Read Northwest Gbaya JƆNAS 2 Bible Online

JƆNAS 2 - Northwest Gbaya bible

JƆNAS 2

¹Nɛ́ mɔ'ɔ nɛ̀ GASA WAN dee ha̧ ŋma zɔm gasa zoro mɛ tɛ̀ɛ́ gur Jɔnas, ɓɛɛ Jɔnas duk kɔ̧ zaŋ zoro'i zɛ taar.

²Mɛ nɛ sɛn kɔ̧ zaŋ zoro'i a̧ a̧ ku̧u̧ nɛ naŋ kɔfa GASA WAN Sɔ̧ kɔ̧-a̧ hee mɔ'ɔ ga:

³Tɛ dita-see n'am duka sɛnɛ, mi aia nú sitɛ GASA WAN, ɓɛɛ a̧ kífí nú ha̧‘m; mi duka ye ko o fio mɛ ai nɛ nú h’ɛ́nɛ́, ɓɛɛ ɛnɛ zii tiger-am.

⁴Ɛ́nɛ́ pi̧i̧ am ɗɔɔ ɗuka dir-yì kpɔ̧ɔ̧-kpɔ̧ɔ̧, ɓɛɛ kin-yì ɓoɓ‘am; pɛŋa-yì in kin-yì k’ɛ́nɛ́ kpee zu'm liŋgɔm,

⁵ɓɛɛ mi ta kɔ‘m'e ndé, ɛnɛ pi̧i̧ am taŋ kaɗi. Zu-a'i, mi kɔ̧ɔ̧ so mɛ zɔk sa̧a̧ Tua k’ɛ́nɛ́!

⁶Yì hu̧ra'm hɔ tiger-am, dir-yì ŋmai̧a'm si ndaa lembe, ɓɛɛ naa-nyɔɗi kpe zu'm lɛŋ.

⁷Mi zira si ɗɔɔ nù mɛ;[1] o kpar-nú-tua sɛn fara ko o fio mɛ kpee e zu'm, ɓɛɛ GASA WAN Sɔ̧ kɔ‘m, ɛnɛ kpasa'm nɛ kɔ̧ ɗuka kɔ̧ mɛ gbonɛ.

⁸Ŋgimbi nɛ hiɗ‘am gɔna, nɛ̀ tɛ‘m mɔka nɛnɛ, tɛ‘m mbaŋa ɗoŋ‘nɛ́; ɓɛɛ aia-nú kɔ‘m daŋ hɔ tɛ‘nɛ́ sɛn kɔ̧ sa̧a̧ Tua k’ɛ́nɛ́ mɛ.

⁹O wi-gasi-géé-sɔ̧ a̧ e yí-tom'i duk. War-a kɔ‘m, mi tɛ ɗafi'nɛ́, bíí nɛ gima zɔn nɛ ɛnɛ.

¹⁰Mɔ n'am ha̧a̧ nú sɛnɛ kaɗi, mi tɛ de kana mɔ‘i hɔ gba̧a̧. Nɛ mbetɛ, yuwar-kpasa-a tɛ nɛ tɛ GASA WAN.

¹¹Nɛ́ mɔ'ɔ nɛ Sɔ̧ tɔ̧ɔ̧ wen ha̧ zoro, ɓɛɛ zoro nɛ́ɛ̀ ɔ̧i̧ Jɔnas pi̧ zan mɛ.