Read Northwest Gbaya DANIƐL 10 Bible Online

DANIƐL 10 - Northwest Gbaya bible

DANIƐL 10

¹Tɛ taar pɛ-wan ko Sirus wannu Pɛrsɛ, Sɔ̧ usa ŋma mɔ ha̧ Daniɛl nɛ‘i sa'e Bɛltasar. Mɔ‘i duka nɛ kpasawen nɛ usi nɛ mɔ zu ŋgamɔ nɛ tɛ tik zu nu. Daniɛl zia mgbara mɔ‘i sɛn tɛ hɔɔ-zu nɛ Sɔ̧ hɔɔ ha̧ a̧.

²«Tɛ ŋgimbi'i, mi Daniɛl, zima mɔ tɛ alat taar.

³Mi nyɔŋ so de nyɔŋmɔ na, kpoo in dɔ̧ɔ̧ ye nú‘m na, mi sɔ̧ nɔ̧́ tɛ‘m na mbɛt tɛ alat nɔ‘i taar'i.

⁴«Tɛ ɓu-yiitoo-zua-naar ɔɔ-zɛ tɛ kuti fio-zɛ, mi a̧a̧ so ká̧ nana-yì Tigrɛ.

⁵Kà‘m ba yí‘m nɛ ŋgɔn wo, mi zɔka ŋma bíí nɛ pi̧i̧ ŋma yɛm-yɛm laa, nɛ hɛra zaŋ nɛ kanda lɔr mɛ nu Ufaz.

⁶Tɛ-a duk so hee de toka ta ga, saŋa-yí-a tok hee pi̧i̧-kórò ga, o gbaayi-a ya hee leɓe-wee ga, o ɓaa-a in o naŋ-a hɔɔ ŋmaa in de yɔka ndɛrɛ. Tiger-a nɔ̧́í̧ hee gba giti ger giiwi ga.

⁷«Nɛ́ mi Daniɛl ɛ̀n'am a̧ zɔka so mɔ‘i ɓɛɛ; o bíí n’ɛɛ yaa so in o ŋmaa'i zɔk so kɔ-wa na. Zu-a'i, kíì dee wa nyɛmna, ɓɛɛ wa pɛsi yu mɔ yak nɛ́ɛ̀ hu̧si.

⁸Mi ɓɔna hi̧i̧ ɛ̀n'am zɔk nɛ gasa mɔ‘i; gba̧a̧-tɛ‘m gbina so lɛŋ, saŋa-yí‘m kpaia kifi nɛ ŋma mɔ nɛtɛ, ɓɛɛ ŋgai gbo tɛ‘m.

⁹Mi zia wen ko wi’ɛi, ɓɛɛ tɛ wen'i, bele zara'm pi̧ nu, ɓɛɛ mi ba sɔnti'm gu nu.

¹⁰Ŋma er bíí tama'm, ba'm e ŋgɔn, ɓɛɛ mi gu zu naŋ-am nak nɛnɛ.

¹¹«Wi’ɛi tɔ̧ɔ̧ ha̧‘m: ‹Daniɛl, wi nɛ dee tɛ Sɔ̧, mɛ̀ zíí gba̧a̧ wen n'am tɛ tɔ̧ ha̧ mɛ; mɛ̀ kúr mɛ̀ yór ŋgɔn wen mi a̧a̧ nɛ tom ha̧‘m mɛ tɔ̧ ha̧ mɛ.› Tɛ wen'i, mi kura yor nɛ naka-tɛ.

¹²«A̧ tɔ̧ɔ̧ ha̧‘m: ‹Ká mɛ de kíì na, Daniɛl, wen ŋgimbi nɛ mɛ ee so nɛ see-mɛ mɛ kii mgbara mɔ in nɛ mɛ mɔka nɛ see-mɛ ti Sɔ̧ kɔ-mɛ, a̧ kpɛka kɔfamɔ kɔ-mɛ, ɓɛɛ mɛ nɛ wen mɔ‘i a̧‘m tɛ nɛnɛ.

¹³Bem ko wannu Pɛrsɛ dee ŋgazu in am zɛ ɓu-yiitoo-zua-kpɔk, ɓɛɛ Michɛl ŋma kpɔk mgbara o gasa betom mɛ yiwese tɛɛ gbak am, ɓɛɛ mi ɓɔn kɔ‘m katɛ o wannu Pɛrsɛ hi̧i̧.

¹⁴Mi tɛa mɛ mbaŋ tɛ-mɛ wen mɔ nɛ tɛ hɔ zu dukbíí kɔ-mɛ nɛ ɗoŋ; mɔ nɛ mɛ zɔka tɛ hɔɔ-zu'i biti.›

¹⁵«Ŋgimbi n'aa tɔ̧ nɛ wen ha̧‘m'i mi zuma nɛ zu'm, duk nɛnɛ nɛ oi nú‘m,

¹⁶ɓɛɛ ŋma mɔ hee bíí ga tam ndàrá-nú‘m. Mi hu̧i̧a̧ nú‘m, ɓɛɛ mi tɔ̧ wen sitɛ wi nɛ yor ti'm'i'e: ‹Nyaa, zu n'am ɔa'i dee kíì pi̧ tɛ‘m nyɛmna, ɓɛɛ gba̧a̧-tɛ‘m mɔk lɛŋ.

¹⁷Mɔ nɛ wi-de-tom k’ɛ́nɛ́ tɛ̀ɛ́ kpa nɛ ŋgai mɛ tɔ̧ nɛ wen in'nɛ̀ɛ́ Nyaa, nɛ gba̧a̧-tɛ‘m gbina nɛnɛ in hiɗ‘am gɔna nɛnɛ mbɛt’ɛ nɛ ge mɔ ge?›

¹⁸«Hegɔ wi nɛ hɔɔ ŋmaa in bíí‘i tama'm woyo, ɓɛɛ ŋgai pii ɗoŋ tɛ‘m.

¹⁹Wi’ɛi tɔ̧a̧: ‹Ká mɛ de kíì na, bíí nɛ dee tɛ Sɔ̧, ga̧a̧mɔ a̧ duk zu mɛ, mɛ̀ kpá ŋgai in mɛ̀ nɔ́ ŋgiɗi.› Tɛ wen nɔ‘i n'aa tɔ̧ɔ̧ ha̧‘m'i, mi kpaa ŋgai, ɓɛɛ mi tɔ̧: ‹Nyaa, ɛ̀nɛ̀ tɔ̧́ wen, wen ɛ́nɛ́ ha̧a̧ ŋgai ha̧‘m kaɗi.›

²⁰«Ɓɛɛ a̧ tɔ̧ ha̧‘m: ‹Mɛ iŋa mɔ nɛ dee ha̧‘m mɛ tɛ tɛ mɛ nde? Mi tɛ̀ɛ̀ mɛ we ɗoŋ gba̧a̧ mɔ nɛ yɔra zaŋ Kalata kpasawen ha̧ mɛ. Kinii, mi tɛ si ɗoŋ mɛ bi biro in be-wan Pɛrsɛ, ɓɛɛ nɛ ŋgimbi n'am tɛ yak nɛ kɔ‘m kaɗi, a̧ be-wan Grɛk tɛ hɔ nɛ kɔ‘i. Ŋma bíí nɛ yee ɗoŋ-am tɛ biro in o wi nɔ‘i bo na, kana nɛ Michɛl be-wan k’ɛ́nɛ́ ɓɛɛ.