Read Northwest Gbaya AMƆS 6 Bible Online

AMƆS 6 - Northwest Gbaya bible

AMƆS 6

¹Bɔnɛ a̧a̧ zu o bíí nɛ̀ ya nɛ̀ ga̧a̧-see wen zu Siɔŋ in nɛ̀ e ta nɛ̀ kaya Samarii. Wa nɛ́ o gasawi sɛn Israɛl nɛ̀ duk nɛ́ kuti tugun bíí zaŋnu, ɓɛɛ nɛ́ wa'i a̧ nutua ko Israɛl zɔk e nɛ̀ ta.

²Wa'e ndé: «Ɛ́nɛ́ nɛ́ si Kalne, ɛ́nɛ́ zɔ́k ye'i, ɛ́nɛ́ kúr nɛ̀ hi̧i̧ sitɛ gasa ye Hamat, ɓɛɛ ɛ́nɛ́ zira si Gat, ye ko o be Filistii mbɛt. Mɔ‘i, o ye kɔ-wa gana o ɛ̧ɛ̧ nɔ'ɔ nde? Nù kɔ-wa gasa gan k’ɛ́nɛ́ nde?»

³Ɛ́nɛ́ kíí mɛ fo wese bɔnɛ e siti, ɓɛɛ deemɔ k’ɛ́nɛ́ ɗɔl nɛ wese ŋgamɔ‘i pii ɗoŋ.

⁴Ɛ́nɛ́ ɔ́ nɛ nu gɔn gado nin-fɔrɔ, ya nɛ nu zu mɔɔ-duk-nu k’ɛ́nɛ́, nyɔŋ nɛ o be-sami in o be ndai nɛ‘i kaia tɛnɛ nɛ fara-dai-wa.

⁵Ɛ́nɛ́ mbɛ́r nɛ kunde, bíí nɛ gima, mɔ kaɗi, mɔ kaɗi, hee mɔ'ɔ nɛ David dee so ga.

⁶Ɛ́nɛ́ nɔ́ nɛ dɔ̧ɔ̧ kɔ̧ o ɗele, sɔ̧ nɛ de pɛr nyama tɛ‘nɛ́, ɓɛɛ wen k’ɛ́nɛ́ bó nɛ̀ ŋgamɔ nɛ tɛ tik zu o bezaŋ Jozɛf na.

⁷Mɛ nɛ wen hegɔ, wa tɛ kai nɛ́ ɛ́nɛ́ nɛ bara-biro yaknɛ nɛti ha̧ o dɔka bíí, ɓɛɛ bɔtɛ mɔi̧a ŋmaa k’ɛ́nɛ́‘i kaɗa.

⁸GASA WAN Sɔ̧ nɛ a̧a̧ nɛ ŋgayamɔ lɛŋ kana mɔ nɛ tɛ-wi, ɓɛɛ tɔ̧: «Mi sɛna ŋmaŋa-tɛ ko nutua ko Jakob, ɓɛɛ mi sɛn tua-wan kɔ-wa mbɛt. Hegɔ mi tɛ ha̧ ye kɔ-wa nɛ oi-aa lɛŋ ha̧ o wisɛn.»

⁹Kà bíí ɓu nɛ́ ɓɔna kɔ̧ tua kpɔk, wa tɛ fe lɛŋ.

¹⁰Ŋma bíí ko fio tɛ tɛ mɛ ba fio gbonɛ kɔ̧ tua wen dɔa-a, ɓɛɛ ka a̧ ak mɔ sitɛ ŋma bíí nɛ ɓɔna ndaa tua'e: «Ŋma bíí ɓɔna in mɛɛ woyo?» Wi’ɛi tɛ kifi nú: «Weyaa, bíí bo ɓɔna.» Ɓɛɛ kuti wi tɛ tɔ̧: «Ká'í tɔ̧ wen na. Bo nɛ ŋgimbi-sa-nin GASA WAN kinii na.»

¹¹Kà GASA WAN ha̧ nú, ɓɛɛ o gasa tua tira a nu, ɓɛɛ o geɗek-a gbina a nu mutu-mutu.

¹²Wí ŋgán nyaŋa zu kam-ta nde, wí wá fɔ nɛ ndai ɗɔɔ tɔp nde? Ɓɛɛ k’ɛ́nɛ́, ɛnɛ kpaia deemɔ nɛ yuwar-a nɛ maada̧, ɓɛɛ ɛnɛ kpai deemɔ nɛ tana-a nɛ ɗaŋmɔ.

¹³Nyɛŋɛ pi̧ nɛ ɛnɛ, wen n’ɛnɛ baa Lo-Dabar, nɛ mɔ'ɔ n’ɛnɛ duk tɔ̧ nɛnɛ‘e: «Bó nɛ́ nɛ̀ ŋgai-tɛ yɛ ɛ́ɛ́ baa nɛ Karnayim na nde?»

¹⁴Nɛ GASA WAN Sɔ̧ nɛ a̧a̧ nɛ ŋgayamɔ lɛŋ a̧ tɔ̧ wen’ɛ: «Mi tɛ de ha̧ ŋma tugun bíí mɛ ba zu duk nɛ ɛnɛ, usi nɛ bɔnɛ h’ɛ́nɛ́ nɛ Lebo-Hamat nɛ war ká̧-zan-mɛ́-ŋgɔn mɛ, hɔ nɛnɛ nu be-zer Raba nɛ a̧a̧ si ká̧-zan-mɛ́-ɗɔɔ.»