Read Northwest Gbaya OSEE 14 Bible Online

OSEE 14 - Northwest Gbaya bible

OSEE 14

¹O bíí Samarii tɛ zɔk kana bɔnɛ-oi-ɗaŋmɔ kɔ-wa, wen wa dee ŋgazu in Sɔ̧ kɔ-wa. Gba-paa tɛ gbɛ wa, ɓɛɛ tɛ kum o be-zɔɗi bem kɔ-wa, wa tɛ vuti zaŋ o nàá-zaŋ.

²Hegɔ, Israɛl, ɛ̀nɛ̀ píí ɗoŋ tɛ GASA WAN Sɔ̧ k’ɛ́nɛ́, wen yɔɔ-kaya k’ɛ́nɛ́ dee h’ɛ́nɛ́ mɛ tir yɔɔ-mɔ.

³Ɛ̀nɛ̀ píí ɗoŋ tɛ GASA WAN, ɓɛɛ ɛ̀nɛ̀ tɔ̧́ wen nɔ'ɔ ha̧ a̧: «Nɛ́ ɛ́nɛ́ a̧ ba ɗaŋmɔ lɛŋ yinɛ. Ɛ̀nɛ̀ kpɛ́k mɔ nɛ ɔ dee. Wiwii-ndai n’ɛɛ ɗafi nɛ̀ ɛnɛ'ɛ usi nɛ wen mɛ kɔ̧ nú yɛ.

⁴Asirii nyɛm mɛ kpasi yɛ na, ɛɛ beka sa mɔ nɛ er yɛ dea'e, Sɔ̧ k’ɛɛ ɓɔna. Ɛnɛ nɛ wan-de-ko ha̧ o be-oi.»

⁵Mi tɛ kpasi wa tɛ ŋgazu kɔ-wa. Mi tɛ kɔ̧ wa nɛ mbetɛ. Mi tɛ fo nyimsea kɔ‘m yinɛ zu wa.

⁶Mi tɛ duk tɛ-a hee mɛ nɛ mbɛŋ ga, hegɔ a̧ tɛ ɓɔ nɛ de-a hee mɛ nɛ gba-dɛŋ ga, ɓɛɛ ku̧nin-a yee nù nɛ ɗuka-a hee kunin-te kɔ̧ kombo Libaŋ ga.

⁷A̧ tɛ gba er-a nɛ gasa-a; gba de tɛ-a tɛ duk hee te-nɔ́ ga, ɓɛɛ pɛr tɛ-a kura ɓisisi hee pɛr kɔ̧́ kombo Libaŋ mɛ ga.

⁸O bíí nɛ yaa so ɗɔɔ gi̧ɔ̧-tɛ-a nɛti tɛ pii ɗoŋ; wa tɛ dɛm alkamaari woyo, wa tɛ do hee waya-nyak-dɔ̧ɔ̧ ga, ɓɛɛ nin-wa tɛ hu̧r hee dɔ̧ɔ̧ Libaŋ ga.

⁹Efraim, nɛ́ ge a̧ mɛ tɛ kii sitɛ o géé-sɔ̧ ɓɔ ge?[19] wen nɛ́ mi'i zii kɔfa-sɔ̧ kɔ-mɛ, ɓɛɛ nɛ́ mi'i dai mɛ mbɛt. Mi duk hee zawaya nɛ duk nɛ ɓɔa-a ɓɔnsɛnɛ ga; ɓɛɛ nɛ́ wen zu'm a̧ nyɔnɔ kɔ-mɛ dɛm nɛnɛ.

¹⁰Wi-iŋ-mgbara-mɔ nɛ́ boa, a̧ tɛ zii mgbara wen ko Osee.[20] Wi-iŋ-mɔ nɛ tɛ iŋ mɔ‘i a̧a̧ sɛnɛ nde? Yuwar ko GASA WAN ɔ tana; o wi-de-mɔ nɛ yuwar-a tɛ nɛ nɔ sɛnɛ, ɓɛɛ o wi-ŋgazu tir kɔ‘i nɛ yɔɔ-aa.