Read Northwest Gbaya DANIƐL 4 Bible Online

DANIƐL 4 - Northwest Gbaya bible

DANIƐL 4

¹«Mi Nabukɔdɔnɔsɔr, mi duka so mɔ kɔ‘m nɛ de-a in nɛ desee kɔ̧ tua-wan kɔ‘m.

²Ɓɛɛ mi ɔ zu nɛ̀ dèè kíì tɛ‘m nyɛmna. Zu n'am ɔa in mɔ n'am zɔka'i sakala taamɔ kɔ‘m batɛ.

³Nɛ mɔ'ɔ n'am ha̧a̧ nú ha̧ wa mɛ sa o wi-iŋ-mgbara-mɔ sɛn nú Babilɔŋ lɛŋ tɛnɛ ti'm, wen ha̧ wa mɛ tɔ̧ gba̧a̧ zu'i ha̧‘m.

⁴Ɗoŋ nɛ o wi-de-mɔɔ-kifi, o wan-gbana, o be Kaldee in o wi-zɔk-mɔ hɔɔ kaɗi, mi tɔ̧ɔ̧ zu n'am ɔa'i ha̧ wa, ɓɛɛ wa tɔ̧ gba̧a̧-a̧ ha̧‘m na.

⁵Ɓɛɛ mɛ ɗoŋ, Daniɛl n'am gɔna so nin ha̧ a̧‘e Bɛltasar nyɛm nɛ ɗoŋ sɔ̧ kɔ‘m tɛa. Ɔmi ko o sɔ̧ nɛ ɔ sa̧a̧ a̧a̧ tɛ a̧. Mi wee ɗoŋ zu n'am ɔɔ ha̧ a̧ hee mɔ'ɔ ga:

⁶‹Bɛltasar, wan ko o wi-de-mɔɔ-kifi, mi iŋa'e ɔmi ko o sɔ̧ nɛ ɔ sa̧a̧ a̧a̧ tɛ mɛ, ɓɛɛ ŋma hu̧sa̧mɔ kpɔk beka gan mɛ na. Mɛ̀ tɔ̧́ gba̧a̧ zu n'am ɔa’ɛ ha̧‘m.

⁷Mɔ n'am zɔka tɛ ɔɔ-zu kɔ‘m'i nɛ mɔ'ɔ: Mi zɔka ŋma gasa kusa te nɛ yor sɛn bɛɛ-nu see gara.

⁸Te'i gasa, kpa ŋgai, ɓɛɛ kusi si yiwese gan zu mɔ lɛŋ. Ɓɛɛ gɔm nduti-nu mɛ lɛŋ, wi nɛ zɔk a̧ na, bo na.

⁹Wa̧a̧ te'i duka so nɛ de-a nyɛmna, te'i waia so batɛ, kóó o nde kpa so nyɔŋmɔ kɔ‘i sɛnɛ. O saɗi-zaŋbɛɛ ɔm so tɛ sɛn ɗɔɔ gi̧ɔ̧-a̧. Poo wa̧a̧-a̧ duka so nɛ o fara-de-yaa ko o nɔ̧́í̧ mbɛt; nɛ a̧ a̧ dai so mɔ lɛŋ.

¹⁰« ‹Mi zɔka mɔɔ nɔ‘i lɛŋ ŋgimbi n'am ɔ nɛ zu gɔn gado kɔ‘m. Sɛn tɛ ɔɔ zu'i mbɛt, mi zɔka ŋma sa̧a̧ wi-pɛm-mɔ fara zira-a tɛnɛ nɛ yiwese.

¹¹A̧ tɔ̧ɔ̧ wen nɛ hee-ger'e: Ɛ̀nɛ̀ gɔ́m te’ɛ pi̧ nu, ɛ̀nɛ̀ ɓír o gbaa-er-a, ɛ̀nɛ̀ á̧k o wa̧a̧-a̧ yinɛ, ɛ̀nɛ̀ kái waya-a a taŋ; o saɗi a̧ yu ti ɗɔɔ gi̧ɔ̧-a̧, o nɔ̧́í̧ a̧ yu tɛ o gbaa-er-a.

¹²Ɛ̀nɛ̀ é ŋginda-te'i nɛ o kunin-a duk sɛnɛ‘i ɓɔn zaŋbɛɛ, nɛ oi nyak-boi in ndɛrɛ n’ɛnɛ tɛ hɛr nɛnɛ‘i, ɓɛɛ ɛ̀nɛ̀ é ha̧ dɔmbɔrɔ mɛ a zu a̧ in ha̧ zɔ̧ mɛ duk nɛ́ kpɔk mɔɔ-nyɔŋ kɔ̧-a̧ in o saɗi.

¹³See-aa beka duk hee ko bíí ga ɓɔna; taamɔ kɔ̧-a̧ tɛ duk nɛ ko saɗi, ɓɛɛ a̧ tɛ duk hegɔ tɛ pɛ mɔɔrɔ-ɗoŋ-yiitoo.

¹⁴« ‹Mɔ‘i tɛ de hegɔ nyɛm nɛ ɗoŋ ha̧a̧nú ko o wi-pɛm-mɔ in ko o sa̧a̧-wi,[2] ha̧ o bíí mɛ iŋ‘e nɛ́ Wan nɛ duk ŋgɔn mɛ, a̧ ɔ wan zu o mɔɔ-wan ko o bíí, ɓɛɛ a̧ ha̧a̧ wan ha̧ wi nɛ dee tɛ-a in baa wi-mɔka-see e ŋgɔn mgbara o dɔka bíí.

¹⁵Zu nɛ mi wannu Nabukɔdɔnɔsɔr ɔa'i, nɛ mɔ‘i. Ɓɛɛ kɔ-mɛ Bɛltasar, mɛ̀ tɔ̧́ gba̧a̧-a̧ ha̧‘m, wen ŋma wi-iŋ-mgbara-mɔ sɛn tɛ nu kɔ‘m hɛ̧ɛ̧ nɛ nyɛma mɛ tɔ̧ mgbara zu'i ha̧‘m bo na, ɓɛɛ mi iŋa, mɛ tɛ tɔ̧ gba̧a̧-a̧ ha̧‘m nɛ sa̧a̧-a̧ wen ɔmi ko o sɔ̧ nɛ ɔ sa̧a̧ a̧a̧ tɛ-mɛ.› »

¹⁶Daniɛl nɛ‘i sa'e Bɛltasar zia wen'i, kíì dee a̧, ɓɛɛ a̧ sakali. Wannu tɔ̧ɔ̧ ha̧ a̧: «Ká mɛ́ sakali wen zu'i in gba̧a̧-a̧ na.» Bɛltasar kifa nú: «Gasa wan kɔ‘m, zu’ɛ a̧ duk wen o wi-sɛn'nɛ́ ɓɛɛ gba̧a̧-a̧ a̧ duk kɔ‘i wen o wisɛn k’ɛ́nɛ́.

¹⁷Te n’ɛnɛ zɔka nɛ̀ gasa kusi si yiwese, kpa ŋgai, nɛ bíí zɔk hɔ nduti-nu naar lɛŋ,

¹⁸nɛ wa̧a̧-a̧ ɓɔ nɛ de-a, nɛ waya-a ɔ dɔka, nɛ o mɔ lɛŋ kpa so mɔɔ-nyɔŋ sɛnɛ, nɛ o saɗi-zaŋbɛɛ ɔ ti ɗɔɔ-aa in o nɔ̧́í̧ yiwese de yaa tɛ o gbaa-er-a'i,

¹⁹nɛ́ ɛ́nɛ́. Mɛ̀ nɛ́ ɛ́nɛ́ wannu, á̧ gasá, ɓɛɛ kpa ŋgai zu mɔ lɛŋ. Wan k’ɛ́nɛ́ gasa hegɔ hɔ yiwese, ɓɛɛ kpa ŋgai zu nu lɛŋ.

²⁰Nɛ̀ kó Sa̧a̧ Wi-pɛm-mɔ nɛ wannu zɔka fara zira-a nɛ yiwese, ɓɛɛ ká tɔ̧‘e: ‹Wa a̧ gɔm te'i pi̧ nu, wa a̧ ɓir a̧ a nu lɛŋ, ɓɛɛ wa a̧ e nɛ ŋginda-a in o ku̧nin-a nɛ‘i tɛ hɛr nɛ nyak-boi in ndɛrɛ ɓɔn zaŋbɛɛ, wa a̧ e ha̧ dɔmbɔrɔ mɛ ɓɔ sɛnɛ, ɓɛɛ wa a̧ é ha̧ a̧ mɛ duk kpɔk in o saɗi-zaŋbɛɛ tɛ pɛ mɔɔrɔ-ɗoŋ-yiitoo wo'i,

²¹gba̧a̧ wen'i nɛ mɔ'ɔ. Mɛ̀ nɛ́ heembea nɛ̀ Wan nɛ duk ŋgɔn mɛ toma tɛnɛ h’ɛ́nɛ́, Nyaa Wannu.

²²Wa tɛ ndak'nɛ́ yinɛ mgbara o bíí, ɓɛɛ fara k’ɛ́nɛ́ tɛ duk kpɔk in o saɗi-zaŋbɛɛ; ɛ́nɛ́ tɛ nyɔŋ nɛ zɔ̧ hee o ndai ga, dɔmbɔrɔ yiwese tɛ ɓɔ tɛ‘nɛ́ tɛ pɛ mɔɔrɔ-ɗoŋ-yiitoo hɔ ŋgimbi n’ɛnɛ tɛ iŋ‘e, nɛ́ Wan nɛ duk ŋgɔn mɛ a̧ ɔ wan zu mɔɔ-wan ko o bíí, ɓɛɛ nɛ́ a̧ a̧ ha̧ wan ha̧ wi nɛ dee tɛ-a.

²³Ɓɛɛ wen nɛ tɔ̧a̧‘e, a'i e ŋginda-te nɛ oi ku̧nin-a wo'i, nɛ mɔ nɛ usi'e, wan k’ɛ́nɛ́ tɛ pii ɗoŋ er'nɛ́ ŋgimbi n’ɛnɛ tɛ iŋ‘e nde, nɛ́ Sɔ̧ mɛ yiwese a̧ ɔ wan zu mɔ lɛŋ.›

²⁴«Hegɔ, Dáà, Wannu, ɛ̀nɛ̀ zíí mbɔrɔ kɔ‘m; ɛ̀nɛ̀ é dee ɗaŋmɔ duk, ɓɛɛ ɛ̀nɛ̀ dé nɛ mɔ nɛ yuwar-a; ɛ̀nɛ̀ é yɔɔ-kaya k’ɛ́nɛ́ lɛŋ duk, ɓɛɛ ɛ̀nɛ̀ dé ko ha̧ o wisan wen h’ɛ́nɛ́ mɛ duk nɛ de-a ɗoŋ-aa nyɛi̧.»

²⁵O mɔɔ nɔ‘i lɛŋ tika zu wannu Nabukɔdɔnɔsɔr.

²⁶Ɗoŋ pɛ kpɔk, sɛn tɛ yara-a n'aa yar nɛnɛ nɛ zu tua-wan saaye Babilɔŋ,

²⁷a̧ tɔ̧a̧: «Mɔ'ɔ bo nɛ mi a̧‘m mboo Babilɔŋ yaa-gásì tɛ ŋgai kɔ‘m ha̧‘m mɛ duk sɛnɛ, usi nɛ mɔɔ-wan kɔ‘m in gasi kɔ‘m na nde?»

²⁸Nú-a tɛ zɔm tɛ wen'i na, ɓɛɛ a̧ zii ŋma tiger nɛ tɔ̧ɔ̧ nɛ yiwese'e: «Wannu Nabukɔdɔnɔsɔr, mɔɔ-wan yuu er-mɛ kaɗi.

²⁹Wa tɛ ndak mɛ mgbara o bíí yinɛ. Mɛ tɛ duk kpɔk in o saɗi-zaŋbɛɛ; mɛ tɛ nyɔŋ nɛ zɔ̧ hee o ndai ga. Mɛ tɛ duk hegɔ pɛ mɔɔrɔ-ɗoŋ-yiitoo, hɔ ŋgimbi nɛ mɛ tɛ iŋ‘e, nɛ́ Wan nɛ̀ duk ŋgɔn mɛ a̧ ɔ wan zu mɔɔ-wan ko o bíí, ɓɛɛ nɛ́ a̧ a̧ ha̧ wan ha̧ wi nɛ dee tɛ-a.»

³⁰Tɛ kpɔk kale ŋgimbi'i, wen nɛ tɔ̧ɔ̧ zu Nabukɔdɔnɔsɔr hɔɔ gba̧a̧; wa ndaka a̧ yinɛ mgbara o bíí, a̧ nyɔŋ nɛ zɔ̧ duk nɛnɛ hee o ndai ga. Dɔmbɔrɔ ɓɔɔ tɛ-a lɛŋ, o mui̧-zu-a hɔ hee dɛ̀dɛ́ dila[3] ga, ɓɛɛ o sɔ̧ɔ̧ er-a zi̧i̧ hee ko o nɔ̧́í̧ ga.

³¹«Nɛ̀ ŋgimbi kɔ‘m dama kaɗi, mi Nabukɔdɔnɔsɔr hu̧i̧a̧ yí‘m si yiwese. Zu'm pia ɗoŋ, ɓɛɛ mi zɔn Wan nɛ duk ŋgɔn mɛ; mi dee osoko gasi nɛ Wan nɛ duk ɓɔnsɛnɛ tɔ̧ nɛnɛ: A̧ ɔ wan kpoo nɛ kpoo, ɓɛɛ mɔɔ-wan kɔ̧-a̧ duk zu o bezaŋ yaknɛ sɔ̧i̧i̧.

³²O bíí zaŋnu lɛŋ nɛ geemɔ; a̧ de mɔ in o gii wi-biro mɛ yiwese in o bíí zu nu hee mɔ'ɔ n'aa kɔ̧a̧ ga. Ŋma wi nɛ tɛ dor a̧ tɔ̧ nɛnɛ‘e: ‹Ge a̧ mɛ de’ɛ ge?› bo na.

³³«Ɓɛɛ tɛ kale ŋgimbi'i, zu'm pia ɗoŋ; tu̧u̧-tɛ-mɔ in gasi kɔ‘m pia ɗoŋ ha̧ wan kɔ‘m mɛ ye tɛ gasamɔ woyo. O wi-ba-keta in o gasawi kɔ‘m tɛ̀ɛ̀ kpɛk am, ɓɛɛ e'm tɛ wan woyo. Ɗoŋ-aa'i mɔɔ-wan kɔ‘m gasa nyɛmna, ɓɛɛ hu̧r gan kuti-a.

³⁴«Mi Nabukɔdɔnɔsɔr, n'am duk kinii’ɛ, mi de nɛ osoko ha̧ Wan mɛ yiwese, zɔn nɛ a̧, in gasi nɛ a̧ mbɛt, wen tom kɔ̧-a̧ lɛŋ nɛ kpasamɔ, yuwar kɔ̧-a̧ ɔ tana, ɓɛɛ a̧ a̧a̧ nɛ ŋgai mɛ e o wi-ŋmaŋ-tɛ si ɗɔɔ.»