Read Northwest Gbaya AMƆS 9 Bible Online

AMƆS 9 - Northwest Gbaya bible

AMƆS 9

¹Mi zɔka GASA WAN fara yora-a zu fara-ɗafi-sɔ̧; a̧ tɔ̧a̧: «Wa a̧ gbin gan-ndui nɛ ya zu mbiŋ, ɓɛɛ dadaa nu Tua ko Sɔ̧ a̧ nak! Mɔ a̧ gbin ai a zu o bíí nɛ mɔ̧i̧a, ɓɛɛ kà oi-wa ɓɔn, mi tɛ de ha̧ wa mɛ kum, ŋma bíí beka yu mɔ yak na, ŋma ɓɔn-kpasa bo na.

²Kóó wa nɛ̀ɛ́ hɔ fara ko o fio mɛ, mi tɛ nɛ̀ɛ́ hɔ hi̧i̧ mɛ kai wa; kóó wa daŋa so si yiwese, mi tɛ de ha̧ wa mɛ zir.

³Kóó wa nɛ̀ɛ́ hu̧si so zu kaya Karmɛl, mi tɛ kpa wa, ɓɛɛ mi kaia wa. Kà wa ta'e, wi tɛ hu̧si ɗɔɔ gba-tɔp, ɓɛɛ mi zɔk wi na wo, mi tɛ tom ndiɓa ha̧ mɛ nɛ̀ɛ́ nyɔŋ wa hi̧i̧.

⁴Kà wa nɛ sitɛ o wisɛn kɔ-wa mɛ duk bara-biro, mi tɛ ha̧ nú ha̧ wa mɛ kum wa hi̧i̧ nɛ gba-paa. Yí‘m tɛ duk tɛ-wa, bo nɛ wen dee demɔ in wa na, ɓɛɛ nɛ wen dee ɗaŋmɔ in wa.»

⁵Kà GASA WAN nɛ a̧a̧ nɛ ŋgayamɔ lɛŋ tam nu, ɓɛɛ nu naka, ɓɛɛ o bíí zu nu lɛŋ yaa tɛ zima mɔ; nu kur nɛ oi-aa lɛŋ ɓɛɛ gbɔsa si ɗɔɔ hee mɔ'ɔ nɛ nana-yì Nil sɛn Egiptɛ ha̧ nɛnɛ ɓɛɛ ɔ̧sa̧ nɛnɛ mbɛt’ɛ ga.

⁶Sɔ̧ mboo tua kɔ‘i sɛn yiwese, ɓɛɛ naŋ tua'i duk zu nu. Nɛ a̧ a̧ sa o yi nɛ dɔɔ gba-tɔp mɛ pɛsi wa dam zu nu lɛŋ. Nin wi’ɛi nɛ GASA WAN!

⁷Wen nɛ GASA WAN tɔ̧ nɛ mɔ'ɔ: «Ɛnɛ o be Israɛl, sɛn yí‘m, ɛnɛ gana bɔɔ o be Etiopii nɛ ge? Kpɔk foo'nɛ́ yinɛ sɛn Egiptɛ n'am foo so’ɛ, nɛ mɔ'ɔ n'am foo kana nɛ o be Filistii yinɛ Kaftɔr in o be Sirii sɛn Kir mbɛt’ɛ. Mɔ‘i, ɛnɛ iŋ hegɔ na?

⁸«Gbaayí GASA WAN Sɔ̧ kɔ‘m mbaɗi nɛ nutua-wan Israɛl nɛ de ɗaŋmɔ.» GASA WAN tɔ̧a̧: «Mi tɛ ɗaŋ wa yinɛ zu nu, ɓɛɛ mɔ kpɔk, mi beka kum o bezaŋ Jakob lɛŋ na.

⁹Kinii, mi tɛ ha̧ nú, wa a̧ yɛkɛsi nutua Israɛl mgbara o dɔka tugun bíí, hee mɔ'ɔ nɛ‘i yɛkɛsi nɛ gba̧a̧ mɔ, ɓɛɛ tik nu na’ɛ ga.

¹⁰Biro tɛ gbɛ o wi-de-ɗaŋmɔ mgbara dukbíí kɔ‘m; mɛ nɛ o wi nɛ tɔ̧ nde: ‹Ŋgamɔ beka hɛɗi katɛ yɛ na, a̧ beka kpa yɛ na mbɛt.› »

¹¹GASA WAN a̧ tɔ̧ wen’ɛ: «Wese'i, mi tɛ tɔi gbina tua-ŋgui ko David e ŋgɔn woyo, mi tɛ yur o woi-aa, mi tɛ mɔi̧ o gbina-a mɛ ɗafi, ɓɛɛ mi mboo a̧ woyo hee mɔ'ɔ n'aa duka so nɛti ga.

¹²Hegɔ ɓɛɛ o be Israɛl tɛ ba oi nu Edɔm in nu ko o ŋma tugun bíí, o fara nɔ‘i nɛ duka so nɛ kɔ‘m nɛti'i. Nɛ mi GASA WAN a̧ tɔ̧ wen'i, ɓɛɛ mi tɛ de mɔ‘i hɔ gba̧a̧.»

¹³Nɛ GASA WAN a̧ tɔ̧ wen’ɛ: «Ŋma wese tɛ hɔ nɛ waa-fɔ tɛ duk ɗoŋ ŋmaa, ɗoŋ ŋmaa in mɔi̧a-nyɔnɔ, in nɛ wi-gun-mɔ beka dak er hɔ̧ɔ̧ na ɓɛɛ wi-ɓi-waya-nyak-dɔ̧ɔ̧ hɔa. Nyɔ̧ɔ̧ dɔ̧ɔ̧ tɛ fok nɛ zu o kaya, ɓɛɛ zu o be zu-tɔ̧́ lɛŋ tɛ mbaŋ nɛ dɔ̧ɔ̧.

¹⁴Mi tɛ kpai duka-a ko dukbíí kɔ‘m Israɛl; wa tɛ mbo o ye kɔ-wa nɛ ɗaŋa so, ɓɛɛ wa ɔɔ sɛnɛ woyo. Wa tɛ gun o waya-nyak-dɔ̧ɔ̧, ɓɛɛ wa nɔɔ dɔ̧ɔ̧-a̧a̧. Wa tɛ gun o nyɔnɔ, ɓɛɛ wa nyɔŋa.

¹⁵Mi tɛ e dukbíí kɔ‘m tɛ nu nɛ duk nɛ kɔ-wa woyo. Wi beka ndak wa yinɛ tɛ nu n'am ha̧a̧ siɗoŋ ha̧ wa na.» Nɛ GASA WAN Sɔ̧ k’ɛ́nɛ́ a̧ tɔ̧ wen'i.