Read Northwest Gbaya AMƆS 4 Bible Online

AMƆS 4 - Northwest Gbaya bible

AMƆS 4

¹Ɛ̀nɛ̀ zíí wen’ɛ, o nana ndai Basaŋ nɛ nyɔŋ mɔ zu kaya Samarii, usi nɛ bɔnɛ ha̧ o wi-kɔsa, nyɔŋ nɛ yi o wisan tɔ̧ nɛnɛ ha̧ o wii k’ɛ́nɛ́‘e: «Ɛ̀nɛ̀ bá tɛnɛ, ɛ̀ɛ̀ nɔ!»

²GASA WAN kana mɔ nɛ tɛ-a'e: «Hee mɔ'ɔ nɛ mi ɔ sa̧a̧ ga, nɛ mbetɛ, ŋma wese tɛ hɔ, nɛ wa tɛ kɔti'nɛ nɛ boi-kɔk-mɔ, ɓɛɛ war ko o bezaŋ‘nɛ́, wa tɛ kai wa hee mɔ'ɔ nɛ‘i dak nɛ zoro nɛ gɛ̧i̧'ɛ ga.

³Ɛnɛ tɛ gɔm nɛ gbáá-ŋgeŋ kpɔk kpɔk, kóó o nde ta nɛ kɔ‘i. Wa tɛ fo'nɛ́ si ká̧ kaya Hɛrmɔŋ.» Nɛ GASA WAN a̧ tɔ̧ wen'i.

⁴«Ɛ̀nɛ̀ tɛ́ pii fara-ɗafi-sɔ̧ sɛn Bɛtɛl, ɛ̀nɛ̀ ɗáfí sɔ̧ mɛ tutuyɛ, ɓɛɛ tɛ́ taar zɛ, ɛ̀nɛ̀ há̧ zu-mɔ k’ɛ́nɛ́.

⁵Ɛ̀nɛ̀ dɔ́ brɛt nɛ hao bo sɛnɛ na ɗafi nɛ Sɔ̧ de nɛ osoko ha̧ a̧. Ɛ̀nɛ̀ ŋmáŋ tɛ zu ha̧a̧mɔ nɛ ta-tɛ n’ɛnɛ ha̧‘m'i, wen nɛ pɛrti deemɔ hegɔ ɛ́nɛ́ kɔ̧a̧, ɛ́nɛ́ o be Israɛl.» Nɛ GASA WAN Sɔ̧ a̧ tɔ̧ wen'i.

⁶«Mi ha̧a̧ nɛ ŋgó-nin h’ɛ́nɛ́ mɛ nyɔŋ tɛ o gasa ye k’ɛ́nɛ́ lɛŋ; brɛt ɓana ɛnɛ dam fara-yaa k’ɛ́nɛ́ lɛŋ, ɓɛɛ ɛnɛ pii ɗoŋ tɛ‘m na.» Nɛ GASA WAN a̧ tɔ̧ wen’ɛ.

⁷«Nɛ mi'i dora so kórò ká hɔ a zu nyɔnɔ k’ɛ́nɛ́ na fio-zɛ taar nɛti sɛka sɔka. Mi dee ha̧ kórò mɛ hɔ zu o ŋma ye, ɓɛɛ o ŋma ye kpa kɔ‘i kórò na. Kórò hɔɔ a zu o ŋma fɔ, ɓɛɛ fɔ nɛ kpa kórò na kor kɔ‘i.

⁸O bíí ye yiitoo, kóó taar haia nɛnɛ mɛ nɛ̀ɛ́ kii yi tɛ ŋma ye, ɓɛɛ wa kpa yi ha̧ yi see-wa mɛ ga̧ na. Zu-a'i, ɛ́nɛ́ pii ɗoŋ tɛ‘m na mbɛt.» Nɛ GASA WAN a̧ tɔ̧ wen’ɛ.

⁹«Mi dee ha̧ laambam mɛ ba alkamaari k’ɛ́nɛ́; mi a̧ dee mbɛt ha̧ o dɔk mɛ nyɔŋ o nyɔnɔ, mɛ ye o waya-nyak-dɔ̧ɔ̧, o waya te-mbɔra, in o waya-te-nɔ̧́ kpɛɛfɔ k’ɛ́nɛ́. Zu-a'i, ɛnɛ pii ɗoŋ tɛ‘m na.» Nɛ GASA WAN a̧ tɔ̧ wen’ɛ.

¹⁰«Mi pi̧i̧ ŋga-zɛɛ zu'nɛ́ hee mɔ'ɔ nɛ dee so sɛn Egiptɛ nɛti ga; mi kuma o daŋa ŋgaiwi k’ɛ́nɛ́ nɛ gba-paa, kai nɛ o nyaŋa k’ɛ́nɛ́ yaknɛ. Mi dee ha̧ pɛr mbɔra mɔ kɔ̧ gbagari k’ɛ́nɛ́ mɛ daŋ a zɔ̧ɔ̧‘nɛ́. Zu-a'i, ɛnɛ pii ɗoŋ tɛ‘m na.» Nɛ GASA WAN a̧ tɔ̧ wen'i.

¹¹«Mi ɗaŋa'nɛ́ hee mɔ'ɔ n'am ɗaŋa so nɛ Sɔdɔm in Gɔmɔr’ɛ ga; oi'nɛ́ nɛ ɓɔna duk hee ŋginda-nu-gua nɛ‘i daka nɛ yí-wee yinɛ ga, ɓɛɛ ɛnɛ pii ɗoŋ tɛ‘m na.» Nɛ GASA WAN a̧ tɔ̧ wen'i.

¹²«Israɛl, nɛ hegɔ a̧‘m tɛ de nɛnɛ in mɛɛ, ɓɛɛ hee mɔ'ɔ nɛ mɔ‘i tɛ hɔ zu mɛ ga, Israɛl, mɛ̀ ɗáfí tɛ-mɛ wen kpaa ŋmaa in Sɔ̧ kɔ-mɛ!»

¹³Wen ɛ̀nɛ̀ zɔ́k wi nɛ dee o kaya, nɛ dee búk, nɛ usi mɔ n'aa kɔ̧a̧ ha̧ bíí, nɛ de tum in sa̧a̧mɔ, nɛ nɛ́ nɔ zu o kusa kaya zu nù. Nin wi’ɛi nɛ GASA WAN, Sɔ̧ nɛ a̧a̧ nɛ ŋgayamɔ lɛŋ!