Read Northwest Gbaya OSEE 9 Bible Online

OSEE 9 - Northwest Gbaya bible

OSEE 9

¹Ká mɛ de tortɛ na, Israɛl, ká nyɛŋɛ pi̧ mɛ hee o ŋma dukbíí ga na, wen mɛ ee Sɔ̧ kɔ-mɛ duk wen zu dàlà kɔ-mɛ. Kpaa mɔɔ-oi ndiŋmɔ kɔ-mɛ nɛ̀ fara-gusi-alkamaari nɛnɛ, dee so tɛ-mɛ;

²ɓɛɛ ɛnɛ beka kpa alkamaari mɛ gusi in dɔ̧ɔ̧ mɛ vati ɓɔna, sɛka bó nɛ̀ nyɔ̧ɔ̧ dɔ̧ɔ̧ mɛ nɔ na mbɛt.

³Ɛnɛ beka duk tɛ nù ko GASA WAN ɓɔna. Efraim tɛ zik tɛ siɗoŋ si Egiptɛ, ɓɛɛ sɛn Asirii mɛ wa tɛ nyɔŋ nɛ ndiŋmɔ.

⁴Wa beka tɛn zu dɔ̧ɔ̧ a nù ha̧ GASA WAN ɓɔna; ɗafa-sɔ̧ kɔ-wa beka de tɛ-a na, tɛ́ duk nɛ nyɔŋmɔ-simbo. O bíí lɛŋ nɛ nyɔŋ, simbo tɛ ba wa. Nyɔŋmɔ‘i tɛ ha̧ ŋgai ha̧ wa; mɔ kpɔk, beka ye kɔ̧ Tua ko GASA WAN na.

⁵Nɛ́ ge ɛ̀nɛ̀ tɛ de wese gbaŋa ko GASA WAN nɛ duk nɛ gasa wese ge?

⁶Wa yuu mɔ ká wa kum; wa tɛ ye Egiptɛ, ɓɛɛ Mɛmfis guna wa. Mɔ tɛ da̧ hu̧r mbɔi kɔ-wa, ɓɛɛ tɛn-dara kpee bɛɛ-oi kɔ-wa lɛŋ.

⁷Israɛl a̧ iŋ‘e wese-bɔnɛ baa! Wese kpa mɔɔ-oi-ɗaŋmɔ hɔɔ kaɗi; dawa yee zu wi-tɔ̧-wen oi nú Sɔ̧, gba gbana ba bíí ko Sɔ̧ wen zu gasa ɗaŋmɔ kɔ-mɛ in zɔm bɔnɛ nɛ tika zu mɛ.

⁸Wi-tɔ̧-wen oi nú Sɔ̧ nɛ pɛm Efraim duk in Sɔ̧, ɓɛɛ wa tui nɛ pɛr ha̧ a̧ dam fara kɔ̧-a̧ lɛŋ nasi nɛ a̧ hɔ kɔ̧ tua ko Sɔ̧ kɔ̧-a̧ mɛ.

⁹Nɛ́ mgbák gasa ɗaŋmɔ a̧ wa dea, hee mɔ'ɔ nɛ wa dee so sɛn Gibea ga. Tɛ GASA WAN bi ɗoŋ ɗaŋmɔ nɛ wa dea'i na; wa tɛ kpa mɔɔ-oi-ɗaŋmɔ nɔ‘i lɛŋ.

¹⁰Israɛl duka so yí‘m hee mɛ nɛ waya-nyak-dɔ̧ɔ̧ nɛ‘i kpa ŋga-gbárà ga. O zɔmdáa k’ɛ́nɛ́ duka yí‘m hee kuti waya mbɔ́ra ga, ɓɛɛ hɔa-a kɔ-wa sɛn Bal-Pɛɔr, wa pi̧i̧ tɛ-wa tɛ mɔɔ-búù, ɓɛɛ wa kifi nɛ mɔɔ-ndiŋ hee o géé-sɔ̧ nɛ see-wa baa ga.

¹¹Gasamɔ ko Efraim tɛ bu̧i yak hee nɔ̧́í̧ ga; o kóò kɔ-wa beka ba zaŋ, kà bó nɛ̀ kóó bem ɓɔna.

¹²À̧ nɛ́ kòò so o ŋma bem mɛ dai wa, mi tɛ kai wa yinɛ er-wa nɛti ha̧ wa mɛ de bíí. Ŋgimbi n'am tɛ e o wi nɔ'ɔ duk, oe bɔnɛ nɛ wa tɛ zɔk wa!

¹³Tɛ zɔka mɔ kɔ‘m, o bem ko Efraim duk yí-a hee o saɗi-zaŋbɛɛ n'aa e ha̧ o bíí mɛ hai mɛ gbɛ wa ga.[13]

¹⁴Ɛ̀nɛ̀ de, GASA WAN! Ge ɛ̀nɛ̀ tɛ́ de in wa ge? Ɛ̀nɛ̀ dé há̧ o kóò kɔ-wa mɛ yar ndɔra. Ɛ̀nɛ̀ dé ha̧ ber-wa mɛ ndaɗi!

¹⁵Ɗaŋmɔ kɔ-wa lɛŋ gboo zan sɛn Gilgal mɛ, ɓɛɛ nɛ́ hi̧i̧ a̧‘m ku̧u̧ nɛ naŋ sɛna wa. Mi tɛ ndak wa kɔ̧ tua kɔ‘m yinɛ, wen ɗaŋmɔ nɛ wa de'i; mi beka kɔ̧ wa ɓɔna, wen o gasawi kɔ-wa lɛŋ nɛ o wi-ŋgazu.

¹⁶Mɔ baa tɛ Efraim kaɗi; ku̧nin-a kora ɓɛɛ a̧ beka wai ɓɔna. Kóó wa a̧ ko nɛ bem, mi tɛ gbɛ o bem nɔ‘i nɛ ba see-wa hegɔ‘i.

¹⁷Sɔ̧ kɔ‘m tɛ bɛ̧ wa wen wa zii wen nú-a na; wa tɛ yambali nɛ mgbara o gɔni-duk nɛnɛ.