Read Northwest Gbaya JƆNAS 3 Bible Online

JƆNAS 3 - Northwest Gbaya bible

JƆNAS 3

¹Nɛ́ mɔ'ɔ nɛ GASA WAN tɔ̧ɔ̧ ha̧ Jɔnas woyo:

²«Mɛ̀ kúr, mɛ̀ nɛ́ sɛn Ninivɛ, gasa ye’ɛ; ɓɛɛ mɛ̀ tɔ̧́ nú-tom n'am tɛ tɔ̧ ha̧ mɛ lɛŋ ha̧ wa.»

³Ɓɛɛ Jɔnas kur, yak si Ninivɛ hee mɔ'ɔ nɛ GASA WAN tɔ̧ɔ̧ so ha̧ a̧ ga. Ninivɛ duka so nɛ zɔm gasa ye nyɛmna. Mɛ nɛ tɛ nɛɛ nɔ zɛ taar sɛka'i hɔɔ nduti ye.

⁴Jɔnas yee saaye'i, ɓɛɛ nɛ nɔ tɛ zɛ kpɔk he nɛ mbéá tɔ̧ nɛnɛ ha̧ o bíí‘e nde: «Oi-aa ɓɔna nɛ́ zɛ ɓu-naar ɓɛɛ Ninivɛ ɗaŋa!»

⁵O bíí Ninivɛ kpaa mbe ta ɓɛɛ kɔ̧ ɗɔaa ha̧ Sɔ̧, ɓɛɛ wa gɔn geŋa ha̧ o bíí lɛŋ mɛ zim yì, ɓɛɛ wa gaɓi tɛ nɛ a̧ka̧ bufu mbɛt, o gasawi gu nɛ o oi o bíí lɛŋ.

⁶Zia nyɛrɛ mɔ‘i nɛ wannu Ninivɛ zia hegɔ, ɓɛɛ a̧ zir zu damti-wan, kpɔ̧i̧ laa-wan kɔ̧-a̧ pi̧ nù, gaɓi tɛ nɛ a̧ka̧ bufu, ɓɛɛ a bùk zu.

⁷Wannu Ninivɛ in o gasawi kɔ‘i hee mbéá‘e ndé: «O bíí in o saɗi, mɔ nɛ‘i saa'e mɔ-dai lɛŋ a̧ ka'i fo mɔ nɛ nú na, wa a̧ ka'i nɔ yì na mbɛt.

⁸Bíí lɛŋ in o saɗi a̧ gaɓi tɛ nɛ a̧ka̧ bufu, ɓɛɛ wa a̧ ai nú ha̧ Sɔ̧ nɛ hee-ger. Koo o nde a̧ bɛ̧ ɗaŋ deemɔ kɔ‘i, in a̧ e yuwar ɗaŋmɔ duk,

⁹gbakna Sɔ̧ kpaia taamɔ, ɓɛɛ see-aa ga̧a̧ zu yɛ k’ɛɛ tɛɛ kum ɗɔɔ ŋga nyimsea kɔ̧-a̧.»

¹⁰Sɔ̧ zɔka mɔ nɛ wa dee lɛŋ. Hee mɔ'ɔ nɛ wa ee ɗaŋ deemɔ kɔ-wa duk ga, a̧ kpaia taamɔ, ɓɛɛ mɔ n'aa taa so mɛ de in wa'i, a̧ e duk.