Read Northwest Gbaya OSEE 2 Bible Online

OSEE 2 - Northwest Gbaya bible

OSEE 2

¹Ɓɛɛ ŋma ŋgimbi, o be Israɛl tɛ dɔk hee nyɛmɛ ɗɔɔ gba tɔp ga, nɛ‘i beka we dɔka-a kà bó nɛ̀ tɔra-a pi̧ nù na. O bíí tɔ̧ɔ̧ so'e: «Ɛnɛ bo nɛ dukbíí kɔ‘m na.» Ɓɛɛ tɛ ŋgimbi'i, wa tɛ tɔ̧‘e: «Ɛnɛ nɛ o bem ko kpasa Sɔ̧.»

²O be Juda in o be Israɛl tɛ mɔi̧ duk kpɔk, ɓɛɛ wa tɛ hok wan kɔ-wa, wa tɛ dɔk gan zu nù‘i, ɓɛɛ wese'i tɛ duk nɛ gasa wese sɛn Yizreɛl.

³Ɛ̀nɛ̀ sá o nya'nɛ́ in o boko-nya'nɛ́‘e: «Dukbíí kɔ‘m» in «Yaa-dua-see-am.»[4]

⁴Ɛ̀nɛ̀ ɓá kita in nàà k’ɛ́nɛ́, ɛ̀nɛ̀ ɓá wen in a̧, wen kinii, a̧ bo nɛ kóò kɔ‘m ɓɔna, mi bo nɛ wíì kɔ̧-a̧ ɓɔna mbɛt. A̧ a̧ fo o mɔɔ-ɗafi-tɛ de dàlà yinɛ yí-a, a̧ a̧ kai o mɔɔ nɔ‘i yinɛ sara ber-aa;

⁵kà bo hegɔ na, mi tɛ kpɔ̧i̧ mɔ tɛ-a yinɛ pi̧ a̧ zan nɛ mgbii, hee wese nɛ nàá kòó nɛ a̧ ga, ɓɛɛ mi tɛ de ha̧ a̧ mɛ duk hee ŋga-gbárà in ŋga nù ga, ha̧ a̧ mɛ fe wɔ yi.

⁶Mi beka kɔ̧ o bem kɔ̧-a̧ na, wen wa nɛ o be-dàlà.

⁷Nàà kɔ-wa kifa kɔ‘i nɛ kó-de-mɔ nɛ mbɔdɔnu, fɛŋ nɛ tɛ, wen a̧‘e, wi tɛ ma yi si ɗoŋ o dàlà kɔ‘i, wen nɛ́ wa a̧ dai wi, ha̧ nɛ laa-ulu in yɛm-yɛm laa ha'i, ká bá nɛ̀ nɔ in dɔ̧ɔ̧ mbɛt.

⁸Wen zu mɔ‘i, mi tɛ ŋgasi yuwar kɔ̧-a̧ nɛ tɛnmɔ, mi tɛ kpe yuwar kɔ̧-a̧ ndiyɛ-ndiyɛ n'aa beka kpa fara mɛ gbo nɛnɛ yak na.

⁹Kóó a̧ ndaka so ɗoŋ o dàlà kɔ̧-a̧ yaknɛ, a̧ beka kpa wa na. A̧ tɛ kii wa dam fara lɛŋ takaɗi. Ɓɛɛ nɛ́ ŋgimbi'i a̧ a̧ tɛ tɔ̧ nɛnɛ‘e nde, wi tɛ si ɗoŋ tɛ kuti wii kɔ‘i, wen duka-a kɔ‘i mɛ ti dee gan ɛ̧ɛ̧ kinii.

¹⁰Ɓɛɛ a̧ iŋ‘e mɛ nɛ mi GASA WAN a̧ ha̧ so alkamaari in nyɔ̧ɔ̧ dɔ̧ɔ̧, ká bá nɛ̀ nɔ ha̧ a̧ na; nɛ kpɔk mi’ɛ a̧ ha̧ bu sede in lɔr nɛ dɔka-a ha̧ a̧ n'aa dui nɛ o géé-sɔ̧ nɛ‘i sa'e Bal.

¹¹Wen zu mɔ‘i, mi tɛ de ha̧ o alkamaari in o waya-nyak-dɔ̧ɔ̧ mɛ de nɛ zɔŋa sɔɔ gee; ɓɛɛ mi tɛ́ kpɔ̧i̧ laa-ulu in yɛm-yɛm laa kɔ‘m n'aa kpe so nɛ tɛ-a yinɛ.

¹²Mi tɛ pi̧ búù zu a ti o dàlà kɔ̧-a̧, ɓɛɛ ŋma wi-ɓar-a er-am yinɛ beka bo na.

¹³Mi tɛ ba o mɔ nɛ ha̧ tortɛ ha̧ a̧ lɛŋ yinɛ: o gbaŋa, o yɔyɛ mbe-yi-zɛ, o wese-ɔm-tɛ in o gasa wese-de-nyɛŋɛ kɔ̧-a̧ lɛŋ.

¹⁴Mi tɛ ɗaŋ o waya-nyak-dɔ̧ɔ̧ in o te mbɔra kɔ̧-a̧ a nù lɔkɔti-lɔkɔti, wen n'aa tɔ̧ɔ̧ so'e nde, mɔɔ-oi dàlà nɛ‘i kpaa so nɛ mɔɔ nɔ‘i. Mi tɛ de ha̧ o fɔ nɔ‘i mɛ kifi duk nɛ zaŋbɛɛ fara nɛ o saɗi tɛ nyɔŋ mɔ sɛnɛ.

¹⁵Mi tɛ usi bɔnɛ ha̧ a̧ wen zu ɗafa o géé-sɔ̧ n'aa ɗafa so a nɛ o kana in wele tɛ, ma nɛ yi si ɗoŋ o dàlà kɔ̧-a̧ e nɛ‘m duk'i. Nɛ mi GASA WAN a̧ tɔ̧ wen'i.

¹⁶Kóó nɛ oi mɔ n'aa dea'i, mi tɛ a wen tɛ a, ɓɛɛ mi mgbɔɔ a yaknɛ si ŋga-gbárà mɛ, mɛ ga̧ see-aa.

¹⁷Sɛn hi̧i̧, mi tɛ́ ha̧ fɔ-nyak-dɔ̧ɔ̧ kɔ̧-a̧ siɗoŋ ha̧ a̧, ɓɛɛ mi dee ha̧ ɗɔŋgɔ Akɔr[5] mɛ kifi nɛ fara e nɛ ta kɔ̧-a̧. Ɓɛɛ ŋgimbi'i, a̧ tɛ kɔ̧ ɗɔɔ nú‘m hee tɛ ŋgimbi zɔŋa kɔ̧-a̧ n'aa gboo so nɛnɛ nɛ nú Egiptɛ mɛ ga.

¹⁸Nɛ mi GASA WAN a̧ tɔ̧ wen’ɛ. Wese'i, a̧ tɛ sa'm'e, kpasa wíì kɔ̧-a̧; a̧ beka sa'm'e Bal, wan kɔ̧-a̧, ɓɔna.

¹⁹Mi tɛ ba nin o géé-sɔ̧ Bal kɔ̧ nú-a yinɛ; wi beka iŋ oi nin-wa ɓɔna.

²⁰Ɓɛɛ tɛ ŋgimbi'i, mi tɛ de ha̧ dukbíí kɔ‘m mɛ nɔ tɔk in o saɗi-zaŋbɛɛ ká bá nɛ̀ o nɔ̧́í̧ gu nɛ o saɗi-gbur-zaŋ-nɛ-nu mbɛt; mi tɛ gbin o mɔɔ-de-biro, kusaa-goo gu nɛ o gba-paa yinɛ zu nù'ɛ, ɓɛɛ mi tɛ de ha̧ o be-nù'ɛ mɛ ɔ ya nɛ fee-see.

²¹Mi tɛ ba mɛ nɛ kóò woyo; mɛ tɛ duk kóò ko'm ɓɔnsɛnɛ. Mbɔi-ɗoŋ-mɛ tɛ duk nɛ deemɔ nɛ yuwar-a, deemɔ sa̧, kɔ̧ɔ̧mɔ in mɔka-see.

²²Mi tɛ ba mɛ nyɛm nɛ ɗoŋ ha̧a̧nú kɔ‘m, ɓɛɛ mɛ tɛ iŋ‘e, mi nɛ GASA WAN.

²³Nɛ́ mi GASA WAN a̧ tɔ̧ wen’ɛ. Wese'i, mi tɛ kifi nú ha̧ yiwese, ɓɛɛ yiwese kifa kɔ‘i ha̧ nù,

²⁴ɓɛɛ nù tɛ kifi nú ha̧ alkamaari in o waya-nyak-dɔ̧ɔ̧ ká bá nɛ̀ o te-nɔ, ɓɛɛ o mɔɔ nɔ‘i kifa nú ha̧ Yizreɛl.

²⁵Mi tɛ de ha̧ o be Israɛl mɛ dɔk zu nù‘i; mi tɛ kɔ̧ Pi̧i̧taŋ, ɓɛɛ mi tɛ sa Bɛ̧ɛ̧-pi̧-nù‘e: «Dukbíí kɔ‘m», ɓɛɛ a̧ saa'm'e: «Sɔ̧ kɔ‘m.»