Read Northwest Gbaya DANIƐL 9 Bible Online

DANIƐL 9 - Northwest Gbaya bible

DANIƐL 9

¹«Darius bem ko Asuerus tɛ dùk ko o be Mɛdɛ ɔɔ so wan zu nu ko o be Kaldee, ɓɛɛ tɛ kuti pɛ-wan kɔ̧-a̧, mi Daniɛl zia gba̧a̧ yɔramɔ zaŋ sa̧a̧ kalata nɛ tɔ̧a̧‘e, Jerusalɛm tɛ duk nɛ́ bɛɛ-oi tɛ pɛ ɓu-mɔɔrɔ-ɗoŋ-yiitoo, nyɛm nɛ ɗoŋ wen nɛ GASA WAN tɔ̧ɔ̧ so ha̧ wi-tɔ̧-wen oi nu Sɔ̧ Jeremii.

³Mi zika tɛ‘m sitɛ GASA WAN Sɔ̧, wen ha̧‘m mɛ kɔf'aa, ai nɛ nú ha̧ a̧ nɛ zima-yì, pi̧ nɛ laa-bufu tɛ‘m, ɔ nɛ nu zu bùk.

⁴Mi kɔfa GASA WAN Sɔ̧ kɔ‘m, gbar nɛ ɗaŋmɔ ha̧ a̧ hee mɔ'ɔ ga: «Ho! GASA WAN Sɔ̧ nɛ ɔ gasa, nɛ‘i yu’ɛ, ɛnɛ nɛ wi nɛ yor ɗoŋ nɔɔ-tɔk in ha̧a̧nú k’ɛ́nɛ́ zu o wi nɛ kɔ̧‘nɛ́ in nɛ kasi o heembea k’ɛ́nɛ́.

⁵«Ɛ́ɛ́ dee ɗaŋmɔ, ɛ́ɛ́ yɔɔ kaya, ɛ́ɛ́ ee'nɛ́ dúk, de nɛ̀ ŋgazu in'nɛ̀ɛ́; ɛ́ɛ́ zika ɗoŋ yɛ e há̧ o heembea in o geŋa k’ɛ́nɛ́.

⁶Ɛ́ɛ́ zii so tɔ̧ɔ̧-mbɔrɔ ko o wi-de-tom k’ɛ́nɛ́, nɛ̀ yaa só nɛ́ o wi-tɔ̧-wen oi nú Sɔ̧ nɛ tɔ̧ɔ̧ so mbɔrɔ oi nu'nɛ́ há̧ o wannu k’ɛɛ, o gasawi k’ɛɛ, o zɔmdáa k’ɛɛ in dukbíí nɛ oi-aa lɛŋ tɛ nu’ɛ na.

⁷Deemɔ nɛ yuwar-a nɛ́ k’ɛnɛ, GASA WAN, ɓɛɛ war k’ɛɛ nɛ foe a̧ gbɛ yɛ sɔsɔɔ, ɛɛ o be Juda, o bíí Jerusalɛm, o be Israɛl nɛ oi-zu lɛŋ: o wan nɛ a̧a̧ saŋa hɛ̧ɛ̧ in ɔ wan nɛ ɔ nyɛi̧a hɔ tɛ ge fara ge nde n’ɛnɛ ndaka so wa pɛsi si sɛnɛ, wen ŋgazu nɛ wa de so in'nɛ̀ɛ́.

⁸GASA WAN, foe baa yɛ in o wannu k’ɛɛ, o gasawi in o zɔmdáa k’ɛɛ, wen ɛɛ dee ɗaŋmɔ ti'nɛ́.

⁹GASA WAN Sɔ̧ k’ɛɛ, zu-a nɛ oi dee ŋgazu k’ɛɛ in'nɛ̀ɛ́‘i, ɛnɛ nɛ wan-de-ko in wan-e-ɗaŋmɔ.

¹⁰Ɛ́ɛ́ zii so wen nú GASA WAN Sɔ̧ k’ɛɛ, wen h’ɛ́ɛ́ mɛ ndak ɗoŋ o heembea nɛ o wi-de-tom kɔ̧-a̧ nɛ yaa so nɛ o wi-tɔ̧-wen oi nú Sɔ̧ usa h’ɛ́ɛ́ na.

¹¹O be Israɛl lɛŋ gbina Heembea k’ɛ́nɛ́ ɓɛɛ wa a̧r bɛ̧ nɛ mboozu h’ɛ́nɛ́. Nɛ mɔ‘i a̧ dee ha̧ o fom in o bee-mɔ nɛ yɔra so zaŋ kalata Heembea ko wi-de-tom k’ɛ́nɛ́ Moisɛ mɛ tik zu yɛ, wen ɛɛ dee ɗaŋmɔ ti'nɛ́.

¹²Ɛnɛ dee ha̧ wen n’ɛnɛ baa tɔ̧ so zu yɛ in zu o gasawi nɛ yaa so zu yɛ mɛ hɔ gba̧a̧; ɛnɛ dee ha̧ o ŋgamɔ in o ŋga zɛɛ mɛ tik zu yɛ. Pɛrti mɔ hegɔ tɛ de zaŋnu hee mɔ'ɔ nɛ dee sɛn Jerusalɛm ga na.

¹³Mɔɔ nɔ‘i lɛŋ tika zu yɛ nyɛm nɛ ɗoŋ mɔ nɛ yɔra zaŋ kalata Heembea ko Moisɛ, ɓɛɛ bo nɛ ɛɛ ga̧a̧ see'nɛ́, GASA WAN Sɔ̧ k’ɛɛ, tɛ ee dea ɗaŋmɔ duk wen h’ɛ́ɛ́ mɛ zii kpasawen k’ɛ́nɛ́ na.

¹⁴GASA WAN, Sɔ̧ k’ɛɛ, ɛ́nɛ́ dee kana ha̧ o ŋgamɔ nɔ‘i mɛ tik zu yɛ, wen tɛ mɔ n’ɛnɛ de lɛŋ, ɛ́nɛ́ dé mɔ nɛ yuwar-a, ɓɛɛ k’ɛɛ, ɛɛ zii so wen k’ɛ́nɛ́ na.

¹⁵«Ɓɛɛ kinii, GASA WAN Sɔ̧ k’ɛɛ, tɛ ŋga er'nɛ́, ɛ́nɛ́ gboo dukbíí k’ɛ́nɛ́ nɛ nú Egiptɛ, de nɛnɛ ha̧ nin'nɛ́ mɛ hu̧r hee mɔ'ɔ n’ɛɛ zɔk sɔsɔɔ'ɛ ga, ɓɛɛ k’ɛɛ, ɛɛ nɛ o wi-de-ɗaŋmɔ in o wi nɛ ndak ɗoŋ‘nɛ́ na.

¹⁶GASA WAN, nyɛm nɛ ɗoŋ yuwar deemɔ k’ɛ́nɛ́, ɛ̀nɛ̀ dé ha̧ nyimsea in ɗaŋsee k’ɛ́nɛ́ mɛ yu zu Jerusalɛm nɛ duk nɛ ye k’ɛ́nɛ́ in sa̧a̧ kaya k’ɛ́nɛ́, wen mɛ̀ nɛ́ zu ɗaŋmɔ k’ɛɛ in yɔɔ-kaya ko o zɔmdáa k’ɛɛ a̧ ziimɔ ba nɛ Jerusalɛm in dukbíí k’ɛ́nɛ́ ti o bíí nɛ ya zik yɛ.

¹⁷Ɓɛɛ kinii, Sɔ̧ k’ɛɛ, ɛ̀nɛ̀ zíí kɔfamɔ in aia-nú kɔ‘m wi-de-tom k’ɛ́nɛ́; ɛ̀nɛ̀ de ha̧ saŋa-yí‘nɛ́ mɛ tok zu Tua k’ɛ́nɛ́ nɛ ɗaŋa'i, wen see zu'nɛ́ nɛ tɛ‘nɛ́.

¹⁸Ɛ̀nɛ̀ yéŋ zer'nɛ́, Sɔ̧ kɔ‘m, ɛ̀nɛ̀ zíí wen’ɛ, ɛ̀nɛ̀ hú̧í̧ yí‘nɛ́, ɛ̀nɛ̀ zɔ́k o mɔ k’ɛɛ nɛ ɗaŋa, ɛ̀nɛ̀ zɔ́k ye nɛ‘i sa nin'nɛ́ sɛnɛ! Bo nɛ wen deemɔ k’ɛɛ nɛ yuwar-a ɛ̀ɛ̀ ai nɛ nú h’ɛ́nɛ́ na, ɓɛɛ mɛ nɛ wen zu gasa deako k’ɛ́nɛ́.

¹⁹GASA WAN, ɛ̀nɛ̀ zii! GASA WAN, ɛ̀nɛ̀ é ɗaŋmɔ k’ɛɛ h’ɛ́ɛ́! GASA WAN, ɛ̀nɛ̀ gá̧ tɛ‘nɛ́, ɓɛɛ ɛ̀nɛ̀ gbák yɛ wen see zu'nɛ́ nɛ tɛ‘nɛ́; ɛ̀nɛ̀ tɛ́ nɛ haya-a wen zu ye in dukbíí k’ɛ́nɛ́ nɛ‘i sa nin'nɛ́ zu wa’ɛ!

²⁰«Mi ɓɔna fara tɔ̧ɔ̧ wen, wor nɛ Sɔ̧, gbar nɛ ɗaŋmɔ kɔ‘m in ko dukbíí kɔ‘m Israɛl, ai nɛ nú sɛn ti GASA WAN Sɔ̧ kɔ‘m wen zu sa̧a̧ kaya kɔ̧-a̧,

²¹ɓɛɛ tɛ ŋgimbi'i, Gabriɛl bíí n'am baa zɔk tɛ hɔɔ-zu kɔ‘m nɛti'i bu̧i̧a tɛ́ pii tɛ‘m nɛ haya-a ŋgimbi ɗafa-sɔ̧ mɛ ga̧a̧mɔ.

²²A̧ wee ɗoŋ mɔ ha̧‘m tɔ̧ nɛnɛ‘e: ‹Daniɛl, mi tɛɛ mɛ usi mgbara mɔ ha̧ mɛ.

²³Ŋgimbi nɛ mɛ ku̧u̧ nɛ naŋ aia nú mɛ, GASA WAN zia tiger-mɛ, ɓɛɛ e tom nú‘m mɛ tɛ̀ɛ́ tɔ̧ ha̧ mɛ, wen mɛ dee tɛ-a nyɛmna. Mɛ̀ yéŋ zer-mɛ, mɛ̀ zíí gba̧a̧ hɔɔ-zu ko Sɔ̧ ha̧ mɛ.

²⁴« ‹Wa gɔna pɛ mɔɔrɔ-ɗoŋ-yiitoo war ɓu-mɔɔrɔ-ɗoŋ-yiitoo ha̧ dukbíí kɔ-mɛ in sa̧a̧ ye kɔ-mɛ, wen ha̧ gbina heembea in dee ɗaŋmɔ mɛ kaɗi, ha'i mɛ kpa ea-ɗaŋmɔ in ha̧ deemɔ nɛ yuwar-a ko Sɔ̧ mɛ duk ɓɔnsɛnɛ; nɛ́ tɛ ŋgimbi'i a̧ o hɔɔ-zu in o wen ko o wi-tɔ̧-wen oi nú Sɔ̧ tɛ hɔ nɛ gba̧a̧, ɓɛɛ wa tɛna nɔ̧́ a zu Sa̧a̧-Wi[9] nɛ̀ gana o dɔka-a lɛŋ.

²⁵Kinii, mɛ̀ zíí gba̧a̧-a̧, ɓɛɛ mɛ̀ íŋ‘e, ŋgimbi nɛ‘i ha̧a̧ nɛ̀ heembea wen baa Jerusalɛm e ŋgɔn woyo hɔ tɛ ŋgimbi nɛ wan nɛ‘i tɛna nɔ̧́ a zu-a tɛ hɔ, tɛ de pɛ mɔɔrɔ-ɗoŋ-yiitoo war mɔɔrɔ-ɗoŋ-yiitoo; ɓɛɛ ɗoŋ mɔ‘i sɛn tɛ pɛ mɔɔrɔ-ɗoŋ-yiitoo war ɓu-mɔɔrɔ-ɗoŋ-kpɔk-zua-yiitoo, wa tɛ ɗafi o bee-gara ye in o ŋgárá, ɓɛɛ tɛ duk nɛ ŋgaya ŋgimbi.

²⁶Sɛn ɗoŋ pɛ mɔɔrɔ-ɗoŋ-yiitoo war ɓu-mɔɔrɔ-ɗoŋ-kpɔk-zua-yiitoo'i, wa tɛ gbɛ ŋma bíí nɛ‘i tɛna nɔ̧́ a zu-a yinɛ, ɓɛɛ bo nɛ wen ŋma mɔ kɔ̧-a̧ mɛ tɛ-a na; ɓɛɛ war ko ye in Tua ko Sɔ̧, dukbíí ko ŋma wan nɛ tɛ hɔ tɛ ɗaŋ wa yinɛ. Mɔ kpɔk, sɔŋkur mɔ ko wi’ɛi tɛ duk hee gba-zu a̧ gbina ga, ɓɛɛ ɗaŋamɔ beka kaɗi na hegɔ hɔ nɛnɛ ŋgimbi kaɗa-a ko biro.

²⁷Sɛn tɛ oi sɔŋkur pɛ mɔɔrɔ-ɗoŋ-yiitoo, a̧ tɛ de ha̧ o dɔka bíí mɛ nɔ tɔk nɛ ŋgai in a̧, ɓɛɛ a̧ dora ɗafa-sɔ̧ in aa-zɛzɛ tɛ reeta ŋgimbi'i. Wi-ɗaŋ-mɔ‘i[10] tɛ de ndiŋmɔ kɔ̧ Tua ko Sɔ̧ hegɔ hɔ nɛnɛ tɛ ŋgimbi nɛ‘i gɔna nɛ mɔ tɛ tik nɛnɛ zu a̧.› »