Read Northwest Gbaya TƆRA-BÍÍ 11 Bible Online

TƆRA-BÍÍ 11 - Northwest Gbaya bible

TƆRA-BÍÍ 11

¹Ŋma wese, o be Israɛl yee tɛ ku̧i̧a mɔ, ɓɛɛ ŋgimbi nɛ GASA WAN zia mɔ‘i, a̧ kpaa ɗaŋsee, ɓɛɛ wee ko GASA WAN tik zu o bíí, dɔ ŋma tua a nù sɛn kɔ̧ gbagari.

²O giiwi hiɗa mɔ sitɛ Moisɛ; a̧ kɔfa mɔ in Sɔ̧, ɓɛɛ wee'i ga̧.

³Wa saa nin fara'i nɛ Tabera, mɔ nɛ tɔ̧‘e «wee», wen wee ko GASA WAN kuma so o be Israɛl sɛn hi̧i̧.

⁴O ŋma gɔni bíí yaa so mgbara wa de nɛ wɔ kpoo; mɔ‘i dee ha̧ o be Israɛl mɛ ku̧naŋ aia nú wen kpoo mbɛt tɔ̧ nɛnɛ: «Nɛ́ o'o tɛ ha̧ kpoo-nyɔŋ h’ɛ́ɛ́ o?

⁵Tɛ yɛ mbaŋa ɗoŋ o zoro, o gala, o saa, o war, ti̧i̧ri in o geɗek ti̧i̧ri nɛ de pɛr-aa nyɛmna n’ɛɛ nyɔŋ so sɔɔ géè sɛn nú Egiptɛ mɛ.

⁶Kinii nú yɛ kora kpaa-kpaa, nyɔŋmɔ k’ɛɛ‘i kànà nɛ man ɓɛɛ.»

⁷Man‘i hɔɔ ŋmaa in ŋma be gba̧a̧-mɔ nɛ ɔ tara.

⁸Ŋgimbi nɛ dɔmbɔrɔ kpe nɛ zu gbagari mɛ zɛ, nɛ́ ŋgimbi'i a̧ man a nɛ nù mbɛt. Mɛ tutuyɛ, ɓɛɛ o bíí pɛsa mɛ nɛ̀ɛ́ kai. Kà wa kai kaɗi, ɓɛɛ wa nɛɛ hɔ̧n fara-hɔ̧n-mɔ, kóó wa too too nɛ duk mbɛt, ɓɛɛ wa gii o makala kɔ̧ kpánà. Nyɔ̧ɔ̧-a̧a̧ yak ŋmaa in nyɔ̧ɔ̧ makala nɛ‘i gii nɛ nɔ̧́ na.

¹⁰Moisɛ zia dukbíí fara aia nú; wa mɔi̧ nɛ ŋmaa nɛ nú-gara ya nɛnɛ nú tua-laa kɔ-wa. See GASA WAN nyima nɛ ŋgaya-a, ɓɛɛ Moisɛ iŋ zu mɔ nɛ tɛ de na.

¹¹A̧ tɔ̧ɔ̧ ha̧ GASA WAN: «Wen ge ɛnɛ de mɔ in wi-de-tom k’ɛ́nɛ́ hegɔ ge nde? Gè ɗaŋmɔ ge a̧‘m dee ti'nɛ́, s’ɛnɛ mɔi̧ o wi nɔ'ɔ lɛŋ e nɛ tui zu'm ge?

¹²Nɛ́ mi a̧‘m baa zaŋ dukbíí'ɛ nde? Nɛ́ mi a̧‘m koo wa, k’ɛ́nɛ́ tɔ̧ ha̧‘m'e, à̧‘m bá wa e yí ŋguɗ‘am hee mɔ'ɔ nɛ naa-wan-bem ba nɛ bem kɔ‘i e yí ŋguɗi’ɛ ga nde? Ɓɛɛ tui'i tɛ duk zu'm hɔ nɛnɛ fara n’ɛnɛ baa ha̧ so nú‘nɛ́ mɛ ha̧ ha̧ o dáà kɔ-wa nde?

¹³Mi tɛ kpa kpoo mɛ ha̧ ha̧ dukbíí'ɛ nɛ ndak ɗoŋ-am, hiɗi nɛ mɔ‘e a̧‘m ha̧ kpoo ha'i nyɔŋ wó'ɛ sɛn déè?

¹⁴Mi beka nyɛm tuia o wi nɔ'ɔ ɛ̀n’ám na, wen wa dita gan am.

¹⁵K’ɛ̀nɛ̀ nɛ́ kɔ̧ɔ̧ mɛ de mɔ in am hegɔ, ɓɛɛ n’ɛ̀nɛ̀ gbɛ́ nɛ‘m yinɛ; mi aia nú h’ɛ́nɛ́, kà ko nɛ́ dee'nɛ́ ha̧‘m, ká‘m zɔk pɛrti bɔnɛ'ɛ ɓɔna.»

¹⁶GASA WAN tɔ̧ɔ̧ ha̧ Moisɛ: «Mɛ̀ mɔ́í̧ o gasawi ɓu-mɔɔrɔ-ɗoŋ-yiitoo mgbara o be Israɛl; mɛ̀ mɔ́í̧ wan nɛ mɛ iŋa'e, wa nɛ o gasawi in o kuti bíí, ɓɛɛ mɛ̀ káí wa si kɔ̧ Tua-kpa-ŋmaa. Wa tɛ yor in mɛɛ sɛn ti'm.

¹⁷Mi tɛ zir hi̧i̧, ɓɛɛ mi tɔ̧ɔ̧ wen in mɛɛ. Mi tɛ ba ŋma be ŋgai kɔ-mɛ n'am ha̧a̧ ha̧ mɛ ha̧ wa. Nɛ́ hegɔ a̧ wa tɛ ba nɛ dita tui yinɛ zu mɛ, nɛ mɛ beka tui ɛ̀nɛ̀-mɛ ɓɔna.

¹⁸Ɓɛɛ mɛ tɛ tɔ̧ ha̧ dukbíí ndé: ‹Ɛ̀nɛ̀ ɗáfí war-tɛ‘nɛ́ wen mɔɔsa̧, ɓɛɛ ɛ̀nɛ̀ ɗáfí mɔ wen nyɔŋa kpoo. GASA WAN zia aia-nú k’ɛ́nɛ́‘e: Nɛ́ o'o tɛ ha̧ kpoo h’ɛ́ɛ́ mɛ nyɔŋ o nde? Ɛɛ yaa so nɛ de-a sɛn Egiptɛ mɛ wó‘i. GASA WAN tɛ ha̧ kpoo h’ɛ́nɛ́, ɓɛɛ ɛnɛ nyɔŋa.

¹⁹Bo nɛ ɛnɛ tɛ nyɔŋ nɛ wese kpɔk kóó yiitoo, kóó mɔɔrɔ, kóó ɓu, kóó ɓu-yiitoo ɓɛɛ na,

²⁰ɓɛɛ nɛ kii-zɛ kpɔk, hɔ ŋgimbi nɛ pɛr-aa beka de tɛ‘nɛ́ ɓɔna in hɔ ŋgimbi nɛ tɛ de sɛ̧ɛ̧. Ɛnɛ ee GASA WAN nɛ duk mgbara'nɛ́ tɛ geemɔ, ɓɛɛ ɛnɛ ku̧i̧ mɔ ti a̧‘e, wi gboo nú Egiptɛ wen ge?› »

²¹Nɛ mɔ'ɔ nɛ Moisɛ tɔ̧a̧: «O wi-biro n'am duk mgbara-a nɛ bíí booro-gɔmŋmaa-mɔɔrɔ-ɗoŋ-kpɔk, ɓɛɛ ɛnɛ‘e ndé, wi tɛ ha̧ kpoo ha̧ wa mɛ nyɔŋ kii-zɛ kpɔk!

²²Kóó wi gbɛɛ so nɛ o sami in o ndai, tɛ nyɛm so wa nde? Kóó bòò só nɛ́ o zoro ɗɔɔ gba-tɔp lɛŋ ká nyɛma wa nde?»

²³GASA WAN tɔ̧ɔ̧ ha̧ Moisɛ: «Ŋgai kɔ‘m nyɛm wen dee mɔ‘i na nde? Mɛ tɛ zɔk kà wen kɔ‘m nɛ́ hɔɔ gba̧a̧ na!»

²⁴Nɛ mɔ'ɔ nɛ Moisɛ gboo si zan, ɓɛɛ tɔ̧ wen nɛ GASA WAN tɔ̧a̧‘i ha̧ dukbíí. A̧ hoka o gasawi ɓu-mɔɔrɔ-ɗoŋ-yiitoo; a̧ aa wa zik ká̧ tua.

²⁵Nɛ mɔ'ɔ nɛ GASA WAN zira tɛ tura-zan, ɓɛɛ tɔ̧ wen ha̧ Moisɛ; a̧ baa ŋma be nú ɔmi nɛ duk tɛ Moisɛ e tɛ o gasawi nɔ‘i ɓu-mɔɔrɔ-ɗoŋ-yiitoo'i. Ŋgimbi nɛ ɔmi‘i ye tɛ-wa, wa ku̧u̧naŋ tɔ̧ɔ̧ wen oi nu Sɔ̧. Mɔ kpɔk, wa tɔ̧ siti na.

²⁶O ŋma bíí yiitoo ɓɔna so kɔ‘i kɔ̧ gbagari: nin-wa nɛ Ɛldad in Mɛdad. Wa hoka so wa mbɛt, ɓɛɛ wa nɛ kɔ-wa kɔ̧ Tua-kpa-ŋmaa na. Nɛ mɔ'ɔ nɛ ɔmi ko Sɔ̧ zira pii zu wa, ɓɛɛ wa tɔ̧ wen oi nu Sɔ̧ kɔ̧ gbagari mɛ mbɛt.

²⁷Ŋma be-ŋgaiwi maa yì nɛɛ mbaŋ tɛ Moisɛ: «Ɛldad in Mɛdad tɔ̧ nɛ wen oi nú Sɔ̧ sɛn kɔ̧ gbagari!»

²⁸Ɓɛɛ Josue, bem ko Nun, wi nɛ de so tom ha̧ Moisɛ ku̧u̧naŋ-a nɛ bem mɛ, tɔ̧ ha̧ Moisɛ: «Nyaa Moisɛ, ɛ̀nɛ̀ dór wa!»

²⁹Moisɛ kifa nú ha̧ a̧: «Mɛ a nɛ see mɔ oi nú‘m nde? Mi kɔ̧ɔ̧ kɔ‘m nyɛmna ha̧ GASA WAN mɛ e ɔmi kɔ̧-a̧ zu o bíí kɔ̧-a̧ lɛŋ, ha̧ wa mɛ ya nɛ o wi-tɔ̧-wen oi nú-a mbɛt.»

³⁰Nɛ mɔ'ɔ nɛ Moisɛ pia ɗoŋ pii kɔ̧ gbagari in o gasawi ko o be Israɛl.

³¹GASA WAN dee ha̧ hara-búk mɛ yu nɛ ɗɔɔ gba-tɔp daŋnɛ ha̧ mɛ kai o kpaŋanaŋa tɛnɛ. O kpaŋanaŋa nɔ‘i a̧a̧ dam fara lɛŋ zik nɛ gbagari kpa ŋmaa. Wa mboɗa zu ŋmaa hee mɛtrɛ kpɔk ga delele; kóó wi nɛɛ so nɔ̀ tɛ zɛ kpɔk, wi tɛ kpa kànà nɛ kpaa wa yaknɛ.

³²O bíí kura kai nɛ o kpaŋanaŋa nɔ‘i mɛ wese in mɛ zɛ, hegɔ tɛ zɛ yiitoo. Wi nɛ kai kɔ‘i batɛ na, kaia gan kilo booro-taar ɓɛɛ. Wa kaia a wese zik kpa gbagari lɛŋ.

³³Kpoo biti kɔ̧ nú-wa, wa tɛ gur hɔ̧ɔ̧ na, ɓɛɛ see GASA WAN nyim zu wa, ɓɛɛ a̧ pi̧ zɛɛ-geŋa mgbara wa.

³⁴Nɛ mɔ'ɔ nɛ wa saa nin fara'i'e Kibrot-Taawa, wen nɛ tɔ̧ «Pɛsi Aa-see-mɔ», wen wa guna o wi-a-see-mɔ hi̧i̧ nɛ dɔka-a.

³⁵O bíí kura Kibrot-Taawa yak si Hasɛrot; ɓɛɛ wa ya hi̧i̧.