Read Northwest Gbaya EZEKIƐL 9 Bible Online

EZEKIƐL 9 - Northwest Gbaya bible

EZEKIƐL 9

¹Nɛ́ mɔ'ɔ nɛ̀ Sɔ̧ tɔ̧ɔ̧ wen nɛ̀ hee ger; ɓɛɛ tɔ̧: «Bɔnɛ hɛɗa nɛ̀ ye’ɛ kaɗi! Ɛ́nɛ́ o wi-ɗaŋ Jerusalɛm, ɛ̀nɛ̀ mɔ́í̧ tɛnɛ pii hɛ̧ɛ̧. Kóó o nde a̧ ba boi-gbin-mɔ kɔ‘i tɛnɛ.»

²Ɓɛɛ o bíí mɔɔrɔ-ɗoŋ-kpɔk gɔm nɛ nu tua mɛ ŋgɔn nɛ war ká̧-zan-mɛ́-ŋgɔn tɛnɛ, kóó o nde nɛ boi-gbin-mɔ kɔ‘i er wi. Ɓɛɛ bíí kpɔk a̧a̧ so mgbara wa'i nɛ pi̧i̧ yɛm-yɛm laa nɛ mɔɔ-yɔr-mɔ ga̧i̧ tɛ kanda guntir-aa; wa lɛŋ yee mɔ, ɓɛɛ yor ká̧ fara-ɗafi-sɔ̧ nɛ‘i dee nɛ ndɛrɛ.

³Gasamɔ ko Sɔ̧ ko Israɛl kura zu keribim nɛ́ si dadaa nu Tua ko Sɔ̧ mɛ, ɓɛɛ a̧ sa wan yɛm-yɛm laa nɛ̀ a̧a̧ nɛ mɔɔ-yɔr-mɔ guntir-wi'i,

⁴ɓɛɛ tɔ̧ ha̧ a̧: «Mɛ̀ nɛ́ɛ̀ yár dam fara lɛŋ sɛn gasa ye Jerusalɛm, mɛ̀ yɔ́r mɔɔ-sedaako sɔnti o bíí nɛ gɔfi mɔ in o wan nɛ hi̧i̧ kɔ̧a̧ ɗaŋmɔ nɛ̀ o bíí tɛ ye'i de.»

⁵Ɓɛɛ mi zii wen nɛ Sɔ̧ tɔ̧ ha̧ o oi wi nɔ‘i'e: «Ɛ̀nɛ̀ nɛ́ ɗoŋ wi nɛ̀ yaka si saaye'i, ɛ̀nɛ̀ kúm o bíí. Ká ko de'nɛ́ ha̧ wa na, k’ɛ́nɛ́ de ko ha̧ bíí kpɔk na.

⁶O gbɛ́rɛ́, o ŋgaiwi, o zɔŋa, o bem gu nɛ o okoo lɛŋ, ɛ̀nɛ̀ kúm wa kum lɛŋ a nu gbuɗuk yinɛ. Ɓɛɛ k’ɛ́nɛ́ fo tɛ o wi nɛ mɔɔ-sedaako a̧a̧ sɔnti-wa na. Kaɗa, ɛ̀nɛ̀ nɛ̀! Ɛ́nɛ́ kú̧ naŋ gbɛɛ o bíí nɛ kɔ̧ Tua kɔ‘m mɛ.» Ɓɛɛ wa ku̧ naŋ gbɛɛ o gasawi nɛ yaa so nu Tua ko Sɔ̧.

⁷A̧ tɔ̧ɔ̧ ha̧ wa: «Ɛ̀nɛ̀ dé ndiŋmɔ a kɔ̧ Tua kɔ‘m, ɛ̀nɛ̀ gbɛ́ o bíí a nɛ bee-gara nɛnɛ. Kaɗa, ɛ̀nɛ̀ nɛ̀!» Ɓɛɛ wa gbo si saaye mɛ gbɛ o bíí yaknɛ.

⁸Ɓɛɛ ŋgimbi nɛ wa yaka mɛ gbɛ o bíí, mi yora ɓɔn oi-am ɛ̀n’ám, mi hɔ̧fa̧ gu sɔnti'm nu, ɓɛɛ mi hiɗi mɔ‘e: «Ho! GASA WAN Sɔ̧, see'nɛ́ kura zu Jerusalɛm, ɓɛɛ nɛ mɔ'ɔ n’ɛnɛ tɛ kum oi o be Israɛl yinɛ lɛŋ'ɛ nde?»

⁹Ɓɛɛ Sɔ̧ kifi nú ha̧‘m: «Yɔɔ-kaya ko o be nutua ko Israɛl in Juda yaka zale, wen wa tɔ̧a̧‘e, ‹GASA WAN ee nu’ɛ duk kaɗi; a̧ zɔk mɔ n’ɛɛ de’ɛ ɓɔna.› Nu’ɛ in Jerusalɛm duna nɛ gbɛɛ-zu in dee ɗaŋ mɔɔ-nyɛr.

¹⁰Ɓɛɛ kinii, ko beka de'm ha̧ wa na, mi beka de ko ha̧ wa ɓɔna; mi tɛ pi̧ wen zu wa oi ɗaŋ deemɔ kɔ-wa.»

¹¹Nɛ mɔ'ɔ nɛ wan-pi̧ yɛ́m-yɛ́m laa, nɛ̀ mɔɔ-yɔr-mɔ a̧a̧ tɛ kanda guntir-aa tɛ̀ɛ́ mɛ we ɗoŋ mɔ ha̧ a̧, ɓɛɛ tɔ̧: «Mi dee mɔ n’ɛnɛ tɔ̧ɔ̧ ha̧‘m mɛ de'i kaɗi.»