrɛ nɔ̧́ yiitoo mɛ tutuyɛ lɛŋ, wen zaŋa-a nɛ ŋmaa in kilo fuu mɔɔrɔ. Yuwar ha̧a̧mɔ ha̧ GASA WAN wese kpɔk kpɔk nɛ́ heembea nɛ̀ tɛ duk kpoo nɛ kpoo.

¹⁵Be-sami, fuu in nɔ̧́, nɛ mɔ nɛ‘i tɛ ha̧ ha̧ GASA WAN mɛ tutuyɛ lɛŋ ɓɔnsɛnɛ.»

¹⁶GASA WAN Sɔ̧ tɔ̧a̧: «Kà be-wan gɔn ŋma nu kɔ‘i ha̧ ŋma bem kɔ‘i, nu'i tɛ duk nɛ war mɔɔ-oi ko bem’ɛi yak nɛnɛ hɔ tɛ o bezaŋ-aa mɛ.

¹⁷A̧ kà be-wan gɔn ŋma nu kɔ‘i ha̧ ŋma ŋgaiwi kɔ‘i, ɓɛɛ nu'i tɛ pii ɗoŋ ha̧ be-wan, wese nɛ wi’ɛi be tɛ̀ɛ́ kpa zu, wen nu nɛ́ mɔɔ-oi ko be-wan nɛ duk wen o bem kɔ̧-a̧.

¹⁸Ká be-wan ɓar nu ko dukbíí kɔ‘m nɛ ŋgai na. Mɛ nɛ war nu kɔ̧-a̧ a̧ a̧ tɛ kɛ̧ ha̧ o bem kɔ̧-a̧, nɛ̀ bó nɛ́ gɔni nu ko wan-aa na; hegɔ a̧ beka ndak dukbíí kɔ‘m yinɛ zu nu kɔ-wa na.»

¹⁹Wi’ɛi mgbɔa'm ye nɛ ɓii nu tua nɛ ye si kɔ̧ o bɛr-tua nɛ wa ɗafa so e ha̧ o wi-ɗafi-sɔ̧, nɛ nú-a zɔk mɔ si ká̧-zan-mɛ́-ŋgɔn. A̧ usa ŋma be fara nɛ duk nɛ war yee-wese ha̧‘m,

²⁰ɓɛɛ a̧ tɔ̧ ha̧‘m: «Fara’ɛ nɛ fara nɛ o wi-ɗafi-sɔ̧ tɛ e kpoo-ɗafi-sɔ̧ wen zu ɗaŋmɔ, kóó bura war-tɛ-wi tɛ wee sɛnɛ, in fara nɛ wa tɛ gi o ha̧a̧mɔ sɛnɛ mbɛt. Wa beka kai o mɔɔ nɔ‘i gbo nɛnɛ si mgbara dukbíí bee-gara-mɛ́-zan mɛ na, wen ká o mɔɔ nɔ‘i tɛɛ ɗafi war-tɛ o bíí.»[32]

²¹Nɛ mɔ'ɔ n'aa mgbɔa'm gbonɛ si kɔ̧ bee-gara-mɛ́-zan, ɓɛɛ a̧ mgbɔ‘m ɓir nɛ ka̧ mgbii o bee-gara naar: o be geɗek gɔna-bee-gara dama mgbii bee-gara nɔ‘i lɛŋ.

²²O geɗek bee-gara nɔ‘i, zi̧a̧-a̧ nɛ mɛtrɛ ɓu-yiitoo, pɛsa-a nɛ mɛtrɛ ɓu-zua-mɔɔrɔ, dam o mgbii fara nɔ‘i naar lɛŋ.

²³Wa mboo so o ŋgeŋ nɛ ta dam mgbii mɔ kpɔk kpɔk, ká bá nɛ̀ o kusi-gi-mɔ zaŋ o ŋgeŋ nɔ‘i zik kpa nu ŋmaa.

²⁴Ɓɛɛ wi’ɛi tɔ̧ ha̧‘m: «Ɛ̧ɛ̧ hɛ̧ɛ̧ nɛ fara ko kusi-gi-mɔ nɛ o wi-de-tom kɔ̧ Tua ko Sɔ̧ tɛ gi o mɔɔ-ɗafi-sɔ̧ nɛ dukbíí tɛ kai tɛnɛ mɛ ɗafi nɛ sɔ̧ sɛnɛ.»