Read Northwest Gbaya DANIƐL 3 Bible Online

DANIƐL 3 - Northwest Gbaya bible

DANIƐL 3

¹Wannu Nabukɔdɔnɔsɔr mboo bíí nɛ lɔr, kusa-a nɛ mɛtrɛ ɓu-taar, pɛsa-a nɛ mɛtrɛ taar, ɓɛɛ a̧ ba e ŋgɔn sɛn bɔkɔ-nu Dura, tɛ nu Babilɔŋ.

²Nabukɔdɔnɔsɔr pi̧i̧ tom wen mɔi̧a o wi-duk-zu-nu, o gasawi, o wi-duk-zu zika-nù, o wi-tɔ̧-mbɔrɔ, o wi-kasi-mbɔi, o wi-ha̧-heembea, o wi-gɔn-kita in o mɔ-geŋa tɛ nu kɔ̧-a̧ lɛŋ mɛ tɛ̀ɛ́ de gbaŋa mboo-mɔ n'aa baa e ŋgɔn'i.

³O wi-duk-zu-nu, o gasawi, o wi-duk zu zika-nù, o wi-tɔ̧-mbɔrɔ, o wi-kasi-mbɔi, o wi-ha̧-heembea, o wi-gɔn-kita, o mɔ-geŋa tɛ nu'i lɛŋ mɔi̧a tɛnɛ wen dee gbaŋa mboo-mɔ nɛ wannu Nabukɔdɔnɔsɔr baa e ŋgɔn'i.

⁴Wi-he-mbea tɔ̧ɔ̧ nɛ hee ger: «Ɛnɛ o dukbíí lɛŋ, in o tugun bíí nɛ tɔ̧ nú nɛtɛ nɛtɛ, wa tɔ̧ɔ̧ a̧‘m tɔ̧ h’ɛ́nɛ́‘e,

⁵ŋgimbi n’ɛnɛ tɛ zii dɔma zak, fol, kunde, koloŋ, be koloŋ, gba-zak gu nɛ o mɔɔ-de-gima lɛŋ, ɛ̀nɛ̀ gbɛ́ zugur'nɛ́ nu mɛ gasi mboo-mɔ nɛ‘i dee nɛ lɔr nɛ wannu Nabukɔdɔnɔsɔr baa e ŋgɔn.

⁶Ɓɛɛ wi nɛ beka gu nu mɛ gasi mboo-mɔ‘i na, wi tɛ ba a̧ pi̧ kɔ̧ gasa wee kɔ̧ lɔk war kpɔk.»

⁷Ŋgimbi nɛ o bíí lɛŋ zia giti wora-zak, fol, kunde, koloŋ, be koloŋ gu nɛ o mɔɔ-de-gima lɛŋ, o dukbíí in o tugun bíí nɛ tɔ̧ nú nɛtɛ nɛtɛ guu nu gasi nɛ mboo-mɔ nɛ‘i dee nɛ lɔr nɛ wannu baa e ŋgɔn.

⁸Ŋgimbi'i, o ŋma be Kaldee tɛa, ɓɛɛ gba ndaa o be Juif.

⁹Wa tɔ̧ɔ̧ ha̧ wannu Nabukɔdɔnɔsɔr'e: «Dáà, wannu nɛ́ ɛnɛ ɓɛɛ!

¹⁰Bó nɛ́ ɛ́nɛ́ baa he so mbéá ha̧ bíí lɛŋ‘e, ŋgimbi nɛ‘i tɛ zii nɛ giti o zak, fol, kunde, koloŋ, be-koloŋ, gba-zak gu nɛ o mɔɔ-de-gima lɛŋ, a'i tɛ́ɛ̀ gu nu ti mboo-mɔ nɛ‘i dee nɛ lɔr mɛ gas'aa na nde?

¹¹Ɓɛɛ kóó o nde nɛ beka gu nu mɛ gasi mɔ‘i na, wi tɛ pi̧ a̧ sɛn kɔ̧ gasa wee kɔ̧ lɔk na nde?

¹²Zɔ́k, Sadrak, Mesak in Abɛd-Nɛgo, o be Juif n’ɛnɛ kaia a zu o tom sɛn nu Babilɔŋ'ɛ kɔ̧ mboo zu tɛ mɔ n’ɛnɛ tɔ̧a̧ na; wa kɔ̧ gasa o sɔ̧ k’ɛ́nɛ́ in mboo-mɔ n’ɛnɛ baa e ŋgɔn na.»

¹³See wannu Nabukɔdɔnɔsɔr ɗaŋa nyɛmna ɓɛɛ tu̧ mbɛt; hegɔ a̧ ha̧a̧ nú ha̧ o bíí mɛ nɛ̀ɛ́ mgbɔ Sadrak, Mesak in Abɛd-Nɛgo tɛnɛ ha̧ a̧.

¹⁴A̧ aka wa: «Sadrak, Mesak, Abɛd-Nɛgo, nɛ́ kpasawen a̧‘m zia'e, ɛ́nɛ́ de tom ha̧ o sɔ̧ kɔ‘m in ɛ́nɛ́ gasi mboo-mɔ nɛ‘i dee nɛ lɔr n'am baa e ŋgɔn na nde?

¹⁵Kinii, ɛ́nɛ́ dúk zu naŋ‘nɛ́ wen nɛa-a mɛ gu nu ti mboo-mɔ kɔ‘m nɛ‘i dee nɛ lɔr mɛ gas'aa ŋgimbi n’ɛnɛ be tɛɛ zii giti o zak, fol, kunde, koloŋ, be-koloŋ, gba-zak gu nɛ o mɔɔ-de-gima lɛŋ nde? K’ɛ̀nɛ̀ de mɔ‘i na, wi tɛ pi̧‘nɛ sɛn kɔ̧ gasa wee kɔ̧ lɔk war kpɔk, ɓɛɛ mi tɛ zɔk sɔ̧ nɛ tɛ gbo'nɛ́ er-am yinɛ‘i.»

¹⁶Sadrak, Mesak in Abɛd-Nɛgo kifa nú ha̧ wannu Nabukɔdɔnɔsɔr: «Ɛɛ kpa kifa nú mɛ ha̧‘nɛ́ tɛ wen'i na.

¹⁷Kà Sɔ̧ k’ɛɛ n’ɛɛ de tom ha̧ a̧‘i á̧ kɔ̧a̧ mɛ gbo yɛ yinɛ, a̧ tɛ gbo yɛ yinɛ sɛn kɔ̧ gasa wee kɔ̧ lɔk in er'nɛ́ mbɛt.

¹⁸«Kóó kà a̧ nɛ dee hegɔ na mbɛt, ɛ̀nɛ̀ íŋ kana nɛ mbetɛ‘e, ɛ́ɛ́ beka de tom ha̧ o sɔ̧ k’ɛ́nɛ́ in gasa mboo-mɔ nɛ‘i dee nɛ lɔr n’ɛnɛ baa e ŋgɔn'i na mbɛt.»

¹⁹Tɛ kifa-nú‘i, see wannu Nabukɔdɔnɔsɔr ɗaŋa batɛ, nyimsea kɔ̧-a̧ kura zu Sadrak, Mesak ba nɛ Abɛd-Nɛgo. A̧ ha̧a̧ nú ha̧ wa mɛ ye wee mɛ yoŋgi nɛ ŋgaya-a war mɔɔrɔ-ɗoŋ-yiitoo gan kuti-a sɛn kɔ̧ lɔk,

²⁰ɓɛɛ a̧ ha̧ nú ha̧ o ŋga wi-biro kɔ̧-a̧ mɛ hɛr Sadrak, Mesak in Abɛd-Nɛgo, wen kaia wa a kɔ̧ gasa wee kɔ̧ lɔk'i.

²¹Wa hɛra wa nɛ oi laa tɛ-wa lɛŋ: gba-laa, sir-laa, laa-gaɓi-tɛ in mɔɔ-gu-zu mbɛt, ɓɛɛ wa kai wa a sɛn kɔ̧ gasa wee kɔ̧ lɔk.

²²Hee mɔ'ɔ nɛ heembea ko wannu ŋgaia so nyɛmna ga, wee kɔ̧ lɔk'i kpɔra so batɛ, ɓɛɛ leɓe-wee dɔ o wi nɛ kaia so Sadrak, Mesak in Abɛd-Nɛgo a tɛ wee'i, gbɛ wa a nu.

²³Ɓɛɛ war ko Sadrak, Mesak in Abɛd-Nɛgo, wa tika yi wee nɛ̀ oi hɛra-a.

²⁴Wannu Nabukɔdɔnɔsɔr kura nɛ gɔna-ɗɛɗɛ, ɓɛɛ ak o wi-ba-keta kɔ‘i hee mɔ'ɔ ga: «Bó nɛ́ ɛɛ hɛra nɛ́ o bíí taar a yí-wee na?» Wa kifa nú ha̧ a̧: «Ii, nɛ mɔ‘i wannu.»

²⁵Wannu tɔ̧a̧: «Nɛ́ bíí naar a̧‘m zɔk fara yara-a nɛ yi wee gee, ɓɛɛ ŋma kpɔk mgbara wa duk hee ŋma bem ko sɔ̧ ga.»

²⁶Nabukɔdɔnɔsɔr ɗɔla pii ká̧ nu gasa lɔk-wee'i, ɓɛɛ sa mɔ: «Sadrak, Mesak, Abɛd-Nɛgo! O wi-de-tom ko Sɔ̧ si ŋgɔn mɛ! Ɛ̀nɛ̀ gbó, ɛ̀nɛ̀ tɛ́!» Ɓɛɛ Sadrak, Mesak in Abɛd-Nɛgo gbo nɛ yí-wee mɛ tɛnɛ.

²⁷O wi-duk-zu-nu, o gasawi, o wi-duk zu zika-nù in o wi-tɔ̧-mbɔrɔ ko wannu mɔi̧a ŋmaa mɛ zɔk o wi nɔ‘i taar nɛ gboo nɛ kɔ̧ wee'i. Wee dɔ ŋma mɔɔ-tɛ-wa na, mui̧-zu-wa bíí wee na, laa kɔ-wa ba so wee na, ŋma be pɛr zi-wee nun tɛ-wa na mbɛt.

²⁸Nabukɔdɔnɔsɔr tɔ̧a̧: «Zɔnamɔ a̧ duk nɛ ko Sɔ̧ ko Sadrak, Mesak in Abɛd-Nɛgo nɛ toma betom kɔ‘i tɛnɛ mɛ gbo o wi-de-tom kɔ‘i nɛ e ta nɛ a̧, ɓɛɛ wa ta mɔ wen fea-a na, gbin nɛ heembea ko wannu wen wa kpɛk mɛ de tom ha̧ ŋma sɔ̧ nɛtɛ in mɛ gas'aa na, wen bo nɛ Sɔ̧ kɔ-wa na.

²⁹«Hegɔ mi ha̧a̧ nú sɔsɔɔ ha̧ dukbíí in o tugun bíí nɛ tɔ̧ nú nɛtɛ nɛtɛ, ŋma bíí kpɔk mgbara'nɛ́ nɛ tɛ tɔ̧ ŋma ɗaŋ wen sa nɛ nin Sɔ̧ ko Sadrak, Mesak in Abɛd-Nɛgo, wi tɛ gɔm a̧ ɓir sɛ́kɛ́ɗɛ́-sɛ́kɛ́ɗɛ́ a nu, ɓɛɛ wi tɛ gbin tua kɔ̧-a̧ a nu lɛŋ, wen ŋma Sɔ̧ nɛ nyɛma mɛ gbo bíí tɛ bɔnɛ hegɔ bo na.»

³⁰Ɓɛɛ wannu de ha̧ Sadrak, Mesak in Abɛd-Nɛgo mɛ ya nɛ o gasawi tɛ zika-nù Babilɔŋ.

³¹Wannu Nabukɔdɔnɔsɔr toma tɔ̧ ha̧ o dukbíí in o tugun bíí nɛ tɔ̧ nú nɛtɛ nɛtɛ zaŋnu lɛŋ hee mɔ'ɔ ga: «Gasa ga̧a̧mɔ a̧ duk in'nɛ̀ɛ́!

³²«Mi tɛ we ɗoŋ o mɔɔ-usi-mɔ in o mɔɔ-kifi nɛ Sɔ̧ mɛ si ŋgɔn dee so ha̧‘m:

³³Oee zɔm o mɔɔ-usi-mɔ, in o ŋga mɔɔ-kifi kɔ̧-a̧ wa! Wan kɔ̧-a̧ duk kpoo nɛ kpoo, ɓɛɛ nɛ a̧ a̧ ɔ wan zu o bezaŋ yaknɛ sɔ̧i̧i̧!