Read Northwest Gbaya TƆRA-BÍÍ 12 Bible Online

TƆRA-BÍÍ 12 - Northwest Gbaya bible

TƆRA-BÍÍ 12

¹Moisɛ baa so nɛ zɔŋa Kus nɛ kóò, ɓɛɛ nɛ mɔ'ɔ nɛ Mariama in Arɔŋ kaia ndaa-a wen zu baa-ŋmaa kɔ-wa'i.

²Wa tɔ̧a̧: «Wi nɛ GASA WAN tɔ̧ɔ̧ wen in a̧, kànà nɛ́ Moisɛ ɓɛɛ nde? Bo nɛ a̧ tɔ̧ɔ̧ wen in yɛɛ mbɛt na nde?» Ɓɛɛ GASA WAN zii wen'i.

³Moisɛ duka so nɛ́ ŋma wi-mɔka-see gan o bíí zu nù'ɛ lɛŋ.

⁴Ahai GASA WAN saa Moisɛ, Arɔŋ in Mariama ɓɛɛ tɔ̧: «Ɛ̀nɛ̀ nɛ́ si nú Tua-kpa-ŋmaa», ɓɛɛ wa nɛ si hi̧i̧ wa taar lɛŋ.

⁵GASA WAN zira nɛ tɛ tura-zan, ɓɛɛ yor nú tua. A̧ saa Arɔŋ in Mariama, ɓɛɛ wa yiitoo lɛŋ ɗɔŋ pii ti.

⁶A̧ tɔ̧a̧: «Ɛ̀nɛ̀ zíí wen n'am tɔ̧ h’ɛ́nɛ́‘i nɛ de-a. Kà ŋma bíí mgbara'nɛ́ duk nɛ wi-tɔ̧-wen oi nú‘m, mi hɔ nɛ zu ha̧ a̧, ɓɛɛ nɛ́ sɛn tɛ hɔɔ-zu a̧‘m tɔ̧ nɛ wen ha̧ a̧.

⁷Ɓɛɛ war ko Moisɛ, wi-de-tom kɔ‘m n'am ee mɔɔ-kɔ̧-tua kɔ‘m lɛŋ er-a, bo hegɔ na.

⁸Mi tɔ̧ wen ha̧ a̧ nɛ hee ger, ɓɛɛ mi dee ha̧ a̧ mɛ zɔk am; mi hu̧si yí-wen nɛ a̧ na. A̧ zɔka kiitɛ‘m; hee ge n’ɛnɛ tɛ kai ndaa Moisɛ, wi-de-tom kɔ‘m ge?»

⁹See GASA WAN nyima in wa nyɛmna, ɓɛɛ a̧ yak e wa duk.

¹⁰Tura-zan yuu zu tua, ɓɛɛ soɓee, tɛ Mariama kpee nɛ zɛɛ doko kaɗi; tɛ-a lɛŋ kifa nɛ bu-a hee ɓɔrɔ ga. Arɔŋ zika tɛ ɓɛɛ zɔk'e, doko baa Mariama.

¹¹Arɔŋ tɔ̧ɔ̧ ha̧ Moisɛ: «Nyaa, k’ɛ́nɛ́ de ha̧ ɗaŋmɔ n’ɛɛ dea mɛ tik zu yɛ na; ɛɛ nɛ o wi nɛ ta mɔ na, ɛɛ nɛ o ɗaŋwi.

¹²Ká Mariama duk hee hɔɔ-bem nɛ ŋma war-tɛ-a ɗaŋa ɗaŋ ŋgimbi nɛ wa koo nɛ a̧ ga na.»

¹³Moisɛ kɔfa GASA WAN, ɓɛɛ tɔ̧: «Ho! Sɔ̧, ɛ̀nɛ̀ kpás'a na nde?»

¹⁴Ɓɛɛ GASA WAN tɔ̧ ha̧ Moisɛ: «Kà bo so nɛ dáà kɔ̧-a̧ a̧ mboɗa sap a yí-a, bo nɛ ziimɔ tɛɛ́ ba a̧ tɛ zɛ mɔɔrɔ-ɗoŋ-yiitoo na nde? Wa a̧ ba a̧ nɛnɛ ɗoŋ gbagari, ha̧ a̧ duk hi̧i̧ zɛ mɔɔrɔ-ɗoŋ-yiitoo kaɗi, sɛka a̧ pia ɗoŋ.»

¹⁵Wa foo Mariama e ɗoŋ ye tɛ zɛ mɔɔrɔ-ɗoŋ-yiitoo, ɓɛɛ o bíí gbin yak na hɔ ŋgimbi n'aa pia nɛ ɗoŋ.

¹⁶Ɗoŋ mɔ‘i, o bíí gbina nɛ Haserot yak si ŋga-gbárà Paraŋ.