Read Northwest Gbaya EZEKIƐL 5 Bible Online

EZEKIƐL 5 - Northwest Gbaya bible

EZEKIƐL 5

¹Ɓɛɛ nɛ mɔ'ɔ nɛ Sɔ̧ tɔ̧ɔ̧ woyo: «Mɛ́ bíí, mɛ̀ bá ŋma tɔ̧ɔ̧ nu gba-paa hee pai ga, ɓɛɛ mɛ̀ kpúí mui̧-zu-mɛ gu nɛ zera kɔ-mɛ lɛŋ a nu. Mɛ̀ mɔ́í̧ mu̧i̧-zu-mɛ‘i, ɓɛɛ mɛ̀ kɛ̧́ duk-aa nɛtɛ nɛtɛ taar.

²Mɛ̀ dɔ́ tua-a kpɔk see ye ŋgimbi nɛ o bíí be tɛ̀ɛ́ kɛr ye nɛ biro; mɛ̀ bá yiitoo tua-a mgbɔ nɛ yi gba-paa zik nɛ ye duk nu ŋmaa. Ɓɛɛ mɛ̀ ŋmásí oi tua-a'i ha̧ búk kai pɛsi yaknɛ, ɓɛɛ mi tɛ dak gba-paa kɔ‘m duk ɗoŋ-aa.

³Ɓɛɛ mɛ̀ bá ŋma be mu̧i̧-zu-mɛ tikiɗi e kɔ̧ zibaa-laa kɔ-mɛ.

⁴Mɛ̀ káí ŋma be mu̧i̧-zu-mɛ woyo wen dɔa-a tɛ wee, ɓɛɛ wee-aa tɛ pɛsi de ŋmaa in o be Israɛl lɛŋ.

⁵«Mi GASA WAN, mɔ n'am tɔ̧ nɛ mɔ'ɔ: Mɔ nɛ tɛ kpa Jerusalɛm, ye n'am ee so mgbara o tugun bíí, nɛ o gɔni-duk ɔɔ so ye zik a̧ e see-a, nɛ mɔ‘i.

⁶O wi Jerusalɛm mbo zu tɛ o heembea in o ha̧a̧nú n'am ha̧a̧ so ha̧ wa na. Wa dee ŋgazu in am gan oi dɔka tugun bíí nɛ ɔɔ zik wa. Wa pi̧i̧ o heembea kɔ‘m taŋ; wa bɛ̧ɛ̧ nɛɛ nɔ nyɛm nɛ ɗoŋ o ha̧a̧nú kɔ‘m.

⁷Mi GASA WAN, Sɔ̧, mi tɔ̧ɔ̧ ha̧ wa'e nde: Ɛnɛ dee ŋgazu gan o dɔka dukbíí nɛ ɔ zik'nɛ́. Ɛ́nɛ́ nɛ nɔ nyɛm ɗoŋ o heembea kɔ‘m na, ɛnɛ mbo zu tɛ o ha̧a̧nú kɔ‘m na mbɛt, ɓɛɛ ɛnɛ baa nɛ yuwar deemɔ ko o tugun bíí nɛ ɔ zik'nɛ́.[6]

⁸Ɓɛɛ sa'm tɔ̧‘e nde, mi tɛ ba zu'm duk nɛ ɛnɛ; mi tɛ gɔn ŋga kita zu'nɛ́, ɓɛɛ mi dee mɔ-aa mgbák saaye Jerusalɛm ha̧ o tugun bíí lɛŋ mɛ zɔk.

⁹Mɔ n'am tɛ de so nɛti na, a̧‘m tɛ de in'nɛ̀ɛ́, wen deemɔ k’ɛ́nɛ́ duk nɛ ndiŋmɔ nyɛmna, ɓɛɛ mi beka de pɛrti mɔ‘i woyo ɓɔna mbɛt.

¹⁰Sɛn saaye, o dáa-wan-bem tɛ nyɔŋ o bem kɔ‘i, in o bem tɛ nyɔŋ o daa kɔ‘i mbɛt. Mi tɛ pi̧ ŋga bɔnɛ zu'nɛ́, ɓɛɛ mi pɛsa oi ndaa o bíí nɛ tɛ ɓɔn dam ti zan fara lɛŋ.

¹¹«Mɔ nɛ mi GASA WAN Sɔ̧ nɛ duk kpasa tɔ̧ nɛ mɔ'ɔ: Ɛnɛ ɗaŋa war sa̧a̧ Tua kɔ‘m nɛ o deemɔ búù k’ɛ́nɛ́, in ɗafa o gee sɔ̧ k’ɛ́nɛ́. Hegɔ, mi tɛ kum'nɛ́ yinɛ, nɛ ko beka bo yí‘m na.

¹²Ɛnɛ tɛ kɛ̧ tɛ fara taar: o ɛ̧ɛ̧ nɔ'ɔ tɛ fe tɛ zɛɛ-geŋa kóó tɛ wɔ sɛn saaye’ɛ; o ŋma tɛ fe nɛ fio gba-paa, ɓɛɛ mi tɛ pɛsi o oi ndaa bíí dam ti zan, mi tɛ duk ɗoŋ wa nɛ gba-paa yaknɛ sóróm.

¹³Mi tɛ kifi er h’ɛ́nɛ́, mi tɛ de mɔ ba nú‘nɛ́ nyɛm nɛ ɗoŋ ŋga nyimsea kɔ‘m, ha̧ see-am mɛ ga̧. Mɛ nɛ ŋgimbi'i ɛ̀nɛ̀ tɛ iŋ nɛnɛ nde, mi GASA WAN tɔ̧ɔ̧ wen’ɛ zu'nɛ́ tɛ nyimsea kɔ‘m.

¹⁴Mi tɛ de ha̧ fara k’ɛ́nɛ́ mɛ duk bɛɛ-oi in mɔɔ-búù ti o tugun bíí lɛŋ nɛ ya zik'nɛ́ ka ba nɛ o wi-ɓir-war mbɛt.

¹⁵Mi tɛ de bɔnɛ in Jerusalɛm tɛ ŋga nyimsea kɔ‘m tɔ̧ nɛ ŋga wen a zu a̧. Ye'i tɛ duk nɛ mɔɔ-mami in mɔɔ-zɛkɛɗi ko o wi nɛ ɔ zik wa, ɓɛɛ mɔ‘i tɛ duk nɛ mɔɔ-mbaŋ tɛ-wa in mɔɔ-pi̧ kíì tɛ-wa; nɛ mi GASA WAN a̧ tɔ̧ wen’ɛ.

¹⁶«Mi be tɛɛ tom kaɓa pi̧ zu'nɛ́ mɛ kum'nɛ́, mɔ‘i tɛ pi̧ gasa bɔnɛ zu'nɛ́ hee mɔ'ɔ nɛ góò ba nɛ wi’ɛ ga. Mi tɛ ɗaŋ o nyɔnɔ mɛ kɔ̧ dam k’ɛ́nɛ́ wen h’ɛ́nɛ́ mɛ fe wɔ.

¹⁷Mi tɛ tom kaɓa in o ɗaŋ boko-nam pi̧ zu'nɛ́ nɛ tɛ kum o bem k’ɛ́nɛ́. Zɛɛ-geŋa, o ŋgamɔ, ka ba nɛ gba-paa tɛ kum'nɛ́; nɛ mi GASA WAN a̧ tɔ̧ h’ɛ́nɛ́.»