Read Northwest Gbaya EZEKIƐL 6 Bible Online

EZEKIƐL 6 - Northwest Gbaya bible

EZEKIƐL 6

¹Ɓɛɛ GASA WAN tɔ̧ ha̧‘m woyo:

²«Mɛ́ bíí, mɛ̀ zɔ́k mɔ si zu o kaya Israɛl, ɓɛɛ mɛ̀ tɔ̧́ wen a zu wa.

³Mɛ̀ tɔ̧́‘e: Ɛnɛ o kaya Israɛl, ɛ̀nɛ̀ zíí wen nɛ GASA WAN Sɔ̧ tɔ̧ h’ɛ́nɛ́'ɛ; wen'i nɛ̀ GASA WAN Sɔ̧ tɔ̧‘i mɛ nɛ ha̧ o wi-ɔ-zu kaya, in o wi-ɔ-zu-tɔ̧ gu nɛ o wi-ɔ-kɔ̧ gboŋgo ka ba nɛ o wi-ɔ-kɔ̧ ɗɔŋgɔ mbɛt. Mi tɛ dak biro pi̧ zu'nɛ́ mɛ ɗaŋ fara-ɗafi-o géé-sɔ̧ k’ɛ́nɛ́ yinɛ.

⁴O fara-ɗafi-sɔ̧ k’ɛ́nɛ́ tɛ ɗaŋ yinɛ lɔkɔti lɔkɔti, o kpáná-ɗafi-sɔ̧ k’ɛ́nɛ́ tɛ gba mbɛt, ɓɛɛ o bíí nɛ dɔka-a mgbara'nɛ́ tɛ kum ti o géé-sɔ̧ k’ɛ́nɛ́‘i.

⁵Mi tɛ mɔi̧ o wɔr be Israɛl a ti o géé-sɔ̧ kɔ-wa, ɓɛɛ mi pɛsa o gba̧a̧ fio-wa zik nɛ fara-ɗafi-sɔ̧ kɔ-wa.

⁶O gasa ye tɛ ɗaŋ lɔkɔti lɔkɔti gu nɛ o fara-ɗafi o géé-sɔ̧ k’ɛ́nɛ́; o kusi-sɔ̧ in o géé-sɔ̧ k’ɛ́nɛ́ nɔ‘i lɛŋ tɛ gbin a nu ɗɛsɛ-ɗɛsɛ gu nɛ o kpáná-ɗafi-wa mbɛt. O tom k’ɛ́nɛ́ lɛŋ tɛ kifi nɛ geemɔ.

⁷O bíí mgbara'nɛ́ nɛ dɔka-a tɛ tir a nu nɛ fio, ɓɛɛ ɛnɛ tɛ iŋ‘e, mi nɛ GASA WAN.

⁸«Mi tɛ mɔi̧ o oi ndaa bíí mgbara'nɛ́, nɛ mɔ hɔɔ yɔɔ zu wa nu gba-paa ɓɛɛ nɛ pɛsa so dam mgbara o tugun bíí sitɛ o ŋma nu.

⁹Ɓɛɛ tɛ oi o ndaa bíí mgbara'nɛ́, nɛ wa tɛ kai nɛ bara-biro yaknɛ si mgbara o tugun bíí mɛ‘i tɛ mbaŋ ɗoŋ am. Mi tɛ de ha̧ see-wa mɛ gɔn zu mɔɔ-dàlà kɔ-wa, in yí-wa nɛ duk ɗoŋ o géé-sɔ̧‘i mɛ́ kaɗi zɔka mɔ si ɗoŋ wa. Wa nɛ̀ tɛ-wa tɛ zɔk mɔ nɛ̀ wa dea, nɛ̀ bó nɛ́ demɔ na, nɛ duk nɛ mɔɔ-nyɛr ti'm.

¹⁰Ɓɛɛ nɛ́ hi̧i̧ a̧ wa tɛ iŋ nɛnɛ‘e, mi nɛ GASA WAN, ɓɛɛ bó nɛ́ géè a̧‘m tɔ̧ nɛ̀ ŋga wen-usa-bɔnɛ ha̧ wa na.»

¹¹GASA WAN Sɔ̧ tɔ̧ɔ̧ ha̧‘m: «Mɛ̀ mbɛ́r er-mɛ, mɛ̀ tó naŋ-mɛ nɛ ŋmaa, ɓɛɛ mɛ̀ tɔ̧́‘e, ‹Oee!› Mɛ̀ nɛ́ wen ɗaŋmɔ nɛ o be nutua ko Israɛl dea, nɛ́ mɔ'ɔ nɛ wa tɛ kum nu gba-paa, in tɛ kaɓa ká bá nɛ̀ ŋga zɛɛ-geŋa’ɛ!

¹²Wi nɛ̀ duk ɓɔn oi-wi tɛ fe nu gba-paa, ɓɛɛ oi o bíí nɛ mɔ hɔɔ yɔɔ zu wa tɛ kum nɛ kaɓa; mi tɛ de mɔ ba nú-wa nyɛm nɛ ɗoŋ ŋga nyimsea kɔ‘m.

¹³Wɔr o bíí k’ɛ́nɛ́ tɛ a nu ti o géé-sɔ̧ k’ɛ́nɛ́ kémbéŋ-kémbéŋ zik nɛ o fara-ɗafi-sɔ̧ k’ɛ́nɛ́. O wɔr bíí tɛ ya nɛ zu o zu-tɔ̧́ in nɛ zu o kaya nɛnɛ, ká bá nɛ̀ ti ɗɔɔ o da̧a̧-wa̧a̧-te in gba de o gasa te lɛŋ,[7] sɛn fara-dɔ-fuu-nyama ha̧ o géé-sɔ̧ k’ɛ́nɛ́ mbɛt, ɓɛɛ ɛ́nɛ́ tɛ iŋ‘e, mi nɛ GASA WAN.

¹⁴Mi tɛ nyɛi̧ er-am mɛ ɗaŋ nu k’ɛ́nɛ́ yinɛ lɔkɔti-lɔkɔti. Fara-duk k’ɛ́nɛ́ tɛ duk nɛ bɛɛ-oi ŋga-gbárà mɛ hɔ nɛnɛ Dibla. Mɛ̀ nɛ́ tɛ ŋgimbi'i ɛ̀nɛ̀ tɛ iŋ nɛnɛ‘e, mi nɛ́ GASA WAN.»