Read Northwest Gbaya DANIƐL 11 Bible Online

DANIƐL 11 - Northwest Gbaya bible

DANIƐL 11

¹« ‹Ɓɛɛ kɔ‘m tɛ kuti pɛ-wan ko Darius be Mɛdɛ, mi yora so ɗoŋ Michɛl, ha̧ nɛ ŋgai ha̧ a̧.

²« ‹Kinii, mi tɛ tɔ̧ kpasawen ha̧ mɛ. Ŋma wannu Pɛrsɛ taar tɛ hɔ, ɓɛɛ naar-a nɛ tɛ hɔ tɛ kpa mbɔi nɛ dɔka-a gan ko o wan mɛ ti, ɓɛɛ ŋgimbi nɛ mbɔi'i tɛ de ha̧ a̧ mɛ kpa ŋgai, a̧ tɛ ba biro duk nɛ nu Grɛk.

³« ‹Mɔ kpɔk, ŋma ŋga wannu tɛ kur tɛ nu Grɛk; nu kɔ̧-a̧ tɛ gasi, ɓɛɛ a̧ tɛ de mɔ hee see-aa kɔ̧ɔ̧ ga.

⁴Ɓɛɛ nɛ tɛ ŋgimbi nɛ mɔɔ-wan kɔ̧-a̧ tɛ kpa nɛ ŋgai a̧ wan'i tɛ ɗaŋ, ɓɛɛ wa kɛ̧ɛ̧ dam mgbii-zan naar lɛŋ. Mɔɔ-wan'i tɛ ye nɛ er o ŋma bíí nɛtɛ nɛ beka kpa ŋgai hee nɛti ga na; mɔɔ-wan'i beka pii ɗoŋ er o bezaŋ-aa ɓɔna mbɛt.

⁵« ‹Wannu mɛ ká̧-zan-mɛ́-ɗɔɔ tɛ kpa ŋgai, ɓɛɛ ŋma be-wan kɔ̧-a̧ tɛ kpa ŋgai woyo gan kɔ̧-a̧‘i, ɓɛɛ wan ko wi’ɛi tɛ duk nɛ gasa-a gan.

⁶Pɛ tikiɗi tɛ yak, ɓɛɛ wa nɔɔ tɔk in o ŋmaa: boko-bem ko wannu mɛ ká̧-zan-mɛ́-ɗɔɔ tɛ ba ŋmaa in wannu mɛ ká̧-zan-mɛ́-ŋgɔn, wen ɗafa mgbara ŋmaa. Mɔ kpɔk, ŋma bíí beka yor ɗoŋ boko-bem’ɛi na, hegɔ o bezaŋ-aa beka duk siti na, wen wa tɛ gbɛ kiitɛ boko-bem’ɛi in o wi nɛ mgbɔɔ so a̧ nɛnɛ, ba nɛ bem kɔ̧-a̧, in wi n'aa e só nɛ̀ ta[11] mbɛt tɛ ŋgimbi'i.

⁷Ŋma kpɔk nyak-zaŋ kɔ̧-a̧ tɛ ba fara oi-aa, ɓɛɛ baa biro duk nɛ o wi-biro ko wannu mɛ ká̧-zan-mɛ́-ŋgɔn si hɔ kɔ̧ ŋgárá kɔ̧-a̧ mɛ. A̧ tɛ bi wa, ɓɛɛ a̧ gbina biro.

⁸A̧ tɛ kai o sɔ̧ kɔ-wa, o mboo-mɔ nɛ‘i dee nɛ boi, gu nɛ o mɔ nɛ‘i dee nɛ bu-mbɔi in lɔr nɛ mɔɔ-oi-biro yaknɛ si Egiptɛ. Ɗoŋ nɛ pɛ yaka nɛ dɔka-a nɛ biro bo na,

⁹wannu mɛ ká̧-zan-mɛ́-ŋgɔn tɛ nɛ̀ɛ́ bi wan mɛ ká̧-zan-mɛ́-ɗɔɔ, ɓɛɛ a̧ pia ɗoŋ tɛ nu kɔ̧-a̧.

¹⁰« ‹O bem kɔ̧-a̧ tɛ mɔi̧ gii bíí nyɛmna wen bíí biro. Mgbara o bem nɔ‘i, ŋma kpɔk tɛ ba biro kur yak in o wi-biro kɔ‘i nɛ ŋgai hee yi a̧ gbina gba-zu ga ye nɛ nu ko wisɛn kɔ-wa. A̧ tɛ bi biro piinɛ hɔ nu ŋgárá ko wisɛn'i.

¹¹Tɛ mɔ‘i, see wannu mɛ ká̧-zan-mɛ́-ɗɔɔ tɛ́ kur nɛ ŋgaya-a, ɓɛɛ a̧ gboo ba biro duk nɛ wannu mɛ ká̧-zan-mɛ́-ŋgɔn; a̧ tɛ gan zu zɔm o wi nɔ‘i.

¹²Gasa-zu tɛ ye tɛ a̧; ɓɛɛ kóó nɛ oi gana zu wa n'aa gana nduk nɛ bíí nɛ dɔka-a'i, a̧ beka gbin biro na.

¹³« ‹Wannu mɛ ká̧-zan-mɛ́-ŋgɔn tɛ si ɗoŋ nɛ́ɛ̀ mɔi̧ bíí nɛ dɔka-a woyo gan kuti-a, ɓɛɛ a̧ ɗafa mbe naŋ biro; mɛ ɗoŋ tɛ ŋma pɛ a̧ tɛ ba biro pii nɛ̀ ɗoŋ nɛ o zɔm mɔɔ-de-biro in o wi-biro nɛ dɔka-a.

¹⁴Nɛ tɛ ŋgimbi'i a̧ o bíí nɛ dɔka-a tɛ kur nɛnɛ zu wannu mɛ ká̧-zan-mɛ́-ɗɔɔ, ɓɛɛ mgbara dukbíí kɔ-mɛ, Daniɛl, o ŋma wi-de-ŋgamɔ tɛ kur mbɛt wen ha̧ mɔ nɛ a̧a̧ so tɛ ŋma hɔɔ-zu mɛ hɔ gba̧a̧. Mɔ kpɔk, wa beka de kpasa mɔ na.

¹⁵Wannu mɛ ká̧-zan-mɛ́-ŋgɔn tɛ tɛ, ɓɛɛ a̧ mboo nù hɔ zu garo ŋma ŋga ye, ba nɛnɛ. O wi-biro mɛ ká̧-zan-mɛ́-ɗɔɔ beka yor ti wa na, kóó nɛ o wi-gbin-biro na mbɛt, wa beka kpa ŋgai mɛ yor ti wa na.

¹⁶Wi nɛ tɛ ba biro tɛnɛ‘i tɛ de mɔ hee mɔ'ɔ nɛ see kɔ̧a̧ ga. Ŋma wi nɛ tɛ yor ti a bo na. A̧ tɛ ba fara tɛ gba de nu,[12] ɓɛɛ ŋgai wen ɗaŋa mɔ a̧a̧ er-a.

¹⁷Taamɔ kɔ̧-a̧ nɛ́ tɛa-a nɛ oi ŋgai kɔ̧-a̧ lɛŋ pii zu wannu mɛ ká̧-zan-mɛ́-ɗɔɔ, ɓɛɛ a̧ ha̧a̧ boko-bem nɛ koo ha̧ a̧, nɔ nɛ tɔk in a̧ wen kia yuwar mɛ ɗaŋ a̧; ɓɛɛ gɔn-zaŋ kɔ̧-a̧‘i beka hɔ ti na.

¹⁸Ɗoŋ mɔ‘i, a̧ tɛ zik tɛ-a mɛ bi o bíí mɛ ká̧-zaŋ gba-tɔp, ɓɛɛ a̧ baa o ŋma nɛ dɔka-a, hɔ ŋgimbi nɛ ŋma gasawi tɛ de ha̧ ɗaŋ deemɔ kɔ̧-a̧‘i mɛ kaɗi wen ha̧ mɔɔ-oi-aa mɛ kpa a̧.

¹⁹Wannu mɛ ká̧-zan-mɛ́-ŋgɔn tɛ zik tɛ tík zu o ye nɛ a̧a̧ nɛ ŋgárá tɛ nu kɔ̧-a̧; naŋ-a tɛ mbali ŋmaa, ɓɛɛ a̧ yoo nu, nɛ‘i beka iŋ oi-aa ɓɔna.

²⁰« ‹Ŋma bíí tɛ ba wan oi-aa, ɓɛɛ toma wi-ndɛm-mɔ nɛ ŋgai mɛ kai mɔ kɔ̧ de be Tua[13] tɛ nu'i. Ɗoŋ-aa beka nyɛi̧ na, ɓɛɛ mɔ kɔ̧-a̧ kaɗa; mɔ kpɔk, bo nɛ nyimsea ko Sɔ̧, kóó biro a̧ tɛ gbɛ a̧ na.

²¹« ‹Ŋma bíí nɛ nyɛm yí bíí na tɛ ba wan oi-aa, nɛ̀ bó nɛ̀ wi ha̧a̧ so nɛ wan ha̧ a̧ na. Wi’ɛi tɛ a wen ha̧ o bíí ba nɛ wan tɛ ga̧a̧mɔ.

²²A̧ tɛ bi o wi nɛ tɛ tik a nɛ biro gan nɛ wa, ɓɛɛ a̧ gbɛɛ ŋma gasawi ko dukbíí nɛ Sɔ̧ nɔɔ tɔk in wa.

²³Mɔ kɔ̧-a̧ nɛ́ nɔɔ tɔk in o bíí wen ɔra wa, ɓɛɛ a̧ gbina biro nɛ o bíí tikiɗi ɓɛɛ.

²⁴A̧ tɛ ye tɛ de nu nɛ a̧a̧ zika-fara'i zaŋ ga̧a̧mɔ, de nɛ mɔ nɛ o dáà kɔ̧-a̧, koo o zɔmdáa kɔ̧-a̧ de so nɛti na; a̧ tɛ kai o mbɔi in o mɔ ko o bíí fara nɔ‘i kɛ̧ nɛnɛ ha̧ o bíí kɔ̧-a̧; a̧ tɛ kii yuwar mɛ bi o ŋgárá mbɛt, ɓɛɛ ɗoŋ mɔ‘i beka nyɛi̧ na.

²⁵« ‹A̧ tɛ e see-aa in ŋgai kɔ̧-a̧ lɛŋ mɛ kai dɔka wi-biro dúk nɛ̀ wannu mɛ ká̧-zan-mɛ́-ɗɔɔ; wannu'i tɛ bi biro nɛ zɔm gasa o ŋga wi-biro kɔ‘i, ɓɛɛ a̧ beka de biro'i hɔ ti na, wen wa tɛ gɔn naŋ-a.

²⁶O wi nɛ nyɔŋ so mɔ in a̧ kpɔk tɛ ɗɔ a̧; o wi-biro kɔ̧-a̧ tɛ kum nɛ dɔka-a, ɓɛɛ biro gana wa.

²⁷O wannu nɔ‘i yiitoo nɛ see duna nɛ ɗaŋ‘i tɛ ya nyɔŋ nɛ mɔ kpɔk, ɓɛɛ nyɛrɛ kɔ-wa sitɛ ŋmaa lɛŋ nɛ́ ndela; mɔ kɔ-wa beka hɔ gba̧a̧ na, wen sɔŋkur ŋgimbi tɛ hɔ hɔ̧ɔ̧ na.

²⁸Wannu mɛ ká̧-zan-mɛ́-ŋgɔn tɛ kai mbɔi nɛ dɔka-a sinɛ tɛ nu kɔ‘i; ɓɛɛ ɗaŋmɔ n'aa ta mɛ de in dukbíí nɛ Sɔ̧ nɔɔ tɔk in wa'i, a̧ tɛ de kana kaɗi, sɛka a̧ sii ɗoŋ nu kɔ̧-a̧.

²⁹« ‹Mɛ́ ɗoŋ tɛ ŋma ŋgimbi, a̧ tɛ ba biro dúk nɛ̀ wannu mɛ ká̧-zan-mɛ́-ɗɔɔ woyo; mɔ kpɔk, mɔ beka duk hee mɔ nɛ yaka so nɛti ga na.

³⁰O kombon mɛ Kitim tɛ gbo biro sitɛ a̧, ɓɛɛ gba̧a̧-tɛ-a gbina; zu mɔ‘i, see-aa tɛ kur, ɓɛɛ a̧ dee ŋgamɔ woyo in dukbíí nɛ Sɔ̧ nɔɔ tɔk in wa; a̧ tɛ ndaɗi in o bíí nɛ ee nɔɔ-tɔk ko Sɔ̧ duk.

³¹O wi-biro kɔ̧-a̧ tɛ ba sa̧a̧ ŋgárá, ɓɛɛ wa fɛŋa fara'i; wa tɛ dor ɗafa-sɔ̧ nɛ‘i ɗafi so wese lɛŋ, ɓɛɛ wa ee ndiŋ mɔɔ-ɗaŋ-mɔ oi-aa.

³²A̧ tɛ ɔr o bíí nɛ nyɔ̧ɔ̧ wen ha̧ wa mɛ e nɔɔ-tɔk ko Sɔ̧ duk, ɓɛɛ o wi nɛ ndak nɛ ɗoŋ Sɔ̧ kɔ‘i, tɛ yor nɛ nɔa-a.

³³O wi-iŋ-mgbara-mɔ mgbara dukbíí tɛ usi mɔ ha̧ o dɔka bíí, ɓɛɛ tɛ ŋma ŋgimbi wa tɛ fe nu gba-paa in yi wee; o bíí tɛ zu̧ mɔ kɔ-wa, kai nɛ wa nɛ bara mbɛt.

³⁴Tɛ ŋgimbi bɔnɛ‘i, wa tɛ kpa gbakamɔ tikiɗi ɓɛɛ; o bíí nɛ dɔka-a tɛ gbin pii zu wa nɛ ɔrmɔ.

³⁵O ŋma wi-iŋ-mgbara-mɔ nɔ‘i tɛ fe, ɓɛɛ fio kɔ-wa tɛ de ha̧ war-tɛ dukbíí mɛ sa̧ nɛ de-a hɔ nɛnɛ tɛ sɔŋkur ŋgimbi, wen ŋgimbi'i tɛ hɔ kana.

³⁶« ‹Wannu'i tɛ de mɔ lɛŋ nɛ see-aa kɔ̧a̧; a̧ tɛ ŋmaŋ tɛ-a kɔn nɛ ŋguɗi-a zu o sɔ̧ lɛŋ, tɔ̧ nɛ kpoko-wen ha̧ Sɔ̧ ko o sɔ̧. Mɔ kɔ̧-a̧ tɛ hɔ gba̧a̧ hɔ ŋgimbi nɛ nyimsea ko Sɔ̧ tɛ hɔ, wen mɔ nɛ tɔ̧ɔ̧ kaɗi tɛ de kana.

³⁷A̧ beka pi̧ nú-a tɛ o sɔ̧ ko o zɔmdáa kɔ̧-a̧ in wan nɛ o okoo gasi na, kóó nɛ ge sɔ̧ ge; a̧ tɛ ŋmaŋ tɛ-a zu mɔ lɛŋ.

³⁸A̧ tɛ gasi kɔ̧-a̧ nɛ sɔ̧-ŋgara nɛ duk nɛ ŋma sɔ̧ nɛ o dáà kɔ̧-a̧ iŋ so kɔ‘i na; a̧ tɛ tu̧ tɛ sɔ̧‘i nɛ lɔr in bu-mbɔi ká bá nɛ̀ o de toka ta, in o demɔ nɛtɛ nɛtɛ.

³⁹Gɔni sɔ̧‘i tɛ yor ɗoŋ-aa, ha̧ a̧ mɛ bi o ye nɛ a̧a̧ nɛ ŋgárá, ɓɛɛ o wi nɛ tɛ gasi sɔ̧‘i, a̧ tɛ ha̧ gasi ha̧ wa; a̧ tɛ e wa zu o giiwi, kɛ̧ nɛ nu ha̧ wa wen mɔ‘i.

⁴⁰« ‹Tɛ sɔŋkur ŋgimbi, wannu mɛ ká̧-zan-mɛ́-ɗɔɔ tɛ kur nɛ biro in a̧, ɓɛɛ wan mɛ ká̧-zan-mɛ́-ŋgɔn tɛ tɛ nɛ o keekee, o nyaŋa in o kombon-biro bi nɛ a̧ nɛ ŋgai. A̧ tɛ ye tɛ o nu ɓir nɛnɛ yak hee yi a̧ gbina gba-zu ga.

⁴¹A̧ tɛ ye tɛ gba de nu mbɛt, ɓɛɛ o bíí nɛ dɔka-a tɛ kum; kana nɛ o be Edɔm, o be Mɔab in o kpasa o be Amɔŋ a̧ tɛ gbo ɗɔɔ er-a.

⁴²A̧ tɛ kpa ŋgai zu o nu nɛtɛ nɛtɛ, ɓɛɛ nu Egiptɛ mbɛt tɛ tik kɔ̧ er-a.

⁴³Lɔr, bu-mbɔi in o gba demɔ mɛ Egiptɛ lɛŋ tɛ duk nɛ kɔ̧-a̧, ɓɛɛ o be Libii, o be Etiopii tɛ zii nɛ̀ a̧ mbɛt.

⁴⁴Mɔ kpɔk, o nyɛrɛmɔ mɛ war daŋa-wese in mɛ ká̧-zan-mɛ́-ŋgɔn tɛ zik zu-a, ɓɛɛ a̧ tɛ kur nɛ zɔm ŋga nyimsea wen ɗaŋa mɔ in wen kuma o bíí nɛ dɔka-a.

⁴⁵A̧ tɛ e tua-laa kɔ̧-a̧ mgbara gba-tɔp in sa̧a̧ kaya tɛ gba de nu, ɓɛɛ nɛ́ sɛn fara'i a̧ fio tɛ kpa a̧ sɛnɛ, nɛ̀ ŋma wi-gbak-a beka bo na.› »