Read Northwest Gbaya OSEE 12 Bible Online

OSEE 12 - Northwest Gbaya bible

OSEE 12

¹Efraim gɔna ɗoŋ-am nɛ ndela; nutua Israɛl zika'm nɛ ɔrmɔ, ɓɛɛ Juda ɓɔn kɔ‘i tɛ nɛɛ nɔ in Sɔ̧, mbo nɛ zu ha̧ Wan nɛ ɔ sa̧a̧ nyɛmna.

²Nyɔŋmɔ ko Efraim nɛ búk; a̧ ndak nɛ ɗoŋ búk mɛ daŋa-wese hegɔ zɛ de nɛnɛ, de nɛ dɔka ŋgamɔ nɛnɛ. A̧ nɔɔ tɔk in Asirii, ɓɛɛ a̧ kai nɔ nɛnɛ si Egiptɛ mɛ.

³GASA WAN a̧a̧ nɛ wen in Juda; a̧ tɛ usi bɔnɛ ha̧ Jakob nyɛm nɛ ɗoŋ deemɔ kɔ̧-a̧, a̧ tɛ ha̧ mɔɔ-oi-tom kɔ̧-a̧ ha̧ a̧.

⁴Jakob baa fara ko zɔmwi kɔ‘i nɛ kɔ̧ zaŋ nàà kɔ-wa mɛ tɛnɛ, ɓɛɛ n'aa gasa kaɗi, a̧ bìí biro in Sɔ̧.

⁵Jakob bìí biro in betom ko Sɔ̧, ɓɛɛ a̧ gan a̧; nɛ mɔ'ɔ n'aa hi̧a̧ kɔ̧a̧ ai nɛ nú ha̧ a̧. A̧ kpaa ŋmaa in Sɔ̧ sɛn Bɛtɛl, ɓɛɛ nɛ́ hi̧i̧ a̧ Sɔ̧ tɔ̧ɔ̧ nɛ wen ha̧ a̧.

⁶Mɛ nɛ GASA WAN nɛ a̧a̧ nɛ ŋgayamɔ lɛŋ, mgbák nin-a nɛ‘i tɛ zɔn nɛ a̧, nɛ́ GASA WAN.

⁷Ɓɛɛ kɔ-mɛ, mɛ̀ píí ɗoŋ tɛ Sɔ̧ kɔ-mɛ, mɛ̀ dúk tɛ mboozu, de nɛ mɔ nɛ yuwar-a, e nɛ ta nɛ Sɔ̧ kɔ-mɛ ɓɔnsɛnɛ.

⁸Efraim hɔɔ ŋmaa in o be Kanaŋ nɛ mɔɔ-we-mɔ kɔ-wa nyɛm sɛnɛ na, nɛ wa zu̧ nɛ̀ bíí.

⁹A̧‘e nde, wi kia kɔ‘i nɛ dɔka mbɔi, ɓɛɛ wi kpa mɔ. Tɛ tom nɛ‘i dee lɛŋ, ŋma be yɔɔ-kaya ha̧ bíí mɛ tɔ̧ wen zu-a bo na.

¹⁰Ɓɛɛ kɔ‘m, mi nɛ GASA WAN Sɔ̧ kɔ-mɛ, nɛ̀ nú Egiptɛ mɛ tɛnɛ; mi tɛ de ha̧ mɛ mɛ ɔ kɔ̧ tua-laa woyo hee ŋgimbi-kpaa-ŋmaa[16] k’ɛɛ nɛti ga.

¹¹Mi tɛ tɔ̧ wen ha̧ o wi-tɔ̧-wen oi nú‘m, mi tɛ hɔ zu ha̧ wa gan kuti-a, ɓɛɛ mi tɛ e lizaŋ kɔ‘m sɛn nú-wa mbɛt.

¹²Mɔ ko Galad lɛŋ nɛ ndela, wa kifa nɛ geemɔ; wa kaɗi gbɛɛ wiwii-ndai ɗafi nɛ géé-sɔ̧ sɛn Gilgal na; o fara-ɗafi-sɔ̧ kɔ-wa ya hee yumba duk-ta sɛn kpɛɛfɔ ga.

¹³Jakob yuu so mɔ si bɔkɔ-nú Aram mɛ; sɛn hi̧i̧ Israɛl dee kɔfɛ dai nɛ mɔ-dai.

¹⁴GASA WAN toma ŋma wi-tɔ̧-wen oi nú-wi mgbɔ nɛ Israɛl nɛ nú Egiptɛ mɛ gbonɛ; nɛ́ wi-tɔ̧-wen oi nú Sɔ̧ a̧ pɛma wa mbɛt.

¹⁵Efraim dee mɔɔ-tu̧-see Sɔ̧ nɛ ɗaŋ-a, ɓɛɛ GASA WAN kɔ̧-a̧ de ha̧ simbo-gbɛɛzu ko Efraim'i mɛ si ɗoŋ zu a̧; a̧ tɛ kpa mɔɔ-oi-búù kɔ̧-a̧.