Read Northwest Gbaya OSEE 10 Bible Online

OSEE 10 - Northwest Gbaya bible

OSEE 10

¹Israɛl duka nɛ de nyak-dɔ̧ɔ̧ nɛ wai so nɛ dɔka-a. Waya-a a̧ dɔk'i, ɓɛɛ fara-ɗafi-sɔ̧ a̧ dɔk nɛnɛ mbɛt'i; tortɛ nù kɔ-wa nɛ ɓɔ‘i pi̧i̧ wa tɛ ɗafa ta-zu-nù nɛ dee gan kuti-a.

²Taamɔ ko o wi nɔ‘i kɛ̧ɛ̧ yiitoo; kinii, wa tɛ zɔk bɔnɛ oi-aa, wen GASA WAN tɛ ɗaŋ o fara-ɗafi-sɔ̧ kɔ-wa a nù, a̧ tɛ mbaŋ o sɛka-ta nɔ‘i yinɛ.

³Ɓɛɛ wa tɛ tɔ̧: «Kinii'i, ɛɛ bó nɛ̀ wannu ɓɔna, wen ɛɛ yu GASA WAN na. Wannu tɛ̀ɛ́ de so nɛ ge h’ɛ́ɛ́ ge?»

⁴Mɔ kɔ-wa nɛ tɔ̧ɔ̧ gee tum wen in kana mɔ nɛ ndela ká bá nɛ̀ nɔɔ tɔk in o bíí nɛnɛ. Deemɔ nɛ yuwar-a duk yí-wa hee ɗaŋ be ɓɔɔ-te kpɛɛfɔ ga.

⁵Tɛ o bíí Samarii nak naki wen be ndai nɛ wa duia so sɛn Bɛt-Avɛn. Wa zim nɛ fio in o wi-ɗafi-sɔ̧-a mbɛt. Ɛ̧ɛ̧ n'aa yɔɔ mgbara wa kaɗi’ɛ, wa a̧ zɔn gasamɔ kɔ̧-a̧ gɔ!

⁶Wa tɛ ba be ndai'i nɛ ha̧a̧mɔ nɛnɛ ha̧ gasa wannu; ziimɔ tɛ tik zu Efraim ɓɛɛ búù tɛ ba Israɛl, wen o géé-sɔ̧ n'aa duia so.

⁷Samarii kifa gee tum mɔ mbulɛɛ, ɓɛɛ wannu Samarii kifi kɔ‘i duk hee kɔ́k-wa̧a̧ zu yi ga.

⁸O ɗaŋ fara-ɗafi-sɔ̧ nɛ Israɛl de ɗaŋmɔ sɛnɛ‘i tɛ yai yinɛ; tɛn in tɛn-dara tɛ hɔ fara-ɗafi-sɔ̧ kɔ-wa sum-sum, ɓɛɛ nɛ́ ŋgimbi'i a̧ wa tɛ tɔ̧ nɛnɛ ha̧ o kaya'e nde: «Ɛ̀nɛ̀ kpé zu yɛ.» Ɓɛɛ wa tɔ̧ɔ̧ ha̧ o zu-tɔ̧́‘e nde: «Ɛ̀nɛ̀ tír a zu yɛ!»

⁹Israɛl ku̧u̧ naŋ dee ɗaŋmɔ nɛ Gibea mɛ tɛnɛ, ɓɛɛ wa ɓɔn kana tɛ dea-a nɛnɛ. Hegɔ, biro beka bi o ɗaŋwi nɔ‘i sɛn Gibea mɛ na nde?

¹⁰Mi tɛ nɛ mɛ usi bɔnɛ ha̧ wa. Wen zu ɗaŋmɔ nɛ wa dee war yiitoo'i, o dukbíí tɛ e nú mɛ usi bɔnɛ ha̧ wa.

¹¹Efraim hɔɔ so ŋmaa in be-zɔŋa ndai nɛ‘i usa tom-gusa-alkamaari ha̧ a̧ nɛ de-a; nɛ mɔ'ɔ n'am pi̧i̧ kpáŋá tɛ bɔ̧i̧a̧ ger-a. Juda duk kɔ‘i tɛ waa fɔ, ɓɛɛ Jakob gbur kɔ‘i nɛ keekee-gbuti-nù.

¹²Ɛ̀nɛ̀ gún nɛ mɔ nɛ duk nɛ yuwar-a, ɓɛɛ ɛ́nɛ́ tɛ mɔi̧ demɔ oi-aa; ɛ̀nɛ̀ gɔ́m mbe fɔ, wen kinii, nɛ́ ŋgimbi kia GASA WAN ha̧ a̧ mɛ tɛ mɛ de demɔ h’ɛ́nɛ́.

¹³Mɔ n’ɛnɛ guna so nɛ́ ɗáŋ, ɓɛɛ s’ɛnɛ mɔi̧ ɗaŋmɔ; ɛnɛ nyɔŋa waya ndela k’ɛ́nɛ́. Hee mɔ'ɔ n’ɛnɛ e ta nɛ keekee-biro, in o gba gii wi-biro k’ɛ́nɛ́ ga,

¹⁴biro tɛ bi o ye k’ɛ́nɛ́, ɓɛɛ o ŋgárá k’ɛ́nɛ́ tɛ gbin a nù lɛŋ hee mɔ'ɔ nɛ Salmaŋ ɗaŋa so nɛ Bɛt-Arbɛl lɔkɔti-lɔkɔti’ɛ ga. Ŋgimbi'i wa kuma o nàá-wan-bem in o bem kɔ-wa.

¹⁵Nɛ́ kale mɔ‘i a̧ tɛ hɔ zu'nɛ́, o be Israɛl,[14] wen ɗaŋmɔ k’ɛ́nɛ́ yaka zale. Mɔ be tɛ̀ɛ́ gɔn, ɓɛɛ wi beka iŋ oi wannu k’ɛ́nɛ́ ɓɔna.