Read Northwest Gbaya OSEE 13 Bible Online

OSEE 13 - Northwest Gbaya bible

OSEE 13

¹Ŋgimbi nɛ Efraim tɔ̧ so wen, kíì dee o bíí lɛŋ sɛn Israɛl. Nɛ mɔ'ɔ n'aa dee ɗaŋmɔ ndak nɛ ɗoŋ o géé-sɔ̧ Bal, ɓɛɛ mɔ‘i gbɛ a̧.

²Kinii’ɛ, wa de nɛ ɗaŋmɔ siti; wa duia gee mɔ pi̧ nù mɛ gasi, kai nɛ bu-mbɔi kɔ-wa ɓo nɛ géé-sɔ̧ mbɛt, nɛ duk nɛ mɔ nɛ wi-iŋ-tom dea. Ɓɛɛ nɛ́ zu o wi nɔ‘i a̧ o bíí tɔ̧ nɛnɛ‘e, wa ɗafi nɛ o be ndai nɛ wa ɓoa'i dui nɛ nú-wa!

³Wen zu mɔ‘i, wa tɛ ya hee kutu mɛ gɔna mɔ ga, wa tɛ duk hee mbɛŋ nɛ duk ɓan na, ɓɛɛ aia’ɛ ga, wa tɛ ya hee pumyulu-alkamaari nɛ búk kai pɛsi a taŋ'ɛ ga, kóó hee zi-wee nɛ tur nɛ woi-tua fati̧i̧ gbonɛ'ɛ ga.

⁴Mi nɛ GASA WAN Sɔ̧ kɔ-mɛ nɛ nú Egiptɛ mɛ tɛnɛ; ŋma sɔ̧ nɛ mɛ iŋa gan am bo na; ŋma wan-kpasi mɛ yak zu'm bo na mbɛt.

⁵Mi iŋa mɛ́[17] nɛ ŋga-gbárà mɛ tɛnɛ, fara nɛ gbɛ̧ŋmɔ a̧a̧ sɛnɛ.

⁶Ɓɛɛ ŋgimbi n’ɛnɛ hɔɔ kpa de fara-nyɔŋ-mɔ kaɗi, ɛnɛ nyɔŋa mɔ zaŋ‘nɛ́ sur; ɗoŋ nɛ zaŋ‘nɛ́ sura kaɗi, ɛnɛ dee ŋgazu, ɓɛɛ tɛ‘nɛ́ bi ɗoŋ-am!

⁷Hegɔ, mi tɛ kpɔr in'nɛ̀ɛ́ hee dila ga; mi tɛ mgbuti ká̧ war hee gɔ̧ ga mɛ ba'nɛ́.

⁸Mi tɛ tik mgbara'nɛ́ hee ŋma nàá-koe-nam[18] nɛ‘i kai o bem kɔ̧-a̧ yaknɛ ga. Mi tɛ ŋguɗi see'nɛ́ ŋman yinɛ; mi tɛ nyɔŋ kpoo-tɛ‘nɛ ɓɔn kpɔk bɛɗɛ hee nana dila ga, ɓɛɛ o boko-nam tɛ a̧k'nɛ́ a nù pɛ́sɛ́-pɛ́sɛ́.

⁹Israɛl, ɛnɛ yaia kaɗi! Nɛ́ mi kpɔk a̧ nyɛma mɛ kpasi'nɛ́ ɓɛɛ.

¹⁰Wannu k’ɛ́nɛ́ a̧ tɛ́ɛ̀ kpasi'nɛ́ sɛn saaye k’ɛ́nɛ́ gɔ! Wannu in o gasawi n’ɛnɛ ak so mɔ‘e a'i ha̧ h’ɛ́nɛ́ wo’ɛ a̧a̧ bɔɔ de?

¹¹Nɛ́ tɛ ɗaŋsee a̧‘m ha̧a̧ nɛ wannu h’ɛ́nɛ́, ɓɛɛ nɛ́ tɛ nyimsea a̧‘m ba nɛ a̧ yinɛ mbɛt.

¹²Mi tɔra ɗaŋmɔ ko Efraim nɛ dama-a, ɓɛɛ mi ba e.

¹³Nyimmɔ tɛ kpa kana a̧ hee nyima-zaŋ-ko-bem ga, ɓɛɛ bem n'aa de mɛ kɔ‘i nɛ ɗaŋ mgbélé obem; ŋgimbi hɔ̧fa̧-a̧ tik nù hɔɔ kaɗi, ɓɛɛ a̧ kɔ̧ gboa-a kɔ̧ zaŋ nàà kɔ̧-a̧ na.

¹⁴Ɓɛɛ kɔ‘m, a̧‘m gɔn zu wa ká wa ye fara ko o fio nde? A̧‘m kpasi wa tɛ fio nde? Fio, o zɛɛ-geŋa kɔ-mɛ a̧a̧ de? Ye ko o fio, ŋga mɔɔ-gbɛ-bíí kɔ-mɛ a̧a̧ dee? Ko bo yí‘m sitɛ wa ɓɔna!

¹⁵Efraim duk nɛ de-a mgbara o nya-a̧, ɓɛɛ gbak a̧ na, wen mi tɛ tom búk nɛ war yiwese pii zu a̧. Mi GASA WAN, mi tɛ de ha̧ búk kɔ‘m mɛ yu nɛ war ŋga-gbárà, ɓɛɛ yì tɛ ɔ̧sa̧ kor tá̧í̧-tá̧í, hegɔ wa tɛ tɛ̀ɛ́ kai demɔ lɛŋ yaknɛ.