Read Northwest Gbaya EZEKIƐL 7 Bible Online

EZEKIƐL 7 - Northwest Gbaya bible

EZEKIƐL 7

¹Nɛ mɔ'ɔ nɛ GASA WAN tɔ̧ɔ̧ ha̧‘m:

²«Mɛ́ bíí, mɛ̀ tɔ̧́ ha̧ o be Israɛl‘e, nɛ́ GASA WAN Sɔ̧ a̧ tɔ̧ wen’ɛ: War k’ɛ́nɛ́ kaɗa! Sɔŋkur mɔ nɛ tɛ kpa'nɛ́ tɛ tik zu nu k’ɛ́nɛ́ kpa nu ŋmaa lɛŋ.

³«Kinii Israɛl, sɔŋkur mɔ kɔ-mɛ nɛ́ mɔ'ɔ nɛ hɔa’ɛ. Nyimsea kɔ‘m tɛ tik zu mɛ; mi tɛ gɔn kita zu mɛ wen ɗaŋmɔ nɛ mɛ dea. Nɛ́ ɗaŋ ndiŋmɔ kɔ-mɛ à̧ tɛ́ tik zu mɛ woyo.

⁴Ko beka bo yí‘m ha̧ mɛ na; mi beka de ko ha̧ mɛ na kóó tikiɗi; mi tɛ pi̧ wen zu mɛ oi ɗaŋ deemɔ kɔ-mɛ. Ɗaŋ ndiŋ deemɔ kɔ-mɛ‘i tɛ si ɗoŋ zu mɛ, ɓɛɛ hegɔ‘i ɛnɛ tɛ iŋ‘e, mi nɛ GASA WAN.

⁵«Nɛ́ GASA WAN Sɔ̧ a̧ tɔ̧ wen’ɛ: Ŋgamɔ n’ɛnɛ tɛ zɔk nɛ ti na a̧ tɛ‘i.

⁶Sɔŋkur mɔ a̧ hɛɗi tɛnɛ‘i! A̧ a̧ tɛ tik zu mɛ‘i! Hɔɔ katɛ mɛ dɔ̧ɔ̧! Hɔɔ hɔɔ kaɗi!

⁷Sɔŋkur mɔ k’ɛ́nɛ́ o bíí nu’ɛ nɛ́ mɔ'ɔ nɛ̀ hɛɗi tɛnɛ'ɛ. Ŋgimbi-a hɔa; wese-a a̧ nyɛm tɛnɛ‘i! Wese'i nɛ́ wese ŋga mɔɔ-kíì, nɛ̀ gima tortɛ in gima nyɛŋɛ nɛ̀ zu kaya mɛ beka bo ɓɔna.

⁸«Ɓɛɛ kinii, mi tɛ mɛ pi̧ ŋga nyimsea kɔ‘m zu mɛ, mi tɛ de mɔ ba nú-mɛ́ nyɛm nɛ ɗoŋ ŋga nyimsea kɔ‘m. Mi tɛ gɔn kita zu mɛ wen ɗaŋmɔ nɛ̀ mɛ́ dea; mi tɛ pi̧ wen zu mɛ zu o ɗaŋ ndiŋ deemɔ kɔ-mɛ lɛŋ.

⁹Ko beka bo yí‘m ha̧ mɛ ɓɔna, mi beka de ko ha̧ mɛ na kóó tikiɗi. Mi tɛ de mɔ in mɛɛ nyɛm nɛ̀ ɗoŋ ɗaŋmɔ nɛ̀ mɛ́ dea; o ɗaŋ ndiŋ deemɔ kɔ-mɛ‘i tɛ si ɗoŋ zu mɛ, ɓɛɛ hegɔ‘i ɛnɛ tɛ iŋ‘e nɛ mi GASA WAN a̧ qusi'nɛ́.

¹⁰«Mɛ̀ zɔ́k wese ŋgamɔ nɛ mɔ'ɔ nɛ tɛ‘i. Ŋgimbi kɔ-mɛ nɛ mɔ'ɔ nɛ hɔa'i. Nyasi nyafa tan nɛ̀ mɛ kaɗi; ŋmaŋa tɛ kɔ-mɛ‘i hɔɔ nduti.

¹¹Ŋgamɔ nɛ́ nyasi nɛ̀ nyafa mɛ́ gusi bíí‘i. Ŋma mɔ kɔ-wa bo ɓɔna; giti mɔ kà bó nɛ̀ gɔfa mɔ kɔ-wa bo ɓɔna: wa kpa gee kpaa ɔma-tɛ tɛ bɔnɛ na.

¹²«Ŋgimbi hɔa, wese-a a̧ nyɛm tɛnɛ‘i. Ká o wi-hi̧fi̧-mɔ dé tortɛ gee na, ká o wi-ɗɔr-mɔ nyim tɛ na mbɛt, wen nyimsea ko Sɔ̧ tɛ tik zu o bíí nu’ɛ lɛŋ.

¹³Wan-ɗɔr-mɔ beka kpa mɔ n'aa ɗɔra woyo na, kóó a̧ ɓɔna so kpasa. Hɔɔ-zu nɛ usi sɔŋkur ɗaŋa-a ko dukbíí'ɛ lɛŋ‘i tɛ hɔ gba̧a̧. O wi nɔ‘i tɛ ɓɔn kana tɛ dee ɗaŋmɔ siti; ŋma bíí mɛ kpasi tɛ-wi nɛ tɛ-wi bo na.

¹⁴Wa mbɛr nɛ bi̧ɔ̧-biro wen mɔi̧a o bíí mɛ ɗafi mɔ, ɓɛɛ o wi-nɛ-biro bo na, wen nyimsea kɔ‘m tika zu o bíí lɛŋ, ŋma bíí mɛ yu ɗɔɔ-aa bo na.»

¹⁵«Gba-paa nɛ̀ zan, zɛɛ-geŋa in kaɓa nɛ̀ kɔ̧ a̧: kóó o nde nɛ tɛ duk kpɛɛfɔ tɛ fe nu gba-paa, ɓɛɛ o wi nɛ tɛ ya tɛ gasa ye, zɛɛ-geŋa in kaɓa tɛ kum wa.

¹⁶Ɓɛɛ o wi-yu-ŋgamɔ tɛ yu mɔ, wa tɛ yu mɔ si zu kaya hee gbaku̧i kɔ̧ ɗɔŋgɔ ga, ɓɛɛ mi tɛ kum wa kpɔk kpɔk lɛŋ nyɛm nɛ ɗoŋ ɗaŋmɔ kɔ-wa.

¹⁷Tɛ o bíí lɛŋ tɛ mɔk, zugur-wa tɛ yɔmbi a zu ŋmaa;

¹⁸wa tɛ mar bufu, bele tɛ zar wa a nu; zu-wa tɛ diti nɛ foe, ɓɛɛ wa lɛŋ tɛ kpui zu.

¹⁹Wa tɛ kai o sede kɔ-wa a taŋ nɛ yuwar nɛnɛ, lɔr kɔ-wa tɛ duk hee yɔsɛ ga sɛn yí-wa. Wese nɛ nyimsea ko GASA WAN tɛ kur, kóó nɛ́ bu-mbɔi, kóó lɔr beka kpasi wa na. Wa beka kpa mɔɔ-gɔn nu wɔ-mɔ tɛ-wa na; zaŋ-wa beka sur na mbɛt, wen nɛ́ lɔr in bu-mbɔi a̧ pi̧i̧ so wa tɛ ɗaŋmɔ.

²⁰Nɛ́ o gba de mɔɔ-ɗafi-tɛ a̧ dee so ha̧ wa mɛ ŋmaŋ tɛ, ɓɛɛ o mɔɔ nɔ‘i a̧ wa kaia dui nɛ o géé-sɔ̧ nɛ duka nɛ gasa ɗaŋmɔ kɔ-wa. Hegɔ mi tɛ de ha̧ o mɔɔ nɔ‘i mɛ duk nɛ mɔɔ-búù zu wa.

²¹Mi tɛ e ha̧ o gɔni-duk mɛ ɓar mɔ kɔ-wa, ha̧ o wi-ɗaŋ zaŋnu’ɛ mɛ fɛŋ o mɔ kɔ-wa, kai nɛnɛ yaknɛ nɛ mɔɔ-oi-biro.

²²Mi tɛ ba yí‘m tɛ-wa yinɛ, ɓɛɛ o wi-zuzu tɛ ye Tua kɔ‘m, mɛ kai o demɔ kɔ‘m yaknɛ; o gɔni-bíí tɛ ye fara'i, ɓɛɛ wa tɛ fɛŋ sa̧a̧-fara kɔ‘m.

²³Mɛ̀ dúí nyak-zɔɓɔ, wen nu’ɛ duna nɛ gbɛɛ-zu, gasa ye duna nɛ dee ŋgamɔ.

²⁴Mi tɛ de ha̧ o ŋga ɗaŋ tugun bíí mɛ tɛ mɛ ɓar o tua kɔ-wa ba; mi tɛ gɔn ndaa ŋgayamɔ ko o ŋga-wi, ɓɛɛ sa̧a̧ fara kɔ-wa tɛ fɛŋ.

²⁵Dita-see a̧ tɛ‘i! Wa tɛ kii ga̧a̧mɔ takaɗi.

²⁶Ŋgamɔ zu ŋgamɔ tɛ kpa wa; ɗaŋ nyɛrɛmɔ tɛ hɔ ɗoŋ ŋmaa ɗoŋ ŋmaa yaknɛ. Wa tɛ nɛ mɛ ak wi-tɔ̧-wen oi nú Sɔ̧ mɛ tɔ̧ mɔ n'aa zɔka ha̧ wa takaɗi; wi-ɗafi-sɔ̧ beka iŋ mɔ mɛ usi ɓɔna, o kuti-wi beka tɔ̧ mbɔrɔ ɓɔna mbɛt.

²⁷Wannu tɛ zim mɔ, gɛ̧ɛ̧mɔ tɛ ba be-wan, ɓɛɛ er o bíí tɛ nak. Mi tɛ de bɔnɛ in wa nyɛm nɛ ɗoŋ ɗaŋmɔ kɔ-wa. Mi tɛ gɔn kita zu wa nyɛm nɛ ɗoŋ gɔna kita kɔ-wa. Ɓɛɛ wa tɛ iŋ‘e, mi nɛ GASA WAN.»