Read Northwest Gbaya TƆRA-BÍÍ 17 Bible Online

TƆRA-BÍÍ 17 - Northwest Gbaya bible

TƆRA-BÍÍ 17

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ wi-ɗafi-sɔ̧ Eleazar bem ko Arɔŋ ndé, a̧ a̧ kai mɔɔ-a-kɛ̧i̧-wee yí wee yinɛ wen wa ɔ sa̧a̧, ɓɛɛ a̧ a̧ yai wee yinɛ nɛ nyɛi̧a-a.

³Wa a̧ kai mɔɔ-a o kɛ̧i̧-wee ko o wi nɛ fee wen ɗaŋmɔ kɔ-wa, gusi ndaɗa-ndaɗa wen kpea-a nɛ zu fara-ɗafi-sɔ̧, wen wi ee so wa ti GASA WAN kaɗi, wa ya nɛ sa̧a̧-a̧. Ɓɛɛ mɔ‘i tɛ duk nɛ mɔɔ-usi-mɔ wen o be Israɛl.»

⁴Wi-ɗafi-sɔ̧ Eleazar kaia o mɔɔ-a-kɛ̧i̧-wee nɛ‘i dee nɛ ndɛrɛ, nɛ o bíí nɛ bia so wee ee ti GASA WAN'i, ɓɛɛ a̧ gusi ndaɗa-ndaɗa mɛ kpe nɛ zu fara-ɗafi-sɔ̧.

⁵Mɔ‘i tɛ duk nɛ mɔɔ-mbaŋ tɛ o be Israɛl, wen ká ŋma géé bíí nɛ̀ bó nɛ́ bezaŋ Arɔŋ na tɛɛ ɗɔŋ pii ti GASA WAN, mɛ dɔ fuu-nyama ha̧ a̧; mɔ‘i, wen ká mɔ nɛ̀ kpaa so Kore in o bíí kɔ‘i, tɛɛ kpa wa, hee mɔ'ɔ nɛ GASA WAN baa tɔ̧ so nɛ nú Moisɛ ga.

⁶Mɔ sa̧a̧, ɓɛɛ o be Israɛl ku̧i̧ mɔ zu Arɔŋ in Moisɛ. Wa tɔ̧a̧: «Ɛnɛ dee ha̧ o bíí ko GASA WAN mɛ fe lɛŋ.»

⁷Ŋgimbi nɛ o bíí kura zu Moisɛ in Arɔŋ, Moisɛ in Arɔŋ zika tɛ sitɛ Tua-kpa-ŋmaa, ɓɛɛ wa zɔk tura-zan nɛ kpee zu tua; wa zɔka gasamɔ ko GASA WAN.

⁸Wa nɛɛ si nú Tua-kpa-ŋmaa,

⁹ɓɛɛ GASA WAN tɔ̧ ha̧ Moisɛ:

¹⁰«Ɛ̀nɛ̀ yú mgbara o wi nɔ'ɔ, wen mi tɛ kum wa yinɛ kinii.» Wa tika nù ba yí-wa gu nù ti GASA WAN,

¹¹ɓɛɛ Moisɛ tɔ̧ ha̧ Arɔŋ: «Mɛ̀ bá mɔɔ-a-kɛ̧i̧-wee sɛnɛ, mɛ̀ nɛ́ nɛ̀ haya-a sitɛ o bíí, ɓɛɛ mɛ̀ dé do-mɔ nɛ usi ea-ɗaŋmɔ zu wa, wen see GASA WAN duia kaɗi. Ŋgamɔ tika nù kaɗi.»

¹²Arɔŋ baa mɔ‘i hee mɔ'ɔ nɛ Moisɛ tɔ̧ɔ̧ ha̧ a̧ ga, ɓɛɛ ye mgbara o bíí, ká ŋgamɔ ku̧u̧ naŋ kpaa o ŋma bíí mgbara o bíí kaɗi. A̧ aa fuu-nyama tɛ wee, ɓɛɛ a̧ de do-mɔ nɛ usi ea-ɗaŋmɔ zu o bíí.

¹³A̧ nɛɛ yor mgbara o wɔr in o bíí nɛ tɛ fe na, ɓɛɛ ŋgamɔ‘i kaɗi.

¹⁴Bíí lɛŋ nɛ fea nɛ bíí booro-ɓu-zua-naar-nɛ-gɔmŋmaa-mɔɔrɔ-ɗoŋ-yiitoo wi tɔr o wan nɛ fea ŋgimbi ko Kore na.

¹⁵Ɓɛɛ Arɔŋ pii ɗoŋ tɛɛ kpa Moisɛ sɛn nú Tua-kpa-ŋmaa, ká ŋgamɔ‘i kaɗa kaɗi.

¹⁶GASA WAN tɔ̧ɔ̧ ha̧ Moisɛ:

¹⁷«Mɛ̀ tɔ̧́ ha̧ o be Israɛl ndé, o bíí tɛ zuduk kpɔk kpɔk a̧ ha̧ dɔra ha̧ mɛ. O gasawi ko o zuduk lɛŋ a̧ ha̧ dɔra kpɔk kpɔk ha̧ mɛ; o dɔra nɔ‘i lɛŋ nɛ ɓu-zua-yiitoo. Mɛ tɛ yɔr nin-wa kpɔk kpɔk, kóó o ndé tɛ dɔra kɔ‘i.

¹⁸Mɛ tɛ yɔr nin Arɔŋ tɛ dɔra ko zuduk ko Levii, wen dɔra kpɔk tɛ duk wen gasawi tɛ zuduk kpɔk.

¹⁹Mɛ tɛ kai o dɔra nɛ́ɛ̀ a nú Tua-kpa-ŋmaa ti Kuɓa nɔɔ-tɔk sɛn fara n'am kpa ŋmaa in'nɛ̀ɛ́ sɛnɛ.

²⁰Wi nɛ dɔra kɔ̧-a̧ tɛ ɓɔ, nɛ́ wi’ɛi a̧‘m hoka. Hegɔ, mi tɛ fo ku̧i̧amɔ ko o be Israɛl yinɛ zu'nɛ́.»

²¹Moisɛ tɔ̧ɔ̧ wen'i ha̧ o be Israɛl, ɓɛɛ o gasawi lɛŋ ha̧ dɔra ha̧ a̧. Gasawi kpɔk kpɔk ha̧a̧ dɔra kpɔk kpɔk, wen nɛ tɔ̧ dɔra ɓu-zua-yiitoo. Dɔra ko Arɔŋ a̧a̧ so kànà mgbara o dɔka dɔra nɔ‘i mbɛt.

²²Ɓɛɛ Moisɛ kai o dɔra nɔ‘i a ti GASA WAN sɛn kɔ̧ Tua-kpa-ŋmaa fara nɛ Kuɓa nɔɔ-tɔk duk sɛnɛ.

²³Mɛ sa̧a̧mɔ, Moisɛ yee kɔ̧ tua fara nɛ Kuɓa nɔɔ-tɔk duk sɛnɛ; a̧ zɔka nɛ́ dɔra ko Arɔŋ tɛ zuduk ko Levii a̧ ɓɔa. Dɔ́rá‘i ɓɔa, doa, wai, ɓɛɛ waya'i[3] gbɛ̧.

²⁴Moisɛ kaia o dɔra nɔ‘i ti GASA WAN gbonɛ mɛ usi ha̧ o be Israɛl lɛŋ. Wa zɔka, ɓɛɛ kóó o ndé ba dɔra kɔ‘i.

²⁵Ɓɛɛ GASA WAN tɔ̧ ha̧ Moisɛ: «Mɛ̀ bá dɔra ko Arɔŋ e ti Kuɓa nɔɔ-tɔk, ha̧ a̧ mɛ duk hi̧i̧ hee mɔɔ-usi-mɔ ga ha̧ o wi-de-ŋgazu. Hegɔ‘i, mɛ tɛ de ha̧ o be Israɛl mɛ kaɗi ku̧i̧a mɔ zu'm, ɓɛɛ wa beka fe wen ku̧i̧amɔ ɓɔna.»

²⁶Ɓɛɛ Moisɛ de hee mɔ'ɔ nɛ GASA WAN tɔ̧ɔ̧ ha̧ a̧ ga.

²⁷O be Israɛl tɔ̧ɔ̧ ha̧ Moisɛ: «Mɛ zɔk! Ɛɛ fee lɛŋ, ɛɛ kuma kaɗi!

²⁸Bíí lɛŋ nɛ nɛ́ si ká̧ fara-duk ko GASA WAN nɛ́ mɔ'ɔ nɛ fe fee’ɛ! Ɛɛ tɛ kum kànà lɛŋ a nù nde?»