Read Northwest Gbaya EZEKIƐL 48 Bible Online

EZEKIƐL 48 - Northwest Gbaya bible

EZEKIƐL 48

¹«Nin o zuduk be Israɛl in war nu nɛ‘i kɛ̧ɛ̧ ha̧ wa nɛ mɔ'ɔ. War nu ko Dan a̧a̧ nɛ ká̧-zan-mɛ́-ŋgɔn, ba nɛ yuwar Hɛtlɔŋ nɛ Lebo-Hamat hɔ nɛnɛ Hasar-Enaŋ, e Damas in Hamat nɛ war ŋgɔn. Gbìsì ko Dan tɛ duk nɛ war daŋa-wese hɔ nu gba-tɔp.

²War nu ko Asɛr tɛ ndaɗi ŋmaa in nu ko Dan nɛ war ɗɔɔ, ku̧u̧naŋ-a nɛ war daŋa-wese hɔ nɛnɛ nu gba-tɔp.

³War nu ko Nɛftalii tɛ ndaɗi ŋmaa in nu ko Asɛr nɛ war ɗɔɔ, ku̧u̧naŋ-a nɛ war daŋa-wese hɔ nɛnɛ nu gba-tɔp.

⁴War nu ko Manase tɛ ndaɗi ŋmaa in nu ko Nɛftalii nɛ war ɗɔɔ, ku̧u̧naŋ-a nɛ war daŋa-wese hɔ nɛnɛ nu gba-tɔp.

⁵War nu ko Efraim tɛ ndaɗi ŋmaa in nu ko Manase nɛ war ɗɔɔ, ku̧u̧naŋ-a nɛ war daŋa-wese hɔ nɛnɛ nu gba-tɔp.

⁶War nu ko Rubɛn tɛ ndaɗi ŋmaa in nu ko Efraim nɛ war ɗɔɔ, ku̧u̧naŋ-a nɛ war daŋa-wese hɔ nɛnɛ nu gba-tɔp.

⁷Ɓɛɛ war nu ko Juda ndaɗa ŋmaa in nu ko Rubɛn nɛ war ɗɔɔ, ku̧u̧naŋ-a nɛ war daŋa-wese hɔ nɛnɛ nu gba-tɔp mɛ mbɛt.»

⁸«Ɗoŋ nu ko Juda, ɛ̀nɛ̀ gɔ́n ŋma nu nɛ war daŋa-wese hɔ nɛnɛ nu gba-tɔp; mɛ nɛ fara'i ɛ̀nɛ̀ tɛ e ha̧ GASA WAN; pɛsa-a tɛ duk nɛ kilomɛtrɛ ɓu-zua-yiitoo nɛ reeta, ɓɛɛ zi̧a̧-a̧ tɛ nyɛm ŋmaa in war nu nɛ‘i gɔna ha̧ o bíí. Ɓɛɛ sa̧a̧ fara tɛ duk see-a.

⁹«War nu n’ɛnɛ tɛ gɔn e ha̧ GASA WAN'i, zi̧a̧-a̧ tɛ duk kilomɛtrɛ ɓu-zua-yiitoo nɛ reeta, in pɛsa-a kilomɛtrɛ ɓu.

¹⁰Ŋma nú fara'i tɛ duk wen o wi-ɗafi-sɔ̧; zi̧a̧-a̧ tɛ duk nɛ kilomɛtrɛ ɓu-zua-yiitoo nɛ reeta. Nɛ war daŋa-wese hɔ si war yee-wese, pɛsa-a nɛ ŋgɔn hɔ ɗɔɔ tɛ duk nɛ kilomɛtrɛ mɔɔrɔ, ɓɛɛ sa̧a̧ fara ko GASA WAN tɛ duk see-a.

¹¹Fara'i tɛ duk wen o wi-ɗafi-sɔ̧, o bezaŋ Sadɔk nɛ‘i ee so wen tom kɔ‘m, wen wa kasa so o geŋa kɔ‘m, ɓɛɛ wa e'm duk mɛ nɛ ɗoŋ ɗaŋ deemɔ ko o be Israɛl hee mɔ'ɔ nɛ o ŋma be Levii dee so ga na.

¹²Hegɔ, wa tɛ kpa war nu kɔ-wa nɛ tɛ duk nɛ sa̧a̧-fara nyɛmna ká̧ nu ko o ŋma be Levii.

¹³O be Levii tɛ kpa nu hee ko o wi-ɗafi-sɔ̧ ga: zi̧a̧-a̧ kilomɛtrɛ ɓu-zua-yiitoo nɛ reeta, pɛsa-a kilomɛtrɛ mɔɔrɔ; war nu kɔ-wa in ko o bezaŋ Sadɔk tɛ nyɛm ŋmaa tɛ zi̧a̧-a̧ in tɛ pɛsa-a mbɛt.

¹⁴War nu ko GASA WAN nɛ zɔm mɔ; wi beka ɗɔr nu'i ha̧ ŋma bíí na, wi beka e ha̧ ŋma bíí mɛ gɔn zu nu'i kà bó nɛ̀ ea-a er ŋma bíí na mbɛt, wen nu'i nɛ ko GASA WAN.

¹⁵«Oi zi̧a̧ nu'i kilomɛtrɛ ɓu-zua-yiitoo nɛ reeta, pɛsa-a kilomɛtrɛ yiitoo nɛ reeta tɛ duk sɔɔ gee. Mɛ nɛ fara'i a̧ o bíí tɛ de ye kɔ-wa sɛnɛ in fara-dai o mɔ-dai kɔ-wa sɛnɛ. Ye'i tɛ duk tan see-a.

¹⁶Pɛsa-a tɛ nyɛm ŋmaa in zi̧a̧-a̧ tɛ mɛtrɛ booro-yiitoo-nɛ-gɔmŋmaa-yiitoo-zua-ɓu-mɔɔrɔ.

¹⁷Ɓɛɛ pɛsa bɛɛ-mɔ mɛ ɗoŋ ye tɛ duk nɛ mɛtrɛ gɔmŋmaa-nɛ-ɓu-yiitoo-zua-mɔɔrɔ zik kpa nu ŋmaa, wen ha̧ o mɔ-dai mɛ nyɔŋ mɔ sɛnɛ.

¹⁸Oi be oi nu tɛ duk ká̧ ye'i nɛ war mgbɔɔr in nɛ war mgbɔɔr mbɛt, zi̧a̧-a̧ si war daŋa-wese nɛ kilomɛtrɛ mɔɔrɔ; pɛsa-a si war yee-wese nɛ kale kpɔk mɔ hegɔ mbɛt, ɓɛɛ fara'i tɛ duk nɛ fara-fɔ wen o bíí sɛn tɛ ye'i.

¹⁹Fara'i tɛ duk nɛ fara-fɔ wen o be nutua ko Israɛl, koo so nɛ ge zuduk ge, nɛ tɛ duk tɛ ye'i.

²⁰«Nu nɛ oi-aa lɛŋ, zi̧a̧-a̧ tɛ duk nɛ kilomɛtrɛ ɓu-zua-yiitoo nɛ reeta, ɓɛɛ pɛsa-a tɛ duk nɛ kale mɔ mbɛt; war nu ko GASA WAN'i, ɛ́nɛ́ tɛ kɛ̧ tɛ fara naar, ɓɛɛ ɛ́nɛ́ baa kɛ̧a̧-a̧ kpɔk e wen saaye.

²¹«Ɓɛɛ oi nu nɛ tɛ ɓɔn tɛ duk wen be-wan, nɛ war ká̧ fara ko Sɔ̧ in nɛ war fara mɛ si saaye'i nɛ war mgbɔɔr in nɛ war mgbɔɔr mbɛt. Pɛsa nu ko be-wan tɛ duk nɛ kilomɛtrɛ ɓu-zua-yiitoo nɛ reeta, ɓɛɛ gbaagur-a kpɔk tɛ nɛ hegɔɔ hɔ gbìsì mɛ si daŋa-wese, ɓɛɛ ɓii gbaagur-a tɛ̀ɛ̀ nɛ́ kɔ‘i hegɔɔ hɔ nu gba-tɔp nɛ war yee-wese mɛ. War nu ko be-wan tɛ duk hee ko oi bíí ga, ɓɛɛ war sa̧a̧ nu ko Sɔ̧ nɛ Tua ko Sɔ̧ tɛ duk sɛnɛ‘i, tɛ duk see-a.

²²Fara ko o be Levii in saaye mbɛt tɛ e nu ko Juda nɛ war ŋgɔn in nu ko Bɛnjamin nɛ war ɗɔɔ, ɓɛɛ war nu ko be-wan kpee ká̧ a̧ nɛ mgbɔɔr in nɛ mgbɔɔr mbɛt.»

²³«War nu nɛ‘i tɛ kɛ̧ ha̧ oi o zuduk be Israɛl nɛ mɔ'ɔ: Nu ko Bɛnjamin tɛ ku̧naŋ-a nɛ gbìsì mɛ si daŋa-wese yaknɛ hɔ nu gba-tɔp.

²⁴War nu ko Simɛɔŋ tɛ ndaɗi ŋmaa in nu ko Bɛnjamin ku̧u̧naŋ-a nɛ war daŋa-wese hɔ nɛnɛ nu gba-tɔp.

²⁵War nu ko Isakar tɛ ndaɗi ŋmaa in nu ko Simɛɔŋ ku̧u̧naŋ-a nɛ war daŋa-wese hɔ nɛnɛ nu gba-tɔp.

²⁶War nu ko Zabulɔŋ tɛ ndaɗi ŋmaa in ko Isakar ku̧u̧naŋ-a nɛ war daŋa-wese hɔ nɛnɛ nu gba-tɔp.

²⁷Ɓɛɛ war nu ko Gad ndaɗa ŋmaa in nu ko Zabulɔŋ, ku̧u̧naŋa-a nɛ war daŋa-wese hɔ nɛnɛ nu gba-tɔp.

²⁸«Gbìsì ko Gad nɛ war ká̧-zan-mɛ́-ɗɔɔ sɛn ká̧ nu ŋga-gbárà Nɛgɛb tɛ ku̧u̧naŋ-a nɛ Tamar hɔ nu yi Mɛriba-Kadɛs, ba nɛ be-zer nu Egiptɛ daŋnɛ a ɗɔɔ gasa gba-tɔp.

²⁹«Nu n’ɛnɛ tɛ pi̧ nɛ tani kɛ̧ nɛnɛ ha̧ o zuduk be Israɛl nɛ mɔɔ-oi in yuwar kɛ̧a̧-a̧ mbɛt'i nɛ mɔ‘i. Nɛ GASA WAN Sɔ̧ a̧ tɔ̧ɔ̧ hegɔ.»

³⁰Nú garo-ye-mɔ si Jerusalɛm nɛ́ ɓu-zua-yiitoo, ɓɛɛ wi tɛ a nɛ́ nin o zuduk be Israɛl kpɔk kpɔk ha̧ wa. Zi̧a̧ kiitɛ garo nɛ̀ oi-aa nɛ̀ war ká̧-zan-mɛ́-ŋgɔn tɛ duk nɛ́ mɛtrɛ booro-yiitoo-nɛ-gɔmŋmaa-yiitoo-zua-ɓu-mɔɔrɔ, ɓɛɛ nú-a tɛ ya nɛ taar, ko Rubɛn, ko Juda in ko Levii.

³²Zi̧a̧ garo wan mɛ si daŋa-wese tɛ duk nɛ́ mɛtrɛ booro-yiitoo-nɛ-gɔmŋmaa-yiitoo-zua-ɓu-mɔɔrɔ, ɓɛɛ nú-a tɛ ya nɛ́ taar, ko Jozɛf, ko Bɛnjamin in ko Dan.

³³Zi̧a̧ garo mɛ war Nɛgɛb, wan mɛ si ká̧-zan-mɛ́-ɗɔɔ tɛ duk nɛ mɛtrɛ booro-yiitoo-nɛ-gɔmŋmaa-yiitoo-zua-ɓu-mɔɔrɔ, ɓɛɛ nú-a tɛ ya nɛ taar, ko Simɛɔŋ, ko Isakar in ko Zabulɔŋ.

³⁴Ɓɛɛ zi̧a̧ garo mɛ si war gba-tɔp tɛ duk nɛ mɛtrɛ booro-yiitoo-nɛ-gɔmŋmaa-yiitoo-zua-ɓu-mɔɔrɔ, nú-a tɛ ya nɛ taar mbɛt, ko Gad, ko Asɛr, in ko Nɛftalii.

³⁵Zi̧a̧ garo nɛ tɛ zik ye'i kpa nú ŋmaa tɛ de nɛ mɛtrɛ booro-mɔɔrɔ-ɗoŋ-naar, ɓɛɛ ku̧u̧naŋ-a sɔsɔɔ‘i hegɔɔ yak nɛnɛ, wi tɛ sa nin ye'i nɛ́ «GASA WAN a̧a̧ hi̧i̧»!