Read Northwest Gbaya TƆRA-BÍÍ 10 Bible Online

TƆRA-BÍÍ 10 - Northwest Gbaya bible

TƆRA-BÍÍ 10

¹GASA WAN tɔ̧ɔ̧ ha̧ Moisɛ:

²«Mɛ̀ dúí mbia yiitoo nɛ bu-mbɔi. Mɛ̀ nɔ̧́í̧ wa nɛ bu-mbɔi. Wa tɛ gbak mɛ wen saa o bíí in wen gbina-a yak.

³Ŋgimbi nɛ wa tɛ dɔm nɛ o mbia nɔ‘i, o bíí lɛŋ tɛ tɛ pii katɛ mɛ, sɛn nú Tua-kpa-ŋmaa.

⁴Kà wa nɛ́ dɔma nɛ mbia kpɔk ɓɛɛ, nɛ́ o gasawi nú-gara ko o be Israɛl a̧ tɛ mɔi̧ ŋmaa katɛ mɛ ɓɛɛ.

⁵Ŋgimbi n’ɛnɛ tɛ dɔm o mbia ndaa-ŋmaa, ndaa-ŋmaa, ɓɛɛ nɛ́ o bíí nɛ̀ ya nɛ̀ war daŋa-wese a̧ tɛ kur mɛ yak.

⁶K’ɛ̀nɛ̀ dɔ́m mbia ndaa-ŋmaa, ndaa-ŋmaa woyo, ɓɛɛ nɛ́ o wi nɛ ya nɛ̀ war ká̧-zan-mɛ́-ɗɔɔ, a̧ tɛ kur mɛ yak. Dɔma mɔ ndaa-ŋmaa, ndaa-ŋmaa tɛ usi nɛ́ kura-a yak;

⁷ɓɛɛ dɔma mɔ gɔn hiɗi na, tɛ usi nɛ mɔi̧a bíí.

⁸Mɛ̀ nɛ́ o wi-ɗafi-sɔ̧, o bem ko Arɔŋ a̧ tɛ dɔm dɔma mɔ! Mɔ‘i nɛ́ ŋma heembea nɛ tɛ duk ɓɔnsɛnɛ wen'nɛ́ in o bezaŋ‘nɛ́.

⁹«Ŋgimbi n’ɛnɛ tɛ nɛ biro sitɛ o wisɛn k’ɛ́nɛ́ nɛ kɔ̧ɔ̧ mɛ bi'nɛ́, ɛnɛ tɛ dɔm mbia ndaa-ŋmaa, ndaa-ŋmaa, ha̧ tɛ‘m mɛ mbaŋ ɗoŋ‘nɛ́; ɓɛɛ hegɔ mi tɛ kpasi'nɛ́ er o wisɛn k’ɛ́nɛ́.

¹⁰K’ɛ̀nɛ̀ be tɛɛ de yɔyɛ, kóó nɛ gbaŋa mbe-yi-zɛ, kóó nɛ gbaŋa lɛŋ, ɛnɛ tɛ dɔm o mbia nɔ‘i mbɛt ŋgimbi dɔɔ kpoo-sɔ̧ in ŋgimbi ɗafa sɔ̧-gaŋmɔ k’ɛ́nɛ́, ɓɛɛ hegɔ, tɛ‘m tɛ mbaŋ ɗoŋ‘nɛ́. Mi nɛ GASA WAN Sɔ̧ k’ɛ́nɛ́.»

¹¹Tɛ yiitoo pɛ sɛn tɛ ɔɔ-zɛ ɓu-yiitoo tɛ yiitoo fio-zɛ, tura-zan kura sɛn zu tua Kuɓa nɔɔ-tɔk.

¹²O be Israɛl gbina e ŋga-gbárà Sinai duk, nyɛm nɛ ɗoŋ yuwar gbara-a nɛ‘i usa ha̧ wa. Ɓɛɛ tura-zan nɛɛ yor sɛn ŋga-gbárà Paraŋ.

¹³Kuti gbina-a ko o be Israɛl yak tɛ wen ko GASA WAN nɛ tɔ̧ɔ̧ so ha̧ Moisɛ nɛ́ mɔ‘i.

¹⁴Nɛ́ tutuwal ko o bíí Juda a̧ kura ti in o wi-biro kɔ‘i. Nɛ́ Nasɔŋ, bem ko Aminadab a̧ duka zu o wi-biro ko o bezaŋ Juda;

¹⁵Netanɛl, bem ko Suar duka zu o wi-biro ko o bezaŋ Isakar;

¹⁶ɓɛɛ Eliab bem ko Elɔŋ duk kɔ‘i zu o wi-biro ko o bezaŋ Zabulɔŋ.

¹⁷Wa yaia Tua-kpa-ŋmaa, ɓɛɛ o bem ko Gɛrsɔŋ in o bem ko Mɛrari tui yaknɛ.

¹⁸Tutuwal ko o bíí ko Rubɛn kura in o wi-biro kɔ‘i yak ɗoŋ wa, ɓɛɛ nɛ́ Elisur, bem ko Sedeur a̧ duka zu o wi-biro ko o bezaŋ Rubɛn.

¹⁹Salamiɛl, bem ko Surisadai duka zu o wi-biro ko o bezaŋ Simɛɔŋ,

²⁰ɓɛɛ Eliasaf, bem ko Deuɛl duk kɔ‘i zu o wi-biro ko o bezaŋ Gad.

²¹Hɔ-ɗoŋ-aa nɛ́ o bem ko Kehat nɛ tui kɔ-wa nɛ o mɔ nɛ ɔ sa̧a̧ nyɛmna a̧ yaka. O wi nɛ yaka baa Tua-kpa-ŋmaa e ŋgɔn nɛti ha̧ wa mɛ hɔ.

²²Hɔ-ɗoŋ-aa nɛ́ tutuwal ko o bíí ko Efraim in o wi-biro kɔ‘i a̧ kura yak, ɓɛɛ nɛ́ Elisama bem ko Amihud a̧ duka zu o wi-biro ko o bezaŋ Efraim.

²³Gamaliɛl bem ko Pedasur, duka zu o wi-biro ko o bezaŋ Manase,

²⁴ɓɛɛ Abidaŋ bem ko Gedeɔŋ, duk kɔ‘i zu o wi-biro ko o bezaŋ Bɛnjamin.

²⁵Sɔŋkur-aa, nɛ́ tutuwal ko o bíí ko Dan in o wi-biro kɔ‘i a̧ kpee ndaa-gɔtɔ ɓɛɛ kur yak. Nɛ́ Ahiezɛr bem ko Amisadai a̧ duka zu o wi-biro ko o bezaŋ Dan.

²⁶War ko o wi-biro ko o bezaŋ Asɛr, nɛ́ Pagiɛl, bem ko Okraŋ a̧ duka zu wa,

²⁷ɓɛɛ nɛ̀ war ko o bezaŋ Nɛftalii, nɛ́ Ahira, bem ko Enaŋ.

²⁸Yuwar gbina-a ko o be Israɛl nɛ wa gbina nɛnɛ yak in o wi-biro kɔ-wa nɛ mɔ‘i. Nɛ́ hegɔ a̧ wa yaka nɛnɛ.

²⁹Moisɛ tɔ̧ɔ̧ ha̧ for-wi Obab bem ko Reuɛl be Madiaŋ‘e: «Ɛ̀ɛ̀ nɛ́ si fara nɛ GASA WAN ha̧a̧ so nú mɛ ha̧ h’ɛ́ɛ́. Mɛ tɛ in yɛɛ; ɛ́ɛ́ tɛ́ de ha̧ mɛ mɛ kpa demɔ nɛ GASA WAN ha̧a̧ so nú mɛ ha̧ ha̧ o be Israɛl mbɛt.»

³⁰Obab kifa nú ha̧ a̧: «Mi beka nɛ́ in'nɛ̀ɛ́ na; mi tɛ si ye kɔ‘m mɛ duk in o bíí kɔ‘m.»

³¹Moisɛ tɔ̧ɔ̧ ha̧ a̧ woyo: «Mi aia nú ha̧ mɛ, ká mɛ e yɛ duk na; wen nɛ́ mɛ a̧ iŋa fara n’ɛɛ nyɛma ɔa-a sɛnɛ sɛn ŋga-gbárà; nɛ́ mɛ́'ɛ tɛ duk wi-usi-war h’ɛ́ɛ́.

³²Kà mɛ nɛ tɛɛ́ in yɛɛ, mɛ́ tɛ kpa kànà demɔ nɛ GASA WAN tɛ ha̧ h’ɛ́ɛ́‘i mbɛt.»

³³Wa dee nɛ zɛ taar tɛ naŋanɔ ŋgimbi nɛ wa ee nɛ kaya Sinai duk. Tɛ nɔ̀ nɛ wa nɛɛ zɛ taar'i, Kuɓa nɔɔ-tɔk ko GASA WAN duka ti wen usa fara-ɔ ha̧ wa.

³⁴Tura-zan ko GASA WAN kpee zu wa mɛ wese ŋgimbi nɛ wa gbin nɛnɛ yak.

³⁵Ŋgimbi nɛ wa gɔ Kuɓa nɔɔ-tɔk ha̧ wa mɛ yak, ɓɛɛ Moisɛ tɔ̧ɔ̧ nɛ hee ger: «GASA WAN, ɛnɛ kur! O wisɛn k’ɛ́nɛ́ a̧ pɛsi ti'nɛ́, o wi-kur-zu'nɛ́ a̧ yu mɔ yak!»

³⁶Ŋgimbi nɛ wa gɔ Kuɓa nɔɔ-tɔk e nu, ɓɛɛ Moisɛ tɔ̧ɔ̧ nɛ hee ger woyo: «GASA WAN, ɛ̀nɛ̀ píí ɗoŋ ba fara mgbara o gii be Israɛl!»