Read Northwest Gbaya DANIƐL 6 Bible Online

DANIƐL 6 - Northwest Gbaya bible

DANIƐL 6

¹Darius be Mɛdɛ baa wan ká a̧ a̧a̧ nɛ pɛ ɓu-mɔɔrɔ-ɗɔŋ-kpɔk-zua-yiito.

²Darius zɔka'e ɔ dee ha'i mɛ hok o wi-duk-zu-nu gɔmŋmaa-nɛ-ɓu-yiitoo mɛ ɔ wan in wii.

³A̧ ee gasawi taar zu wa, ɓɛɛ Daniɛl nɛ ŋma kpɔk mgbara wa. O wi-duk-zu-nu nɔ‘i tɛ we ɗoŋ mɔ nɛ yak tɛ nu kɔ-wa ha̧ o gasawi nɔ‘i taar'i, wen ká ŋma mɔ tɛ́ɛ̀ sakali wannu.

⁴Daniɛl iŋa so mgbara mɔ nyɛmna gan oi o gasawi nɔ‘i yiitoo'i ba nɛ o wi-duk-zu-nu mbɛt, hegɔ wannu kɔ̧ɔ̧ so mɛ e a̧ nɛ gasawi zu nu kɔ‘i lɛŋ.

⁵Tɛ mɔ‘i, oi gasawi in o wi-duk-zu-nu kia yuwar mɛ ɗaŋ tom ko Daniɛl tɛ nù yinɛ; mɔ kpɔk, wa kpa ŋma be gɔɔmɔ kóó yɔɔ-kaya ha̧ wa mɛ ɗɔ a sɛnɛ na, wen a̧ nɛ wi-de-mɔ nɛ yuwar-a nɛ ŋma wen mɛ tɔ̧ zu a tikiɗi bo na.

⁶O wi nɔ‘i baa keta ɓɛɛ tɔ̧: «Ɛɛ beka kpa ŋma yɔɔ-kaya tɛ Daniɛl mɛ ba a̧ nɛ wen sɛnɛ, kà bó nɛ́ tɛ́ Heembea ko Sɔ̧ kɔ̧-a̧ na.»

⁷O gasawi in o wi-duk-zu-nu nɔ‘i yaka sitɛ wannu, ɓɛɛ tɔ̧ ha̧ a̧: «Wannu Darius, ɛ̀nɛ̀ nyɔ́ŋ hɔ tɛ sɔki!

⁸«O gasa wi-duk-zu-nu, o gasawi, o wi-duk-zu-nu, o wi-tɔ̧-mbɔrɔ in o wi-duk-zu-zika-nù lɛŋ baa keta ha̧ wannu mɛ gɔn geŋa'e: tɛ ɔɔ-zɛ ɓu-taar, wi nɛ beka gasi wannu na, nɛ tɛ gasi ŋma sɔ̧, kóó nɛ ŋma bíí nɛtɛ, wi tɛ ba a̧ pi̧ kɔ̧́ kɔ̧̀ ko o dila.

⁹Hegɔ kinii, wannu, ɛ̀nɛ̀ gɔ́n geŋa’ɛ, ɓɛɛ ɛ̀nɛ̀ e tumbal k’ɛ́nɛ́ sɛnɛ, nɛ bíí beka kpai ŋma mɔ sɛnɛ na, hee mɔ'ɔ nɛ‘i nyɛm mɛ kpai nɛ mɔ tɛ heembea ko o be Mɛdɛ in Pɛrsɛ na’ɛ na ga.»

¹⁰Wannu Darius kpɛka wen kɔ-wa, ɓɛɛ yɔr mɔ e tumbal tɛ geŋa'i.

¹¹Ŋgimbi nɛ Daniɛl zia'e, wannu kpɛka heembea'i, e nɛ tumbal-wan kɔ‘i sɛnɛ, a̧ sii ɗoŋ kɔ̧ tua kɔ̧-a̧ nɛ o woi-aa mɛ ŋgɔn zɔk so mɔ si Jerusalɛm; ɓɛɛ war taar tɛ wese kpɔk kpɔk, a̧ gbɛ so nɛ zugur-aa nu kɔfi nɛ Sɔ̧, zɔn nɛ a̧, hee mɔ'ɔ n'aa de so nɛti ga.

¹²O wi-sɛn-a tɛa, ɓɛɛ kpa a̧ fara aia nú kɔfi nɛ Sɔ̧.

¹³Wa sii ɗoŋ nɛ haya-a nɛ́ɛ̀ tɔ̧ ha̧ wannu hee mɔ'ɔ ga: «Wannu, bo nɛ ɛ́nɛ́ gɔna geŋa h’ɛ́ɛ́‘e, sɛn tɛ ɔɔ-zɛ ɓu-taar, wi nɛ tɛ gasi ŋma sɔ̧, kóó nɛ ŋma bíí nɛtɛ, nɛ̀ bó nɛ́ ɛnɛ na, wi tɛ pi̧ a̧ kɔ̧́ kɔ̧̀ ko o dila na nde?» Wannu kifa nú ha̧ wa: «Nɛ mɔ‘i! Kana hee mɔ'ɔ nɛ heembea ko o be Mɛdɛ in Pɛrsɛ kpai na’ɛ ga!»

¹⁴Ɓɛɛ wa tɔ̧ ha̧ wannu: «Daniɛl ŋma be Juda nɛ wa baa so nɛ bara tɛnɛ, é nɛ́ ɛ́nɛ́ in heembea tɛ geemɔ. Wese lɛŋ, a̧ kɔfi nɛ Sɔ̧ kɔ̧-a̧ war taar.»

¹⁵Nɛ wannu zia wen'i, see-aa ɗaŋa nyɛmna, ɓɛɛ a̧ kii mɔ n'aa tɛ de mɛ fo nɛ wen zu Daniɛl yinɛ hegɔ zɛ de nɛnɛ, kii nɛ yuwar mɛ kpas'a.

¹⁶O wi nɔ‘i pia ɗoŋ tɛ wannu, ɓɛɛ tɔ̧: «Ɛ́nɛ́ iŋa'e, hee mɔ'ɔ nɛ heembea ko o be Mɛdɛ in Pɛrsɛ tɔ̧ ga, wi beka kpai ŋma mɔ tɛ geŋa ko wannu na.»

¹⁷Ɗoŋ wen'i, wannu ha̧a̧ nú ha̧ wa mɛ ba Daniɛl pi̧ kɔ̧́ kɔ̧̀ ko o dila. Wannu tɔ̧ɔ̧ ha̧ Daniɛl: «Sɔ̧ kɔ-mɛ nɛ mɛ de tom ha̧ a̧ nɛ see kpɔk'i tɛ kpasi mɛ.»

¹⁸Wa kina gasa ta kpe nɛ nu kɔ̧‘i, ɓɛɛ wannu e tumbal kɔ‘i in ko o gasawi kɔ‘i zu ta'i, ká mɔ ko Daniɛl tɛ́ɛ̀ kpai.

¹⁹Wannu sii ɗoŋ si kɔ̧ tua kɔ‘i; a̧ nyɔŋ mɔ mɛ zɛ‘i na ɔ nɛnɛ, ŋma kóò kɔ̧-a̧ hɔ katɛ a̧ na, ya hɔ yi-a na mbɛt.

²⁰Mɔ tɛ gɔn na mɛ tutuyɛ sut, ká wannu hɔɔ so nú kɔ̧̀ ko o dila kaɗi.

²¹A̧ hɔɔ nu kɔ̧‘i, ɓɛɛ a̧ sa Daniɛl nɛ dita-see, tɔ̧ nɛnɛ: «Daniɛl, wi-de-tom ko Sɔ̧ nɛ duk kpasa, Sɔ̧ nɛ mɛ de tom ha̧ a̧ nɛ see kpɔk kpasa mɛ nú o dila nde?»

²²Ɓɛɛ Daniɛl kifi nú: «Wannu, ɛ̀nɛ̀ nyɔ́ŋ hɔ tɛ sɔki!

²³Sɔ̧ kɔ‘m toma betom kɔ‘i tɛnɛ, ɓɛɛ kpe nu o dila lɛŋ, ɓɛɛ wa de ŋma ɗaŋmɔ in am na, wen ŋma ɗaŋmɔ n'am dee ti a̧ kóó sɛn ti'nɛ́ mbɛt, bo na.»

²⁴Wannu kpaa gasa desee, ɓɛɛ ha̧ nú ha̧ wa mɛ dak Daniɛl gbonɛ. Wa daka Daniɛl gbonɛ, ɓɛɛ zɔk ŋma da̧i̧ tɛ-a na, wen n'aa ee so ta nɛ Sɔ̧ kɔ̧-a̧.

²⁵Wannu hee mbéá ha̧ wa mɛ kai o wi nɛ ee ɗɔra tɛ Daniɛl a kɔ̧́ kɔ̧̀ ko o dila, gu nɛ o bem in o kóò kɔ-wa lɛŋ. Wa tɛ hɔ ndaa kɔ̧ na, ká o dila a̧ka̧ wa lɛŋ kaɗi.

²⁶Wannu Darius yɔra kalata ha̧ o dukbíí, in o tugun bíí nɛ tɔ̧ nú nɛtɛ nɛtɛ zu nu’ɛ nɛ oi-aa lɛŋ tɔ̧ nɛnɛ‘e: «Gasa ga̧a̧mɔ a̧ duk in'nɛ̀ɛ́!

²⁷«Nɛ mi a̧ gɔn geŋa’ɛ ha̧ o bíí lɛŋ nɛ a̧a̧ zu nu kɔ‘m. Ɛ́nɛ́ o bíí lɛŋ, ɛ̀nɛ̀ yú kíì Sɔ̧ ko Daniɛl. A̧ nɛ Sɔ̧ nɛ fe na; a̧ duk kpasa ɓɔnsɛnɛ. Ŋma mɔɔ-ɗaŋ mɔɔ-wan kɔ̧-a̧ bo na; ɔɔ-wan kɔ̧-a̧ duk kpoo nɛ kpoo!

²⁸Nɛ́ a̧ a̧ gbo bíí ɓɛɛ a̧ kpasa bíí mbɛt; nɛ́ a̧ a̧ de o mɔɔ-usi-mɔ in o mɔɔ-kifi, sɛn yiwese in mbɔɗɔnu wen nɛ a̧ a̧ kpasa Daniɛl nú o dila.»

²⁹Ɗoŋ mɔ‘i, Daniɛl duka nɛ de-a ŋgimbi-wan ko Darius in ko Sirus be Pɛrsɛ.