Read Northwest Gbaya TƆRA-BÍÍ 14 Bible Online

TƆRA-BÍÍ 14 - Northwest Gbaya bible

TƆRA-BÍÍ 14

¹O bíí lɛŋ ku̧u̧ naŋ hiɗa mɔ. Wa yaa tɛ hi̧a̧ kɔ̧a̧ zɛzɛzɛ mɔ sa̧ nɛnɛ.

²O be Israɛl lɛŋ kpaa ɗaŋsee zu Moisɛ in Arɔŋ, ɓɛɛ wa tɔ̧ ha̧ wa: «Gana so ɛ̀ɛ̀ fé sɛn Egiptɛ mɛ, kóó sɛn ŋga-gbárà'ɛ.

³Wen ge sa GASA WAN mgbɔ ɛɛ nɛnɛ tɛ nù'ɛ h’ɛ́ɛ́ mɛ fe ɗɔɔ gba-paa ge? O wisɛn tɛ kai o kóò k’ɛɛ in o bem k’ɛɛ, ɓɛɛ bo nɛ gana so h’ɛ́ɛ́ mɛ si ɗoŋ sɛn nú Egiptɛ mɛ na nde?»

⁴Wa tɔ̧ɔ̧ nɛ nú ŋmaa: «Ɛ̀ɛ̀ hók ŋma wan nɛ tɛ duk zu yɛ, ɓɛɛ ɛ̀ɛ̀ sí ɗoŋ si Egiptɛ.»

⁵Moisɛ in Arɔŋ hɔ̧fa̧ tik nù sɛn ti gii be Israɛl lɛŋ nɛ mɔi̧a.

⁶Josue bem ko Nun in Kalɛb bem ko Yefunɛ nɛ yaa so mgbara o wi-kpe-naŋ-mɔ nɔ‘i a̧ka̧ laa yinɛ tɛ.

⁷Wa tɔ̧ɔ̧ ha̧ o gii be Israɛl lɛŋ: «Nù n’ɛɛ yara sɛnɛ kpe nɛ naŋ-a'i nɛ de nù nyɛmna.

⁸Kà GASA WAN nɛ yora ɗoŋ yɛ, a̧ tɛ de h’ɛ́ɛ́ mɛ ye tɛ nù‘i; a̧ tɛ ha̧ nù‘i h’ɛ́ɛ́. Nɛ́ nù nɛ yibere in gɔrɔ fok fok sɛnɛ.

⁹K’ɛ́nɛ́ de ŋgazu in GASA WAN na; k’ɛ́nɛ́ yu o bíí nù‘i na. Ɛɛ tɛ de ŋmaa in wa war kpɔk ɓɛɛ. Wi zɔk géé zɔka gi̧ɔ̧ sɔ̧ kɔ-wa na, ɓɛɛ k’ɛɛ, GASA WAN a̧a̧ in yɛɛ. K’ɛ́nɛ́ yu wa na!»

¹⁰O bíí lɛŋ kɔ̧ɔ̧ so kɔ‘i mɛ yo nɛ wa nɛ ta, ɓɛɛ gasamɔ ko GASA WAN zir duk zu Tua-kpa-ŋmaa nɛ gbaayí-wa lɛŋ.

¹¹GASA WAN tɔ̧ɔ̧ ha̧ Moisɛ: «O wi nɔ'ɔ tɛ e bɔɔ zɔka'm hee geemɔ ga duk mɛ gese ge? Nɛ́ mɛ gese ge a̧ wa tɛ e nɛ ta nɛ‘m tɛ o gasamɔ nɛ‘m dee ha̧ wa’ɛ ge?

¹²Mi tɛ pi̧ ŋga-zɛɛ tɛ-wa, wa beka kpa mɔɔ-oi kɔ-wa ɓɔna, ɓɛɛ mi tɛ de ha̧ mɛ mɛ kifi gasa dukbíí gan wa.»

¹³Moisɛ kifa nú ha̧ GASA WAN: «O be Egiptɛ iŋa'e nɛ́ ŋgai k’ɛ́nɛ́ a̧ gboo dukbíí k’ɛ́nɛ́ er-wi,

¹⁴ɓɛɛ wa tɔ̧ nyɛrɛ-a ha̧ o bíí nù'ɛ. Nɛ mɔ'ɔ nɛ o wi nɔ'ɔ iŋa'e, ɛnɛ a̧a̧ mgbara dukbíí k’ɛ́nɛ́. Wa iŋa'e ɛnɛ GASA WAN, ɛnɛ usi tɛ‘nɛ́ usi ha̧ o bíí k’ɛ́nɛ́. Nɛ̀ wese, ɓɛɛ ɛnɛ nɛ tɛ‘nɛ́ ɛnɛ yaka ti ha̧ wa tɛ tura-zan; ɓɛɛ nɛ̀ zɛ, ɛnɛ duka ti ha̧ wa tɛ wee.

¹⁵K’ɛ̀nɛ̀ de ha̧ dukbíí nɔ'ɔ mɛ kum hee kpɔk bíí ga, o bíí nɛ tɛ zii hu̧ra nin'nɛ́ tɛ tɔ̧:

¹⁶‹GASA WAN gbɛɛ wa lɛŋ ŋga-gbárà, wen a̧ nyɛm so mɛ de ha̧ wa mɛ ye tɛ nù n'aa kana so mɔ‘e nde, wi tɛ ha̧ ha̧ wa'i na.›

¹⁷Mi ai nú h’ɛ́nɛ́ kinii, ɛ̀nɛ̀ úsí ŋgai k’ɛ́nɛ́ hee mɔ'ɔ n’ɛnɛ baa tɔ̧ so'e,

¹⁸wi nɛ GASA WAN, nɛ see nyim nɛ haya-a na, nɛ yor ɗoŋ ha̧a̧nú kɔ‘i yor, in nɛ e yɔɔ-kaya in ŋgazu ko o bíí ha̧ wa; mɔ kpɔk, wi e ŋma ɗaŋmɔ yak géè na; wi e o bem in o bezaŋ ɗoŋ ŋmaa taar in naar géè na wen ɗaŋmɔ ko o dáà kɔ-wa.

¹⁹Hegɔ, ɛ̀nɛ̀ é ɗaŋmɔ ko o bíí nɔ'ɔ ha̧ wa nyɛm nɛ ɗoŋ gasa kɔ̧ɔ̧mɔ k’ɛ́nɛ́, hee mɔ'ɔ n’ɛnɛ ee nɛ ɗaŋmɔ ha̧ wa nɛ̀ Egiptɛ hɔ hɛ̧ɛ̧ ga.»

²⁰GASA WAN kifa nú: «Mi ee ɗaŋmɔ kɔ-wa ha̧ wa hee mɔ'ɔ nɛ mɛ aka ga.

²¹Mɔ kpɔk, o kpar-wi nɔ'ɔ zɔka gasamɔ kɔ‘m in ŋgamɔ lɛŋ n'am dee so sɛn Egiptɛ in sɛn ŋga-gbárà; ɓɛɛ nɛ mɔ'ɔ nɛ wa wea'm war ɓu yak kaɗi, wa zii wen kɔ‘m na mbɛt. Tɛ mɔ‘i, hee mɔ'ɔ n'am duk kpasa ga, in hee mɔ'ɔ nɛ gasamɔ kɔ‘m duna zaŋnu ga,

²³mi kana mɔ, ŋma bíí kpɔk mgbara wa beka hɔ tɛ nù n'am ha̧a̧ so nú wen ha̧a̧ ha̧ o daa kɔ-wa na. Ŋma bíí kpɔk mgbara o wi nɔ'ɔ nɛ ee so'm tɛ geemɔ beka hɔ hi̧i̧ na.

²⁴Ɓɛɛ war ko Kalɛb, wi-de-tom kɔ‘m nɛ̀ taamɔ kɔ̧-a̧ duk nɛtɛ, nɛ̀ ník naŋ tɛ mboo zu ha̧‘m na, mi tɛ de ha̧ a̧ mɛ hɔ tɛ nù n'aa nɛɛ hɔ sɛnɛ, ɓɛɛ o bezaŋ-aa tɛ ba nù‘i.

²⁵War ko o be Amalɛk in o be Kanaŋ, wa tɛ ɔ kɔ-wa tɛ bɔkɔ-nù. Mɛ sa̧a̧mɔ, ɛ̀nɛ̀ kífí tɛ‘nɛ́ nɛ war ŋga-gbárà sinɛ̀ ɗoŋ si ká̧ Gbɛ̧ gba-tɔp.»

²⁶GASA WAN tɔ̧ɔ̧ ha̧ Moisɛ in Arɔŋ:

²⁷«Mi zia ku̧i̧amɔ ko o ɗaŋ duk be Israɛl nɔ'ɔ nɛ wa ku̧i̧ pii tɛ‘m. Ku̧i̧amɔ nɛ wa ku̧i̧ ndekeli nɛ̀‘m'i tɛ kaɗi bɔɔ mɛ gese ge?

²⁸Mɛ̀ tɔ̧́ ha̧ wa, mi kana mɔ, hee mɔ'ɔ n'am duk kpasa ga, mi tɛ de mɔ in wa nyɛm nɛ ɗoŋ mɔ nɛ wa tɔ̧a̧ n'am zia.

²⁹O wɔr-wa tɛ a nù ŋga-gbárà hɛ̧ɛ̧, wen wa dee ŋgazu in am. Mɛ̀ nɛ́ o bíí lɛŋ nɛ wa tɔra so nɛ a̧a̧ nɛ pɛ ɓu-yiitoo in o wan nɛ gana mbɛt.

³⁰Mi kana mɔ, wa beka hɔ tɛ nù n'am kana so mɔ mɛ a wa sɛnɛ na. Nɛ́ Kalɛb bem ko Yefunɛ in Josue bem ko Nun a̧ tɛ hɔ hi̧i̧ ɓɛɛ.

³¹War ko o bezaŋ‘nɛ́ n’ɛnɛ tɔ̧ɔ̧ so'e wa tɛ kai wa nɛ bara'i, mi tɛ mgbɔ wa hɔ hi̧i̧. Nɛ́ wa a̧ tɛ iŋ nù‘i n’ɛnɛ kɔ̧ so k’ɛ́nɛ́ na'i.

³²Ɓɛɛ nɛ̀ war k’ɛ́nɛ́, o wɔr'nɛ́ tɛ a nù ŋga-gbárà hɛ̧ɛ̧.

³³O bezaŋ‘nɛ́ tɛ dai mɔ nɛnɛ nɛ ŋga-gbárà tɛ pɛ ɓu-naar. Nɛ́ wa a̧ tɛ tui bɔnɛ oi ɗaŋmɔ k’ɛ́nɛ́, hɔ ŋgimbi nɛ wɔr'nɛ́ lɛŋ tɛ a nù ŋga-gbárà'ɛ.

³⁴Hee mɔ'ɔ nɛ naŋanɔ-kpe-naŋ-mɔ k’ɛ́nɛ́ dee nɛ zɛ ɓu-naar ga, nɛ́ hegɔ ɛ̀nɛ̀ tɛ ya nɛnɛ zaŋ bɔnɛ ɗaŋmɔ k’ɛ́nɛ́ tɛ pɛ ɓu-naar, kà be de k’ɛ́nɛ́ iŋa nɛ sii kafɛ in am.

³⁵Mi GASA WAN, mi tɔ̧ɔ̧ kɔ‘m kaɗi, mi kana mɔ, nɛ́ hegɔ a̧‘m tɛ de nɛnɛ in ɗaŋ dukbíí'ɛ nɛ dee ŋgazu in am’ɛ. Wa tɛ kum mɛ kum kaɗi sɛn ŋga-gbárà'ɛ.»

³⁶War ko o wi nɛ Moisɛ toma so mɛ kpe naŋ mɔ nɛ pia ɗoŋ, we nɛ ɗoŋ ɗaŋmɔ nɛ wa zɔka tɛ nù‘i, ɓɛɛ ká de ha̧ o dukbíí mɛ kur zu Moisɛ‘i,

³⁷o wi-ŋga-see nɔ‘i nɛ tɔ̧ɔ̧ ɗaŋ wen zu nù‘i, kpaa ŋga fio fe ti GASA WAN nɛ bu wese.

³⁸Mgbara o wi nɛ nɛɛ kpe naŋ mɔ, nɛ́ Josue bem ko Nun, in Kalɛb bem ko Yefunɛ a̧ ɓɔna kpasa.

³⁹Moisɛ baa wen'i tɔ̧ ha̧ o be Israɛl, ɓɛɛ wa ku̧ naŋ zima mɔ.

⁴⁰Mɔ sa̧a̧ mɛ tutuyɛ, wa daŋa si mgbara kaya, ɓɛɛ wa tɔ̧: «Ɛɛ nɛ mɔ'ɔ! Ɛɛ tɛ daŋ si fara nɛ GASA WAN usa. Nɛ́ kpasawen, ɛɛ dee ɗaŋmɔ.»

⁴¹Nɛ mɔ'ɔ nɛ Moisɛ aka mɔ: «Nɛ́ ge ɛ̀nɛ̀ de hi̧i̧ ge? Ɛnɛ nyar nɛ ndaa-wen ko GASA WAN. Mɔ‘i beka gbak na.

⁴²K’ɛ́nɛ́ daŋ si hi̧i̧ na, wen GASA WAN bo mgbara'nɛ́ na. K’ɛ́nɛ́ de ha̧ o wisɛn k’ɛ́nɛ́ mɛ bi'nɛ́ na.

⁴³O be Amalɛk in o be Kanaŋ a̧a̧ ti'nɛ́‘i, wa tɛ kum'nɛ́ nɛ gba-paa. Hee mɔ'ɔ n’ɛnɛ ee nɛɛ ɗoŋ GASA WAN duk ga, a̧ beka nɛ in'nɛ̀ɛ́ na.»

⁴⁴Wa kɔna ŋguɗi-wa, ɓɛɛ wa daŋ si mgbara kaya, ká Kuɓa nɔɔ-tɔk ko GASA WAN in Moisɛ ɓɔna kɔ‘i kɔ̧ gbagari.

⁴⁵Nɛ mɔ'ɔ nɛ o be Amalɛk in o be Kanaŋ nɛ ɔɔ so mgbara kaya'i zira tɛnɛ, de ŋmaa in wa, ɓɛɛ ndak wa hɔ nɛnɛ Ɔrma.