Read Northwest Gbaya OSEE 4 Bible Online

OSEE 4 - Northwest Gbaya bible

OSEE 4

¹Ɛnɛ o be Israɛl, ɛ̀nɛ̀ zíí wen nɛ GASA WAN tɔ̧; a̧ a̧a̧ nɛ wen in o bíí nù'ɛ. «Kinii, kpasawen, kɔ̧ɔ̧ ŋma-wi, ká bá nɛ̀ iŋa Sɔ̧ mbɛt nɛ mɔ'ɔ nɛ bo tɛ nù'ɛ ɓɔna,

²ɓɛɛ kànà nɛ kanamɔ ndela, gbɛɛ ŋmaa, zuzu, dàlà in dee ŋgamɔ kum nɛ ŋmaa a̧ dɔk.

³Wen zu mɔ‘i, kaara tɛ yor zu nù'ɛ; o bíí hɔ nɛnɛ tɛ o saɗi-zaŋbɛɛ in o nɔ̧́í̧ mɛ yiwese lɛŋ tɛ ziɓi nɛ oi, ɓɛɛ o zoro mɛ ɗɔɔ gba-tɔp kuma mbɛt.»

⁴Ɛ̀nɛ̀ mbó ta'nɛ́ tɛ kia nú ŋmaa, k’ɛ́nɛ́ e wen zu ŋmaa na mbɛt. Wan-wen'i nɛ́ mɛ́, wi-ɗafi-sɔ̧.

⁵Mɛ tɛ tir yɔɔ-mɔ mɛ wese, ɓɛɛ wi-tɔ̧-wen oi nú Sɔ̧ tira yɔɔ-mɔ in mɛɛ mbɛt mɛ zaŋzɛ. Mi tɛ de ɓɛɛ wi beka zii ger nàà kɔ-mɛ Israɛl ɓɔna kpoo nɛ kpoo.

⁶Dukbíí kɔ‘m iŋ am na kum nɛnɛ; mɛ mbɛt, mɛ baa bɛ̧ iŋa'm. Wen mɔ‘i, mi tɛ bɛ̧ mɛ, ɓɛɛ mɛ́ beka duk nɛ́ wi-ɗaf'am ɓɔna. Tɛ-mɛ bìí ɗoŋ usamɔ ko Sɔ̧ kɔ-mɛ. Hegɔ, mi mbɛt, tɛ‘m tɛ bi ɗoŋ o bem kɔ-mɛ mbɛt.

⁷Zu dɔka wi-ɗafi-sɔ̧ nɔ‘i, wa lɛŋ dee ɗaŋmɔ pii tɛ‘m; hegɔ, mi tɛ kpai gasi kɔ-wa nɛ mɔɔ-búù.

⁸Zaŋ-wa sur wen zu nyɔŋa ɗaŋmɔ nɛ dukbíí kɔ‘m de, ɓɛɛ wɔ ɗaŋmɔ nɛ dukbíí kɔ‘m de'i gbɛ nɛ wa lɛk-lɛk.

⁹Hegɔ nɛ́ kale mɔ nɛ tɛ kpa dukbíí a̧ tɛ kpa o wi-ɗafi-sɔ̧ mbɛt. Mi tɛ usi bɔnɛ ha̧ wa nyɛm nɛ ɗoŋ naŋanɔ kɔ-wa; mi tɛ de mɔ in wa nyɛm nɛ ɗoŋ deemɔ kɔ-wa.

¹⁰Wa tɛ nyɔŋ mɔ, ɓɛɛ zaŋ-wa beka sur na. Wa tɛ de dàlà, ɓɛɛ wa beka ko na, wen wa bɛ̧ɛ̧ GASA WAN pi̧ nɛ tɛ-wa tɛ dàlà.

¹¹Dɔ̧ɔ̧ in nyɔ̧ɔ̧ dɔ̧ɔ̧ nɛ mɔɔ-sakali taamɔ ko bíí.

¹²Dukbíí kɔ‘m zɔk nɛ mɔ nɛ tani; nɛ́ ɓira-te kɔ-wa a̧ usi mɔ ha̧ wa, wen taamɔ-dàlà in dee dàlà ɔra wa mɛ e Sɔ̧ kɔ-wa duk ndak nɛ ɗoŋ o géé-sɔ̧.

¹³Wa ɗafi o sɔ̧ nɔ‘i zu o kaya in o zu-tɔ̧́, dɔ nɛ kpoo-sɔ̧ nɛ ɗɔɔ o gasa te[8] nɛnɛ, wen gi̧ɔ̧ o te nɔ‘i dee tɛ-wa nyɛmna. Mɛ nɛ zu mɔ‘i a̧ o boko-bem k’ɛ́nɛ́ yar nɛ mbɔɗɔnu fɛŋ nɛ tɛ nɛnɛ, ɓɛɛ o be-for'nɛ́ ya kɔ‘i de nɛ dàlà mbɛt.

¹⁴Mi beka usi bɔnɛ ha̧ o boko-bem k’ɛ́nɛ́ zu ɗaŋ deemɔ kɔ-wa in ha̧ o be-for'nɛ́ zu dàlà kɔ-wa'i na mbɛt, wen o wi-ɗafi-sɔ̧ ɓɔŋ nɛ tɛ de nɛ mɔ in kó-de-mɔ nɛ mbɔɗɔnu, ɓɛɛ wa ɗafi sɔ̧ in o kó-de-dàlà wan mɛ fara-ɗafi-sɔ̧ mɛ mbɛt. O bíí nɛ iŋ mgbara mɔ na nɛ kɔ‘i mɛ tik.

¹⁵Ɓɛɛ Israɛl, tɛ dee dàlà kɔ-mɛ‘i, ká Juda pi̧ kɔ‘i tɛ sɛnɛ na. K’ɛ́nɛ́ kai ŋmaa yak si Gilgal na, k’ɛ́nɛ́ daŋ si Bɛt-Avɛn [9] na, k’ɛ́nɛ́ kan mɔ‘e: «GASA WAN nɛ duk kpasa» na mbɛt.

¹⁶Israɛl dora gari hee nana ndai ga, ɓɛɛ GASA WAN tɛ dai wa hee o be-sami ga tɛ de mbɔɗi zɔ̧ hee ge?

¹⁷Efraim ndaɗa in o géé-sɔ̧. Mɛ̀ é a̧ ha̧ a̧ dé!

¹⁸Ɗoŋ gbɛɛ dɔ̧ɔ̧ kɔ̧-a̧, a̧ de nɛ mɔɔ-búù, ɓɛɛ o gasawi kɔ̧-a̧ fɛŋ nɛ tɛ.

¹⁹Búk tɛ kai wa yaknɛ, ɓɛɛ búù tɛ ba wa nɛ oi mɔɔ-ɗafi-sɔ̧ kɔ-wa.