Read Northwest Gbaya TƆRA-BÍÍ 16 Bible Online

TƆRA-BÍÍ 16 - Northwest Gbaya bible

TƆRA-BÍÍ 16

¹Kore bem ko Yisɛhar, be-koo Kehat, be Levii aa wen ha̧ Dataŋ in ha̧ Abiram bem ko Eliat, in ha̧ Ɔn, bem ko Pɛlɛt; wa taar'i lɛŋ nɛ o bezaŋ Rubɛn.

²Nɛ mɔ'ɔ nɛ wa in o be Israɛl gɔmŋmaa-yiitoo-nɛ-ɓu-mɔɔrɔ kura zu Moisɛ. O wi nɔ‘i nɛ o gasawi in o wi-ba-keta zu o bíí. Wa nɛ o bíí nɛ a̧a̧ so nɛ hu̧ra-nin.

³Wa mɔi̧a ŋmaa nɛ gii, ɓɛɛ tɛɛ tɔ̧ ha̧ Moisɛ: «K’ɛ́nɛ́ n’ɛnɛ de’ɛ za̧i̧a̧! O wi nɔ'ɔ ɔ sa̧a̧ lɛŋ, wen GASA WAN duk mgbara wa; ɓɛɛ nɛ̀ k’ɛ́nɛ́ nɛ́ o'o ee'nɛ́ mɛ duk zu wa o?»

⁴Moisɛ zia wen'i, ba yí gu nù,

⁵ɓɛɛ a̧ tɔ̧ wen ha̧ Kore in o bíí kɔ̧-a̧ lɛŋ hee mɔ'ɔ ga: «Sa̧a̧mɔ, GASA WAN tɛ usi wi nɛ duk nɛ́ kɔ̧-a̧, wi nɛ ɔ sa̧a̧ in wi nɛ nyɛma mɛ ɗɔŋ si katɛ a̧. Wi n'aa tɛ hok'i, nɛ́ wi nɛ tɛ ɗɔŋ si katɛ a̧.

⁶Mɔ n’ɛnɛ tɛ de nɛ mɔ'ɔ: Kore in o bíí kɔ‘i, ɛ̀nɛ̀ kíí o mɔɔ-a-kɛ̧i̧-wee.

⁷Mɛ sa̧a̧mɔ, ɛnɛ tɛ a kɛ̧i̧-wee kɔ̧ a̧, ɓɛɛ ɛnɛ aa fuu-nyama zu a̧ ti GASA WAN, ɓɛɛ wi nɛ GASA WAN tɛ hok, nɛ wi’ɛi a̧ duk nɛ sa̧a̧-a̧. Ɛnɛ dee mɔ za̧i̧, ɛnɛ o be Levii!»

⁸Moisɛ tɔ̧ɔ̧ ha̧ Kore woyo: «O be Levii, ɛnɛ zii!

⁹GASA WAN hoka'nɛ mgbara o dɔka bíí e nɛtɛ h’ɛ́nɛ́ mɛ nɛ si katɛ a̧, h’ɛ́nɛ́ mɛ de tom kɔ̧ tua kɔ̧-a̧, h’ɛ́nɛ́ mɛ duk oi nú bíí lɛŋ, ŋgimbi n’ɛnɛ tɛ wor nɛ sɔ̧ oi nú wa; mɔ‘i nyɛm'nɛ́ na nde?

¹⁰A̧ kpɛka h’ɛ́nɛ́ mɛ ɗɔŋ pii katɛ a̧, mɛ in o nya-mɛ; nɛ mɔ'ɔ n’ɛnɛ kɔ̧ɔ̧ mɛ duk nɛ wi-ɗafi-sɔ̧.

¹¹Nɛ́ hegɔ sa mɛ in o bíí kɔ-mɛ de ŋgazu in GASA WAN! Arɔŋ nɛ ge bíí ge s’ɛnɛ ku̧i̧ a̧ ge?»

¹²Moisɛ saa Dataŋ in Abiram, o bem ko Eliab, ɓɛɛ wa kifi nú: «Ɛɛ beka nɛ́ k’ɛɛ na.

¹³Mɛ dee so h’ɛ́ɛ́ mɛ e de fara nɛ nɔ̧́-gɔrɔ in yibere fok sɛnɛ duk mɛ́ tɛ̀ɛ́ fe sɛn ŋga-gbárà hɛ̧ɛ̧; mɔ‘i tɛ nyɛm tɛ mɛ na, sa mɛ kɔ̧ɔ̧ mɛ ɔ wan zu yɛ woyo nde?

¹⁴Bo nɛ mɛ mgbɔ nɛ ɛɛ sitɛ nù nɛ nɔ̧́-gɔrɔ in yibere fok sɛnɛ na. Bo nɛ mɛ ha̧a̧ nɛ fɔ waya-nyak-dɔ̧ɔ̧ nɛ mɔɔ-oi h’ɛ́ɛ́ na. Mɛ tɔ̧ kɔ-mɛ‘e, wi nɔ'ɔ zɔk mɔ na? K’ɛɛ, ɛɛ beka nɛ na.»

¹⁵See Moisɛ nyima, ɓɛɛ tɔ̧ ha̧ GASA WAN: «K’ɛ́nɛ́ kpɛk ha̧a̧mɔ kɔ-wa na. Mi de kɔ‘m ŋma ɗaŋmɔ in wa na, kà bó nɛ̀ baa ŋma tuifuu kɔ-wa na mbɛt.»

¹⁶Moisɛ tɔ̧ɔ̧ ha̧ Kore: «Mɛ in o bíí kɔ-mɛ lɛŋ, ká bá nɛ̀ Arɔŋ, ɛ̀nɛ̀ tɛ́ mɛ sa̧a̧mɔ mɛ yor ti GASA WAN.

¹⁷Kóó o ndé a̧ ba mɔɔ-a-kɛ̧i̧-wee kɔ‘i tɛnɛ, ɛ̀nɛ̀ á fuu-nyama zu a̧, ɓɛɛ kóó o ndé a̧ ba tɛnɛ e ti GASA WAN; mɛ nɛ wen nɛ tɔ̧‘e, mɔɔ-a-kɛ̧i̧-wee gɔmŋmaa-yiitoo-nɛ-ɓu-mɔɔrɔ. Mɛ in Arɔŋ, ɛ̀nɛ̀ bá mɔɔ-a-kɛ̧i̧-wee k’ɛ́nɛ́ tɛnɛ mbɛt.»

¹⁸Nɛ mɔ'ɔ nɛ o nde baa mɔɔ-a-kɛ̧i̧-wee kɔ‘i tɛnɛ, e wee sɛnɛ, a fuu-nyama zu a̧, ɓɛɛ tɛ́ɛ̀ yor ti GASA WAN sɛn nú Tua-kpa-ŋmaa; Moisɛ in Arɔŋ baa kɔ‘i tɛnɛ mbɛt.

¹⁹Kore mɔi̧a o bíí kɔ‘i lɛŋ, gbìsì nú Tua-kpa-ŋmaa, ɓɛɛ o bíí lɛŋ zɔk gasamɔ ko GASA WAN.

²⁰GASA WAN tɔ̧ɔ̧ ha̧ Moisɛ in Arɔŋ:

²¹«Ɛ̀nɛ̀ yú mgbara o wi nɔ'ɔ, wen mi tɛ ɗaŋ wa yinɛ kinii.»

²²Moisɛ in Arɔŋ guu nù ti GASA WAN, ɓɛɛ wa tɔ̧: «Sɔ̧, ɛ́nɛ́, nɛ̀ ɔmi ko mɔ lɛŋ duk er'nɛ́, see'nɛ́ tɛ nyim in bíí lɛŋ wen zu ɗaŋmɔ ko kpɔk bíí nde?»

²³GASA WAN kifa nú ha̧ Moisɛ:

²⁴«Mɛ̀ tɔ̧́ ha̧ wi nɔ'ɔ mɛ yu fara ko Kore, Dataŋ in Abiram.»

²⁵Moisɛ kura nɛ́ɛ̀ kpa Dataŋ in Abiram, ɓɛɛ o gasawi Israɛl gbin a ɗoŋ-aa.

²⁶Moisɛ tɔ̧ɔ̧ ha̧ dukbíí: «Ɛ̀nɛ̀ yá nyɛi̧ nɛ fara ko o wi-ŋgazu nɔ'ɔ; k’ɛ́nɛ́ fo ŋma mɔ kɔ-wa na, wen k’ɛ́nɛ́ tɛɛ kum wen ɗaŋmɔ kɔ-wa.»

²⁷Nɛ mɔ'ɔ nɛ o bíí ɗɔŋa si ɗoŋ, e fara ko Kore, Dataŋ in Abiram nɛ nyɛi̧a-a. Dataŋ in Abiram gboo so ya nú tua-laa in o kóò kɔ-wa, o bem kɔ-wa gu nɛ o be-koo wa lɛŋ.

²⁸Ɓɛɛ Moisɛ tɔ̧: «Tɛ mɔ'ɔ, ɛnɛ tɛ iŋ ndé, bo nɛ mi de nɛ mɔ nɛ zu'm na; mi de nɛ mɔ nɛ GASA WAN toma'm tɛnɛ mɛ de.

²⁹Kà o wi nɔ'ɔ nɛ́ fee nɛ́ géé fio kɔ-wa, hee mɔ'ɔ nɛ bíí lɛŋ fe nɛnɛ'ɛ ga, ɓɛɛ bo nɛ GASA WAN á̧ toma'm na.

³⁰Ɓɛɛ kà GASA WAN nɛ́ dee ŋma ŋgamɔ, kà nù hu̧i̧, nù gúr wa, wa in o mɔ kɔ-wa lɛŋ, kà wa zir nɛ kpasa si fara ko o fio mɛ, ɓɛɛ ɛnɛ tɛ iŋ ndé, o wi nɔ'ɔ ee so GASA WAN tɛ geemɔ.»

³¹Moisɛ tɛ kaɗi so tɔ̧ɔ̧ wen na, ɓɛɛ nù mbaŋ ɗɔɔ naŋ-wa,

³²gur wa in o bíí kɔ-wa lɛŋ, ká bá nɛ̀ o bíí ko Kore gu nɛ mɔ kɔ-wa lɛŋ.

³³Wa zira nɛ zu kpasa si fara ko o fio mɛ, wa in o mɔ kɔ-wa lɛŋ, ɓɛɛ nù kpe zu wa lɛŋ, wa bo mgbara bíí ɓɔna.

³⁴O be Israɛl lɛŋ nɛ yaa so katɛ wa yuu mɔ yak tɛ hiɗimɔ ko wi nɔ‘i; wa tɔ̧a̧: «Ɛ̀ɛ̀ yú mɔ yak, wen ká nù tɛɛ gur yɛ.»

³⁵Nɛ mɔ'ɔ nɛ GASA WAN toma wee tɛnɛ, ɓɛɛ dɔ o bíí gɔmŋmaa-yiitoo-nɛ-ɓu-mɔɔrɔ lɛŋ nɛ duka so dɔ nɛ fuu-nyama'i.