Read Northwest Gbaya DANIƐL 8 Bible Online

DANIƐL 8 - Northwest Gbaya bible

DANIƐL 8

¹«Tɛ taar pɛ-wan ko Baltazar, mi Daniɛl ɔɔ mbe zu ɗoŋ wan n'am ɔɔ so nɛti.

²Tɛ ɔɔ zu'i, kà‘m zɔk wo, mi nɛ mɔ'ɔ n'am duk tɛ ŋga ye Suzɛ tɛ zika-nù Elam mɛ‘i’ɛ. Mɛ ɗoŋ woyo, mi a̧a̧ nu yi Ulai.

³Mi hu̧i̧a̧ yí‘m, ɓɛɛ mi zɔk ŋma vala sami nɛ yor sɛn nu yi, zak-a yiitoo nɛ dura-a, ɓɛɛ ɓii-aa nɛ sɔia nɛ ɗoŋ zi̧i̧ gan kuti-a.

⁴Mi zɔka vala sami'i yɛka zak si yee-wese, si ká̧-zan-mɛ́-ŋgɔn in si ká̧-zan-mɛ́-ɗɔɔ. Ŋma saɗi nɛ nyɛma mɛ yor ti a̧ bo na, ŋma bíí nɛ nyɛma mɛ ɓar mɔ nú-a yinɛ bo na mbɛt; a̧ de so mɔ hee mɔ'ɔ nɛ see-aa kɔ̧a̧ ga, gasi nɛnɛ siti.

⁵«Mi ɓɔna fara ta mɔ tɛ mɔ‘i, ɓɛɛ ŋma vala gbadua hɔ nɛ yee-wese, a̧ zika nù kpa lɛŋ, naŋ-a ndɔ nu na, ŋma zak a̧a̧ so see-a mgbara gbaayi-a yiitoo.

⁶A̧ tɛ̀ɛ̀ kpe vala sami nɛ a̧a̧ nɛ zak yiitoo, n'am baa zɔk so sɛn nu yi'i e nu, ɓɛɛ ba a̧ nɛ biro.

⁷A̧ hɔɔ kpa Vala sami'i, ɓɛɛ see-aa kur hee wee ga; a̧ too vala sami'i, gbin o zak-a yiitoo a nu, ɓɛɛ sami'i bo so nɛ̀ ŋgai mɛ yor ti a̧ na. Vala gbadua'i visa a̧ pi̧ nu, ɓɛɛ i̧s'a̧; ŋma bíí nɛ nyɛma mɛ ɓar vala sami'i ɗɔɔ-aa bo na.

⁸«Vala gbadua'i gasa siti gan kere, ɓɛɛ ŋgimbi n'aa kpa nɛ ŋgai nyɛmna'i, gasa zak-a'i gbina, ɓɛɛ mbe-a naar hɔ oi-aa dam nɛ mgbii-zan naar.

⁹Sɛn tɛ ŋma zak nɔ‘i kpɔk, ŋma be geɗek-a sɔia, ɓɛɛ bɔ̧i̧ si ká̧-zan-mɛ́-ɗɔɔ, daŋa-wese in sitɛ gba de nù.[7]

¹⁰Zak'i gasa hegɔ hɔ tɛ o gii wi-biro yiwese mɛ, ɓɛɛ a̧ fo o ŋma gii wi-biro nɔ‘i in o ŋma sɔra a nu i̧si̧ nɛnɛ.

¹¹A̧ gasa siti hɔ tɛ Be wan-zu o gii wi-biro nɔ‘i, ɓɛɛ a̧ ɗaŋ ɗafa-sɔ̧ nɛ‘i ɗafi so ha̧ a̧ ɓɔnsɛnɛ yinɛ, gbin nɛ tua ko Be-wan'i a nu mbɛt.

¹²Tɛ mɔ n'aa de de na'i, a̧ kpaa ŋgai zu o gii wi-biro in zu ɗafa-sɔ̧ nɛ‘i ɗafi so ɓɔnsɛnɛ. A̧ baa Kpasawen pi̧ taŋ, ɓɛɛ mɔ n'aa de lɛŋ hɔ nɛ gba̧a̧.

¹³Mi zia ger ŋma betom fara tɔ̧ wen, ɓɛɛ ŋma woyo tɔ̧ ha̧ a̧: ‹Mɔ nɛ zu tɔ̧a̧ tɛ ɗafa-sɔ̧ ɓɔnsɛnɛ, tɛ ɗaŋamɔ, tɛ Tua, in tɛ mɔ ko gii wi-biro'i tɛ kaɗi mɛ gese ge?›

¹⁴«Kuti betom kifa nú: ‹Wa tɛ mbo Tua ko Sɔ̧ woyo sɛn ɗoŋ tuyɛ booro-nɛ-gɔmŋmaa-nɛ-ɓu-mɔɔrɔ, in ga̧a̧mɔ hegɔ mbɛt.›

¹⁵«Ɓɛɛ kɔ‘m Daniɛl, ŋgimbi n'am zɔk nɛ mɔɔ nɔ‘i tɛ zu, kii nɛ gba̧a̧-a̧, mi zɔka ŋma mɔ nɛ hɔɔ ŋmaa in bíí fara yora-a ti'm,

¹⁶ɓɛɛ mi zii tiger bíí nɛ tɔ̧ wen nɛ see yi Ulai mɛ‘e: ‹Gabriɛl, mɛ̀ tɔ̧́ gba̧a̧ zu'i ha̧ wi’ɛi.›

¹⁷Gabriɛl tɛ̀ɛ̀ pii fara n'am duk sɛnɛ‘i, ɓɛɛ ŋgimbi n'aa tɛ nɛnɛ‘i, kíì zara'm pi̧ nu. A̧ tɔ̧ɔ̧ ha̧‘m: ‹Mɛ́ bíí,[8] mɛ̀ íŋ‘e zu’ɛ usi nɛ mɔ zu sɔŋkur ŋgimbi.›

¹⁸Ŋgimbi n'aa ɓɔna fara tɔ̧ɔ̧ wen'i ha̧‘m, hiɗ‘am gɔna, ɓɛɛ mi ɔ nu hee fio ga. A̧ foo tɛ‘m fara-ɔ-nu, ba'm e ŋgɔn,

¹⁹ɓɛɛ tɔ̧: ‹Mi tɛ tɔ̧ gba̧a̧ mɔ nɛ tɛ de ŋgimbi nɛ‘i gɔna, ŋgimbi nɛ nyimsea ko Sɔ̧ tɛ kaɗi nɛnɛ ha̧ mɛ.

²⁰Vala sami nɛ mɛ zɔka nɛ a̧a̧ nɛ zak yiitoo, usi nɛ o wannu Mɛdɛ in Pɛrsɛ.

²¹Vala gbadua nɛ mɛ zɔka nɛ buma-a ulɛ-ulɛ‘i, nɛ́ wannu Grɛk, ɓɛɛ gasa zak nɛ mɛ zɔka see-a mgbara o gbaayi-a, nɛ́ kuti wannu.

²²Mbe zak nɛ hɔɔ naar oi wan nɛ gbina'i usi nɛ wan naar nɛ tɛ gbo nɛ tɛ kpɔk zuduk bíí kpɔk, ɓɛɛ wa beka ŋgai hee ko kuti-a ga na.

²³Ŋgimbi kaɗa wan kɔ-wa, ŋgimbi nɛ deemɔ ko o ɗaŋwi be tɛ̀ɛ́ yak zale, ŋma kpɔra wan tɛ kur nɛ kɔ̧ zaŋ-aa ɔ gɔna nyɛmna.

²⁴A̧ tɛ kpa ŋgai siti, ɓɛɛ ŋgai'i, bo nɛ a̧ kpa nɛ tɛ-a na. A̧ tɛ ɗaŋ mɔ nyɛmna, ɓɛɛ mɔ n'aa tɛ de lɛŋ tɛ hɔ gba̧a̧; a̧ tɛ ɗaŋ o wi nɛ a̧a̧ nɛ ŋgai in o sa̧a̧ dukbíí mbɛt.

²⁵Ɓɛɛ hee mɔ'ɔ n'aa a̧a̧ nɛ iŋa-mgbara-mɔ nyɛmna ga, a̧ tɛ iŋ ɔra bíí; a̧ tɛ ŋmaŋ tɛ a̧, kum nɛ o bíí nɛ dɔka-a nɛ e ta'e wi duk tɛ ga̧a̧mɔ. A̧ tɛ ba biro duk nɛ Be-wan nɛ duk zu o dɔka-a lɛŋ, ɓɛɛ wan kɔ̧-a̧ tɛ kaɗi, nɛ bo nɛ er bíí a̧ foo a̧ na.

²⁶Hɔɔ-zu tɛ mɔ ko o tuyɛ in o ga̧a̧mɔ nɛ mɛ zɔka so'i nɛ kpasamɔ, ɓɛɛ kɔ-mɛ, mɛ̀ é mɔ nɛ mɛ zɔka'i kɔ̧ see-mɛ, wen ɗoŋ mɔ-aa ɔ nyɛi̧a.›

²⁷«Ɓɛɛ kɔ‘m Daniɛl, gba̧a̧-tɛ‘m gbina, gɛ̧ɛ̧mɔ baa'm hɔ tɛ ŋma ŋgimbi, ɓɛɛ ɗoŋ mɔ‘i, mi kúra ɓɛɛ mi ye tɛ tom ko wannu woyo. Zu'i sakala so'm nyɛmna, wen mi zii so gba̧a̧-a̧ na.»