Read Northwest Gbaya EZEKIƐL 47 Bible Online

EZEKIƐL 47 - Northwest Gbaya bible

EZEKIƐL 47

¹Wi’ɛi mgbɔa'm ye nɛ mɔ si fara Tua ko Sɔ̧. Kà‘m zɔk mɔ wó, ɓɛɛ yì nɛ mɔ'ɔ nɛ fok nɛ ɗɔɔ dadaa nu Tua ko Sɔ̧ gbonɛ si war daŋa-wese’ɛ, wen nɛ Tua ko Sɔ̧ duka so zɔk mɔ si fara'i. Yi'i duka fok gbonɛ nɛ tɛ Tua ko Sɔ̧ nɛ war wiiko, ba nɛ ká̧ fara-ɗafi-sɔ̧ yaknɛ si ká̧-zan-mɛ́-ɗɔɔ.

²Nɛ mɔ'ɔ n'aa mgbɔa'm gbonɛ nɛ nu garo mɛ ká̧-zan-mɛ́-ŋgɔn, ɓɛɛ a̧ mgbɔ‘m zik nɛ ɗoŋ Tua ko Sɔ̧ hɔ nu garo mɛ wan nɛ zɔk mɔ si war daŋa-wese, ɓɛɛ mi zɔk yi nɛ fok yak nɛ ká̧ nu garo nɛ war wii-er.

³Ɓɛɛ wi’ɛi ba nyak-we-mɔ kɔ‘i yak nɛ nyɛi̧a-a si war daŋa-wese, ɓɛɛ we mɔ mɛtrɛ gɔmŋmaa-mɔɔrɔ, ɓɛɛ mgbɔ‘m ku nɛ yi'i si kur mɛ. Mi yee ɗuka yi'i hɔ kpoi-naŋ-am.

⁴Nɛ mɔ'ɔ n'aa wee mɛtrɛ gɔmŋmaa-mɔɔrɔ woyo, ɓɛɛ a̧ mgbɔ‘m ku nɛ yi, ɓɛɛ ɗuka yi'i daŋ am hɔ zugur-am. A̧ wee mbe mɔ woyo, mɛtrɛ gɔmŋmaa-mɔɔrɔ, ɓɛɛ a̧ mgbɔ‘m ku nɛ yi woyo, ɓɛɛ ɗuka yi'i daŋ am hɔ guntir-am.

⁵Nɛ mɔ'ɔ n'aa wee mɔ mɛtrɛ gɔmŋmaa-mɔɔrɔ woyo, ɓɛɛ yi'i kifi nɛ zɔm ŋga ɗuka yi n'am nyɛm mɛ ku ɓɔna, wen yi'i ha̧a̧ kifi zɔm nana-yì nɛ‘i tɛ zui zui sɛka'i kua.

⁶Ɓɛɛ wi’ɛi tɔ̧ ha̧‘m: «Mɛ́ bíí, mɛ zɔka mgbák mɔ'ɔ sa̧ yí-mɛ gɔ?» Ɓɛɛ a̧ mgbɔ‘m wɛr benaŋ si mgbɔɔr.

⁷Ɓɛɛ ŋgimbi n'am pia ɗoŋ, mi tɛ̀ɛ̀ kpá nɛ o gba gii te nɛ dɔka-a nɛ ya nu ŋgere nɛ kur in nɛ kur mbɛt.

⁸A̧ tɔ̧ɔ̧ ha̧‘m: «Yi’ɛ nɛ mɛ zɔk’ɛ fok si war daŋa-wese zir nɛnɛ si ɗɔɔ Jurdɛn mɛ, ɓɛɛ duka hi̧i̧ fok nɛnɛ nɛ́ɛ̀ a ɗɔɔ gba-tɔp Tɔŋ. Ɓɛɛ kà a̧ fok nɛɛ a ɗɔɔ gba-tɔp, ɓɛɛ gba-tɔp Tɔŋ gɛɗa ŋgúlúlú kifi gba de yi.

⁹Fara lɛŋ nɛ yi’ɛ tɛ fok si sɛnɛ, o be mɔ fara'i lɛŋ tɛ ya nɛ tortɛ, o zoro tɛ dun ɗɔɔ-aa mbɛt. Wen yi’ɛ tɛ ɗafi fara lɛŋ n'aa tɛ fok a sɛnɛ; a̧ tɛ de ha̧ o mɔ fara'i lɛŋ mɛ kpasi.

¹⁰Ɓɛɛ o wi-ba-zoro tɛ nɛk ká̧ ŋgere tɔp’ɛ pi̧ nɛ yɔk nɛ̀ Ɛn-Gedi hɔ Ɛn-Eglaim. O zoro mɛ ɗɔɔ-aa tɛ duk nɛ o pɛrti zoro mɛ ɗɔɔ gba-tɔp nɛ dɔka-a nyɛmna.

¹¹Ɓɛɛ o be gɔna-yi in o yí-fuk mɛ ká̧ a̧ beka duk nɛ gɛɗa-a na; wa tɛ ɓɔn nɛ yí-tɔŋ.

¹²O gba de te-nyɔŋ tɛ nɛk nu ŋgere yi'i nɛ kur in nɛ kur mbɛt; wa̧a̧-te nɔ‘i beka ai na, ɓɛɛ o te nɔ‘i tɛ wai tɛ fio-zɛ lɛŋ, wen yi nɛ fok a gun-wa, fok nɛ kɔ̧ Tua ko Sɔ̧ mɛ tɛnɛ. Waya o te nɔ‘i tɛ duk nɛ́ nyɔŋmɔ, ɓɛɛ o wa̧a̧-a̧ duka nɛ́ nyina.»

¹³GASA WAN Sɔ̧ tɔ̧a̧: «Gbìsí nu n’ɛnɛ tɛ kɛ̧ ha̧ o zuduk o be Israɛl nɛ mɔ'ɔ. Ɛ̀nɛ̀ há̧ war nù ko be nutua ko Jozɛf war yiitoo.

¹⁴Mi ha̧a̧ so nú ha̧ o zɔmdáa k’ɛ́nɛ́‘e, mi tɛ ha̧ nù'ɛ ha̧ wa nɛ mɔɔ-oi; kinii, ɛ̀nɛ̀ kɛ̧́ nù'ɛ nyɛm ŋmaa.

¹⁵Gbìsì mɛ́ ká̧-zan-mɛ́-ŋgɔn tɛ ku̧ naŋ nɛ ká̧ gba-tɔp, ɓir nɛ yuwar Hetlɔŋ hɔ Hamat yak nɛnɛ si Zeda mɛ,

¹⁶hɔ nɛnɛ Berota in Sibrayim nɛ duk gbìsì Damas in Hamat, ká bá nɛ̀ Hasɛr-Tikɔŋ nɛ duk si war gbìsì Huraŋ mɛ.

¹⁷Gbìsì mɛ́ ká̧-zan-mɛ́-ŋgɔn tɛ ku̧ naŋ ká̧ gba-tɔp nɛ war yee-wese hɔ Hasar-Enaŋ, e mgbara nu Damas in Hamat nɛ war ŋgɔn. Gbìsì mɛ́ ká̧-zan-mɛ́-ŋgɔn nɛ mɔ‘i.

¹⁸«Ɓɛɛ nɛ ko gbìsì mɛ war daŋa-wese ku̧u̧naŋ-a nɛ́ gbìsì Damas in Horaŋ, ɓir nɛ ɗɔŋgɔ Jurdɛn mgbara o Galad in Israɛl hɔ nɛnɛ Tamar nu gba-tɔp Tɔŋ. War gbìsì mɛ daŋa-wese nɛ mɔ‘i.

¹⁹«Ɓɛɛ nɛ wan mɛ si Nɛgɛb si ká̧-zan-mɛ́-ɗɔɔ, gbìsì tɛ ku̧naŋ nɛ Tamar hɔ nu yi Mɛriba-Kadɛs, ba nɛ be-zer nu Egiptɛ daŋnɛ a ɗɔɔ gba-tɔp. Gbìsì wan mɛ ká̧-zan-mɛ́-ɗɔɔ nɛ mɔ‘i.

²⁰«Gbìsì mɛ wan mɛ si yee-wese nɛ́ gba-tɔp, ku̧u̧naŋ-a nɛ gbìsì mɛ ká̧-zan-mɛ́-ɗɔɔ daŋ nɛnɛ hɔ Lebo-Hamat nɛ ŋgɔn mɛ. Gbìsì mɛ yee-wese nɛ mɔ‘i.

²¹Ɛ̀nɛ̀ kɛ̧́ nù'ɛ nɛ er ŋmaa dam'nɛ́ o be Israɛl lɛŋ.

²²Ɛ̀nɛ̀ pí̧ nɛ tani kɛ̧ nɛ nù, wen h’ɛ́nɛ́ mɛ kpa nu nyɛm'nɛ́ in o gɔni-duk nɛ duk mgbara'nɛ́ mbɛt, ba nɛ o bem kɔ-wa, ha̧ wa mɛ kpa nù nɛ tɛ duk nɛ mgbák nù kɔ-wa. Kale mɔ n’ɛnɛ tɛ de in o be Israɛl‘i, ɛ̀nɛ̀ tɛ de in o gɔni-duk nɛ ya mgbara'nɛ́ mbɛt.

²³Ɛnɛ tɛ ha̧ war nù ko o gɔni-duk mgbara zuduk nɛ wa ya in wa. Nɛ mi GASA WAN Sɔ̧ a̧ tɔ̧ wen’ɛ.»