Read Northwest Gbaya AMƆS 5 Bible Online

AMƆS 5 - Northwest Gbaya bible

AMƆS 5

¹Ɛnɛ zii wen n'am tɔ̧ h’ɛ́nɛ́ nɛ duk nɛ kɔ̧a̧-fio zu'nɛ́, nutua ko Israɛl:

²«Be-zɔŋa Israɛl tika kaɗi, a̧ beka kur ɓɔna! Mgbák zu nu kɔ̧-a̧ a̧ a̧ nyafi sɛnɛ, ŋma wi ba a̧ e ŋgɔn bo na.»

³Wen nɛ GASA WAN tɔ̧ nɛ mɔ'ɔ: «Ye nɛ tɛ tom o wi-biro booro yaknɛ, oi-aa nɛ tɛ pii nɛ́ gɔmŋmaa; ɓɛɛ wan nɛ tɛ tom kɔ‘i gɔmŋmaa, nɛ́ ɓu ɓɛɛ a̧ tɛ pii.»

⁴Wen nɛ GASA WAN tɔ̧ ha̧ nutua ko Israɛl nɛ mɔ'ɔ: «Ɛ̀nɛ̀ kíí am, ɓɛɛ ɛ́nɛ́ tɛ duk kpasa.

⁵K’ɛ́nɛ́ nɛ́ɛ̀ kii am sɛn Bɛtɛl na, k’ɛ́nɛ́ nɛ́ɛ̀ kii am sɛn Gilgal na, k’ɛ́nɛ́ nɛ́ sɛn Bɛrseba na mbɛt, wen wa tɛ kai o bíí Gilgal nɛ bara-biro lɛŋ yaknɛ, ɓɛɛ Bɛtɛl mbɛt tɛ yambali.»

⁶Ɛ̀nɛ̀ kíí GASA WAN, ɛ́nɛ́ o bíí nutua ko Jozɛf, ɓɛɛ ɛ́nɛ́ tɛ duk kpasa. Ká bó hegɔ na, a̧ tɛ tik zu'nɛ́ hee wee ga. Wee'i tɛ dɔ o bíí Bɛtɛl, ɓɛɛ ŋma wi-bia-a bo na.

⁷Ɛ́nɛ́ kpai nɛ́ deemɔ nɛ yuwar-a nɛ maada̧, ɓɛɛ ɛ́nɛ́ siŋa deemɔ nɛ tana-a pi̧ nu!

⁸Nɛ a̧ a̧ dee o Gbaayí-be-zɔŋa in Gɔm-ndaa, nɛ a̧ a̧ kpai tum nɛ sa̧a̧mɔ, ɓɛɛ a̧ kpaia wese nɛ ɗuka-zɛ mbɛt. Nɛ a̧ a̧ sa o yi nɛ ɗɔɔ gba-tɔp mɛ pɛsi wa dam zu nu lɛŋ. Nin-wi’ɛi nɛ GASA WAN.

⁹Nɛ a̧ a̧ de ha̧ wa mɛ ɓar mɔ ko ŋga-bíí yaknɛ, ɓɛɛ a̧ dee ha̧ o ŋga ye mɛ tik er o wi-ɓar-mɔ er-wi.

¹⁰Ɛ́nɛ́ sɛn nɛ́ o bíí nɛ tɔ̧ nɛ wen nɛ yuwar-a in nɛ ɓa wen nɛ sa̧a̧-a̧ ti kita.

¹¹Hee mɔ'ɔ n’ɛnɛ mbɔli nɛ o wi-kɔsa, kai nɛ zu-nyɔnɔ kɔ-wa ga, o de tua-ta n’ɛnɛ dea'i, ɛnɛ beka ɔ kɔ̧ a̧ na. O de waya-nyak-dɔ̧ɔ̧ n’ɛnɛ guna'i, ɛnɛ beka nɔ ɗɔɔ-aa na,

¹²wen mi iŋa dɔka ŋgazu k’ɛ́nɛ́. Ɗaŋmɔ k’ɛ́nɛ́ yaka zale nyɛmna, ɛnɛ o wi-nasi o wi-de-mɔ nɛ yuwar-a, ɛnɛ o bíí nɛ wa ye'nɛ́, ɛnɛ o bíí nɛ de ha̧ kita mɛ tik o wi-kɔsa.

¹³Mɛ nɛ wen hegɔ wi-kasi-zu, tɔ̧ wen tɛ ŋgimbi’ɛ na, wen nɛ́ ŋgimbi ŋgamɔ!

¹⁴Ɛ̀nɛ̀ kíí nɛ́ demɔ nɛ̀ bó nɛ́ ɗaŋmɔ na, wen h’ɛ́nɛ́ mɛ ya kpasa; hegɔ, GASA WAN Sɔ̧ nɛ a̧a̧ nɛ ŋgayamɔ lɛŋ tɛ duk in'nɛ̀ɛ́, hee mɔ'ɔ n’ɛnɛ tɔ̧ ga.

¹⁵Ɛ̀nɛ̀ sɛ́n ɗaŋmɔ, ɓɛɛ ɛ̀nɛ̀ kɔ̧́ nɛ demɔ. Ɛ̀nɛ̀ dé ha̧ deemɔ nɛ yuwar-a mɛ pii ɗoŋ fara kita. Ŋmafara, GASA WAN Sɔ̧ nɛ a̧a̧ nɛ ŋgayamɔ lɛŋ tɛ de ko ha̧ oi nutua ko Jozɛf.

¹⁶Mɛ nɛ wen hegɔ sa GASA WAN kɔ‘m nɛ duk nɛ GASA WAN Sɔ̧ nɛ a̧a̧ nɛ ŋgayamɔ lɛŋ tɔ̧‘e: «O bíí tɛ hi̧i̧ fio dam bee-gara lɛŋ; o bíí tɛ ai nú dam o yuwar lɛŋ. Ɛnɛ tɛ sa o wi-wa-fɔ mbɛt mɛ tɛ mɛ hi̧i̧ fio in o wi nɛ tom kɔ-wa nɛ hi̧a̧-fio.

¹⁷Ɛnɛ tɛ hi̧i̧ fio nɛ kpɛɛfɔ nyak-dɔ̧ɔ̧ nɛ́nɛ́, ŋgimbi n'am tɛ ɓir nɛnɛ mgbara'nɛ́.» GASA WAN a̧ tɔ̧.

¹⁸Bɔnɛ a̧a̧ zu o wi nɛ pɛm wese ko GASA WAN! Wese'i tɛ duk h’ɛ́nɛ́ hee ge? Tɛ duk nɛ tum, nɛ bó nɛ́ sa̧a̧mɔ na.

¹⁹Mɔ‘i tɛ hɔ ŋmaa in ŋma bíí nɛ yu mɔ ti dila, ɓɛɛ nɛ̀ɛ̀ tík nɛ́ nú baŋgiiɗoŋ'ɛ[4] ga, kóó hee bíí nɛ pii ɗoŋ kɔ̧ tua kɔ‘i, ha'i tam ŋgeŋ wó, ɓɛɛ ká gɔ́k gɔma a̧'ɛ ga.

²⁰Bo nɛ wese ko GASA WAN tɛ duk nɛ tum nɛ bó nɛ́ sa̧a̧mɔ na, na nde? Wese'i tɛ duk nɛ tum, nɛ mbulu sa̧a̧mɔ beka bo na.

²¹«Mi sɛna o ɗafa-sɔ̧ n’ɛnɛ mɔi̧ ɗafi nɛnɛ‘i; o gbaŋa k’ɛ́nɛ́ de tɛ‘m na.

²²Dɔɔ-kpoo-sɔ̧ n’ɛnɛ dɔ ha̧‘m in o nyɔnɔ n’ɛnɛ ha̧‘m'i de tɛ‘m na. Mi beka kpɛk o ŋmaŋa saɗi n’ɛnɛ ba tɛnɛ mɛ ɗafi nɛ‘m'i na mbɛt.

²³Ɛ̀nɛ̀ bá o gima k’ɛ́nɛ́ nyɛi̧ nɛ‘m, mi kɔ̧ mɛ zii o giti kunde na mbɛt.

²⁴Deemɔ nɛ yuwar-a a̧ duk mgbara'nɛ́ hee kpút-kpút ga; deemɔ nɛ tana-a a̧ duk mgbara'nɛ́ hee foka-yì nɛ ɔ̧sa̧ na ga.

²⁵«O be Israɛl, tɛ pɛ ɓu-naar n’ɛnɛ yaa ŋga-gbárà, ɛnɛ ɗafa so'm, ha̧ nɛ mɔ ha̧‘m nde?

²⁶Ɓɛɛ ɛnɛ tuia nɛ o géé-sɔ̧ n’ɛnɛ dea, Sikut nɛ duka hee wan ga, in Kiyun sɔ̧-sɔra k’ɛ́nɛ́.

²⁷Hegɔ, mi tɛ kai'nɛ́ nɛ bara-biro yaknɛ siɗoŋ Damas nɛ ɓi'i.» Nɛ GASA WAN nɛ‘i sa nin-a'e Sɔ̧ nɛ a̧a̧ nɛ ŋgayamɔ lɛŋ, a̧ tɔ̧ wen'i.