Read Northwest Gbaya OSEE 11 Bible Online

OSEE 11 - Northwest Gbaya bible

OSEE 11

¹«Mi kɔ̧ɔ̧ so Israɛl ŋgimbi n'aa biti so nɛ geɗek-a; mi saa bem kɔ‘m gbonɛ nɛ Egiptɛ mɛ.

²Mi a̧‘m sa wa pii tɛ‘m'i, ɓɛɛ wa yak kɔ-wa yak nyɛi̧ nɛ‘m; wa yaka ɗafi nɛ sɔ̧ Bal, dɔ nɛ fuu-nyama ha̧ o géé-sɔ̧.

³Zu-a'i, nɛ mi a̧ usa so ɗoŋ pi̧i̧ naŋ ha̧ Efraim; nɛ mi a̧ kasa so er-a mbɛt, ɓɛɛ a̧ iŋ‘e, mɛ̀ nɛ́ mi a̧ dai a̧ na!

⁴Mi dee mɔ in a̧ hee bíí ga nɛ kɔ̧ɔ̧mɔ; mi baa a̧ e yí-see-am hee mɔ'ɔ nɛ‘i de nɛnɛ in be zɔɗi’ɛ ga; mi nyɛi̧a nyɔŋmɔ ha̧ a̧ mɛ nyɔŋ mbɛt.

⁵«Kinii, o be Israɛl si ɗoŋ Egiptɛ ɓɔna, ɓɛɛ nɛ Asirii a̧ tɛ ɔ wan zu wa, wen wa bɛ̧a̧‘m.

⁶Gba-paa tɛ de ŋgamɔ ye kɔ-wa, ɗaŋ nɛ ŋgárá kɔ-wa, kum nɛ wa a nù wen zu ɗaŋ baa keta kɔ-wa.

⁷O bíí kɔ‘m ɓɔn kana tɛ bɛ̧ɛ̧ am siti; wi sa wa mɛ kur takaɗi.[15]

⁸«Efraim, mi tɛ e bɔɔ mɛ duk hee ge? Israɛl, mi tɛ bɛ̧ mɛ hee ge? Mi tɛ de mɔ in mɛɛ hee mɔ n'am dee so in o ye Adma in Seboyim ga hee ge? See-am ɗaŋ ɗaŋ nyɛmna; ko de'm dee batɛ h’ɛ́nɛ́.

⁹Mi beka pɛm nɛ nyima see-am na, mi beka ta mɔ mɛ ɗaŋ Efraim yinɛ ɓɔna mbɛt, wen mi nɛ Sɔ̧, mi bo nɛ gee bíí na. Mi nɛ Sa̧a̧ Wi mgbara'nɛ́; mi beka tɛ, mɛ ɗaŋ mɔ na.»

¹⁰O wi nɛ yaka so tɛ ndak pata GASA WAN. A̧ tɛ mgbimgbi hee dila ga; a̧ be tɛ̀ɛ́ tuɓi, ɓɛɛ o bem kɔ̧-a̧ tɛ mɔi̧ tɛnɛ nɛ gɔna-ɗɛɗɛ nɛ yee-wese mɛ.

¹¹Wa tɛ gar tɛnɛ hee soŋdɔya ga nɛ Egiptɛ mɛ nɛ gɔna-ɗɛɗɛ; wa tɛ tɛ hee o gbaku̧i ga nɛ Asirii mɛ mbɛt, «ɓɛɛ mi kaia wa piinɛ ɗoŋ nù kɔ-wa woyo.» Nɛ mi GASA WAN a̧ tɔ̧ wen’ɛ.