Read Northwest Gbaya OSEE 7 Bible Online

OSEE 7 - Northwest Gbaya bible

OSEE 7

¹Ŋgimbi n'am kɔ̧ɔ̧ mɛ kpasi Israɛl, a̧ ɗaŋmɔ ko Efraim in ɗaŋ ko Samarii gboo nɛ zan. Tom-dee kɔ-wa nɛ ɔra bíí kai nɛ mɔ kɔ-wa; nɛ́ koma tua zu̧ nɛ mɔ, in ɓara mɔ er bíí nɛ ŋgai nɛ zan nɛnɛ.

²Ɗaŋ kɔ-wa nɛ̀ wa de lɛŋ‘i, wa ta kɔ-wa'e mi iŋ na, ɓɛɛ kinii, ɗaŋ tom nɔ‘i kɛra wa e see-a; o mɔɔ nɔ‘i lɛŋ yɔ yí‘m na.

³O wi nɔ‘i ba nɛ keta wannu in o be-wan ɔr nɛ wa nɛ gɔna-kɔ̧-zaŋ, ha̧ nɛ desee ha̧ wa.

⁴Wa lɛŋ nɛ o wi-de-dàlà. Wa hɔɔ ŋmaa in ŋga wee kɔ̧ lɔk nɛ wi-dɔ-brɛt yea, n'aa beka tusi nú gua na hɔ ŋgimbi nɛ mbɔɗa fuu kura sɛ.

⁵Wese gbaŋa ko wannu, dɔ̧ɔ̧ á nɛ wee tɛ o be-wan, ɓɛɛ wannu ee tɛ mɛ duk in o wi-ɔr-a.

⁶Wa ɗɔla pii katɛ a̧ nɛ ŋga-see hee wee kɔ̧ lɔk ga; see-wa duna nɛ ɔramɔ. Mɛ zɛ ɓɛɛ ŋga nyimsea kɔ-wa deŋa, kà mɔ sa̧ ɓɛɛ misa̧ woyo.

⁷Wa lɛŋ, tɛ-wa ɔ kpɔra hee wee kɔ̧ lɔk ga. Wa dɔɔ o gasawi kɔ-wa a nù gbuɗuk; o wannu kɔ-wa tira a nu gbéyéŋ, ŋma bíí kpɔk mɛ sa mɔ pii tɛ‘m bo na.

⁸Efraim yee ŋmaa in o gɔni-duk; Efraim nɛ makala nɛ‘i tɛ ha̧n wii na.

⁹O gɛnɛ baa ŋgai kɔ̧-a̧ yinɛ, a̧ iŋ kɔ̧-a̧ na; mbui nɛ mɔ'ɔ nɛ hɔɔ zu-a lɛŋ, a̧ iŋ na!

¹⁰Ŋmaŋa-tɛ ko Israɛl de nɛ sedaako zu a̧, ɓɛɛ wa kɔ̧ mɛ si ɗoŋ tɛ GASA WAN Sɔ̧ kɔ-wa na; ɓɛɛ zu mɔ‘i lɛŋ wa kii a̧ na mbɛt.

¹¹Efraim hɔɔ ŋmaa in mgbélé gbaku̧i nɛ ta mɔ ɗuk na; a̧ sa mɔ si Egiptɛ, ɓɛɛ a̧ nɛɛ nɛa-a tɛ Asirii.

¹²Ŋgimbi nɛ wa a̧a̧ tɛ nɛa-a, mi pi̧i̧ yɔk kɔ‘m zu wa ba nɛ wa pi̧ nù hee nɔ̧́í̧ ga; mi kaia wa ŋgimbi mɔi̧a ŋmaa kɔ-wa.[12]

¹³Ŋgamɔ a̧ kpa wa wen wa yu nɛ‘m! Bɔnɛ a̧ tik zu wa wen ŋgazu kɔ-wa. Mi tɛ̀ɛ́ kpasi wa, ɓɛɛ kɔ-wa nɛ dee ndela zu'm!

¹⁴Ŋgimbi nɛ wa gɔfi nɛ mɔ gɔn gado kɔ-wa, bo nɛ see kpɔk a̧ wa ai nɛ nú ha̧‘m na; wa á nɛ da̧i̧ tɛ-wa wen kpaa alkamaari in nyɔ̧ɔ̧ dɔ̧ɔ̧, ɓɛɛ o mɔɔ nɔ‘i nɛ wa de'i, wa dé nɛ́ ŋgazu in am.

¹⁵Nɛ́ mi a̧‘m ha̧a̧ ŋgai ha̧ wa, ɓɛɛ kɔ-wa nɛ baa ɗaŋ keta zu'm.

¹⁶Wa á̧ pia ɗoŋ ndé, bó nɛ́ pii tɛ‘m na. Wa duk hee dɔ́mgbá kusaa ga; o gasawi kɔ-wa tɛ kum nú gba-paa wen tɔ̧ɔ̧ ɗaŋ-nú, ɓɛɛ o bíí tɛ zɛkɛɗi wa mam nɛnɛ sɛn Egiptɛ mɛ!