Read Northwest Gbaya DANIƐL 2 Bible Online

DANIƐL 2 - Northwest Gbaya bible

DANIƐL 2

¹Tɛ yiitoo pɛ-wan ko Nabukɔdɔnɔsɔr, a̧ ɔɔ ŋma zu; zu'i sakala taamɔ kɔ̧-a̧, ɓɛɛ yá hɔ yi-a ɓɔna.

²Wannu tɔ̧ɔ̧ ha̧ wa mɛ sa o wi-de-mɔɔ-kifi, o wan-gbana, o wi-zɔk-mɔ in o wi-a-tani[1] tɛnɛ ha̧ wa mɛ tɔ̧ zu'i ha̧ a̧; ɓɛɛ wa tɛ lɛŋ, mɔi̧ ŋmaa ya ti wannu.

³A̧ tɔ̧ɔ̧ ha̧ wa: «Mi ɔɔ zu, ɓɛɛ zu'i sakala'm; mi kɔ̧ɔ̧ mɛ iŋ zu'i.»

⁴O be Kaldee kifa nú ha̧ wannu nɛ nú Aram: «Dáà, wannu nɛ́ ɛnɛ ɓɛɛ! Ɛ̀nɛ̀ tɔ̧́ zu k’ɛ́nɛ́ ha̧ o wi-de-tom k’ɛ́nɛ́, ɓɛɛ ɛɛ tɛ tɔ̧ gba̧a̧-a̧ h’ɛ́nɛ́.»

⁵Wannu kifa nú ha̧ o be Kaldee hee mɔ'ɔ ga: «Mi ha̧a̧ nú, k’ɛ̀nɛ̀ we ɗoŋ zu'i tɔ̧ nɛ gba̧a̧-a̧ ha̧‘m na mbɛt, wa tɛ ɓir ɛnɛ sɛ́kɛ́ɗɛ́-sɛ́kɛ́ɗɛ́, ɓɛɛ wa gbina tua k’ɛ́nɛ́ lɛŋ a nu.

⁶Ɓɛɛ k’ɛ̀nɛ̀ we ɗoŋ zu kɔ‘m, tɔ̧ nɛ gba̧a̧-a̧ ha̧‘m nɛ mbetɛ, ɛnɛ tɛ kpa mɔ er-am, tu̧u̧-tɛ-mɔ in zɔnamɔ mbɛt. Ɛ̀nɛ̀ wé ɗoŋ-aa in ɛ̀nɛ̀ tɔ̧́ gba̧a̧-a̧ ha̧‘m mbɛt.»

⁷Wa kifa nú ha̧ a̧ woyo: «Wannu a̧ tɔ̧ zu kɔ‘i ha̧ o wi-de-tom kɔ‘i, ɓɛɛ ɛɛ tɛ tɔ̧ gba̧a̧-a̧ ha̧ a̧.»

⁸Wannu kifa nú ha̧ wa woyo ɓɛɛ tɔ̧: «Mi iŋa nɛ mbetɛ ɛnɛ ba nɛ ŋgimbi, wen ɛnɛ zɔka mi ha̧a̧ nú kaɗi.

⁹K’ɛ̀nɛ̀ tɔ̧ gba̧a̧ zu'i ha̧‘m na, mɛ nɛ wen nɛ tɔ̧, ɛnɛ mɔi̧a ŋmaa ba keta mɛ tɛ̀ɛ́ de ndela sɛn ti'm ɔr nɛ‘m ha̧ ŋgimbi mɛ yak, ɓɛɛ kpɔk ha̧a̧nú kɔ‘m'i tɛ tik kana zu'nɛ́. Kinii ɛ̀nɛ̀ tɔ̧́ zu'i ha̧‘m; hegɔ mi tɛ iŋ‘e, ɛ́nɛ́ tɛ tɔ̧ gba̧a̧-a̧ ha̧‘m mbɛt.»

¹⁰O be Kaldee kifa nú ha̧ wannu hee mɔ'ɔ ga: «Ŋma bíí kpɔk zu nu’ɛ nɛ nyɛma mɛ we ɗoŋ zu ko wannu, bo na. Ŋma wannu nɛ ɔ gasa in ɔ ŋgaya nɛ aka pɛrti mɔ hegɔ nɛti in o wi-de-mɔɔ-kifi, o wan-gbana in o be Kaldee bo na.

¹¹Akamɔ nɛ wannu aka'i yaka zale, ŋma bíí kpɔk nɛ tɛ we ɗoŋ zu'i ha̧ wannu bo na; nɛ́ o sɔ̧ nɛ duk kɔ‘i mgbara bíí na a̧ nyɛma mɛ iŋ mgbara-a ɓɛɛ.»

¹²Hegɔ see wannu ɗaŋa nyɛmna, ɓɛɛ tu̧ mbɛt wen zu kifa-nú‘i; ɓɛɛ a̧ ha̧ nú ha̧ wa mɛ kum o wi-iŋ-mgbara-mɔ sɛn Babilɔŋ yinɛ lɛŋ.

¹³Wa hee mbéá‘e, wa tɛ gbɛ o wi-iŋ-mgbara-mɔ yinɛ, ɓɛɛ wa kii Daniɛl in o gbama-yari kɔ‘i mɛ gbɛ yinɛ mbɛt.

¹⁴Ɓɛɛ Daniɛl nɛ́ɛ̀ tɔ̧ wen nɛ mboozu in nɛ yuwar-a ha̧ Ariɔk wi-duk-zu o wi-pɛm-wannu nɛ gboo so mɛ nɛ̀ɛ́ gbɛ o wi-iŋ-mgbara-mɔ sɛn Babilɔŋ.

¹⁵A̧ aka Ariɔk gasa wi-duk-zu o wi-pɛm-wannu'e: «Nɛ́ ge a̧ dee ha̧ wannu mɛ ha̧ ŋga heembea hegɔ‘i ge?» Ariɔk wee ɗoŋ mɔ nɛ yaka ha̧ Daniɛl.

¹⁶Ɓɛɛ Daniɛl nɛ́ tɛ wannu mɛ ak a̧ mɛ e be ŋgimbi ha'i wen kia gba̧a̧ zu kɔ̧-a̧ ha̧ a̧.

¹⁷Daniɛl sii ɗoŋ tɛ kɔ‘i, ɓɛɛ we ɗoŋ mɔ nɛ yaka ha̧ o gbama-yari kɔ‘i Hanania, Misaɛl in Azaria,

¹⁸wen mbaŋa tɛ-wa ha̧ wa mɛ ai nú ha̧ Sɔ̧ yiwese zu hu̧sa̧mɔ‘i, wen ká‘i tɛ̀ɛ́ fe in wa gu nɛ o wi-iŋ-mgbara-mɔ sɛn Babilɔŋ mbɛt.

¹⁹Mɛ zɛ, Sɔ̧ usa mgbara hu̧sa̧mɔ‘i ha̧ Daniɛl tɛ hɔɔ-zu, ɓɛɛ Daniɛl zɔn Sɔ̧ yiwese tɔ̧ nɛnɛ:

²⁰«Nin Sɔ̧ a̧ hu̧r ɓɔnsɛnɛ kpoo nɛ kpoo, wen iŋa-mgbara-mɔ in ŋgai nɛ ko Sɔ̧.

²¹Nɛ́ a̧ a̧ de ha̧ o ŋgimbi mɛ kpai ŋmaa; nɛ́ a̧ a̧ gbo o wannu tɛ wan yinɛ, nɛ́ a̧ a̧ ba o bíí e tɛ wan; nɛ́ a̧ a̧ ha̧ iŋa-mgbara-mɔ ha̧ o wi-iŋ-mgbara-mɔ. Nɛ́ a̧ a̧ ha̧ iŋamɔ ha̧ o wi-iŋ-kɛ̧ɛ̧-mgbara-mɔ.

²²Mɛ̀ nɛ́ a̧ a̧ ba mɔ nɛ‘i iŋ na in mɔ nɛ ɔ hu̧sa̧ gbonɛ. A̧ iŋa mɔ nɛ a̧a̧ zaŋ tum, ɓɛɛ sa̧a̧mɔ duk in a̧.

²³Mi zɔn nɛ ɛnɛ gasi nɛ ɛnɛ mbɛt, Sɔ̧ ko o zɔmdáa kɔ‘m, wen ɛ́nɛ́ ha̧a̧ iŋa-mgbara-mɔ in ŋgai ha̧‘m. Ɛ́nɛ́ ha̧a̧ mɔ n’ɛɛ aia nú h’ɛ́nɛ́ wen-aa mbɛt h’ɛ́ɛ́, tɛ dea-a h’ɛ́ɛ́ mɛ iŋ mgbara mɔ nɛ sakali wannu.»

²⁴Daniɛl yee tua ɗoŋ Ariɔk wi nɛ wannu ha̧a̧ so heembea ha̧ a̧ mɛ gbɛ o wi-iŋ-mgbara-mɔ sɛn Babilɔŋ; ɓɛɛ tɔ̧ ha̧ a̧: «K’ɛ́nɛ́ kúm o wi-iŋ-mgbara-mɔ sɛn nú Babilɔŋ na, ɛ̀nɛ̀ mgbɔ́‘m nɛnɛ tɛ wannu ha̧‘m tɔ̧ gba̧a̧ zu kɔ-wa ha̧ wa.»

²⁵Ariɔk mgbɔɔ Daniɛl nɛnɛ tɛ wannu nɛ haya-a, ɓɛɛ tɔ̧: «Wannu, mi kpaa ŋma bíí mgbara o be Juda n’ɛɛ kaia so nɛ bara-biro, nɛ tɛ tɔ̧ gba̧a̧ zu k’ɛ́nɛ́ h’ɛ́nɛ́.»

²⁶Wannu tɔ̧ɔ̧ ha̧ Daniɛl nɛ wa sa so'e Bɛltasar: «Mɛ nyɛma mɛ we ɗoŋ zu n'am ɔɔ in gba̧a̧-a̧ mbɛt nde?»

²⁷Ɓɛɛ Daniɛl kifi nú ha̧ a̧: «O wi-iŋ-mgbara-mɔ, o wan-gbana, o wi-de-mɔɔ-kifi in o wi-zɔk-mɔ nyɛm mɛ we ɗoŋ hu̧sa̧mɔ'ɛ h’ɛ́nɛ́ na,

²⁸ɓɛɛ ŋma Sɔ̧ a̧a̧ yiwese nɛ ba hu̧sa̧mɔ e zan; nɛ́ a̧‘i a̧ usa mɔ nɛ tɛ hɔ ha̧ wannu Nabukɔdɔnɔsɔr. Gba̧a̧ zu n’ɛnɛ ɔa in mɔ n’ɛnɛ zɔka ŋgimbi ɔɔ ya k’ɛ́nɛ́ nɛ mɔ'ɔ:

²⁹«Ŋgimbi n’ɛnɛ ɔɔ nɛ nu gɔn gado k’ɛ́nɛ́, taamɔ k’ɛ́nɛ́ kura duk tɛ mɔ nɛ tɛ hɔ nɛ ɗoŋ, ɓɛɛ wi-ba-mɔ e zan usi mɔ nɛ tɛ de nɛ ɗoŋ h’ɛ́nɛ́.

³⁰War kɔ‘m, bo nɛ wen nɛ̀ iŋamɔ kɔ‘m gana ko o dɔka bíí sa Sɔ̧ usi nɛ ndaa mɔ'ɛ ha̧‘m na, ɓɛɛ mɛ̀ nɛ́ wen ha'i mɛ tɔ̧ gba̧a̧ zu'i ha̧ wannu, in ha̧ wannu mɛ iŋ mɔ nɛ a̧a̧ kɔ̧ see-wi nɛ tɛ-wi mbɛt.

³¹«Wannu, mɔ n’ɛnɛ zɔka tɛ ɔɔ zu k’ɛ́nɛ́ nɛ mɔ'ɔ. Ɛnɛ zɔka gasa ɓoo-bíí nɛ yor ti'nɛ́ tok nɛnɛ nyɛmna, ɓɛɛ bo so nɛ mɔ ha'i mɛ zɔk na.

³²Zu ɓoo-bíí‘i nɛ́ de sa̧a̧ lɔr, yí-ŋguɗi-a in o ɓaa-a nɛ́ bu-mbɔi, zaŋ-aa in o ku-a nɛ́ ndɛrɛ,

³³o ti-bee-a nɛ́ boi, reeta o naŋ-a nɛ́ boi, ɓɛɛ ɓii reeta-a nɛ́ dɔɔ gii.

³⁴Ɛnɛ ɓɔna fara zɔka mɔ‘i, ɓɛɛ ŋma ta ai nɛ ta-tɛ nɛ zu kaya mɛ tɛnɛ tɛ́ɛ̀ yo naŋ ɓoo-bíí nɛ naŋ-a duka so nɛ boi in dɔɔ gii'i gbin.

³⁵Boi, gii, ndɛrɛ, bu-mbɔi in lɔr lɛŋ gbina a nu, ɓɛɛ kifi nɛ pumyulu-mɔ hee sɛn fara-gusi-alkamaari ga. Búk kaia mɔ‘i lɛŋ yaknɛ, wi zɔk oi-aa na. War ko ta nɛ yoo mboo-bíí gbin'i kifa kɔ‘i nɛ gasa kaya nɛ kpee zu nu lɛŋ.

³⁶«Zu nɛ wannu ɔa'i nɛ mɔ‘i; ɓɛɛ gba̧a̧-a̧ nɛ mɔ'ɔ n'am tɛ tɔ̧ kinii'i.

³⁷Wannu, ɛ́nɛ́ ɔ gasa zu o dɔka wannu lɛŋ; nɛ́ ɛnɛ a̧ Sɔ̧ mɛ yiwese ha̧a̧ mɔɔ-wan, ŋgayamɔ in gasamɔ ha̧ a̧;

³⁸o bíí, o saɗi-zaŋbɛɛ, o nɔ̧́í̧ yiwese sɛn ge fara ge, Sɔ̧ ee wa lɛŋ er'nɛ́, h’ɛ́nɛ́ mɛ ɔ wan zu wa. Ɓɛɛ zu bíí nɛ‘i dee nɛ lɔr'i nɛ ɛnɛ.

³⁹Ɗoŋ wan k’ɛ́nɛ́ hɛ̧ɛ̧, ŋma mbe wan tɛ kur nɛ beka nyɛm ŋmaa in k’ɛ́nɛ́ na. Ɓɛɛ ɗoŋ i̧i̧ wi’ɛi, ŋma taar wan tɛ hɔ nɛ tɛ kpa ŋgai zu nu lɛŋ; ndɛrɛ usi nɛ wi’ɛi.

⁴⁰Naar wan nɛ tɛ hɔ tɛ duk nɛ ŋgaya-a hee boi ga; a̧ tɛ ɗaŋ o kuti wan yinɛ, hee mɔ'ɔ nɛ boi to nɛ mɔ gbin a nu’ɛ ga.

⁴¹O naŋ in o waza-naŋ n’ɛnɛ zɔka nɛ‘i dee reeta-wa nɛ boi in ɓii reeta-wa nɛ dɔɔ gii'i usi nɛ wan nɛ kɛ̧ɛ̧ yiitoo. Tɛ zu k’ɛ́nɛ́, ɛnɛ zɔka'e boi in gii a̧a̧ sɛnɛ mbɛt; hegɔ, wan'i tɛ duk kana nɛ be ŋgai tikiɗi mbɛt.

⁴²War ko o waza-naŋ nɛ duk nɛ boi in gii'i, mɔ‘i usi nɛ kɛ̧a̧-a̧ ko wan nɛ tɛ kɛ̧ fara yiitoo: ŋma tɛ duk nɛ ŋgaya-a hee boi ga, ɓɛɛ ɓii-aa beka ŋgai kɔ‘i na hee gii ga.

⁴³Ɛnɛ zɔka boi nɛ‘i zaŋa nɛ gii; mɛ̀ nɛ́ hegɔ a̧ o wannu nɔ‘i tɛ ndaɗi ŋmaa tɛ̀ báá ŋmaa, ɓɛɛ mɔ‘i beka ye ŋmaa nɛ de-a na, hee mɔ'ɔ nɛ boi in gii ye ŋmaa duk kpɔk na’ɛ ga.

⁴⁴«Ŋgimbi ko o wannu nɔ‘i, Sɔ̧ yiwese tɛ e ŋma damti nɛ tɛ duk ɓɔnsɛnɛ, nɛ ŋma gɔni dukbíí beka ba na; a̧ tɛ gan zu o dɔka wan nɔ‘i, gbin nɛ ŋgai kɔ-wa lɛŋ, ɓɛɛ a̧ tɛ duk kpoo nɛ kpoo,

⁴⁵kana hee mɔ'ɔ n’ɛnɛ zɔka nɛ ta fara kura-a nɛ ta-tɛ nɛ zu kaya mɛ tɛnɛ gbin nɛ boi, ndɛrɛ, gii, bu-mbɔi in lɔr a nu'i ga. Sɔ̧ nɛ ɔ gasa dee ha̧ wannu mɛ iŋ mɔ nɛ tɛ hɔ. Zu'i bó nɛ́ ɔrmɔ na; gba̧a̧ zu'i mbɛt nɛ kpasamɔ.»

⁴⁶Tɛ ŋgimbi'i, wannu Nabukɔdɔnɔsɔr guu yí nu ti Daniɛl zɔn nɛ a̧, ɓɛɛ ha̧ nú ha̧ wa mɛ ɗafi sɔ̧, dɔ nɛ fuu-nyama ha̧ a̧ mbɛt.

⁴⁷Wannu tɔ̧ɔ̧ ha̧ Daniɛl: «Nɛ́ kpasawen, Sɔ̧ k’ɛ́nɛ́ nɛ Sɔ̧ ko o sɔ̧. A̧ nɛ wan ko o wannu, wi-ba-hu̧sa̧mɔ e zan, wen mɛ tɔ̧ɔ̧ mgbara hu̧sa̧mɔ'ɛ.»

⁴⁸Wannu baa Daniɛl e nɛ gasawi, a̧ ha̧a̧ o zɔm demɔ ha̧ a̧, ɓɛɛ e a̧ zu o wi-iŋ-mgbara-mɔ sɛn zu nu Babilɔŋ nɛ oi-aa lɛŋ.

⁴⁹Daniɛl aka wannu ha̧ a̧ mɛ e Sadrak, Mesak, in Abɛd-Nɛgo mɛ duk zu zika-nù Babilɔŋ, ɓɛɛ Daniɛl nɛ̀ zù ɓɔn kɔ‘i in wannu kɔ̧ kira kɔ̧-a̧.