Read Northwest Gbaya DANIƐL 5 Bible Online

DANIƐL 5 - Northwest Gbaya bible

DANIƐL 5

¹Wannu Baltazar dee gasa gbaŋa ha̧ o gasawi nu kɔ‘i nɛ mɔi̧a tɛ bíí booro, ɓɛɛ a̧ nɔ dɔ̧ɔ̧ sɛn ti wa.

²Ŋgimbi nɛ wannu Baltazar nɔɔ nɛ dɔ̧ɔ̧‘i, a̧ ha̧a̧ nú ha̧ wa mɛ kai o nyɛk nɛ‘i dee nɛ lɔr, in nɛ bu-mbɔi nɛ dáà kɔ̧-a̧ Nabukɔdɔnɔsɔr baa kai so yinɛ sɛn kɔ̧ Tua ko Sɔ̧ sɛn Jerusalɛm, wen ha̧ a̧ mɛ nɔ nɛ dɔ̧ɔ̧ in o gasawi, o okoo in o kó-bii-gima kɔ̧-a̧.[4]

³Wa kaia o nyɛk nɔ‘i nɛ‘i dee nɛ lɔr in bu-mbɔi nɛ wa kaia so yinɛ kɔ̧ Tua ko Sɔ̧ sɛn Jerusalɛm'i tɛnɛ, ɓɛɛ wannu in o gasawi, o okoo in o kó-bii-gima nɔ nɛ dɔ̧ɔ̧.

⁴Wa nɔɔ dɔ̧ɔ̧ gasi nɛ o sɔ̧ nɛ‘i dee nɛ lɔr, nɛ bu-mbɔi, nɛ ndɛrɛ, nɛ boi, nɛ te in nɛ ta.

⁵Kà wa zɔk wo, er bíí nɛ mɔ'ɔ nɛ yɔr mɔ zaŋ ŋgeŋ kɔ̧ tua ko wannu, ká̧ fara nɛ dek-e-wee duk sɛnɛ‘i. Wannu zɔka er nɛ yɔr mɔ‘i,

⁶yi wannu kpaia, zu-a zika, ku-a mɔka, ɓɛɛ o naŋ-a[5] mbali ŋmaa.

⁷Wannu pi̧i̧ tom ha̧ wa mɛ sa o wi-de-mɔɔ-kifi, o be Kaldee in o wi-zɔk-mɔ tɛnɛ bee. A̧ tɔ̧ɔ̧ ha̧ o wi-iŋ-mgbara-mɔ mɛ Babilɔŋ: «Wi nɛ tɛ tɔr yɔramɔ'ɛ in tɔ̧ɔ̧ gba̧a̧-a̧ ha̧‘m, wi tɛ pi̧ laa-wan tɛ-a, wi tɛ pi̧ kísí-lɔr ger-a, ɓɛɛ a̧ tɛ duk nɛ ŋma gasawi kpɔk mgbara o dɔka-a taar tɛ nu kɔ‘m.»

⁸O wi-iŋ-mgbara-mɔ ko wannu lɛŋ gara nɛ haya-a, ɓɛɛ wa iŋ so tɔra yɔramɔ‘i kà bó nɛ̀ tɔ̧ɔ̧ gba̧a̧-a̧ ha̧ wannu na mbɛt.

⁹Zu wannu Baltazar zika tɛ mɔ‘i nyɛmna, yi-a kpaia, ɓɛɛ o gasawi kɔ̧-a̧ yaa nɛ kíì mbɛt.

¹⁰Tɛ ŋgimbi'i, naa ko wannu yee tua fara nɛ wa de gbaŋa'i; tɛ zia ger wannu in o gasawi kɔ‘i, a̧ tɔ̧a̧: «Wannu, ɛ̀nɛ̀ nyɔŋ hɔ tɛ sɔki! Ká taamɔ k’ɛ́nɛ́ sakali na, in ká see'nɛ́ tu̧ na mbɛt!

¹¹Ŋma bíí nɛ ɔmi ko o sɔ̧ nɛ ɔ sa̧a̧ a̧a̧ tɛ-a a̧a̧ tɛ nu k’ɛ́nɛ́ hɛ̧ɛ̧. Ŋgimbi-wan ko dáà k’ɛ́nɛ́, ɛɛ zɔka'e wi’ɛi iŋa zɔka mɔ, a̧ ɔ haya, ɓɛɛ iŋa-mgbara-mɔ kɔ̧-a̧ duk hee ko o sɔ̧ ga. Hegɔ dáà k’ɛ́nɛ́ wannu Nabukɔdɔnɔsɔr ee a̧ nɛ gasawi ko o wi-de-mɔɔ-kifi, o wan-gbana, o be Kaldee in o wi-zɔk-mɔ.

¹²Daniɛl, nɛ̀ wannu gɔna so nin Bɛltasar ha̧ a̧, a̧a̧ so nɛ ɗuka taamɔ nyɛmna, a̧ nɛ wi-iŋ-mɔ. A̧ ɔ haya, ɓɛɛ a̧ nyɛma mɛ tɔ̧ gba̧a̧ zu in sumgba ká bá nɛ̀ ɗafa-mgbara-mɔ. Ɛ̀nɛ̀ sá a̧, ɓɛɛ a̧ tɛ tɔ̧ mgbara mɔ‘i h’ɛ́nɛ́.»

¹³Wa mgbɔɔ Daniɛl tɛnɛ ti wannu, ɓɛɛ wannu ak a̧: «Mɛ́ nɛ́ ŋma be Juda nɛ wa sa'e Daniɛl nɛ dáà kɔ‘m kaia so piinɛ nɛ nu kɔ-wa nde?

¹⁴Mi zia'e ɔmi ko o sɔ̧ nɛ ɔ sa̧a̧ a̧a̧ tɛ mɛ; wa'e mɛ iŋa zɔka mɔ, mɛ ɔ haya, ɓɛɛ iŋa-mgbara-mɔ nyɛmna a̧a̧ tɛ mɛ mbɛt.

¹⁵Wa mgbɔɔ o wi-iŋ-mgbara-mɔ, in o wi-zɔk-mɔ tɛnɛ mɛ tɔr yɔramɔ'ɔ in tɔ̧ɔ̧ gba̧a̧-a̧ ha̧‘m, ɓɛɛ wa nyɛm na.

¹⁶Mi zia'e mɛ nyɛma tɔ̧ɔ̧ mgbara mɔ in ɗafa mgbara-a mbɛt. Ɓɛɛ kà mɛ nɛ nyɛma tɔra yɔramɔ'ɔ in tɔ̧ɔ̧ gba̧a̧-a̧ ha̧‘m mbɛt, mi tɛ pi̧ laa-wan tɛ-mɛ, mi tɛ pi̧ kísí-lɔr ger-mɛ, ɓɛɛ mɛ tɛ duk nɛ ŋma gasawi kpɔk mgbara o dɔka-a taar tɛ nu kɔ‘m.»

¹⁷Ɓɛɛ Daniɛl tɔ̧ ha̧ wannu'e: «O ha̧a̧mɔ nɔ‘i de ŋma mɔ tɛ‘m na, ɛ̀nɛ̀ é mɔ k’ɛ́nɛ́; koo ɛ́nɛ́ ha̧a̧ ha̧ ŋma bíí nɛtɛ. Nɛ ko yɔramɔ, mi tɛ tɔr ɓɛɛ mi wee ɗoŋ-aa h’ɛ́nɛ́.»

¹⁸«Sɔ̧ nɛ duk ŋgɔn mɛ, wannu, ha̧a̧ wan, tu̧u̧-tɛ-mɔ ha̧ dáà k’ɛ́nɛ́ Nabukɔdɔnɔsɔr.

¹⁹Gasi nɛ Sɔ̧ ha̧a̧ ha̧ a̧‘i dee so ha̧ o dukbíí in o tugun bíí nɛ tɔ̧ nú nɛtɛ nɛtɛ mɛ yu a̧. A̧ gbɛ so bíí hee mɔ'ɔ nɛ see-aa kɔ̧ɔ̧ ga; ɓɛɛ a̧ ee o wi n'aa kɔ̧ɔ̧ mbɛt. A̧ ha̧ so gasi ha̧ o wi n'aa kɔ̧a̧, ɓɛɛ a̧ foo o ŋma si ɗɔɔ mbɛt.

²⁰Ŋgimbi n'aa ku̧u̧naŋ gasa zu-a, nɛ see-aa ŋgaia gan zu a, wa gboo a̧ yinɛ tɛ wan, ɓɛɛ tu̧u̧-tɛ-a kaɗi.

²¹Wa foo a̧ yinɛ mgbara bíí. Taamɔ kɔ̧-a̧ kifa duk hee ko saɗi ga, ɓɛɛ a̧ duk kpɔk in o tuifuu-zaŋbɛɛ. A̧ nyɔŋ so nɛ zɔ̧ hee ndai ga, ɓɛɛ dɔmbɔrɔ do tɛ-a hɔ wese n'aa iŋa nɛnɛ‘e, mɛ nɛ Sɔ̧ si ŋgɔn a̧ ɔ wan zu mɔɔ-wan ko o bíí, ɓɛɛ nɛ wi n'aa kɔ̧a̧ a̧ a̧ ba e tɛ wan.

²²«Ɓɛɛ kɔ-mɛ, Baltazar, bem ko Nabukɔdɔnɔsɔr, mɛ́ mɔ́k see-mɛ si ɗɔɔ tɛ mɔ‘i nɛ mɛ iŋa so'i na.

²³Mɛ dee ŋgazu in GASA WAN mɛ yiwese. Mɛ kaia o nyɛk kɔ̧ Tua kɔ̧-a̧ a ti mɛ nɔ nɛ dɔ̧ɔ̧ in o gasawi, o okoo in o kó-bii-gima kɔ-mɛ, gasi nɛ nin o sɔ̧ nɛ‘i dee nɛ lɔr, bu-mbɔi, ndɛrɛ, boi, te in ta nɛ zɔk mɔ na, zii mɔ na, in nɛ iŋ mgbara mɔ na mbɛt; ɓɛɛ mɛ́ gásí Sɔ̧ nɛ kasi ɔmi in o mɔ kɔ-mɛ lɛŋ‘i na.

²⁴Mɛ̀ nɛ́ Sɔ̧‘i a̧ toma er nɛ yɔra mɔ'ɛ.

²⁵«Tɔra-a nɛ: MƐNE, MƐNE, TƐKƐL in PARSIN.

²⁶Gba̧a̧ wen-aa nɛ mɔ'ɔ: MƐNE nɛ mɔ nɛ tɔ̧‘e, ‹wi tɔra›; wen Sɔ̧ tɔra pɛ-wan kɔ-mɛ ɓɛɛ kaɗa kaɗi.

²⁷TƐKƐL nɛ mɔ nɛ tɔ̧‘e, ‹wi wea›; wen a̧ baa mɛ e zu mɔɔ-we-mɔ, ɓɛɛ mɛ diti na.

²⁸PƐRƐS mɛ nɛ mɔ nɛ tɔ̧‘e, ‹wi kɛ̧a̧›; wen wan kɔ-mɛ kɛ̧a̧ ha̧ o be Mɛdɛ in o be Pɛrsɛ.»

²⁹Nɛ mɔ'ɔ nɛ Baltazar ha̧a̧ nú ha̧ wa mɛ pi̧ de laa-wan tɛ Daniɛl in kísí-lɔr ger-a, ɓɛɛ e a̧ mɛ duk nɛ taar gasawi mgbara o dɔka-a tɛ nu kɔ̧-a̧.

³⁰Kale zaŋzɛ‘i, wa gbɛɛ Baltazar wannu ko o be Kaldee.