Read Northwest Gbaya OSEE 1 Bible Online

OSEE 1 - Northwest Gbaya bible

OSEE 1

¹Mɔ nɛ a̧a̧ zaŋ kalata’ɛ nɛ wen nɛ GASA WAN tɔ̧ɔ̧ ha̧ Osee bem ko Beeri, ŋgimbi wan ko Ozias, Yotam, Ahaz in Ezɛkias nɛ ɔɔ so wan Juda. Tɛ ŋgimbi'i, nɛ́ Jeroboam bem ko Jɔas a̧ ɔ wan Israɛl mɛ.

²Ɛ̧ɛ̧ nɛ ku̧u̧naŋ tɔ̧ɔ̧ wen ko GASA WAN, ŋgimbi n'aa ee nɛ wen nú wi-tɔ̧-wen oi nú Sɔ̧ Osee wen tɔ̧a̧-a̧ ha̧ dukbíí kɔ̧-a̧: «Mɛ̀ nɛ́ɛ̀ ba kó-dàlà[1] nɛ kóò, a̧ mɛ̀ kó be-dàlà in a̧; ɛ̧ɛ̧ kinii nù'ɛ ea'm duk hee mɔ'ɔ nɛ kó-dàlà e nɛ wíì kɔ‘i duk’ɛ ga.»

³Nɛ mɔ'ɔ n'aa nɛ̀ɛ́ ba Gɔmɛr, boko-bem ko Diblayim nɛ kóò, ɓɛɛ Gɔmɛr ba zaŋ ko nɛ̀ be-wiwii ha̧ a̧;

⁴ɓɛɛ GASA WAN tɔ̧ ha̧ Osee: «Mɛ̀ á nin bem’ɛi nɛ Yizreɛl, wen dekpaa mi tɛ kundi ari ha̧ o bíí nutua ko Jɛhu wen o bíí nɛ wa gbɛɛ so saaye Yizreɛl, ɓɛɛ mi tɛ yai mɔɔ-wan ko Israɛl yinɛ mbɛt.

⁵Wese'i, mi tɛ gbin kusaa-goo ko Israɛl a nù sɛn kɔ̧ ɗɔŋgɔ Yizreɛl.»

⁶Gɔmɛr baa zaŋ woyo, ko nɛ̀ be-okoo, ɓɛɛ GASA WAN tɔ̧ ha̧ Osee: «Mɛ̀ á nin-a'e Pi̧i̧-Taŋ,[2] wen mi beka usi kɔ̧ɔ̧mɔ ha̧ nutua Israɛl ɓɔna, kà bó nɛ̀ ee ɗaŋmɔ ha̧ wa na mbɛt.

⁷«Ɓɛɛ war nutua ko Juda, mi tɛ usi kɔ̧ɔ̧mɔ ha̧ wa; mi GASA WAN Sɔ̧ kɔ-wa tɛ kpasi wa; ɓɛɛ bó nɛ́ biro a̧‘m tɛ de nɛ kusaa-goo, gba-paa, nyaŋa, kóó o wan-nyaŋa kpasi nɛ wa na.»

⁸Pi̧i̧taŋ bɛ̧ɛ̧ bere, ɓɛɛ Gɔmɛr ba mbe zaŋ woyo ko nɛ̀ be-wiwii,

⁹ɓɛɛ GASA WAN tɔ̧ ha̧ Osee: «Mɛ̀ á nin-a'e, Bɛ̧ɛ̧-pi̧-nù;[3] wen ɛnɛ bó nɛ́ dukbíí kɔ‘m ɓɔna, ɓɛɛ mi bó nɛ́ Sɔ̧ k’ɛ́nɛ́ ɓɔna mbɛt.»