Read Northwest Gbaya OSEE 6 Bible Online

OSEE 6 - Northwest Gbaya bible

OSEE 6

¹Ɛnɛ‘e: «Ɛɛ tɛ si ɗoŋ tɛ GASA WAN; nɛ a̧ a̧ ee da̧i̧ tɛ yɛ, ɓɛɛ kana nɛ a̧ a̧ tɛ de ha̧ da̧i̧‘i mɛ wii; nɛ a̧ a̧ gusa yɛ da̧i̧, ɓɛɛ nɛ a̧ a̧ tɛ hɛr da̧i̧-a̧.

²Zaŋ zɛ yiitoo a̧ tɛ ha̧ ŋgai h’ɛ́ɛ́ woyo, ɓɛɛ tɛ taar-a, a̧ baa yɛ e ŋgɔn, h’ɛ́ɛ́ mɛ duk in a̧.

³Ɛ̀ɛ̀ há̧ ŋgai tɛ yɛ h’ɛ́ɛ́ mɛ iŋ GASA WAN. Hee mɔ'ɔ nɛ wese nyaŋ nɛ daŋa-a na ga, nɛ hegɔ a̧ GASA WAN tɛ tɛ nɛnɛ; a̧ tɛ pii ɗoŋ tɛ yɛ hee mɛ nɛ kórò ga, kóó hee wan mɛ nú-kórò nɛ hɔ a zu nù'ɛ ga.»

⁴Ge mɔ ge a̧‘m tɛ de ha̧ mɛ ge, Efraim? Ge a̧‘m tɛ de ha̧ mɛ ge, Juda? Tu̧u̧-tɛ-mɔ k’ɛ́nɛ́ pii tɛ‘m hɔɔ ŋmaa in kutu mɛ gɔna-ndaa-zan, kóó hee mbɛŋ-tuyɛ nɛ duk ɓan na ɓɛɛ aia’ɛ ga.

⁵Nɛ mɔ‘i a̧ dee ha̧‘m mɛ qusi'nɛ́ nɛ̀ wen ko o wi-tɔ̧-wen oi nú‘m; mi kuma'nɛ́ nɛ o wen mɛ nú‘m. Kita kɔ‘m ɔ sa̧a̧ hee de gboo-ndaazan ga.

⁶Nɛ́ kɔ̧ɔ̧mɔ k’ɛ́nɛ́ pii tɛ‘m a̧ dee tɛ‘m, nɛ̀ bó nɛ́ ɗafa'm na; nɛ́ iŋa Sɔ̧ a̧‘m kɔ̧a̧ gan dɔɔ-kpoo-sɔ̧ k’ɛ́nɛ́.

⁷Ɛnɛ gbina nɔɔ-tɔk kɔ‘m in'nɛ̀ɛ́ e nɛ‘m duk, hee mɔ'ɔ nɛ Adam dee so ga.[11]

⁸Galad nɛ ɗaŋ ye-gbɛ-zu.

⁹Hee mɔ'ɔ nɛ o wi-kai-mɔ er-wi gba nɛ mbaŋtol ha̧ wi-ɓir-war ga, nɛ́ hegɔ a̧ o wi-ɗafi-sɔ̧ kum nɛ o bíí yuwar Sikɛm mɛ. Mɔ nɛ wa de'i yaka zale.

¹⁰Mɔ n'am zɔka nutua Israɛl nɛ gasa mɔɔ-ndiŋ; mɛ nɛ fara'i a̧ Efraim de dàlà sɛnɛ, ɓɛɛ búù-a ba Israɛl

¹¹Mi gɔna ŋgimbi wen mɛ mbɛt, Juda; ɗoŋ-aa nyɛi̧ ɓɔna ɓɛɛ wi tɛ mɔi̧ a̧ hee nyɔnɔ ga, ha̧‘m mɛ kpai duka-a ko dukbíí kɔ‘m.