Read Northwest Gbaya EZEKIƐL 8 Bible Online

EZEKIƐL 8 - Northwest Gbaya bible

EZEKIƐL 8

¹Pɛ mɔɔrɔ-ɗoŋ-kpɔk nɛ reeta, nɛ ɔɔ-zɛ mɔɔrɔ yaka tɛ pɛ bara, mi a̧a̧ so tɛ duka-a nu tua kɔ‘m in o gasawi nutua ko Juda nɛ yaa zik am, ɓɛɛ ŋgayamɔ ko GASA WAN duk zu'm.

²Kà‘m tɛ ba yí‘m nɛ ŋgɔn wo, ɓɛɛ ŋma mɔ nɛ hɔɔ ŋmaa in saŋa-yí bíí nɛ mɔ'ɔ nɛ duk’ɛ, ɓɛɛ mɔ nɛ duk hee golo-zaŋ-aa mɛ́ sí ɗɔɔ ga duk hee wee ga, ɓɛɛ golo-zaŋ-aa mɛ si ŋgɔn duk tok nɛnɛ hee gbɛ̧ boi ga.

³Ɓɛɛ nɛ mɔ'ɔ nɛ wi’ɛi nyɛi̧a ŋma mɔ hee er bíí ga, ɓɛɛ ɗɛk am tɛ mui̧-zu'm; nɛ́ tɛ ŋgimbi'i a̧ ɔmi baa nɛ‘m ga̧i̧ ŋgɔn, naŋ-am ndɔ nu na, ba'm nɛnɛ tɛ hɔɔ-zu'i, nɛ́ɛ̀ e Jerusalɛm mɛ. A̧ baa'm nɛ́ɛ̀ e nu tua ye si kɔ̧ gasa bɛr-tua nɛ zɔk mɔ si ká̧-zan-mɛ́-ŋgɔn mɛ; nɛ́ fara'i a̧ géé-sɔ̧ duk sɛnɛ, nɛ́ géé-sɔ̧‘i a̧ a̧ŋa nyimsea-gɔya ko Sɔ̧ a ŋgɔn.

⁴Ɓɛɛ gasamɔ ko Sɔ̧ ko Israɛl nɛ mɔ'ɔ nɛ duk’ɛ, hee mɔ'ɔ n'am ɔɔ so zu zɔk nɛnɛ sɛn kɔ̧ ɗɔŋgɔ mɛ‘i ga.

⁵Ɓɛɛ nɛ mɔ'ɔ nɛ Sɔ̧ tɔ̧ɔ̧ ha̧‘m: «Mɛ́ bíí, mɛ̀ bá yí-mɛ nɛ ŋgɔn si war ká̧-zan-mɛ́-ŋgɔn ai.» Nɛ mɔ'ɔ n'am baa yí‘m nɛ ŋgɔn si nu zala wan mɛ si ká̧-zan-mɛ́-ŋgɔn fara-ɗafi-sɔ̧, ɓɛɛ géé-sɔ̧ nɛ ɗaŋ see sɔ̧, nɛ mɔ'ɔ nɛ duk ká̧ gasa nu tua mɛ‘i’ɛ.

⁶Sɔ̧ tɔ̧ɔ̧ ha̧‘m: «Mɛ́ bíí, bo nɛ mɛ zɔka mɔ nɛ wa de’ɛ na? Bo nɛ mɛ zɔka o ndiŋmɔ nɛ o be Israɛl de, nɛ de ha̧‘m mɛ e Tua kɔ‘m duk’ɛ na? Ɓɛɛ mɛ tɛ zɔk o ŋma zɔm ndiŋmɔ woyo mbɛt.»

⁷Ɓɛɛ nɛ mɔ'ɔ n'aa mgbɔɔ am si nu tua gboa-a si bee-gara, ɓɛɛ mi zɔk ŋma gboo-zaŋ-ŋgeŋ.

⁸Ɓɛɛ a̧ tɔ̧ ha̧‘m: «Mɛ́ bíí, mɛ̀ gbó zaŋ ŋgeŋ'ɛ.» Mi gboo zaŋ ŋgeŋ‘i, ɓɛɛ mi zɔk ŋma yuwar nɛ duk si kɔ̧ mɔ mɛ.

⁹Nɛ mɔ'ɔ n'aa tɔ̧ɔ̧ ha̧‘m: «Mɛ̀ yé si kɔ̧ mɔ'ɔ a̧ mɛ zɔk o ɗaŋ mɔɔ-nyɛr nɛ o wi nɔ'ɔ de’ɛ.»

¹⁰Mi yee fara'i, ɓɛɛ mi zɔk o mɔ nɛtɛ nɛtɛ nɛ wa mboa, o ŋma hɔɔ ŋmaa in o saɗi-gbur-zaŋ nɛ nu, o ŋma hɔɔ kɔ‘i ŋmaa in o saɗi-nyɛr. O géé-sɔ̧ nɛ o be Israɛl mboa lɛŋ, wa kaia, ga̧i̧ zaŋ ŋgeŋ tua kpa nu ŋmaa.

¹¹Ɓɛɛ o gasawi nutua Israɛl ɓu-mɔɔrɔ-ɗoŋ-yiitoo yor ti o géé-sɔ̧ nɔ‘i; Yazania bem ko Safaŋ a̧a̧ mgbara wa mbɛt. Wa lɛŋ kóó o nde nɛ̀ be kpánà er nɛ zi-wee fuu-nyama tur sɛnɛ.

¹²Ɓɛɛ sa Sɔ̧ ak am'e: «Mɛ́ bíí, bo nɛ mɛ zɔka mɔ nɛ o gasawi Israɛl de nɛ nu tum’ɛ na nde? Kóó o nde yor ti fara n'aa ɗafa e géé-sɔ̧ kɔ̧-a̧ sɛnɛ, ɓɛɛ wa ya tɔ̧ nɛnɛ‘e, ‹GASA WAN zɔk mɔ n’ɛɛ de’ɛ na. Kɔr zu-a nyɛi̧a nɛ yɛ kaɗi.› »

¹³Ɓɛɛ GASA WAN tɔ̧ ha̧‘m: «Mɛ tɛ zɔk mbe ɗaŋ deemɔ kɔ-wa woyo.»

¹⁴Ɓɛɛ a̧ mgbɔ‘m si nu Tua kɔ̧-a̧, wan nɛ zɔk mɔ si war ká̧-zan-mɛ́-ŋgɔn, ɓɛɛ o ŋma okoo mɔi̧a so ŋmaa ya hì̧í̧ nɛ Tamuz.[8]

¹⁵Ɓɛɛ a̧ tɔ̧ ha̧‘m: «Mɛ́ bíí, mɛ zɔka mɔ'ɔ nde? Mɛ tɛ zɔk mbe ɗaŋ deemɔ ko o wi nɔ'ɔ nɛ ɗaŋa gan wan mɛ ti'i.»

¹⁶Nɛ mɔ'ɔ n'aa mgbɔa'm nɛnɛ si bee-gara kɔ̧ Tua ko GASA WAN nɛ kɔ̧ a̧. Ɓɛɛ o bíí hee ɓu-yiitoo-zua-mɔɔrɔ ga nɛ mɔ'ɔ nɛ ya ɗɔɔ zala Tua ko GASA WAN mgbara dadaa-nu tua in fara-ɗafi-sɔ̧'ɛ. Wa zika ɗoŋ e sitɛ Tua ko Sɔ̧, ɓɛɛ wa ya zɔk mɔ si daŋa-wese, gbɛ nɛ zugur nu, gasi nɛ wese.

¹⁷Ɓɛɛ GASA WAN tɔ̧ ha̧‘m: «Mɛ́ bíí, mɛ zɔka o mɔɔ nɔ'ɔ nde? Mɔ‘i nɛ geɗek mɔ a̧ o be nutua ko Juda de tɛ gasa zɔm ndiŋmɔ nɛ wa de nɛnɛ'ɛ nde? Zu-a'i, wa duna nu’ɛ nɛ dee o ŋgamɔ, aŋ nɛ nyimsea kɔ‘m a ŋgɔn woyo. Gban-te hɛɗa mɛ ye kɔ̧ zɔ̧ɔ̧-wa kaɗi.

¹⁸Wen hegɔ see-am tɛ kur zu wa, mi beka de ko ha̧ wa na, ko beka bo yí‘m ha̧ wa ɓɔna mbɛt. Wa tɛ hiɗi mɔ nɛ ŋgaya-a pii tɛ‘m, ɓɛɛ mi tɛ kpe zer-am.»