Read Northwest Gbaya AMƆS 3 Bible Online

AMƆS 3 - Northwest Gbaya bible

AMƆS 3

¹Ɛnɛ o be Israɛl, ɛ̀nɛ̀ zíí wen nɛ GASA WAN tɔ̧ zu'nɛ́. Wen'i a̧ tɔ̧ zu o bíí n'aa kaia so gbonɛ nɛ nu Egiptɛ lɛŋ:

²«Nɛ ɛ́nɛ́ ɛ̀nɛ̀‘nɛ́ a̧‘m iŋa mgbara o dukbíí zaŋnu lɛŋ; nɛ hegɔ sa'm tɛ usi bɔnɛ h’ɛ́nɛ́ nyɛm nɛ ɗoŋ o ɗaŋmɔ k’ɛ́nɛ́ lɛŋ.»

³Wiwii yiitoo nyɛma kura nɔ in ŋmaa, nɛ wa tɛ e zu nɔ‘i in ŋmaa nɛti na nde?

⁴Dila tɛ hiɗi mɔ zaŋbɛɛ sɔɔ gee, ɓɛɛ saɗi-nyɔŋ bo na nde? Be dila tɛ de da̧ kɔ̧ di̧i̧ kɔ‘i sɔɔ gee, kà a̧ nɛ baa saɗi na nde?

⁵Kà ŋma mɔɔ-nyɔŋ bo yi pɛr na, ɓɛɛ nɔ̧́í̧ tɛ zir nɛ yiwese tik sɛnɛ nde? Mbala nyɛma so mɛ misi̧ sɔɔ gee kà saɗi nyun a̧ pi̧ ŋgɔn na nde?

⁶Wa dɔm zak saaye, ɓɛɛ kíì beka de o bíí ye'i na nde? Ŋma bɔnɛ tɛ tik zu ŋma ye nɛ̀ bó nɛ́ GASA WAN a̧ dee mɔ‘i na nde?

⁷GASA WAN Sɔ̧ de ŋma mɔ, ɓɛɛ hu̧sa̧ ndaa-a nɛ o wi-de-tom kɔ‘i nɛ duk nɛ o wi-tɔ̧-wen oi nú Sɔ̧ na.

⁸Kà dila hiɗi mɔ, nɛ o'o beka de kíì na o? Kà GASA WAN Sɔ̧ tɔ̧ wen, nɛ ge bíí ge a̧ beka we ɗoŋ-aa na ge?

⁹Ɛ̀nɛ̀ hé mbéá ha̧ o bíí nutua-wan Asdod, gu nɛ o bíí nutua-wan Egiptɛ mɛ; ɛ̀nɛ̀ tɔ̧́ ha̧ wa mɛ mɔi̧ ŋmaa kpa sɛn zu kaya Samarii, ɓɛɛ ɛ̀nɛ̀ zɔ́k ŋgamɔ nɛ mɔi̧a ŋmaa dun saaye'i! O bíí nasi nɛ ŋmaa sɛn saaye'i nɛ ŋgaya-a.

¹⁰«Wa iŋ yuwar deemɔ nɛ yuwar-a sɛn fara kɔ-wa na.» Nɛ GASA WAN a̧ tɔ̧ wen’ɛ: «Tom dee kɔ-wa nɛ duna tua-wan kɔ-wa nɛ o mɔ nɛ wa ɓara nɛ ŋgai er o bíí in o mɔɔ-zuzu mbɛt.»

¹¹Nɛ hegɔ, sa GASA WAN Sɔ̧ tɔ̧‘e: «O wisɛn tɛ kɛr nu, wa tɛ gbin o ŋgárá kɔ-mɛ a nu, ɓɛɛ wa kaia o mɔ nɛ a̧a̧ kɔ̧ tua-wan k’ɛ́nɛ́ lɛŋ yaknɛ!»

¹²GASA WAN'e: «Wi tɛ ɓar o be Israɛl nɛ ya sɛn Samarii fara ɔ nu gɔn de gado yinɛ, hee mɔ'ɔ nɛ wi-dai-sami ɓar nɛ oi ɓira sami, kóó oi ɓira zer-aa yinɛ nu dila’ɛ ga.»

¹³GASA WAN Sɔ̧‘e: «Ɛ̀nɛ̀ zíí wen’ɛ, ɓɛɛ ɛ̀nɛ̀ mbáŋ tɛ o bíí nutua ko Jakob.» GASA WAN nɛ a̧a̧ nɛ ŋgayamɔ lɛŋ‘e:

¹⁴«Wese n'am tɛ usi bɔnɛ ha̧ Israɛl wen zu dee ɗaŋmɔ kɔ-wa, mi tɛ ɗaŋ fara-ɗafi-sɔ̧ kɔ-wa wan mɛ Bɛtɛl mɛ. O mgbii fara-ɗafi-sɔ̧ tɛ gbin lɛŋ tir a nu gɛ́tɛ́-gɛ́tɛ́.

¹⁵Mi tɛ gbin o tua-ɓar, gu nɛ o tua-bɛɛ lɛŋ a nu; o tua-nin-fɔrɔ tɛ gbin a nu gu nɛ o gasa tua mbɛt.» Nɛ GASA WAN a̧ tɔ̧ wen'i.